• ×
الأربعاء 25 نوفمبر 2020 | 11-25-2020
شوربجي

اخرج كردنه الي جماهير الهلال واعترف بالاخطاء

شوربجي

 24  0  2654
شوربجي




[[[]]] وان انتزعوا كل النقاط فالهلال عشقنا الابدي :

وكم احبك يا وطن

وكم احبك يا هلال

فأنت الملاذ وانت الخلاص وانت الوطن

أحبك مكانك صميم الفؤاد

وباسمك أغنى

تغنى السواقى

خيوط الطواقى

سلام التلاقى

ودموع الفراق

واحبك ملاذ

وناسك عزاز

أحبك حقيقه

وأحبك مجاز

وأحبك بتضحك

وأحبك عبوس

بعزة جبالك ترك الشموس

وما بين ظلالك

افتش وأكوس

أفتش طفولتى وملامح صباى

بناتك عيونن صفاهن سماى

وهيبة رجالك بتسند قفاى

أحبك بتضحك

واحبك عبوس

صحى بتملا عينى

وتشّرف غناى

بحضرة جلالك

يطيب الجلوس

مهذب أمامك يكون الكلام

لأنك محنك

عميق الدروس

مجيد المهابة

مديد القوام

شبابك تشابك

شديد الزحام

أراهم وراهم غبار الحياه

مداين تعاين

كأمّ العروس

تهلل تكلل جبين الإمام

رزازاً يبلل أغانى الخليل

أصدق كلامك حقيقه وبخاف

أخاف الطريق اللى ما بودى ليك

وأعاف الصديق اللى ما بهم بيك

معاك انتظارى ولو بالكفاف

وعنك بعيداً أبيت الرحيل

وبيك اعتزاز الصباح الجميل

جميع الأغانى اتكالن عليك

فمهما كان التآمر

ومهما كانت السقطات

ومهما شمت الاعداء

ومهما كتب المريخاب

فأنت يا هلال في القلب

وكل الدعوات لاهلنا في كسلا بأن يرفع عنهم البلاء

ومنها نعرج لوطني الهلال

وان كنا قد قلناها مرارا وتكرارا ولا حياة لمن تنادي

فكل خيوط لعبه كرة القدم في يد الكبار والكبار جدا

ولا ناقة ولا جمل لكائن من كان سواء كان الكاردينال او اكتاي او الشيخ مدني او جمال الوالي او الارباب او شداد او غيره

والضايعين في ( الطوشه ) هم تلكم الجماهير المسكينه

وقد اخذت علي حين غرة

ومعقوله من هلالاب تحالفوا مع مريخاب لجندلة الهلال

وانتقام بنظام ثأر الصعايده واتحاد اللقيمات الذي اقتلعه الهلال بسبب الفساد

فقاموا بتسفير صاج اللقيمات القديم من الخرطوم الي زيورخ

وكانت ( الصالحه ) حضورا ونتمني لكم سفرا سعيدا

ولا ادري ان كان الامر سيقف عند هذا الحد

فحتي الآن لا اخبار عن حضور كافالي او من ينوب عنه لاستلام الاموال

وخوفي علي جمهور الهلال العظيم من تبعات ذلك الزلزال

ولا تأكيدات عن امكانية الخصم من مجموع نقاط الدوري باكمله

واكيد اعداء الهلال سيقفون بقوة لخصم النقاط من دوري النخبه

فقط تطمئننا كلمات قرن شطه وقصص بعض الفرق التي اعادت الفيفا نقاطها

والدرس المستفاد من هذه المؤامرة ان تكون للهلال قوة داخل السلطه تحميه كما المريخ

والا فأن الهلال سيكون مكشوفا وسهل الاختراق



[[[]]] من هنا وهناك :


**** اخطر ما في الامر ان البروف شداد صرح بوجود ١٦ قضية ماليه اخري من الفيفا ضد الهلال والمريخ واهمها قضية غارزيتو وطبعا هذا امر قد يخيف اهل المريخ اكثر كما هو معلوم للجميع


**** اليس غريبا ان يسقط الهلال بسبب قضية واحده والحبة ما تجي للمريخ الذي كانت شكاوي اللاعبين في الفيفا بالجمله مارسيل ووجابسون وكوفي وديديه وغارزيتو وغيرهم


**** ادارة نادي الهلال مطالبه اليوم قبل غد بمراجعة كل المخالصات التي تمت مع محموعة المدربين او اللاعبين الذين انهت عقودهم الادارة - وده امر هام للغايه ويجب ان يأمر به الكاردينال اركان حربه والا فاذنوا بحرب من جماهير الهلال ان حدثت مشكلة جديده مع الفيفا


**** ما يدمر الهلال هو ذلك الجدل البيزنطي ما بين المعارضه والكاردينال بخصوص لاعبي المريخ بكري المدينة محمد عبدالرحمن التش بيبو سيف تيري - وان كنت لا ادري ماذا فعل هؤلاء للمريخ هل فقط سجلوا هدف او هدفين او محاوره بسيطه صرخت لها الجماهير السؤال هل اخرج هؤلاء المريخ من حفرة الوصافة التي ظل فيها ردحا من الزمان


**** حتي الآن لا افهم مفهوم المعارضه الهلاليه وفهمونا ايها الديمقراطيون ولو سمحتوا - فهل الديمقراطيه هي العداء والتخوين والتبخيس ونشر الغسيل والشكاوي - فلا اظن اخوتي ان هذه هي الممارسه الديمقراطيه الحقه - ولو عرف صناع الديمقراطية في هذا العالم بالامر لماتوا كمدا

فمثلا صلاح ادريس حكم الهلال وحيدا وضيع الشعار وحارب البرير وحارب الكاردينال يعني الرجل ديمقراطي ١٠٠٪ في رأي انصاره


**** اسمه في النهايه الدوري الممتاز السوداني لعام ٢٠١٨ ولا يسمي الدوري الممتاز السوداني الدورة الاولي ودوري النخبه السوداني الدورة الثانيه ٢٠١٨ - فنتائج الدورة الاولي هي من خلقت دوري النخبه وفرق دوري النخبه تم ترشيحهم من دوري الدورة الاولي للممتاز وهداف الدوري هو من احرز اكثر عدد اهداف في كل الدوري لهذا فخصم نقاط الهلال يجب ان يكون من المجموع الكلي او الدوره الاولي


**** لعب فريق الهلال امام حي العرب مباراة ممتازه ولم تظهر علي اللاعبين آثار قضية النقاط المنزوعه وفازوا والحمد لله ونالوا اعجاب هلالاب بورسودان الذين شحعوا الفريق بقوة


**** كنت اتمني ان يخرج الكاردينال لشعب ويخاطبه بكل الحدث وبصراحه وحتي يقفل باب التأويلات الذي امتلأ بالكذابين والمنافقين واعداء الهلال المدفوعين من فلان وعلان -

اخرج كردنه الي جماهير الهلال وخليك شجاع واعترف بالاخطاء فكلنا خطاء


محمد الحسن شوربجي


امسح للحصول على الرابط
بواسطة : شوربجي
 24  0
التعليقات ( 24 )
الترتيب بـ
الأحدث
الأقدم
الملائم
  • #1
    جلابي الدوحة - قطر 09-25-2018 06:0
    قضية في عمرها عامان ونصف العام وتقول مؤامرة من المعارضه مع المريخ ....كنت تسال نفسك المليئه بالاتهامات لماذا لم يدفع كردنه من سنتين ونصف يعني الفيفا ود عم المريخ صابر عليكم سنتين ونص وقضايا المريخ لم تتعدي الاشهر البسيطه لكن نقول شنو الفيفا ود عم المريخ ذلك المريخ الذي يقف شامخا بكل مشاكله وبكل المؤامرات التي حيكت ضده وما زال متماسكا وبرضو الفيفا ود عم المريخ ولو عاوز تسال اسال حي العرب السوكرتا وين دسو 9 لاعبين وليه مرمي الهلال محرم علي المهاجمين وليه رفض اصحاب الضمير الاشتراك في الدنائه والخباثه المعتاد عليها المدعوم لكن نقول شنو الفيفا ود عم المريخ تتكلم عن بكري والتش والغربال وتيري ما عندنا شي نقولو بس ديل اولاد عم الفيفا ... حرقة وحقد وفتن وتاويل وكذب وعدم خجل من القلم الشريف البريء وعدم خجل من القاريء وعدم خجل من لقب صاحبة الجلالة ...اكتب يا هذا فانت تكتب بيدك ما ستراه في الجحيم
       الرد على زائر
    • 1 - 1
      إبراهيم محمد الحسن 09-26-2018 09:0
      عارف الوجع في الجوف شدييييييد ..

      حاجة شوربة إتصبري ..

      إتصبري ..

      إتصبري ....
  • #2
    ود الموردة 09-25-2018 04:0
    يا جماعة شوربة ام فتفت. حالتو يُحنن الكافر مسكين ياشوربتنا. راح فى حق الله
    يا شوربة. هل تعلم. الفيفا. طلع. مريخابى. وكمان شداد معاه وفى القريب العاجل كردنة سوف يعلن انه. مريخابى الدور. على المشجعين الصغار جهز. نفسك وأختم حياتك. بتشجيع المريخ. لو الصفوة وافقوا
  • #3
    أبومحمد 09-25-2018 02:0
    صدقونى ماقادر اكتب اى حاجه ودائما بقول لايستحق الرد لانو خالى المحتوى
    الوصف الوحيد الذى يمكن نطلقه على هذه البكائيه هذا ماجنيتوهو من كسير التلج وصحيتو على الماء الساخن والله الصحافه فى محنه اتمنى ان ليقرا مثل هذا العمود فى الخارج لقيمات وزيورخ وماادراك عمود خالم بارم
    الحمدلله اقتنعت ان المريخ افضل منك واستطاع حل مشاكله مع الفيفا لان صحافة المريخ تبصر الاداره وانتم تكسرو التلج ارجو ان لاتحشر المريخ فى شأن لايخصه لعلمك ال16 قضيه اتنين فقط تخص المريخ مع غارزيتو والحمدلله اليوم انتهت وال14 كلها فى الهلال شكلكم التالته مابتمسكم لان العقوبه القادمه انزال الدرجه الادنى فالادنى عيييك الايعملو ليكم درجه جديده
  • #4
    هاشم هاشم 09-25-2018 01:0
    فول مصري
    فول مدمس
    فوفانا فات خلانا
    فوفو وعمك تنقو
    فوووووووو.. الهلال فات
    الفات الفات في ايدينو 6 نقطات
    فكة ريق.....فكة ود خالتي مكة
    فييفا فيفا جد مخيفا الفيفا جاتكم وخصمت.......
  • #5
    SAYED ABDOUN 09-25-2018 01:0
    استحي واكتب مثل الأخرين واعترف بأن الأدارة فاشلة وأن القوة المالية ضاربة

    طول عمرك طبال قل قولة حق بعد أن شاب العمر

    انظر ما يكتبه صحفي الهلال كلها اعمدة نيره وصادقة ما فيها نفاق وكذب
    حاول استفيد منهم واقرأ ما يكتبون

    فطومة معذوره لانها انثي ولكن لاعذر لك فقط اذا كنت مصاب بالزهايمر
  • #6
    محمد الفاتح عمر عثمان 09-25-2018 01:0
    كان بتحب الوطن تعال أقيم فيه ما تدور ريال الخليجيين
    وكان بتحب الهلال تعال أسكن العرضة شمال
    خليك من الكلام الفاضي البتخدع بيه الناس الغبش
    قال بحبك ياوطن تحبه وقاعد بعيد منه تعال للصفوف الطويلة دي
  • #8
    جعفر صالحين 09-25-2018 12:0
    بورشة لا يستحق كل هذه الردود على عموده الأسود .. هذه هرطقات واحد محبط وخجلان من الحاصل للهلال ... اين القوة المالية الضاربة ؟؟ اين التحدى الذى رفعه كردنة كل يوم ؟؟ من فضلك لا تقحم المريخ فى سقطاتكم .. والكاردينال لن يخرج للجماهير كما طلبت لأنه لا يحترم هذه الجماهير التى تتحدث عنها .. فضحتونا
  • #9
    أبو محمد 09-25-2018 12:0
    **** اسمه في النهايه الدوري الممتاز السوداني لعام ٢٠١٨ ولا يسمي الدوري الممتاز السوداني الدورة الاولي ودوري النخبه السوداني الدورة الثانيه ٢٠١٨ - فنتائج الدورة الاولي هي من خلقت دوري النخبه وفرق دوري النخبه تم ترشيحهم من دوري الدورة الاولي للممتاز وهداف الدوري هو من احرز اكثر عدد اهداف في كل الدوري لهذا فخصم نقاط الهلال يجب ان يكون من المجموع الكلي او الدوره الاولي ).

    يا سيد الفيفا بتقول تخصم النقاط من المسابقة الجارية ... وقع ليك ... الجارية حسع دوري النخبة ... أنت بتعرف أحسن من الفيفا ؟
  • #10
    ابوعكر 09-25-2018 11:0
    شوربة الله يستر عليك من الكنكشة والتشتشة
    شوربة طلع لسانك كبير وقول وه
  • #11
    Abojeddo 09-25-2018 11:0
    قلت لي زولك بتاع الاهلية كيف ؟؟؟؟ متواصل معاهو وللا خليت الشغلة وتبت ؟؟؟؟
    مرة واحدة كن شجاعا وقل الحق ... على قول شبونة .. اعوذ بالله
       الرد على زائر
    • 11 - 1
      اب عاج 09-26-2018 12:0
      ههههههههههههههههههههههههههههههههاي
  • #13
    عزالدين وديدي 09-25-2018 11:0
    قول احبك مخصوم واحبك طيش واحبك متشوش التش تش الهلال وبيبو ردم الهلال وتيري جاييك يوم السبت اركز يا طيش الجعرانية
  • #14
    تونجيلا 09-25-2018 11:0
    سلامات عمنا شوربة قالوا الفيفا جاتكم باللفة اقصد بالدقسة... دحين عرفت الفرق بين المريخ والهلال فى فن ادارة الازمات " كردنة عامل حريف قال يجرجر فى الخواجة لحد ما يترك حقو الخواجة ما قصر جراكم ورمى ليكم الجوكر بايظ تفحطوا للاسئناف ولشداد دون فائدة العام المقبل نشوفكم منورين الجعرانية مع ناس سونقو.
  • #15
    محمد ابوبكر 09-25-2018 11:0
    يبدو لي انك ما فاهم اي حاجة وما اظنك تفهم بعد فات فيك القوات.احسن ليك ما تكتب ولا حرف لانو نوعك دا ونوع شجرابي هم من ضلل ويضلل الرأي العام ويثير الكثير من الغبار الذي يحجب الرؤية عن القضايا الأساسية.انت جنك المريخ خاصة عندما يرفع المريخاب شعار احلامكم جزء من ماضينا. فانت في نفس المقال تسب المريخ وتجي تقول عاوزين زي المريخ عندنا أصحاب نفوذ.ثم ثانيا نسيت انت والشترابي عندما كنتم تضربون طبول الفيفا لحرق المريخ واللعب في دوري الشمس الحارقة.هل نسيتو كل ما ما كتبتموه وهو موثق وموجود ارجو إعادة قراءته اليوم ليعرف كل واحد بما كان يهرف. ويخوض في الآخرين منصبا نفسه علامة زمانة وحكمه العدل...
    المهم شد حيلك شوية وسيب الجرسة وارجي الراجيك لتتعلم من المريخ والايام والتاريخ.
  • #16
    ابومحمد 09-25-2018 11:0
    قلتها من قبل وسوف اكررها مرارا وتكرارا نادي انتم كتابه سيظل ابدا الدهر في هذا الوضع السئ , فسيطرة نظرية المؤامرة علي تفكيركم وعدم الاعتراف بالاخطاءالادارية والفنية والبحث عن الحلول لمعالجتهاهو مايؤدي لحصد هذه النتائج
  • #18
    أيمن حسن 09-25-2018 10:0
    ( قضية غارزيتو وطبعا هذا امر قد يخيف اهل المريخ اكثر كما هو معلوم للجميع )
    إنت واعي ياشوربة ،، قول واي ،،
    قروش غارزيتو إندفعت زمان ،،،
    وتاني برضو قول واي ،،، شوربة عدس
    المرة الأولى كانت غربلة ، والمرة التانية كانت تشتشة
    والمرة الثالثة والجاية ،، شكلها حتكون شنو ياربى ،،
    هههه ، قول إنت ،،،
    نقاطكم الستة شاله أب ستة ،،،هههه
  • #19
    ابو محمد 09-25-2018 10:0
    الله يعينك بس اختفيت كم يوم و ظهرت ما بتقدر تقول شي فاطمة الصادق بتهرشك.
  • #22
    ياسر الشيخ 09-25-2018 09:0
    مقال يضحك .. جاري ناعم و البكى و الجعير باين ..
    الفيفا يا اخت بلادي يا شقيقه
    قول واااااي
  • #23
    كمال وديدي 09-25-2018 09:0
    ههههههههه اللهم لاشماتة..حالتك تحنن والله..بكري المدينة ومحمد ع الرحمن وبيبو والتش هم أحسن اللعيبة في البلد بإعتراف الهلالاب النضاف..إنت موت بحقدك وغلك وقلبك الأسود ...
  • #24
    Mars 09-25-2018 09:0
    كلما أقرأ لجدو شوربة أقول ملعون أم أبوالواسطة حتى فى *الدوحة*آه على الحظ سبع صنايع والبخت ضايع
    تهديها لجدو شوربة
    مرة أسرح ***ومرة أفرح***

    ومرة تغلبنى القراية***ولّمن أكتبلك وداعاً***

    قلبى ينزف فى الدوايا ***يا صبيّة***

    ***الريح ورايا*** والصفر غاية ***
    ***اللهم أدم عليهم صفرهم ليوم الدين *** آمين
أكثر

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 02:0 الأربعاء 25 نوفمبر 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019