• ×
الأحد 27 سبتمبر 2020 | 09-26-2020
عبدالمنعم هلال

الوصيف يقتات من الهلال والحكام

عبدالمنعم هلال

 16  0  2094
عبدالمنعم هلال
- لولا الهلال لما كان المريخ ف(الضل) يتبع صاحبه والهلال وهب ضله الكثير من (الخيرات) وأنقذه من الفناء و(الممات) ..!!
- من المعروف أن الوصيف لا يعيش إلا علي دفرة الحكام والحكومات ونيل الهدايا ومد (القرعة) للحصول علي (الهبات) من أموال و(نقاط) والوصيف نال ما نال من الحكومات المتعاقبة من حكومة مايو بقيادة المرحوم المشير نميري وحتى حكومة انقاذ الوصيف لم تبخل جميع الحكومات ولجان التحكيم علي الوصيف بشئ فمن المعروف أن الوصيف هو النادي المفضل للأنظمة الشمولية والفريق المدلل للعسكر والحكومات والحاكم والولاة ..!!
- غير دعم الحكومات يظل الهلال هو الداعم الأول للمريخ فمن خيرات الهلال يعيش الوصيف ودعم الهلال المادي والعيني للمريخ لم يتوقف يوما ما ، وعندما كشف رئيس الهلال الأسبق صلاح إدريس عن دعمه وتبرعه بمبلغ 100 ألف دولار لتأهيل أستاد المريخ أنبري له الاعلام الأحمر مهاجما ومنتقدا ومكذبا وحتى الكاردينال الرئيس الحالي للهلال دعم الوصيف بالمال ولكن تبقي الحقيقة التي لا تخفي علي أحد وهي أن المريخ يعيش علي دعم الهلال ويتمرغ في تراب نعيمه وحتي أوقاف الهلال يذهب جزاء من ريعها لدعم المريخ فقد أوردت دورية (سنابل الوقف) والتي تصدر عن أدارة الإعلام والعلاقات العامة بهيئة الأوقاف الأسلامية ولاية الخرطوم العدد الثالث لشهر أبريل 2009 أوردت خبرا جاء فيه أن الأوقاف السودانية لم تغفل الرياضة حيث أوقف الرياضي المطبوع وقطب الهلال كمال راشد كيشو وضمن أوقافه ريعا لأندية الهلال والمريخ والموردة وظلت هذه الأندية تتلقي سنويا نصيبها في تنفيذ شرط الوقف من ريع أوقاف كيشو ونادي المريخ (يقوم حاليا ببناء مئذنة مسجده من عائدات ريع وقف المرحوم كيشو) ..!! أنتهي خبر دورية الأوقاف ..!! وحتى مئذنة استاد المريخ تم تشييدها من ريع وقف الهلالي المرحوم كيشو ..!!
وهكذا يتضح أن الهلال شريك أساسي في نهضة المريخ وفي تشييد منشآته وداعم رئيسي للوصيف ومع ذلك يكابر اعلام الوصيف ويتفخشر ويتبطر ويتكبر مع أن ناديهم يعيش من عائد ريع أقطاب الهلال أمثال المرحوم كيشو ومن دعم الحكومات المتعاقبة حتى يومنا هذا ..! وما خفي أعظم ..!!
- مساهمة سيد البلد في نهضة الوصيف مستمرة من قديم الزمان وحتي وقتنا هذا فقد أهداه من قبل المرحوم حسن أبو العائلة وجمال الوالي هذا علي مستوى الادارة والرئاسة ويدعمه سنويا من عائدات ريع قطب الهلال المرحوم كيشو ويدعمه ميدانيا داخل المستطيل الأخضر فقد تصدق عليه بفلذات كبده من لاعبيه المهرة منهم ريتشارد وطمبل ومجاهد وكليتشي والباشا وغيرهم كثر وأهداه حاليا بكري ومحمد عبد الرحمن وهما العمود الفقري للوصيف وهكذا يأكل الوصيف من خيرات الهلال لا يشبع ولا يشكر إنما يتنمر ويتكبر ولهدايا الحكام يتنكر ..!!
- الوصيف ينعم بخيرات سيد البلد ولا يحلو له العيش إلا مما يجود به الهلال ..!!
- أولاد سيد البلد هم الأفضل بالمريخ ولولاهم لهبط الوصيف لدوري الشمس الحارة..!!
- جامعة الهلال تدعم المريخ بطلابها النجباء لاعبين وإداريين وتسهم في تأهيل وتعليم ورقي وتقدم الوصيف وتتكرم عليه بالاداريين واللاعبين والأموال وريع الأوقاف الهلالية ..!!
- الوصيف يعيش في جلباب سيد البلد ولا يستطيع خلعه والاستغناء عنه أبدا..!!
- الوصيف في جاه الهلال يلوك ...!!
- المريخ استفاد من سيد البلد فوائد لا تحصي ولا تعد في الكيف والعدد ..!!
- في الوصيف (اوكتاي) يدفع والشكر لناس (هناي) ..!!
- بعض الكومبارس يلعبون دور (البطل) ويتبنون كل ما (حصل) ..!!
- الحديث اليومي عن التحكيم بطريقة مقززة وممجوة والأدعاء بأن الحكام يظلمون المريخ حديث يحمل بين طياته الكثير فهؤلاء القوم يريدون التأثير علي الحكام واستمالتهم الي جانبهم وذلك حتي يحافظ المريخ علي فارق النقاط بينه وبين سيد البلد وينال البطولة بأمر التحكيم كما فعل في بعض المواسم وقد نجحت حملة اعلام الوصيف في ارهاب (الحكام) وجعلتهم يحللون (الحرام) ..!!
- الهجوم المنظم من الإعلام السالب ضد (الحكام) أهدافه واضحة ومراميه معلومة للخاصة و(العوام) ..!!
- المخطط المريخي يعمل علي ارهاب الحكام حتي يقفوا الي جانب الوصيف ويهدوه البطولة زورا وبهتانا وانحياز ..!!
- التحكيم يتحكم في مسار البطولة وفي تحديد الاندية الهابطة وجميع الفرق لا تهش ولا تنش..!
- أذا لم ينتبه الهلال لهذا المخطط المريخي ويحبط هذه المؤامرة الحمراء الدنيئة ويفك هذا الرابط بين الوصيف والحكام فسوف تضيع منه البطولة بما يفعله حكام (عامر) الذي بسمعة التحكيم يتلاعب و(يغامر) ..!!
- ويتواصل الانحياز (السافر) من حكام (عامر).!
- (شانتير) أنقذ (الطير)..!!
- احتسب وقتا فوق الوقت الإضافي حتى أحرز الوصيف هدفه في شباك (حي العرب) ثم أنهى المباراة و(هرب) ..!!
- شانتير تغاضى عن ضربة جزاء لحي العرب أوضح من ميناء بورتسودان في عز النهار ..!!
- الوصيف يدخل كل مباراة بعدد 13 لاعب وأهم لاعبيه صاحب (الصفارة) وأصحاب (الشارة) ..!!
- عندما يفتقد الوصيف (الحكام) يكثر النويح ويتباكى الاعلام السالب ويطلق السهام و(النبال) ..!!
- علي إدارة الهلال المطالبة بحكام أجانب أسوة بدوريات الدول التي من حولنا وعندها سوف يعرف الوصيف قدره وتنكشف عورته المغطاة بصافرة حكام عامر ..!!
- تم ايقاف خالد النقر (نصف عام) وغضوا الطرف عن معاقبة (فتوات الحمام) ..!؟
- صلاح نمر والعجب وأمير كمال يشاركون مع الوصيف بقوة عين وبانتظام وكل الذي فعلوه بالحكك النور في مباراة القمة مر مرور الكرام ..!!
- أعاين فيهو وأضحك وأمشي وأجيهو راجع ..!!

ظل أخير

الخير في الناس مصنوع اذا جبروا
والشر في الناس لا يفني وان قبروا
وأكثر الناس آلات تحركها
أصابع الدهر يوما ثم تنكسر
امسح للحصول على الرابط
بواسطة : عبدالمنعم هلال
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    السما الاحمر 09-23-2018 04:0
    مستحيل يا كفر ووتر تتركوا غيكم القديم وحمايتكم لهذا الكاتب والاخر شوربجي .. ليه ما ينشروا تعليقي هل انا اساءت له وهل ما كتبته أسوأ من عموده الذي ينضح إساءة وسب وتجريح للمريخ.
  • #2
    السما الاحمر 09-23-2018 01:0
    هلال ابو حصانة ... كفر ووتر كلامك صادف قلبا خاليا فتمكنا
  • #3
    هاشم هاشم 09-23-2018 12:0
    الضرب حاااار....... احي يا محاسن كبي جرسة
    ياعم انت جاي طيش المجموعات بي 3 نقاط طيييييييييييييييييييييييش
    حكام مين ؟؟؟؟؟؟؟؟؟؟؟؟؟؟؟؟؟ ماعندكم تيييم ؟؟؟ ما تدلسو وتكضبو علي الناس....... اكتبو بي موضوعية عشان الحال يتصلح..
  • #4
    السما الاحمر 09-23-2018 09:0
    اكيييد ما حاتنشرو تعليقي وكم وكم .. اتقوا الله يا ناس كفر ووتر كفاية حماية لهذا الموتور.
  • #5
    السما الاحمر 09-23-2018 09:0
    يوووه الكلام ده اتكتب قبل عملتك يا فيفي يقطعك يختي ويقطع عمايلك البتدمر الدماغ وتخلي الواحد يهذي..يا ابوهلال نسيت تضيف الفيفا كمان ما عاقبت المريخ رغم الشكاوي الكثيرة هههههه تمشي وين النقطة منك الولد تيري وتشتش وبيبو وحمزه الاسد نسيت اضافتهم للغربال والعقرب.. انت بطريقتك دي الجلطة حاتكون مدمرة انصحك بالابتعاد عن الزعيم وخليك مع سحب الجنسيات وتحريض الانضباط على معاقبة لاعبي الزعيم قامت فيفي اللبطلت ترقص تاني خصمت ٦ نقاط والسبب طبعا المريخ لأن اوكتاي صديق ريس لجنة الانضباط في الفيفا كمان احمد أحمد قالو بيعشق المريخ من زمن دحدوح ومعجب بجمال ابوعنجة الشرس والبروف شداد في الأصل صفوة وزعيم اداريي السودان .الكلام دا كل عن المريخ ما بفيدك بشي غير يزيد الضغط ونوبة السكر واتنقطي يا فيفي يختي يقطعني لو المقال دا ما اتكتب قبل قرار ال ٦ والمدعوم عندو نكبات اسمها ٦ من سجل اب٦ ودفع فيهو ٦ وشطبه قبل شهر ٦ واليوم يا فيفي تاخدي ٦ الهلال اب ستة.
  • #6
    طارق 09-23-2018 03:0
    الطير من يشجعون فريقا رصيده صفرا لقرن من الزمان
    المدعوم ما قاله كابتنكم ل17 سنه وتهافتكم علي نيل الدوري المحلي تعويضكم للنقص الدولي زورا وبهتانا
    الظل من يحاول يكون أصلا بأقرب طريق وأي وسيله
    والحكام الأجانب طالب بهم الزعيم بعد أن مل من خبثكم ولكن أصر كاردينالكم علي حكام الدعم للبطولات الزيف
    وبالحكام الأجانب ضربكم الزعيم في البطوله الافريقيه ولكنكم من الغباء أن تظن الناس خيرا
    خيركم ده حاسبوا كافالي والجايين بعدو ولا تلاقوا فريقكم في مكانة الطبيعي لأنه لا يستحق الوصافه سيد اللبن والصفر بي جاي
  • #7
    اشرف محمد حسين 09-22-2018 03:0
    لا عليك الله انتو كربمين للدرجة دى ...والله كلامك القلتة ده اى زول ممكن يقولوا....والله خسارة زيك يخلو يكتب بدون علم ...هسع كلتمك ده ناس الهلال زاااااااتو بصدقوا .
  • #8
    بابكر مكاوي 09-22-2018 01:0
    اوووووووووووووووع...اووووع...ياخي احترم سنك احترم آدميتك احترم عقول الناس ....ياخ انتو ل متين ...او الاصح ياخ جيتو من وووين انتو...من حفر الضلاق وشقوق الوسخ ...ياخ بتبالغوا..بس نعمل شنو ...والبلد ماشه بالمقلوب...هسا انت معقول صحفي !!!؟؟؟
  • #9
    د . الشريف 09-22-2018 01:0
    اعجب والله لكاتب بلغ من العمر عتياا يسمح لنفسه بنشر مقال بهذا المستوى الفكرى الضحل .. كان من المفترض ان يكون امثال كاتب المقال قدوة لصغار إعلامى الهلال ولكن هيهات .. من الطابيعى لمن كان هذا حالهم ان تقودهم الحيزبون وتابعها روشا .. لم يستغل كاتب المقال المساحة التى منحتها اياه كفر ووتر فى تقديم فكر يفيد فريقه بل تمادى فى سرد وقائع ابقته فى النهاية عاريا امام الحقيقة والقراء... ثلاثة من أعمدة فريقه الحالى اتوا من المريخ .. اصبح فريقه اول نادى سودانى تعاقبه الفيفا بخصم ست نقاط لعدم تنفيذ التزاماته التعاقدية .. وهو النادى الوحيد فى السودان الذى ارتضى إعلامه ان يرأسه مدان فى جرائم مخلة بالشرف والأمانة .. الإحترام هو أحد القيم الحميدة والنبيلة .. من يحترم نفسه يحترمه الناس .. هل يعى هذا المراهق العجوز ان اغلب اهل السودان لا يحترمونه لأنه لا يحترم زعيم الكرة الأوحد فى السودان .. امثال كاتب المقال يظلوا منغمسين فيما لا ينفع ومن ثم ياتى يوما يصبحوا فيه أثرا بعد عين عفا عليه الدهر والعياذ بالله !!!!!!
  • #11
    Hajjam 09-22-2018 12:0
    سعى عامر عثمان مسئول لجنة الحكام بالاتحاد السوداني لكرة القدم لتجريم مدير الكرة بنادي الهلال خالد النقر بشتى السبل وكشف متابعات المشاهد الدقيقة الى ان عثمان تحدث مع اعضاء لجنة المسابقات حول الوقائع التي شهدتها مباراة القمة وما وجهه له مدير الكرة بنادي الهلال من اساءات شخصية الا ان لجنة المسابقات استبعدت اقواله وطالبته بشكوى مكتوبة ضد النقر باعتباره مراقبا لحكام تلك المباراة الا انه فضل الانسحاب من القضية ولم يستبعد مصدر مطلع وقريب من اللجنة بأن بكون عامر عثمان قد حرض الحكم النور عبد الله على تضمين واقعة النقر في تقريره والذي حوكم النقر بموجبه بالايقاف لست اشهر.
  • #12
    الضكر 09-22-2018 12:0
    اب كسكته عمل يافكيك

    دا اب لويس دا يمسك فيك تاني متنفك

    بني زرقان حايعانوا دا الا يفكهم منو الله بس

    بالموت لكن هو حي دا رئيس الهلال لي 50 سنه قادمة

    اجعروا يابني جعران
  • #14
    جعفر صالحين 09-22-2018 08:0
    ستظل عقدة ضربات الجزاء تطاردكم ياهلالاب .. اين القوة المالية الضاربة ... اولاد فتحية شربوا مارووا
  • #15
    جلابي الدوحة قطر 09-22-2018 08:0
    اخجلو ياناس القوه الماليه الضاربه ...المريخ المريخ المريخ ..شوف حال فريقك المعرض للهبوط وخصم النقاط ..افضل ليك من ان تجري ورا المريخ ...شفت اخر جريكم ورا المريخ وترككم القضايه المهمه لفريقكم ودتكم وين . لا دوري ولا تمثيل خارجي وقريبا الهبوط ..ولسه شغالين بالمريخ
    الخجل وين ..فتحيه وقعت
  • #16
    الضكر 09-22-2018 08:0
    اللحق بني زرقان السنة دي لا ابطال لا جعران

    دي سنة الرمادة وانا اقول شداد مالو بهضرب الايام دي

    وباني مالو حردان

    ياود هلال والله رحتوا شمار في ورقة اسف مرقة
أكثر

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 10:0 الأحد 27 سبتمبر 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019