صابنها | محمد عبدالماجد |

الكورة الايامات دي متل (الفول) في الغداء

الحصة الصباحية
برامج العيد في كل الفضائيات السودانية بتبدأ بي (شعورك شنو؟).
وما هو الفرق بين العيد في الخرطوم والعيد في البلد؟.
تقول الخرطوم في فرنسا!!.
وكل الضيوف في برامج العيد وبرامج رمضان كمان بيبدأوا حديثهم بقولهم : (انا سعيد اني اكون معاكم ، وان شاءالله اكون ضيف خفيف الظل عليكم!!).
والسودان دا كلو ما فيه زول خفيف الظل!!.
..................
• جانا (شافع) ، رأسو كلو (جلحات)...بالميت كدا انا وقفت في العدد في (الجلحة التاسعة)..في اربعة مرن عليّ ما شفتهن!!.
• دا ما موضوعنا.
• الناس في شنو وانت في شنو؟.
• لمن تكونوا قاعدين مجموعة – ويجيكم (شافع) جاري – لازم يجيب ليكم خبر ما حلو.
• زي كأنو (الشفع) ديل خلقوهم عشان يفرتكوا القعدات.
• المهم....(ما عاوز ادخل ليكم في التفاصيل).
• واطول ليكم في الموضوع.
• الشافع قال لينا (التريب ود جرقم) جاء.
• قلنا ليه جاء من وين؟.
• وفي الاساس (التريب ود جرقم) دا كان وين؟.
• نحن نسينا الموضوع...و(التريب ود جرقم) مرق من رأسنا.
• الشافع لسانو سليط – ورأسو كلو (جلحات) ...قال لينا (التريب ود جرقم) جاء من الصين.
• لا حول ولا قوة إلّا بالله.
• كلنا وقفنا على حيلنا.
• ووضعنا ايدنا في رأسنا.
• رأسنا عاوز يتشق.
• قلنا للشافع كيف يعني جاء من (الصين)؟ – هي البلد دي فاتحة ساكت كدا.
• مشرع هي.
• الناس ديل ما عارفين (كورونا) بدأ من الصين.
• انتوا (مطار الخرطوم) دا مالو بقى زي (دفاع المريخ)؟.
• أي زول يفوت منو؟.
• لا فحص.
• لا حجر.
• ولا عزل.
• (التريب ود جرقم) دا ليه (17) سنة في الصين ...الجابو هسع شنو؟.
• مالو؟.
• عاوز شنو؟.
• الزول دا (17) سنة في الصين... (طاقية) ما جابها لينا منها – عاوز هسع بعد العمر دا يجيب لينا (كورونا).
• والله كلام.
• وين ناس لجان المقاومة؟.
• زول قادم من برة اصلو ما يدخل الحلة دي من غير اجراءات (طبية) ، واحترازات (صحية).
• كمان نحن ناقصين.
• الحلة دي فيها الناس الكبار.
• اقل واحد من اعمامنا ديل عمرو (70) سنة.
• الخالات ..والعمات ..والحبوبات ..وتقولوا لي (التريب ود جرقم) عاد من الصين.
• الزول دا (17) سنة في الصين ..(مسكول) ما عملوا لينا.
• هسع الجابو شنو؟.
• عاوز يجيب لينا المرض.
• عاوز يجيب لينا الهوا.
• يا جماعة الموضوع دا لازم تثبتوه.
• لازم يقيف في حدو.
• دي ما طريقة دي.
• المهم....(ما عاوز ادخل ليكم في التفاصيل).
• واطول ليكم في الموضوع.
• قلنا نمشي على (التريب ود جرقم) ، ونشوف الموضوع شنو؟.
• في واحد ثبتنا – قال كيف نمشي عليه ؟..انتوا عاوزين تجيبوا لينا (الكورونا).
• قلنا ليه نحن هينين ...الكلام الناس التانية – اكيد هسع بكونوا خاشين فيه سلام واحضان ..وتحايا.
• (السودانيين) ديل بنسوا أي حاجة.
• لا بعرفوا ليك (كورونا) ولا (سكسكانية).
• احسن نحن نلحق الزول دا ونثبتو.
• لكن يا جماعة الموضوع دا فيه خطورة علينا.
• ما مشكلة ..بنقيف نتكلم معاه من بعيد لي بعيد – المهم نلحق اعمامنا ديل.
• مشينا على (التريب ود جرقم) ...ونحن من بعيد كدا شفنا ليك (الخروف) معلق في الباب.
• كمان!!.
• ضبحوا ليه.
• الله يستر.
• قربنا شوية على البيت ..ووقفنا بعيد.
• التريب ود جرقم عاوز يجي علينا – قلنا ليه يا زول خليك بعيد...انت (كورونا) دي ما سمعت بيها.
• كيف ما سمعت بيها وانت قادم من بلدها.
• التريب ود جرقم الكلام وقع ليه.
• فاكر الناس ما سمعوا بي (كورونا).
• عاوز يتعامل مع الناس بي عفويتهم.
• التريب ود جرقم ..قال لينا ..يا جماعة انا اجراءاتي صحيحة ..وما عندي أي مشكلة ...عملت الفحوصات كلها.
• قلنا ليه ولو.
• انت مفروض تكون في حجر صحي (14) يوم ..ما تقرب على زول ..يمكن تكون شائل (الفيروس) واعراضو لسه ما ظهرت عليك.
• التريب ود جرقم حاول يتملص من (الحجر الصحي)...ونحن مصرين.
• جبنا لينا معانا (7) اولاد من لجان المقاومة.
• الموضوع دا ولا بجاملوا فيه.
• ولا بتفاهموا.
• التريب ود جرقم قال لينا طيب انتوا عاوزني اعمل شنو؟.
• قلنا ليه عاوزنك تعمل (حجر صحي).
• قال لينا كيف؟.
• قلنا ليه (تربع ود حسن) عندو صالون في طرف البلد ، فاضي وكبير ...تشيل حاجاتك وتمشي تقعد فيه (14) يوم.
• قال لينا يا جماعة – لكن الموضوع دا ما صعبتوه عليّ.
• قلنا ليه واي زول اتخالطت معاه ..تسوقو يمشي معاك (الحجر الصحي).
• ونحن بنتصرف.
• الاكل ...والحاجات الباردة ..وكروت الشحن كلها بتصلك.
• شاحن الموبايل بنجيبو ليك.
• اصلو ما بنقصر معاك.
• بس 14 يوم ما نشوفك في الحلة دي.
• التريب ود جرقم ..قال لينا قلتوا كدا.
• قلنا ليه ايوا – ودا كلام نهائي.
• صاحبكم وقت لقى الناس مصرة ..شال شنطتو وشاحن الموبايل ومشى على صالون (تربع ود حسن).
• 14 يوم ..نحن نشيل ونجيب في الصواني.
• شيء لبن.
• وشيء عدس.
• وشيء لحوم.
• وشيء فول.
• مرة مصلح.
• ومرة سادة.
• ما خلينا ليه حاجة.
• شاحن الموبايل دي غيرناه ليه 4 مرات.
• لمن الفترة انتهت.
• اول ما انتهت المدة – مشينا عليه..قلنا ليه اها جبت لينا شنو من الصين؟.
• عاوز يفتح الشنط ..في واحد مننا وقف على حيلو ..وقال يا جماعة اوعكم تهبشو حاجة ...الاحاجات دي لو ما اتعقمت ما في زول يمشي عليها.
• الروح دي ما حلوة.
• هو نحن عاوزين نعيش كم مرة.
• والله من الحاجات البقينا نشوفها في التلفزيون للكورونا في الصين وايطاليا وامريكا واسبانيا وفرنسا ...الواحد بقى شائل (صابونتو) في جيبو.
• من الغسيل الكتير ايدينا لمن نقصت اصبع.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• الحكومة براها الموضوع دا ما بتقدر تعمل فيه حاجة.
• الحكومات لو بتقدر على الكلام دا ..الصين وامريكا وايران وايطاليا واسبانيا وفرنسا دا ما كان حصل ليها.
• الموضوع موضع (شعبي).
• ننتظر من الحكومة تقوم بدورها ..لكن الشعب برضو مفروض ما يقصر.
• الخطر على الشعب.
• الخطر علينا كلنا.
• انت واولادك.
• اخوانك ..وابوك ..وامك.
• ونحن ما عندنا قدرة ..ولا عندنا طاقة للعلاج.
• احسن نمسك في الوقاية.
• ونرتب اوضاعنا.
• وما نفرط في البلد.
• ابقوا عشرة على ارواحكم.
• ابقوا عشرة على غيركم.
• ..............
متاريس
• والله الايامات دي الكلام في الكورة بقى زي الفول في الغداء.
• الناس كلها شغالة في موضوع (كورونا).
• الفضائيات.
• الناس في الشارع.
• الحكومات.
• الشعوب.
• عشان كدا ..الوقت دا ما وقت كورة.
• لكن لو لقينا (التش) ما كعب معانا.
• بيصلح لينا الورق.
• احسموا من الآن.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• ...........
• الصبة الاخيرة – اذا فكرت تبيع (ابنوبة الغاز) حقتك ..فذلك يعني ان اوضاعك في غاية السوء.