• ×
السبت 19 سبتمبر 2020 | 09-18-2020
محمد كامل سعيد

الرشاقة.. الـ(كتلت) اشراقة..!!

محمد كامل سعيد

 13  0  3292
محمد كامل سعيد

Mohammed.kamil84@yahoo.com


* كالعادة، ظهرت (اشراقة) في كامل حيويتها المزعومة، وطفقت ترسل رسائلها الى الجميع، كورال ودخلاء وتجار كلمة، وفي الاتجاه الآخر تسمر المتسلقون ترقباً لاي اشارة تقوم بتوجيههم ناحية القصة او الحبكة المراد العزف على وترها في مقبل الايام..

* خرجت اشراقة وهي تتحدث بكل الوهم والغباء المسنود بالاعتقاد الكاذب الذي اطلقته منذ سنوات وصدقه قبل البسطاء من شعب النادي الاحمر.. وقالت بصوت (مبحوح) اها.. عايزين أغشكم بي شنو الليلة..؟! اتحاد والا تاريخ والاَ هلال والاّ رئيس طوالي..؟!

* اطلبوا، واوعكم تخجلوا، انا هنا عشان ابيع ليكم الوهم في قزايز وبكل الاحجام والالوان، ولا مانع ان اعيد ليكم الغلط عشرات المرات ولاكثر من (15) سنة متتالية بلا كلل او ملل.. وكيف يحدث الملل وانا عارفة السر الذي بواسطته اغش على الكل..؟!

* (الحصة تاريخ).. تعالوا يا شطار.. ويا ناس الكورال خليكم قراب ح احتاج ليكم بس ما عليكم الاّ تفتّحو عقولكم معاي، وتفهموا انا عايزة شنو، وعلى طول تنفذوا الاوامر.. المعاي يجي بي جاي.. والما معاي انا بحروقو وبطاردوا وبكرهو وبطردوا من الوسط..

* اها قتلوا لي دايرين شنو..؟! والله نسيت اني قلت ليكم الحصة تاريخ.. طيب طيب.. اها نادينا دة اصول ما في زيو لا في افريقيا ولا العالم العربي، انحا جدارة واصالة وحضارة وكاساتنا جوية.. ما المبيوعة.. واوعى زول يسألني عن المبيوعة دي شنو..!!

* وعشان تتاكدوا (في سنة تسعطاشر) فزنا على الند والناس قاموا جاريين فقلنا ليهم تاني بتجو..؟! قالو لينا (التووبة).. يللا اضحكوا على كلمتهم القالوها دي... (قه قه قه).. بعدين التاريخ ده انحنا حافظنو صم وما في زول بيغلطنا فيهو ابداً حتى ولو شداد زاتو..

* وبمناسبة شداد انا طبعاً ما معترفة بيهو نهائي.. لانو هلالابي.. واوعى زول يقول لي الزول ده عرف الكورة قبل ما اجي من البلد دي.. هوي فتحو عيونكم يا ناس الكورال.. وفجأة يتدخل الكوراليون بالهتاف (اوعك تخلف الميعاد.. ولن يحكمنا البروف شداد)..!!

* نحنا ما شين في الاتجاه الصحيح.. آآي لينا (خمسطاشر) سنة بنقول في الكلام ده لكن كيف ما نتأخر ونتعرض للهزائم وناس شداد ديل ومعاهم نادس الهلال شغالين لينا حفر ودفر.. قه قه قه قه.. يللا اضحكوا على كلمة (دفر دي).. فيردد الكورال (دفر وحفر)..!!

* اشراقة تواصل الحديث وارسال الرسائل الى الشعب ومن حولها افراد الكورال والدخلاء، ويتابعها الجميع وهي تمسك في الموضوع ده، وتفك في داك بلا كلل او ملل وهي تردد في دواخلها (النادي ده بتاعي اعمل فيهو الانا عايزاه ولا بيقدر زول يسألني).

* اها عايزين شنو.. اكلمكم عن البطولات الافريقية.. طيب.. كاس مانديلا.. كمان ده فيهو كلام..؟! ما تقولي لي ليهو ربع قرن وزيادة.. واوعى زول يحاول ينتقد لان كل من يتململ فانه سيدخل في دائرة المندسين الهلالاب الذين لا يعرفون قدر وقيمة الكيان..!!

* بعدين انت يا كورالي انت الواقف هناك.. انا مش قلت ليك ما تكتب عن مواضيع اللاعبين الاجانب ديل وقصص تمارضهم وتمردهم..؟! انت عايز تقسم لينا الصف والاَ شنو..؟! المواضيع الزي دي، ده ما وقتها.. انساها هسه وشد طبلتك عشان نعتمدك..!!

* بعدين انا سامعة تحت تحت، من الناس البيجبو لي الاخبار من كل حتة وباي وسيلة انو في ناس ما موافقين على سياستي دي.. وفي الحتة دي بقول انا ح انسف اي زول يقيف قدام مصالحي، احم احم، اللي هي بالطبع مصالح الكيان ومصالحكم انتو يا عالم..!

* فينبعث صوت خافت من بعيد وكأنه مكتوم قائلاً (رشاقة رشاقة.. يا اشراقة) فيلتفت الجميع ناحية ذلك (المصدر) وبلا اي تردد يردد الجميع ذات العبارة فتنشرح اسارير اشراقة وتصل احاسيسها عنان السماء وتعدل نظارتها وتلتفت لـ(صواطة) العجين..!

* تخريمة أولى: لم اتفاجأ بسقوط المريخ وتعادله امام الخرطوم الوطني في بداية مشواره ببطولة الممتاز لا لشئ سوى لانني حفظت مثل هذه (الوهمات) التي ظلت تتكرر في كل عام وبذات ادوات (الطبل والزمر) والات العزف اياها خاصة (النفخ)..!!

* تخريمة ثانية: الواقع الذي تابعته عقب فوز المريخ المفاجئ على اتحاد العاصمة عربياً وحالة الذهول التي فرضت نفسها على الجميع حكت بعمق الواقع المؤلم وحالة التواضع التي وصل اليها الاحمر الذي لم يتبقى منه غير الذئاب التي تنهش فيه لاجل ان تعيش..!

* تخريمة ثالثة: فجأة نسى دخلاء المريخ تلك القصص التي اثيرت عن تصعيد الشكاوى الى الفيفا وكأس والتي لا اظن انها توقفت عند الاحتجاج على قانونية مشاركة لاعب مريخ الفاشر جنية فقط لانها امتدت وشملت الكثير من الحكاوي.. بنرجع ليها باذن الله.
امسح للحصول على الرابط
بواسطة : محمد كامل سعيد
 13  0
التعليقات ( 13 )
الترتيب بـ
الأحدث
الأقدم
الملائم
  • #1
    ابو عبدالله 11-27-2018 08:0
    الاستاذ الكاتب الكبير ابو الفهم يا خى لو بتحب المريخ عليك الله سيبو فى حالو شجع الهلال شجع البارشا اكتب عن الموردة خلينا فى حالنا ياخى كرهتنا.....
  • #2
    الفيل 11-26-2018 09:0
    اتمني ان تكتب بوضوح وبما يفيد القراء ولا يهمنا من بعيد او قريب اختلافك مع مزمل وماذا بهمنا اذا تم فصلك من صحيفه او لم بتم تعيينك. او ما اعطوك قروش ما ذنبنا نحن في الكلام المكرر الممجوج الغير واضح والجبان جدا جدا
  • #3
    Mars 11-26-2018 07:0
    صدقني أنا لا أرجم بالغيب لكن باقى ليك كم طاشر مقال وتترقى قربت شديد
    من *التجانى الماحى* أتركوا الحسد وتمنو لغيركم الخير ف على نياتكم ترزقون
  • #4
    Mohammabhussein697@gmail.com 11-26-2018 06:0
    طيب هب إنه سلمنا جدلا إنه نحنا مخدرين من مزمل أبو القاسم وكل مصيبة تحل بالمريخ سببها مزمل والكورال والمطبلاتية وإنت بديت تكتب في المصطلحات دي وتكرر فيها وقت الوالي رفض يشتري ليك الأمجاد ومزمل طردك من الصدي وإلي الآن دون ملل ونحنا حفظناها واقتنعنا طيب ورينا الحل اطرح فكرة قول لينا علي مخرج ادينا حل قول أي حاجة مفيدة عشان نحس بانك فعلا عاوز مصلحة الكيان واقسم بالله تلقانا قدامك بجهدنا ومالنا وفكرنا. لكن ماذا ننتظر من مفلس وحاقد وحاسد وغير مريخي. ولو إنت فعلا راجل سيب الهمز واكتب مزمل صراحة زي ما أي صحفي صادق وراجل بكتب أو زي مزمل مثلا.
  • #5
    sahir 11-26-2018 11:0
    مثل طائر الشؤو لا تظهر ؟إلا عند الاخفاق .. يعنى الدنيا كلها تكلمت عن مباراة الجزائرين إلا انت ولو لا تعادل الخرطوم ماكان ظهرت !!! يا اخى العزيز والله حالك يبعث على الشفقة .. ومفروض تعرف اسلوبك هذا اصغر طفل يعرف انه همز وغمز ولا يمت للرجولة باى حال ووالله انه مقرفففففففف
       الرد على زائر
    • 5 - 1
      مدفع الدلاقين 11-26-2018 01:0
      تعرف ماظهر ليه بعد مباراة الجزاير؟

      لان الانتصار جاء ضربة حظ

      وفى مباراة الرد عينك ماتشوف الا النور

      قوم انقلع وتانى لا تقرأ

      للاستاذ القامة محمد سعيد

      روح شوف مزمل وابو خيبة وكابو

      واشكالهم لانك محتاج جرعة


      مققققققرف

      تهى تهى تهى
  • #6
    د . الشريف 11-26-2018 09:0
    وضح جليا ان كفر ووتر تمثل طابورا خامسا هدفه تدمير المريخ وتحجيم تميزه .. منذ ان اوقعت القرعة المريخ مع فايبرز اصبحت تفبرك اخباره وتنشر اخبار تتعلق بالتهديد والوعيد هزيمة المريخ فى ارضه ووسط جمهوره .. وداومت على نشر اخبار لاعبيه وتفوقهم فى الدورى اليوغندى .. ايضا ظلت تنشر اخبار اتحاد الجزائر وتصفه بعملاق افريقيا ولم تتوقف حتى بعد علقة القلعة وهاهى بالأمس تنشر اخبار الحرب ومعركة الموت التى تنتظر لاعبى المريخ بالجزائر .. لم تقف عند هذا الحد بل افردت كل مساحاتها لأقلام عرفت بالكراهية والحقد والهيافة من امثال شوربجى وكتاحة وديدى وهلال وقاضى وعطالة حائل والرياض .. ايضا لم تجد من ابناء المريخ الا من اسود قلبه ليكتب فى الشأن المريخى فى تكرار ممل اكد بما لايدع مجال للشك ان القائمين على الأشراف هم من ذات العينة والطينة .. الرشاقة قتلت اشراقة دليل على ان من اعتمر السواد قلبه لن يقدم للناس سوى التافه من الأمووور .. صدقونى هذا الرجل يشغل مساحة لا يستحقها !!!!!!!!
       الرد على زائر
    • 6 - 1
      مدفع الدلاقين 11-26-2018 01:0
      ياعربي انقرع وبطل الفلسفة

      استاذ محمد سعيد يديك الحقيقة فى عينك

      ومزمل يديك ليها حقنة

      روح للمخدراتى وفكنا من شرك

      وانا عايز اسألك

      الدال اختصار لدفع الله الشريف

      ام هى دكتره حقيقية

      واذا كانت حقيقية

      انت دكتور فى شنو

      بتاع حقن وكده

      تهى تهى تهى
  • #7
    ود الخير 11-26-2018 09:0
    الزول ده زماااااان كان منضبط ومهذب وكويس بالله مالو مع مزمل يااخى بطل الحاجات دى وامشى انجح زى مامزمل نجح فى جميع الاصعدة واصبح رقم فى الصحافة السودانية بغض النظر مع اعجابى به اواختلافى معه وعلى مااظن شغلتك دى غيرررره منه ليس الا وعالج نفسك قبل الطوفان مايشيلك وربنا يشفيك من داء مزمل
  • #8
    مانديلا 11-26-2018 08:0
    بالله عليك انت كاتب!!!! دا يقولو عليهو شنو اسي!!!!! اوووووووف
       الرد على زائر
    • 8 - 1
      مدفع الدلاقين 11-26-2018 01:0
      لانه لا ينطق الا بالحق

      وانتوا بتاعين الجرعة

      خدر خدر يامزمل

      مزمل شغال فيكم تخدير بالكتابة

      وشغال تخدير فى اللاعبين بالبتاع

      البتاع البدوهو حقنة

      اسمو شنو ذكرني

      تهى تهى تهى
  • #9
    Sharaf 11-26-2018 08:0
    ظهرت بعد ٣ أيام وبعد الرجال ما كتبوا ..لن تكون اكتر من تابع ..والله انك حنظل
       الرد على زائر
    • 9 - 1
      مدفع الدلاقين 11-26-2018 01:0
      تابع انت ومخدرنك ناس مزمل

      لكن الكلام الدوغرى مابنفع معاكم

      ايها الدلقونابى

      خليك مع تخدير مزمزه بتاعك

      واتمزمزى

      تهى تهى تهى
  • #10
    احمد عثمانt 11-26-2018 08:0
    عوووع منتهي البياخه يا اشراقه.. عامل فيها ابو الفهم..يا اخي انتبهي وانطم..عووووع
       الرد على زائر
    • 10 - 1
      مدفع الدلاقين 11-26-2018 01:0
      والله عووووع انت

      الاستاذ بقول كلام زى الفل

      ونسبة لانك دلقونابي فهمك مطبل

      يبقى تنقلع انت وتنطم انت

      تهى تهى تهى
  • #11
    أبو محمد 11-26-2018 07:0
    يا مريخابى حتى الآن لم تعلق على فوز المريخ فى مباراته مع أتحاد العاصمى الجزائرى !!!!! .

    من هى أشراقة ؟ كقارىء يهمنى ان أعرف ما ترمى أليه من خلال عمود تكتبه دون عناء التفكير فى الكلام ( المغتغت )

    يا سيد أطرح اراءك بشكل مباشر .
  • #12
    nasir 11-26-2018 07:0
    لا أقول إنّك ضللت المسرح إلى الصحافة ،،، ولكن لخصت الحال المائل بما فيه الكفاية ،، لك الود وعاشراً بنقول ولا نمل من تكرار ذلك لو في ثلاثة صحفيين مثلك في عالم المريخ لتغيّر الحال المائل و بؤس الواقع المريخي الحالي ،،،
أكثر

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 07:0 السبت 19 سبتمبر 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019