بالعربي الكسيح
محمد
* في زمن سابق كانت المرأة السودانية (لو بقت فأس ما بتشق الرأس) ..
* مهمتها كانت تنحصر بين (غسيل العدة والمطبخ وكنس الحوش ومسح البلاط إن وجد).
* تغسل وتكوي وتسوي الملاح وتربي وتعلم.
* وهذه أدوار كبيرة وعظيمة تقوم بها المرأة دون أن تجد (الكلمة الطيبة) من معظم الرجال.
* والمرأة السودانية هي من أعظم نساء الأرض (ست بيت وأخت أخوان وبت رجال).
* هي نصفنا الحلو وهي كل شيء في حياتنا.
* وما قدمته المرأة السودانية إبان الثورة شيء يفوق الخيال.
* كانت (لو بقت فأس ما بتشق الرأس)، وهسه بقت (ترجع البمبان لدورية الشرطة).
* مع مرور الزمن تطورت المرأة السودانية ونالت حظها من التعليم وخرجت من دورها التقليدي في المجتمع.
* وأصبحت موجودة في كل مفاصل الحياة السودانية.
* ويكفي أن نقول إن المرأة السودانية هي أول وزير خارجية في محيطنا العربي الأفريقي.
* وهذا يؤكد أن حواء السودان لم تعد تلك التي (لا تشق الرأس).
* المرأة السودانية الآن بتشق الرأس وبتشوت الكورة وبتجيب القون.
* ولذلك أخصص هذه المساحة اليوم للحديث عن (دوري السيدات) الذي أنطلق أمس الأول لأول مرة في السودان.
* دوري النسوان انطلق أمس الأول، لأول مرة في السودان وجرت المباراة الأولى بملعب إستاد الخرطوم (كورة قدم عديل كده).
* وبغض النظر عن (مع أو ضد) أعتقد أن الموضوع يحتاج لمقارنة بين طبيعة وواقع المرأة السودانية وبعض المفارقات.
* ولعل الناس تناولت هذه الموضوع من زوايا طريفة (بعيداً عن الزعل).
* المرأة دائماً تحرص على الذهاب إلى المنزل قبل المغرب أو قبل العشاء.
* الآن مع التمارين والمباريات عادي (البت) تجي راجعة بعد حداشر مساء.
* كنتي وين؟ في التمرين يا أبوي.
* زمان (البت) ممكن (تجرح) يدها بالسكين أثناء حش البصل.
* الآن (البت) ممكن تقطع رباط صليبي.
* البنات زمان بيدخلن (ختة صندوق) عشان الواحدة تشتري ليها (بلوزة) أو (فستان) أو (علبة ديانا).
* بعد كده تاني البنات بيدخلن (ختة صندوق) عشان الواحدة تشتري ليها (كدارة).
* عادي ممكن تسمع الواحدة تقول لصحبتها اشتريت لي كدارة أديداس أصلية.
* كدارة ليمونية.
* أو كدارة بي لون زينب.
* كدارة لونها فوشي.
* الواحدة تمشي محل المعدات الرياضية تقول لصاحب المحل: (عليك الله يا عمو دايرة لي كدارة لونها بنفسجي فاتح).
* ودايرة لي (شنكار لونو بصلي).
* وشراب لونو لحمي.
* القروش الكانت رايحة في الكريمات والفسيخ والخجلخ ح تمشي للكدارات والشنكارات والذي منه.
* الواحدة أثناء المباراة تنط (جوز) في واحدة من الفريق الخصم عشان ما جاتها في بكا حبوبتها.
* تقول ليك (فلانة دي ثقيلة أنا أصلاً ما ارتحت ليها).
* دقيها يدقها البلا.
* كمان لو في واحدة ضربت واحدة الشكلة ح تدوِّر.
* والشكلة ح تكون عبارة عن (امشي يا وسخة يا فاسخة يا مقطعة عاملة كدارتك القبيحة دي).
* وعادي ممكن واحدة تضرب ليها واحدة وتقول ليك (يومداك لاقتني وما سلمت عليَّ).
* في المعسكر الونسة بين البنات ح تكون (وااااااو ما شفتي الحارسة بتاعت فريق الدفاع لابسة كدارة لونها حلو كيف)؟
* أووووب علي فظيعة، كدارة لونها بيجي رويان.
* والعجب الطرف الشمال بتاعت فريق القادسية عندها (شراب فيهو قلوب نفسياااااات عديل).
* وتقول ليها (النبي فيك أسأليها الشرابات دي جابتها من وين).
* شرابات لونها (بني محروق) وفيها قلوب وفراشات باللون الذهبي.
* نفسيات عديل يا هناية.
* والأولاد كمان تاني الواحد لو داير يقدم هدية لحبيبتو بمناسبة عيد ميلادها، بدل التلفون أو الدبدوب الأحمر يجيب ليها كدارة ولبسة تمرين.
* والله صحي.
* جيب ليها كدارة (كدايسها ناعمة).
* لأنو البنات ديل عادي الواحدة ممكن تجيب ليها كدارة تقول ليك الكدارة دي كدايسها طويلة.
* نصيحتنا ليكم الواحدة لو (كاوية شعرها ما تدق هيد).
* والواحدة لو راسمة عند الحنانة ما تلعب باص طويل.
* وبالنسبة للأظافر الطويلة عادي ممكن تقد الكرة.
* والمنكير بيظهر في التسلل.
* والروج بضيع اللياقة البدنية.
* لكن بوصيكم بالكحل.
* تاني الشعراء بدل يتغزلوا لينا في عيون البنات والوجنات والقوام، ح يتغزلوا في الكدرات والشنكارات.
* وبالمناسبة.. لو في واحدة (شلبت راجل واحدة لو اتقابلن في الميدان بيحصل موت).
* وغايتو جنس غايتو ..
*و..و..
* وحلوة عينيك و.......(الكدارة برضو).خ