• ×
الجمعة 29 مارس 2024 | 03-28-2024
محمد عبدالماجد

صابنها | محمد عبدالماجد | (الطلقة) ما بتكتل ..تكتل (عطسة) الزول!!

محمد عبدالماجد

 0  0  169176
محمد عبدالماجد
صابنها | محمد عبدالماجد | (الطلقة) ما بتكتل ..تكتل (عطسة) الزول!!



# الحصة الصباحية
نسيبتو قاعدة معاه في البيت – كل مرة تقول ليه كلام زي السم ... مرة تقول ليه : مالك ما جبت اللحمة ؟..ومرة بطيختك ما طاعمة !!...ومرة الطماطم الجبتها غشوك فيها.
ومرة كرفست (الملايات) – اصلو ما بتقول ليه كلمة حلوة!!.
نسيبتو منكدة عليه عيشتو – مرة قاعد في الحوش كدا بحضر في المؤتمر الصحفي للجنة ازالة التمكين ..قال لي زوجتو انتي عارفة نحن لو ما ازلنا (التمكين) من البيت دا اصلو ما بنرتاح.
............
• الحاجة البتجيك بالواضح كدا – اصلو ما فيها مشكلة – وما في خوف منها.
• ويمكن عشان هذا الوضوح – قال شاعر الثورة السودانية (الطلقة ما بتكتل بكتل سكات الزول) في اقوى شعارات وعبارات الثورة السودانية المجيدة.
• ما في اقوى من كدا.
• الكلام دا اقوى من أي رصاصة.
• اعتقد ان لهذا الشعار وذلك المقطع الثوري الجميل من القصيدة الثورية دور كبير في انتصار ثورة ديسمبر المجيدة.
• الكلام دا كان بعطي الناس فتمنيات الشجاعة والجرأة والقوة.
• اعملوا شير.
• انتوا (الشير) دا صعب عليكم.
• الشير دا قاعدين يدفعوكم عليه قروش.
• بتخسروا فيه (جاز).
• أي زول بيسمع الشعار دا – بكون على استعداد يخوض في النار.
• يخش في الجن الاحمر ذاتو.
• الشعار نفسه فيه ايمان – ما في زول بموت قبل يومه ..لذلك ما في طلقة بتكتل ليها زول قبل يومها.
• لا طلقة ولا دبابة.
• ما في اسوأ من السكات.
• المهم....(ما عاوز ادخل ليكم في التفاصيل).
• واطول ليكم في الموضوع.
• السودانيون وسط (الرصاص) و (الطلقات) – خرجوا وتحدوا الميلشيات ولم يهتموا بالتاتشرات والبمبان.
• لا قانون طواريء.
• ولا جن احمر.
• الرصاص ما عمل ليهم شيء.
• انتصروا في النهاية على النظام المستبد.
• وقبل ذلك كان تاريخ السودان في كرري وفي شيكان ، في المهدية وبعد المهدية ، وفي معارك ضد الاستعمار – كان السلاح (الابيض) بنتصر على السلاح الناري.
• السودانيون عملوها.
• انتصر السلاح الابيض على السلاح الناري.
• الكلام دا اثبتوه جدودنا زمان – الطلقة ما بتكتل ..بكتل سكات الزول.
• ما في زول يسكت يا جماعة.
• اتكلموا.
• اتحرروا.
• المهم....(ما عاوز ادخل ليكم في التفاصيل).
• واطول ليكم في الموضوع.
• هسع الحكاية عكست.
• هسع ممكن نقول الطلقة ما بتكتل بتكتل (عطسة) الزول.
• الايامات دي احسن يفكوا فيك (طلقة) – وما يفكوا فيك (عطسة).
• في حافلة فيها اكتر من (45) راكب ..قالوا ليك في راكب عطس ...الركاب كلهم قاموا جاريين.
• بما في ذلك السوّاق والكمساري.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• امريكا قدرت على ناس القاعدة ..وناس اسامة بن لادن.
• امريكا قدرت على داعش.
• وكل المنظمات الارهابية امريكا قدرت تنتصر عليها.
• لكن امريكا ما قدرت على فيروس كورونا.
• امريكا كلها بترجف الآن.
• ترامب بقى زي (الباك) الما عندو كورة وما عندو لياقة في اخر اللعب.
• بتمها (طفيش) في الكورة.
• زمان في الدافوري الواحد وقت يقطع في نهاية اللعب – بقعد يطفش في الكورة.
• محل ما تمشي تمشي.
• السماء فوق.
• المهم....(ما عاوز ادخل ليكم في التفاصيل).
• واطول ليكم في الموضوع.
• ندخل على (العطسة).
• نرجع ليها تاني.
• ونرفع ليها القبعات.
• اقصد نلبس ليها الكمامات.
• قبعات شنو كمان البنرفعها للعطسة!!.
• ما تستغربوا من الكلام دا (عطسة) ساكت بتجهجه امريكا.
• صاروخ ما بعمل ليهم شيء.
• لكن (عطسة) ممكن يجيب خبرهم.
• كل الجيوش في العالم – كل الاسلحة ..التقيلة والخفيفة ..الصواريخ ..والمدافع ما قدرت تعمل شيء لفيروس كورونا.
• رجعنا الى (العلم).
• عرفنا الآن ان القوة الحقيقية في العلم.
• القوة ما في المال.
• القوة ما في السلاح.
• كل هذه الاشياء فشلت امام فيروس كورونا.
• القوة الحقيقية في العلم.
• عشان كدا الناس عرفوا الآن قيمة الجيش الابيض.
• عرفوا قيمة الاطباء ..وكل الذين يعملوا في الحقل الطبي.
• ديل ناس اتعملوا...درسوا وعرفوا يتعاملوا كيف مع مثل هذه الامراض.
• انتوا فاكرين القراية دي لعب.
• فيروس لا يرى بالمجهر ..ممكن يعمل في العالم كله كدا.
• الالاف بيموتوا في اليوم الواحد في امريكا وفي ايطاليا وفي فرنسا وفي اسبانيا.
• فيروس صغير ..ما معروف ليه اصل حتى الآن – جعل كل الناس يدخلون الى بيوتهم.
• كل الناس رفعوا شعار (خليك في البيت).
• وهذا امر لم يحدث في الحرب العالمية الاولى – ولم يحدث في الحرب العالية الثانية.
• وسط الحروب – في كل الظروف – ما كان في (حجر) بهذه الصورة.
• في امريكا في ولايات معزولة بالكامل وفي ايطاليا ..وفي معظم الدول العربية.
• السعودية منذ اليوم سوف تطبق حظر التجوال 24 ساعة في اليوم.
• يحدث ذلك في اكبر مدن السعودية في مكة وفي المدينة وفي الرياض وفي جدة.
• لا حفلات.
• لا منتزهات.
• لا كابريهات.
• أي حاجة مقفلة.
• حتى الصلوات الجماعية اصبحت ممنوعة في الدول الاسلامية.
• سبحان الله.
• الله لم يفرق بين عباده.
• جائحة تجتاح العالم كله.
• ليل العالم كله في (الحظر الصحي).
• ما في زول يطلع برة.
• خليك في البيت.
• كل هذا الشيء قدرت عليه (كورونا).
• فيروس.
• يا ريت امريكا تتعلم .
• فرنسا ..ايطاليا ..انجلترا.
• عقلياتهم كلها منصرفة في انتاج الاسلحة وتطويرها.
• الامكانيات كلها تذهب في ذلك الاتجاه.
• الدول العربية كل دخلها بتصرفو في شراء الاسلحة.
• الآن الاسلحة ما بتنفع.
• الطلقة ما بتكتل بتكتل عطسة الزول.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• يا جماعة نحن ما عندنا عشر ما عند امريكا.
• ولا عندنا ربع ما عند السعودية والامارات.
• نحن ما عندنا اكتر من نقعد في البيت.
• ما في طريقة نتجاوز بيها (كورونا) غير الكلام.
• ما بنفع البيت كله يقعد في البيت ..وزول يطلع ..يخالط الناس ويرجع في نهاية اليوم.
• الزول دا ممكن يجيب للبيت كله (كورونا).
• عشان كدا ما في زول يطلع.
• والزول البكون مجبور على الخروج ..يتبع الارشادات والتوجيهات الصحية والتعقيمية الدقيقة.
• عشان ما يجيب المرض لاولاده.
• ما يجيب المرض لامه الكبيرة في البيت.
• او زوجتو الما عندها أي ذنب.
• يا زول يلتزم.
• الموضوع دا ما فيه رجالة.
• ولا فيه حقارة.
• الموضوع دا فيه التزام.
• فيه انضباط.
• واي حاجة بدون انضباط والتزام ما بتمشي لي قدام.
• يا ريت نلتزم.
• يا ريت نحترم صحة الاخرين.
• احترم غيرك.
• لو انت ما خايف ..وقلبك ميت ..وما فارقة معاك ..ما تجيب المرض لي زول اخر.
• زول ما عندو أي ذنب.
• قاعد ومتلزم في البيت.
• حتى الزيارات بين الاهل والاصحاب والجيران ..يا ريت تقيف.
• ما في زول بلوم ليه زول في الايامات دي.
• واي زول بمشي يزور ليه زول في بيتو ..بعمل ليه ازعاج ..وبكون في خوف وحذر منو.
• على كدا – احسن أي زول يكون في بيتو.
• اقعدو في البيت.
• اكتشفوا نعمة (البيت).
• نعمة (الاسرة).
• الاخوان ..والابناء.
• الام والاب ..والزوجة.
• اقعدوا في الواطة..وراجعوا حساباتكم.
• المهم....(ما عاوز ادخل ليكم في التفاصيل).
• واطول ليكم في الموضوع.
• ............
متاريس
• مهند الطاهر طول عمرو زول راقي.
• طول عمرو زول مهذب ..وجميل ..وبقول كلام زي الفل.
• والد مهند الطاهر كمان حكاية تانية.
• يا ريت قناة الهلال تحاور لينا في يوم والد مهند الطاهر.
• زول هلالابي ..صبغ اللون الازرق على ابنه مهند الطاهر.
• وعبدالرؤوف أي زول بيشيد بيه.
• اوعك من الغرور يا كابتن.
• اوعك من خطر (النجومية).
• الالتزام ..والانضباط..والتواضع ..اهم شيء في النجم.
• والتسجيلات جات.
• والكاردينال لغاية الآن مركز لينا في اضاءة الجوهرة الزرقاء.
• يا ريس شوف لينا موضوع التسجيلات دا.
• عشان التسجيلات القادمة الفرصة الاخيرة للكاردينال في الهلال.
• ...........
• الصبة الاخيرة – في قطاع مهم اسمه (ستات الشاي) بيدفع في ثمن غال شديد هذه الايام...وما في زول جايب خبرهن!!.
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019