• ×
الإثنين 30 نوفمبر 2020 | 11-29-2020
محمد الطيب الامين

ورونا الفضى الاعتصام منو وبنخلي الأهلي يغلبنا !!

محمد الطيب الامين

 0  0  963
محمد الطيب الامين
بالعربي الكسيح
محمد الطيب الأمين
ورونا الفضى الاعتصام منو وبنخلي الأهلي يغلبنا !!


* في مرحلة ما قبل المراهقة وفي أي بيت سوداني تقريباً هنالك شخص (بتلبد) من الضيوف .
* لما الباب يدق بتلقى بعض من ناس البيت جاريين على الغرف .
* وهو هروب من السلام وبياخة الونسة .
* لما يكون عمرك (14) سنة كده ويجوكم ضيوف في البيت شكل ونستهم معاك بيكون فيهو ملل غير عادي .
* والونسة المملة دي بتخلي أولاد أو بنات البيت يتلبدوا عند قدوم الضيوف .
* تلقاهم دخلوا الغرفة وعملوا نايمين .
* خاصة لو ما عندك علاقة كبيرة بالضيوف .
* الحاجة دي عند البنات أكتر .
* لما يسمعن صوت الباب بيجرن على الغرف طوالي .
* مرحلة معينة من العمر بتفرض عليك (تزوغ من الضيوف وما بتحب تمشي زيارة بيوت الناس) .
* وأعتقد أن هذه المرحلة هي التي يعمر بها المريخ الآن .
* والله صحي .
* المريخ يا كافي البلا .. لا بيسافر (ضيف) ولا بستقبل (ضيوف) .
* قاعد زي (المصران العصبي) .
* ولما يجوا ضيوف للهلال المريخ بيجري الغرفة .
* عشان كده أفريقيا قربت تنسى المريخ .
* لازم ينسوكم .
* تلاتة سنين بتودعوا البطولة من التمهيدي، لا بتسافروا ولا بجيبوكم في بن اسبورت .
* يتذكروكم كيف؟
* الداير يتذكرو لازم يكون حاضر، يستقبل الضيوف ويمشي زيارات وكده .
* لكن بطريقتكم دي ما في زول بتذكركم والله .
* هسه أنا الفريق اللعب معاكم في التمهيدي وطيركم على بالقسم ما متذكر اسمو .
* المهم .. السنة الجاية لما تشاركوا في الأبطال (بفضل الهلال) لازم لما تسافروا أي بلد تقولوا : (نحن المريخ تبع الهلال) .
* وأصلاً أفريقيا عارفكم أنتو (ضل البلد) .
* (ضل بلد ولا ضل حيطة) .
* والله أنا أمبارح فكرت في إحساس المريخاب كتير جداً .
* يمكن ساعتين وأنا بفكر .
* السنة دي لما طاروا من التمهيدي قالوا الهلال ح يطير معانا .
* قام الهلال صعد دور الـ(32) ، قالوا خلاص الهلال بيطير من هنا.
* صعدنا دور الـ(16) قالوا بس ده حد الهلال .
* نطينا في المجموعات جوه، قالوا الأهلي والنجم المتأهلين والهلال (حصالة) .
* ضربنا بلاتينيوم هنا والنجم هناك وبلاتينيوم هناك وجماعتك (جرجيرم غرق) .
* والجرجير لما يغرق الموضوع خلاص انتهى .
* ما في حل .
* ما في زول بقدر ينقذ ليهو جرجير غرقان .
* ولا في زول بقدر يحس ليهو بي (وصيفابي) حزنان .
* وطالما أنتو نفسياً تعبانين كده ما في مشكلة نحن بنتغلب ليكم من الأهلي وبنطير لكن بشرط .
* عندنا شرط واحد بس .
* ورونا الفضى الاعتصام منو؟
* ورونا .
* ده بس شرطنا .
* المهم .
* قالوا الهلال باع الكورة .
* قلنا البيع فضلت خيركم .
* بلاتينيوم حصالة المجموعة سقط وفي رصيده نقطة ومع ذلك هو أفضل من المريخ بمليون مرة .
* أفضل منكم .. على الأقل بلاتينيوم سافر وجابوه في بن اسبورت وكده .
* لكن أنتو .. قاعدين لي ديم سلمان والتحرير .
* تلعبوا بالعصر مع ديم سلمان وبالليل تمشوا أندية المشاهدة عشان تتابعوا مباريات مجموعة الهلال .
* بالمناسبة المجموعة .
* من العبارات القاسية تلك التي كتبها سائق الركشة : (الجلابي نايم وأنا حايم) .
* سيد الركشة عادة بينوم من الساعة (8 وربع) بينما الجوكي السايق الركشة بيكون (حايم ولافي) لحدي الواحدة صباحاً .
* بعد المغرب يجيب الإيراد للجلابي ويتخارج .
* وحقيقة نحن في الهلال أمبارح بقينا زي الجلابي سيد الركشة .
* على الصعيد الشخصي نمت من (8 ونص) ورفضت أحضر مباراة الأهلي والنجم .
* أحضرها لشنو؟
* أنا جلابي فريقي عندو تسع نقاط وما عندي شغلة بالباقين .
* مهمتي أغلب الأهلي في أم درمان وأصعد .
* جلابي وما ناقص سهر .
* سيد بلد وما بحب السهر .
* الأهلي غلب ولا غلبو ما شغلتي .
* النجم اتعادل ولا المباراة ما تمت ما عندنا دخل بالموضوع .
* المباراة دي تابعوها المريخ .
* تابعوها عشان دايرين يشوفوا الأهلي مطمئن ولا عادي .
* دايرين الأهلي يطمنهم .
* عليك الله دي حالة دي .
* عشان كده قلت ليكم مباراتنا مع أهلي هي موت أحمر .
* نضرب (الأحمر المصري عشان اللصيفر بتاع العرضة جنوب يتألم) .
* المهم .
* اليوم يتوقع أن يتدرب الهلال استعداداً للأهلي .
* ونأمل أن يكون تدريب اليوم فيه استقبال كبير لأبطال الهلال .
* نستقبلهم ومجلس الإدارة يسلمهم الحوافز والمرتب ونقفل الباب .
* ننسى حكاية بلاتينيوم والتسع نقاط .
* نستعد لمعركة الأهلى ونوقف كل مظاهر الفرح والتراخي .
* وعلينا أن نتذكر أننا لم نكن الطرف الأفضل في المباراة الأخيرة .
* حسمنا بلاتينيوم بالخبرة، ولذلك الأهلي يحتاج لعمل خاص .
* عمل كبير وتركيز أكبر .
* نعالج السلبيات ونجهز لمعركة السبت .
* ونركب صافنات ونجيبه (حمدوكية) وأصلو الزول بيموت والذكرى تفضل حية .
* و..و..
* وأنا شايف لو ركزتوا مع موضوع أسود حديقة القرشي أفضل ليكم.
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 02:0 الإثنين 30 نوفمبر 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019