• ×
الجمعة 29 مارس 2024 | 03-28-2024
محمد الطيب الامين

لشنو يا علي كرتي (٩٩) ما كان تتمها (١٠٠) !؟

محمد الطيب الامين

 0  0  2877
محمد الطيب الامين
قزاز ورذاذ
محمد الطيب الأمين


لشنو يا علي كرتي (٩٩) ما كان تتمها (١٠٠) !؟


* أكثر ما يدهشني في (الكيزان) ذلك (الشبه الباين بينهم) في (الضلال والاحتيال والحيل الميت) .
* شبه عجيب وغريب .
* أول مرة في حياتي أشوف لي (حزب كامل) تتشابه كل عضويته في (الحيل الميت والضمير المعطوب) .
* يتشابهون في شكل (الدقن) وعدد (شعر الدقن) .
* يتشابهون في الشكل الدائري للكرش والخدود اللامعة .
* يتشابهون في الوقار المصطنع والاحترام الصناعي .
* يتشابهون في علامة الصلاة التجارية والمعاصي غير المرئية .
* ولعل شاعر الثورة أزهري محمد على قد أحسن وصف (كبيرهم) حينما قال : (ناعم والكلام طاعم .. ينوم فوق الجرح منحل ويقوم زي الحبن في محل) .
* الكوز لا يختلف كثيرا عن (الحبن) و(الثعلب) و(الثعبان) .
* (ناعم والكلام طاعم) و(الدقن) و(علامة الصلاة) و(البطن الحامل) بقروشنا.
* (بطون) لا تشبع فسمح لها الله أن تتمدد وتكبر وكأنها (تحمل جنين) ولكنها في الحقيقة تحمل (اموال أيتام وشعب أصبح يأكل من فضلاتهم) .
* هم هكذا .
* وبما أن ذلك كذلك فنحن لم نستغرب عندما أعلنت لجنة إزالة التمكين عن (٩٩) قطعة أرض للشيخ (علي كرتي) .
* علي كرتي يعني (الوقار والدقن والشيب والبدلة الأنيقة) .
* (٩٩) قطعة أرض .. يعني قدر (عدد حبات السبحة) التي يحملها شيخ علي كرتي في يده .
* حبات السبحة (٩٩) حبة ، (٣٣ سبحان الله) و(٣٣ الحمدلله) و(٣٣ الله أكبر) .
* (٩٩) حبة في السبحة .
* و(٩٩) قطعة أرض يملكها علي كرتي .
* يعني شيخ علي كرتي ممكن يسبح بالسبحة وممكن يسبح بقطع الأراضي العندو .
* (٩٩) قطعة أرض لرجل تجاوز السبعين من عمره !
* (٩٩) قطعة أرض لرجل هو أقرب للمقابر.
* (٩٩) قطعة أرض لرجل واحد بينما شباب السودان إذا تزوجوا سكنوا مع نسابتهم .
* ليه (٩٩) يا كرتي ؟
* ما كان تعصر على روحك وتتمها(١٠٠) يا كرتي ؟
* معقولة قطعة واحدة غلبتك؟
* هسه لو سألت على كرتي قلت ليهو لشنو اراضيك ٩٩ ؟ لو سالتو ح يديك دليل من القرآن.
* بجيب ليك حديث يقول الرسول قال (لا تتمها مائة) .
* وطبعا الرسول صلى الله عليه وسلم برئ منهم ومن عمائلهم.
* اتخيل ده (علي) كرتي عندو (٩٩) قطعة فكيف حال (على عثمان) وباقي الكبار .
* والله أنا خايف (بيت ناس أبوي) يكون حق مصطفى عثمان اسماعيل .
* خايف بيت (ناس عمتي) يطلع حق عبد الباسط سبدرات.
* إذا كان ده زول واحد عندو (٩٩) قطعة يبقى قطع شك نحن قاعدين في بيوت ما بيوتنا .
* شكلو كده نحن السودان ده جيناهو بالإيجار.
* (٩٩) قطعة أرض ده غير القصور والعمارات والشقق .
* (٩٩) قطعة أرض وأكيد القطعة ألف متر .
* يعني عمك ده عندو (٩٩) ألف متر في البلد دي .
* مسكين على كرتي .
* مسكين فهو لا يعلم أنه يملك (شبر في مقابر حمد النيل) .
* لا يدري أن كل ما يملكه (شبر في مقابر البكري) .
* شبر بس .
* شبر لا فيهو شهادة بحث ولا سراميك ولا باب رخام .
* شبر يا كرتي ما فيهو مولد كهربائي ولا شجرة برتقال .
* شبر يا كرتي ما فيهو تلاجة ولا تفاح لبناني .
* شبر يا كرتي ما فيهو عربة أوباما ولا فيهو برادو .
* طبعا أنا عندي قناعة قديمة إنو الكيزان عندهم (وهم) وإحساس بأنهم (مبشرين بالجنة) .
* هسه علي كرتي بفتكر إنو ال(٩٩) قطعة أرض دي (تقربا لله) .
* بيكون فاكر إنو (الله باني ليهو بيت في الجنة شمال القصر بتاع سيد عمر بن الخطاب).
* والله صحي .
* عندهم وهم زي ده .
* مش زمان (شيخ) إسحاق أحمد فضل الله قال في حرب الجنوب جاتهم غزالة قالت ليهم اضبحوني؟
* نفس الفهم .
* هسه علي كرتي وباقي الكيزان عندهم قناعة إنو نحن (كفار قريش) وهم بيوتهم في الجنة لا تبعد كثيرا عن قصور (سيدنا أبوبكر وسيدنا عمر وسيدنا علي) .
* وعلي كرتي ده بالذات بيتو في الجنة فاتح على بيت خالد بن الوليد .
* وهم عجيب .
* عليك الله ما عيب (٩٩) قطعة والشعب السوداني بيتشاكل في بيوت الإسكان الشعبي التي هي بره الخرطوم ؟
* ما عيب ناس ساكنة في بيوت تكشف ولا تستر ؟
* عشان كده ناس حمدوك ديل لو (لحقونا امات طه) أفضل مليون مرة من ناس على كرتي وباقي (الصحابة) المعاهو ديل .
* سبحان الله .
* ويا أستاذة : كده اصدميني وقولي لي ال٩٩ قطعة ديل كلهم ناصية؟
* و..و..
* والله في .
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019