• ×
الأربعاء 4 أغسطس 2021 | 08-03-2021
محمد عبدالماجد

مطر لابسة (سفنجات) خدر

محمد عبدالماجد

 0  0  2010
محمد عبدالماجد
صابنها | محمد عبدالماجد | مطر لابسة (سفنجات) خدر
______________________
الحصة الصباحية
ممكن تتلخبط في السكر والملح – في اللون – في الشكل – في (العلبة) – علبة الملح بتكون نفس (علبة) السكر.
لكن اصلو ما ممكن تتلخبط في (الطعم).
السكر طعمو براهو – والملح طعمو براهو – عشان تبقوا عارفين بس.
…………
• كان عمنا ود السردوب – زول صعب – وما بتفاهم – قهوتو بيشربها مرة …وما بتنيها.
• زول صعب شديد..ما اظن حضر ليه في يوم (حصة رياضيات) او وقف في الباب منتظر (سيد اللبن).
• زول جنب.
• اعملوا شير.
• أي مناسبة يمشي ليها – حتى لو ما عندو علاقة بالعروس …في العقد بقولوا عليه (وكيل العروس).
• قاعد قدام.
• مرات بكون ما شايل معاه بطاقتو ..وبرضو بكون (الوكيل).
• ولو العريس ما عجبو – ممكن يفركش ليك العقد في (5) دقائق.
• لا بعرف ليك حب.
• ولا بعرف ليك الخسائر التى خسرها العريس.
• في المقابر – سنو فوق السبعين ..بنزل بالجثمان في (ود اللحد).
• لو ما وهط (الجثمان) كويس – ما بطلع.
• والله قادر واحد يفتح خشمو.
• ما في زول بقدر يقول ليه حاجة.
• عمنا ود السردوب دا كان وقت يجي يلقانا قاعدين نذاكر للامتحانات بقول لينا : نومو نومكم ساكت.
• ما بحب السهر.
• وكان وقت يكون في وباء منتشر في البلاد او في العالم كله زي (كورونا) – كان بخش علينا في الصالون الكبير وبقول لينا : اقرأوا لمحمد الحسن سالم حميد – ما بتجيكم (الحبة).
• كورونا تجينا وين مع (عصائدنا) دي.
• اشربوا اللبن واكلوا التمر ونوموا بدري.
• الجرسة البعملوا فيها (الاسبان) ديل – ما تشتغلوا بيها.
• يا زول نحن الله بحمينا.
• نحن راكزين.
• رحمة الله واسعة.
• لا عندنا دواء ليها.
• ولا عندنا طرق وقاية.
• ماشين ساكت.
• على الله – عشان كدا الحبة ما بتجينا.
• عمنا ود السردوب ايمانو كان قوي – ما بخاف من الموت – ولا بخاف من المرض – بقول لينا ما في زول بموت قبل يومو.
• انتوا خايفين من شنو؟.
• المهم….(ما عاوز ادخل ليكم في التفاصيل).
• واطول ليكم في الموضوع.
• ذكرني كلام عمنا ود السردوب بعد العمر دا كلام ازهري محمد علي.
• مرة حاورنا الشاعر ازهري محمد علي في ذكري رحيل الشاعر محمد الحسن سالم حميد ، قام ازهري لفت نظرنا لهذا المقطع الذي كتبه محمد الحسن سالم حميد رحمة الله عليه : (عصرت على طرف الطريق وعقدت سفنجتا بي دلق ينشافن الاتنين خُدر).
• انا بقيت كل ما ادور اكتب عن ازهري محمد علي او محمد الحسن سالم حميد بتذكر هذا المقطع (عصرت على طرف الطريق وعقدت سفنجتا بي دلق ينشافن الاتنين خُدر).
• وقت اقول المقطع دا.
• واشبع بيه.
• واقيف في الشارع ..مادي رقبتي ..بقول والله كورونا الحبة ما بتعملها لينا مع هذا المقطع.
• دا كلام عجيب.
• شوف حسن التدبير والتصرف اول حاجة – عصرت على طرف الطريق.
• دي حاجة نحن زمان كنا بنسميها (حرفنة) – من غير ما يشعر بيها زول – عشان كدا عصرت على طرف الطريق.
• بشويش كدا.
• بعد ما عصرت على طرف الطريق عملت شنو؟.
• عقدت سفنجتا بي دلق.
• واذا قلنا في البداية عصرتها على طرف الطريق (حرفنة) ، فان عقدتها لسفنجتها بي دلق اخدر هنا (شفتنة).
• شفتنة عديل.
• وعشان اكمل ليكم (الشفتنة) او تكملها ليكم وتوصلها حدها – يناشفن الاتنين خدر.
• السنفجة المقطوعة ـ والما مقطوعة.
• اها ناس (شفوت) زي ديل (الكورونا) تجي تعمل ليهم شنو؟.
• ديل ناس بيعرفوا يتصرفوا.
• ديل ناس ما بقيفوا في حتة.
• اقصى حاجة ممكن يعملوها يعصروا على طرف الطريق.
• هسع نحن والله للكورونا ما عندنا اكتر من نعصر على طرف الطريق.
• وبعد كدا – البحصل يحصل.
• ما بتجيبكم الحبة.
• اذا عندكم يقين.
• اذا عندكم ايمان.
• ما في حاجة بتجيكم.
• بالمناسبة الآن كل التوصيات وكل منظمات الصحة بتدعو الى النظافة ..وبتشدد على غسل اليدين.
• نحن النظافة عندنا من الايمان.
• نحن غسل اليدين عندنا بي كورونا او من غير كورونا.
• تعاليم (دينا) كدا.
• الخواجات ما عارفين الدين الاسلامي – أي زول بتبع تعاليم الدين ما في حاجة بتجيه.
• لا ايدز.
• ولا كورونا.
• حتى (السرطانات) يمكن التغلب عليها بالقرآن – لو كنت صادق مع ربك.
• الله يحفظ البلاد.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• في حاجات تانية نمت فينا (الانسانية) – وخلت الشعب السوداني يتميز بالاخلاق.
• نحن يمكن يكون ما عندنا نفط.
• ما عندنا مصانع.
• ما عندنا سلاح.
• ما عندنا دولار.
• اقول ليكم – ما عندنا (بنزين).
• وما عندنا (رغيف).
• لكن عندنا (اخلاق).
• شوفوا الكلام دا كيف (عصرت على طرف الطريق وعقدت سفنجتا بي دلق ينشافن الاتنين خُدر).
• دي تدابير.
• دي منتهى الحكمة في التصرف وحسن السداد.
• ما في زول بقيف في حاجة زي دي.
• ولا بتشعر بيها (ينشافن الاتنين خدر).
• ما عاوز ادخل على مقاطع اخرى لمحمد الحسن سالم حميد.
• ما عاوز افتش ليكم حاجات تانية.
• عارفين ليه؟.
• عشان هذا المقطع يكفي.
• المقطع دا والله ما بزيدوا ليكم.
• دا مقطع اكبر من أي حاجة (عصرت على طرف الطريق وعقدت سفنجتا بي دلق ينشافن الاتنين خُدر).
• هذا المقطع بساوي الف ديوان شعر.
• انتوا قالوا ليكم بالكترة.
• نقيف شوية عند (السفنجات).
• جربتوا مرة – في موقف محرج (سفنجتك) تقوم تتقطع عليك.
• لو جربتوا الموقف دا – بتعرفوا حلاوة (عصرت على طرف الطريق).
• بتعرفوا الكلام البقول ليكم فيه دا.
• السفنجة ذاتها لمن تتقطع – فذلك يعني انها اخلصت معاك.
• اصلو ما قصرت.
• لمن (نخرتها) اتقطعت.
• والله الحبة ما بتجيكم من (كورونا).
• ماشين على الله ساكت.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• مرة صبت لينا مطرة.
• المطرة من شدتها – بتحس بالنقطة بتاعة المطر لابسة ليها (سفنجات).
• سفنجات مقاس 11 كمان.
• النقطة قدر دي.
• تعمل صوت في الواطة.
• الله يجيب لينا (المطر).
• نطلع على الشارع.
• نقيف في قوز الرملة.
• ونمشي علي عثمان – قالوا عندهم (حيطة) وقعت.
• المطرة جميلة.
• ما في احسن منها.
• خاصة لو جات لابسة (سفنجات) خدر.
• ما عارف ليه الزول وقت يختار ليه سفنجة من السوق بختار السيور (خدر).
• السر في ذلك شنو؟.
• والله انا ما عارف.
• لكن قدر ما اجيب لي سفنجة بجيبها (خضراء).
• يمكن عشان بعدين وقت تتقطع ..اعقدها بي دلق (اخدر) – وما في زول يلاحظ للقطعة.
• غايتو حميد خرب طبعنا.
• المهم….(ما عاوز ادخل ليكم في التفاصيل).
• واطول ليكم في الموضوع.
• كفاية كدا.
• ………..
متاريس
• المطر رحمة.
• هسع وقت تجيبكم مطرة صفوف الرغيف بتختفي.
• وصفوف البنزين.
• والكورونا.
• الله يجيب لينا الخريف.
• يعنوا انتوا عاوزين تخلونا في صفوفنا دي للخريف.
• الله في.
• اعملوا شير.
• …….
• الصبة الاخيرة – الكلام الكتير بجيب البعوض.
نقلا عن صحيفة ريمونتادا
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019