من مفكرة الحكواتى ...!
كان ياما كان فى قديم الزمان لما كانت الفئران تروح للمدارس ، والارانب ينجعصوا على الطنافس ، والعليترات تركب على ظهر الخنافس ، والجن يطيروا بالمكانس ، حابس حابس .

وكان ياما كان لما كان الزيز يطير تحت الشمس ، والقطط بتلحس العسل والدبس ، والمظلوم يتختخ فى الحبس ، والخالوش يسابق النمس ، والهموم تكبس عليك كبس ، كانت الدنيا بخير وساترنا اللبس .

وكان ياما كان لما كانت القمحة فى الطاحونة ، والطاحونة مسكونة ، ساكناها الحاجة ميمونة ، ومعاها بنتها المجنونة ، واحدة بتكبس مخلل ، والتانية بتعصر ليمونة ، كنا عايشين فى امن وامان وحافظين الكينونة .

من يوم قمنا حامدين شاكرين بناكلها كسرة بملاح ، وجانا الزمان الاغبر خلانا لابنفرق بين الافراح والاتراح .. وبقت وجبتنا الرئيسية سخينة ، ياربى متين تنفرج علينا وهمنا ينزاح .

ان حكينا على الغلة والارباح ، بقولوا لا تكفر ارزاق ربك مقسومة ، وان حكينا على النهضة والاصلاح بقولوا هذه مش شغلتك هذه شغلة الحكومة ، والحكي ما بفيد لان الامور فيها محسومة .

واذا تعرضنا لسياسة الانفتاح ، بقولوا آرائك كلها ملغومة ، وان قلنا حى على الفلاح ، بقولوا خبرتك فى الدين معدومة ، واذا صمتنا بقولوا جالس مثل البومة ، مافى حل غير نحكي عن قصة مشكاح ،

والله فكرة رائعة وسليمة ، نحكي القصص ونترك الافكار العقيمة ، وتعالوا نشوف كيف مشكاح اتجوز ريما ، وبهذه الطريقة راح يظل الفكر مرتاح ، وفطومة اخت نعيمة .

خربشاااات :

** قرار الاتحاد بتقليص عدد اللاعبين الاجانب فى المباريات التنافسية ، يأتى على شاكلة الظروف الامنية ، والتعليمات التحكيمية . فالوصيف بامر الفيفا ممنوع من التسجيلات الشتوية .
** انزاح عن صدورنا هم الجاكومي ، وابتلينا بحميدتي ( تعيين حكومي ) .
** لن نتعجل ولن نتعقب ، يموت الزمَار واصابعه بتلعب .

اقعدوا بالعافية ... hamza99h@hotmail.com