*والمريخ كان منتظر شيء ومالقي أي شيء

*وكل شيء وليهو شيء والمريخ الما عندو شئ

*احلي ما في انتظار الامس ذلك الهمس وامل المريخاب الاوكتاب الما انقطع

*فحتي وهم منهارين من احفاد السلاطين كانوا متجهين بكلياتهم لكردفان الغرة ام خير جوه بره

*فسبحان مغير الاحوال من حال الي حال ناس كانوا منتظرين الاحتفال بقوا يفتشوا في الشكاوي ونتائج الغير

*الما اكلتو بايدك بمشي ويسيبك

*لكن ياشمسنا الضوايه وقناة الملاعب حزنكم ظاهر وعملتوها ظاهرة وين الساعه وعم سمساعه

*وهلالنا ده الما متلو شيء بقي قريب من اللقب وعندما يداعب الهلال اللقب يادوب الكان مؤمل بيتعب

*غايتو مباراة المريخ دي زي الشافعه المشوا قدوا ليها اضانه وما لقت الحلق

*يعني تاني نقول ياحليلم المريخاب في زول بركب الوتد وما عندو حق الخروف

*وناس الهلال ديل امبارح دوروا ليك في الوسائط شغل عجيب والجماعة لبدوا

*وصاحبنا امير الخليفه عبر حسابه اصلوا ما جامل وو ما احلي تغريدو عندما قال صدق الكاردينال عندما قال ستعود الستة نقاط !

* قال ايه ::نحن من نبعث الحياة للهلال من جديد ، و نحن من نضخ فيهم العزيمة .محمد الشيخ مدني .. امشي شوف مدارسك مع عبد الصمد ، مال اوكتاي وحده لا يخلق فريق ولا يحقق بطولات .

*وجمال سالم مخترق !! ياربي الاخترقوا منو والوصل لي منو !!

*ونقول سمح الغنا من خشم سيدو..

*والليله لا عندنا كلام مع لامين ولا عن هلال الملايين اصلوا الموضوع منتهي ومن راهن علي الاقمار ما خاب رهانه

*لامين ده ما اظن نصيح او طبيعي زول بلعب اربعة باكات في مباراة! حير ليك الزولفاني لمن غير فنيلتو

*غايتو لامين اشتغل شغل عجيب بشه دخل المباراة ما نفذ المطلوب طوالي غيرو ! ما عندو كبير يعني موعودين بمدرب تكتيكي من الطراز الفريد

*لكن اطهر الليلة غير والعمله سكتتنا وقفلة خشمنا ! اتاري كان عندو رأي ورايو براهو ! يا اخي تاني خليك قدام اوعك ترجع وراء ما دام دي خانتك المفضلة

*بويا وحسين الجريف عشرة علي عشرة خاصة في الكرات العالية وتناسق وتفاهم وفدائية

*الصورة اتغيرت

*وكسبنا الجولة وفي انتظار اللقب ونحنا ماشين بلد السلاطين

*نحنا ماشين بلد السلاطين ومنتصرين ما مهزومين ولا مضروبين

*والهلال بمباراة الامس حقق مكاسب عدة ! الشعلة هدافا للدوري الممتاز وسيد البلد علي بعد خطوات من الاحتفاظ باللقب

*وتاني نرجع للمريخ ومرسي الفاشر لو ما فاطر ما تخاطر

*وكأس السودان حافظوا علي السمعة ما يبقي زي قصة النقعة وحلاته الصقعه اصلوا اولاد كردفان ديل حارين ومن خمسة ولي فوق

*تبلدينا لي قدام والقادم احلي وفي انتظار التتويج اليوم كنا سلاطين وغدا سنكون علنا جهارا نهارا مع اولاد التبلدي مش اولادنا وكده

*الوضع الطبيعي ان يكون الهلال سيد اللقب ولا عجب

*في امدرمان في الواق واق في فاشر السلطان سيد اللقب

*ومازال الجماعة في رحلة البحث عن لقب !! ملحوظة الرجاء ابلاغ الاعلامية ميرفت بقناة النيل الازرق التغير الي البحث عن لقب بدل هدف!

*القصة والتفوق الهلالي ليست اسماء والقاب ! انها قصة روح وجماعية والفه وسحر خاص يتمتع به لاعبو الازرق

*قبل مباراة اليوم طاردت الاصابات نجوم الهلال واعمدته بشه الكبير والشغيل وجيوفاني ورغم ذلك تعامل لامين مدرب الهلال بواقعية وحقق المراد بما يملك من لاعبين

* لامين خلق من الهلال فريق جماعى وليس لاعبا واحدا أو لاعبين. ودون شك سيكون غياب الثلاثى مؤثرًا فى عمليات التغيير والتبديل أثناء المباراة إلا أن الفريق تعرض لغيابات سابقة ومضى منها بسلام وبنجاح.. لأنه فريق وليس لاعبًا.. !

*اكثر ما يطمئن الان ان الهلال قوته في الجماعية وفى قدرة لاعبيه على تنفيذ تكتيك المدرب الصارم.. هم جميعا يدافعون من أول نقطة إلى آخر نقطة. وهم جميعا يهاجمون بخطوطهم الثلاثة لتحقيق المطلوب

* مفتاح المباراة الأول ليس لاعبا أو ثلاثة. ولكنه الفريق وشخصية الهلال

*شكرا نجوم الهلال شكرا لامين ودوما منتصرين

كلمات حرة

*الو الزولفاني وين فارشين قصدي متي راجعين مضروبين ومقهورين

*وجود نمر في تشكيلة المريخ اكبر مكاسب الفرق الأخرى التي تعمد علي الاستفادة من وجوده

*واخونا الجعلي الحر فتحي الجعلي جنو رميات لكن ما رميه (النجمه ام ضنب البكاء والنويح مابفيدك...مابصح تتفلسفي وتمشي قدام سيدك ) (ديل ناسا كبار امشي قارعي نديدك....والفي (فاشر السلطان) كانت عواسة ايدك..

*مخير الله على عبادو .. المريخ إنضرب من اولادو

*اخر كلمة ملاريا غيبت الحكام قام انضرب الحمام

*كلمة حرة اخيرة ...الفاشر كيف ؟ وكيف