• ×
الخميس 29 أكتوبر 2020 | 10-28-2020
محمد عبدالماجد

نزار حامد...أريتك تبقى طيب

محمد عبدالماجد

 7  0  2824
محمد عبدالماجد
إذا سألتني عن اللاعب المفضل بالنسبة لشخصي الضعيف، في الوقت الحالي..لقلت بدون تردد هو (نزار حامد).
الصاقعة نزار حامد.
هذا الجيل الحالي رمانته، وخياره الأوحد هو اللاعب نزار حامد، أعاد الله لنا معافياً وسليماً على وجه السرعة.
إن شاء الله يعود لينا سريعاً.
وإن شاء الله الفحوصات تؤكد سلامته.
الدولار على الهبشة.
لو إصابة نزار حامد تأكدت الدولار ممكن يصل 100.
الدولار نزار حامد ما بيلعب فيه.
ونحن ذاتو والله الزول دا ما بنرضى فيه.
سلامتو عندنا بالدنيا.
لقد أصبح للرقم (13) في الهلال هيبة...الرقم بقى عندو مكانة.
أول ما تدخل إستاد الهلال تقعد تفتش في الرقم (13).
وأول ما تقع عينك في الرقم (13) تنوم قفا.
رقم مليان هيبة وكلام.
مليان إبداع.
رقم مكانو في الملعب.
وقت نشوف الرقم 13 في الكنبة ...والله ما قاعدين نرضى.
نص المتعة بتغيب عن الهلال.
نص الروعة بتختفي.
ما في زول بستلم وبيسلمك أحسن من نزار حامد.
الكورة البيستلمها الخصم يقنع منها.
والكورة البيسلمها بتمشى في الحتة الصاح.
تقول صراف ليها (توزيع موسيقى).
صراف ليها حساب صاح.
الحكاية ما لعب.
نزار حامد في تشكيلة الهلال عليك أن تتنظر الدقيقة 7 والدقيقة 22 والدقيقة 43 والدقيقة 52 والدقيقة 74 والدقيقة 91 كلها بتكون أقوان.
الدقائق دي بتعرف نزار حامد كويس.
أقوان الهلال في وجود نزار حامد مظبوطة بالثانية.
ما في حاجة ساكت.
ما في زول بيقطع ليه حاجة من رأسو.
كل حاجة بي نظام.
الكورة تمشي زي الساعة.
نحن عرفنا (كشافات) إستاد الهلال بسبب نزار حامد.
نزار حامد لاعب طويل، بسببه قعدنا نعد في لمبات كشافات إستاد الهلال.
علمنا (الصنقيع).
لاعب فوق ..وكورتو تحت.
إعجاز عديل في المستطيل الأخضر.
مرة نزار حامد عمل ليه عملية في وسط المريخ ...تحديداً في علاء الدين يوسف نحن لغاية الآن واقفين شماعة بسبب هذه الحركة.
الوقفة الياها.
من ديك تاني ما قعدنا.
علّم جماهير مدرجات الهلال الوقوف.
زمان كان الجمهور بيقيف في مباراة الهلال بعد الدقيقة 79...بسبب نزار حامد الجمهور بقى يقيف من (التسخينة).
نزار لاعب ولَّا ما لاعب؟.
وقت يقولوا ليك نزار حامد في تشكيلة الهلال، تاني لو المباراة حاكمها مأمون أبوشيبة من وسط الملعب ومعاوية الجاك وهيثم كابو رجال خطوط ما عندنا قضية.
بتذكر هدف نزار حامد في المريخ، كورة لعبها ليه بكري المدينة.
نزار حامد تابعها لمن دخلت الشبكة.
وبتذكر هدف نزار حامد في سموحة المصري.
مسك الكورة من النص.
أي لاعب مصري قابلو، أقنعو ليك أن حلايب مصرية.
وشال ليه المصران.
والكلى.
والمرارة بره.
هدف نزار حامد في سموحة الأستوديوهات المصرية 40 يوماً قاعدة تحلل فيه.
ما عندهم شغلة غير هدف نزار حامد.
دي شيء لا شافوه عند الخطيب.
ولا أبو تريكة.
نزار حامد وقت يكون في تشكيلة الهلال، زي الحفلة لمن كانت بتكون بي زيدان إبراهيم.
طرب شديد.
الناس ما بتطلع من الدارة.
العريس من الما عريس ما بتعرفو.
ما في زول بيقعد ليه في كرسى.
الموسم الماضي كانت خسارة كبيرة أن نفقد نزار حامد بسبب الإصابة، موسم كامل غاب فيه نزار حامد فحرمنا من المتعة والروعة والدهشة.
ظهرت صفوف العيش.
وصفوف البنزين.
وصفوف النقود.
واختفت صفوف الكورة.
إصابة نزار بتعمل أكتر من كدا.
نسأل الله أن لا نحرم من نزار حامد هذا الموسم، ليعود لنا فيجول ويصول في وسط الملعب.
يعمل أي حاجة.
يفرتكك فرتيك.
ينزل ويطلع.
ويجيب قونو.
أعشم أن تأتي التقارير الطبية من مصر كما نشتهي، وأكاد أجزم أن عودة نزار حامد سوف تكون قريبة، وأن التقارير الطبية بإذن الله سوف تؤكد أن اللاعب سليم، وهو لن يحتاج للكثير للعودة من جديد ليجري بين أترابه بالرقم (13) في وسط الهلال.
أراهن أن دعوات الأهلة الصادقة سوف تكون هي الترياق الحقيقي لعودة نزار حامد سريعاً إلى الهلال ليكون أحد جنود الهلال في هذا الموسم الذي ننتظر فيه الكثير.
ونتوقع الكثير من نزار حامد وأخوانه في الهلال.
إصابة نزار حامد الأخيرة لن تكون خطيرة، نسأل الله ذلك، فقد خرج اللاعب من الملعب بشكل عادي، وتابع نزار حامد من بعد تمارين الهلال من الخارج قبل مغادرة الهلال إلى تونس دون أن يشكي من إصابة يمكن أن تكون مزعجة.
مع ذلك نتمنى أن تكون المراجعة الطبية لنزار حامد هذه المرة مكتملة ليعود وهو في كامل عافيته ولياقته وحالته الفنية المتوهجة.
ما تلعبوا في نزار حامد.
موهبة مثل موهبة نزار حامد يجب الاعتناء بها والحفاظ عليها، لأن ملاعبنا تنعدم منها مثل تلك المواهب.
نزار حامد لاعب بمواصفات خاصة، يمتلك الدرجة الكاملة في كل المواصفات التي توجد في اللاعب السوبر.
اللاعب النجم.
لاعب خلوق ومنضبط، توهج وانتقل للهلال وهو في سن صغيرة، ومازال نزار حامد صغيراً في السن يمكن أن يعطي الهلال والمنتخب الكثير.
نزار حامد إلى جانب مهاراته العالية، وإمكانياته الفنية، فهو صاحب بنية جسمانية أنموذجية.
يعشق الكرة بجنون، ولا يجاريه أحد في حبه للهلال.
تربطه علاقة مميزة بجماهير الهلال، هذه العلاقة لم تأت من فراغ، علاقة فرضتها أخلاق اللاعب العالية واحترامه وحبه الكبير للهلال.
طبعاً إلى جانب مهاراته الكبيرة التي كانت بمثابة الأرضية التي انطلق منها اللاعب.
أول من التفت لموهبة نزار حامد وطالب بضمه للهلال وهو في الأمل عطبرة كابتن الهلال السابق هيثم مصطفى.
قال عنه الجنرال صلاح أحمد محمد الذي دربه في الهلال إن إمكانياته يمكن أن تجعله يلعب في أكبر الدوريات في العالم لو انتبه نزار حامد لموهبته الكبيرة.
لكن دائماً (الإصابات) تأتي بما لا تشتهي الجماهير.
ودائماً الإصابات تحرمنا من إبداع ومتعة بمثل الإبداع الذي يتوفر عند الصاقعة نزار حامد.
رابطة الهلال في قطر أعلنت عن علاج نزار حامد.
إن شاء الله الأمر ما يكون محتاج.
ولكن إذا كان الأمر في حاجة لذلك، فلا تبخلوا على نزار حامد بشيء.
يمشي ألمانيا عديل كدا.
موهبة مثل موهبة نزار حامد يجب الحفاظ عليها.
يجب الاعتناء بها.
نسأل الله مرة أخرى أن تؤكد التقارير الطبية أن إصابة اللاعب خفيفة وأنها لن تحرمه من العودة سريعاً لكي يستفيد منه الهلال في المباريات المقبلة وهو بكامل عافيته وجاهزيته.
وأريتك تبقى طيب يا نزار حامد.
نحن البينا كل هين كما يقول نزار حامد.
وإن شاء الله سليمة.
وبكره ترجع أفضل.
وأحسن.
وأقوى.
........
ملحوظة : ونحن في الانتظار.
هوامش
وسط الهلال بكره لو فيه الشغيل وأبوعاقلة وأبوبكر ديارا وشيبوب ... لو كنت بتلعب أمام الهلال برشلونة ما يجيبوا ليهم قون.
وهناك في الشوط الثاني بشه الصغير وصهيب الثعلب.
بشه الكبير ممكن الاستفادة منه في الهجوم.
الهلال مطالب بكره بالانتصار.
ما تهتموا بتصريحات الأفريقي.
البرد شديد.
وهناك 4 عناصر عادت لتشكيلة الأفريقي.
والحضور الجماهيري يمكن أن يصل إلى 40 ألف مشجع.
لكن في كل الأحوال.
في كل هذه المعطيات.
يجب أن ينتصر الهلال.
وإن شاء الله الهلال ينتصر.
الهلال يجب أن يحسم أمر تأهله في تونس.
في رادس.
حسم التأهل هناك أسهل من هنا.
جمهور الأفريقي فقد الثقة في فريقه في الفترة الأخيرة.
وممكن بهدف يسجله الهلال في بداية المباراة يفصل الجمهور من الفريق.
في عام 2011 المباراة لم تكتمل.
بسبب هدف سادومبا.
عشان كدا مطلوب من الهلال أن يسجل من بدري.
اعتبروا نفسكم بتلعبوا في أم درمان.
المجموعات يا هلال.
ونتيجة بكره بتحدد المصير.
الأمل يواجه المريخ اليوم في عطبرة.
والزلفاني عرفها.
قال ماشي يجدد جوازه.
كمان عطبرة عاوزه ليها (جواز سفر).
الزول دا هارب من الأمل.
وأنتوا بتذكروا.
حصل شنو لغارزيتو في عطبرة.
وبتذكروا حصل شنو لكروجر في عطبرة.
غارزيتو قال تاني ما بمشي عطبرة.
الزلفاني عرفها.
وعملها في جواز السفر.
كمان عطبرة عاوزه ليها جواز سفر.
يا سليم شوف شغلك.
ناس الجس ديل ما بنستروا.
الأهلي المصري فاز أمس، في الأبطال على جيما الإثيوبي بهدفين دون رد.
المباراة في مجملها كانت باهتة.
وكانت خالية من اللمسات الفنية.
الأهلي المصري عاوز الكثير.
والبطولة الأفريقية يمكن أن تتحقق لو كان هناك عمل وجد وكد حقيقي.
أبقوا الكبار.
وما تقللوا من قيمتكم.
أنتوا الأجدر.
أنتوا الأحق.
ألعبوا للانتصار.
قدموا كورتكم.
الناس كلها سوف تشهد ليكم.
وإن شاء الله خير فوق خير.
وأبقوا على سفر.
.......
عاجل : الـ 200 ألف دولار اتقسمت ولَّا لسه؟
امسح للحصول على الرابط
بواسطة : محمد عبدالماجد
 7  0
التعليقات ( 7 )
الترتيب بـ
الأحدث
الأقدم
الملائم
  • #1
    بشير الرفاعي 12-17-2018 08:0
    بصراحة لو كتبت هذا الغزل في اسطوره زمانه هيثم مصطفي لصدقناك و امنا علي كلامك ام نزار الذي رأيناه يلعب في الأمل ثم الهلال فكلامك عنه يدخل في باب اعذب الكلام أكذبه .
    ثم كيف تكتب ان نزار كلما قابل لاعبا مصريا أقنعه بان حلايب مصريه ؟ من اقنع من ؟ الم اقل لك ان اعذب الكلام أكذبه !!!!
  • #2
    وطن موجوع بلا وجيع 12-16-2018 07:0
    اللهم اشفي نزار ووفق زملاءه لفوز يهدونه من على البعد يفرح قلبه ويريح افئدتنا. اسف افئدة ة دي ما ح يفهموها ناس ش العرضة صعبة عليهم
  • #3
    Ahmed 12-16-2018 04:0
    لا فض فوووك. اى والله . والله انى لا اذوق طعما لمباريات الهلال بدون ابو النز.
    من طينة الكبار ..من زمن اخر . من زمن صبحى وكندوره.اليوم وجدت من يشفى قليلى .ويكتب عن افضل لاعب . فى السودان.لاعب يضفى نكهة على الميدان .نكهة خاص ومذاق وطعم ورايحة فى كورة الهلال.
    شكر الكاتب الكبير محمد عبدالماجد
  • #5
    ابو عبد الله 12-15-2018 08:0
    ان شاء الله يتعافى نزار ويعود لابو الهل ..ومريخ العرب كلو نزار حامد
  • #6
    محمد ابوبكر 12-15-2018 08:0
    شكلك بتنفخ في قرية وانت مقتنع انها مقدددة.ولو كلامك دا صاح أكان الأندية الخارجية تكالبت علي طلب خدماته تكالب الأندية العربية علي الغربال .كلامي وقع ليك ..ما تقدنا فاكرنا ما بتفهم كورة ولا عايز تخمنا وتصرنا وتودينا شمال وتجيبنا جنوب لأمن راسنا إلف .والحقيقة المرة هي الصفر الخارجي الفي حلوقنا طول شديد ما عايز يزح وامثالك هم السبب.. شكراً لييك..وشكرا ليك..
  • #7
    جلابي الدوحة قطر 12-15-2018 07:0
    سخريتكم يا كتاب الهلال بقت مسيخه وعموما بدلا من السخريه عن عطبره اهتم بي رادس غدا واعمل علي تحسين السيره الزاتيه لنزار
    صحافة شنو.دي
       الرد على زائر
    • 7 - 1
      وطن موجوع بلا وجيع 12-16-2018 07:0
      زي طعم فريقكم الخلى خشمكم ملح ملح
أكثر

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 08:0 الخميس 29 أكتوبر 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019