• ×
الجمعة 29 مارس 2024 | 03-28-2024
حسن فاروق

لو عايز تعرف سبب انهيار الهلال ركز مع الاوسكار

حسن فاروق

 0  0  3343
حسن فاروق
ممكن نتخيل زول براهو بيعلن للناس إنه ادوهو اوسكار في حاجة إسمها الحكم الرشيد والنزاهة الرياضية وانه الأدتو الاوسكار جهة إسمها الاتحاد الرياضي لمكافحة الفساد وتابعة للإتحاد الدولي لكرة القدم (فيفا)، وبعيدا عن إنه ماف جهة تابعة للفيفا إسمها الإتحاد الرياضي لمكافحة الفساد الرياضي، وانه جسم عملو زول في دولة عربية وبيحاول يخلق بيهو وجود، بإختصار ومن الآخر زي مابقولو ماف اوسكار تم تسليمه للرئيس (المالعب) الذي أدمن الكذب في أشياء كثير تتعلق بالشأن الرياضية وتحتاج أكاذيبه لمساحات ومساحات حتى نتمكن من حصرها.
خبر الاوسكار في النزاهة ( ودي ذاتها نكتة) ظهر في يوم 30 مارس 2018 ونحن اليوم 20 يوليو 2018 ولم يتم تسليم الرجل الاوسكار المزعوم، والحاجة البتخلي الواحد يشفق على الهلال من شخص أصبح في غفلة من الزمن رئيس مجلس إدارة النادس، إصراره على وضع صورته مع الاوسكار الخيالي في لوقو قناته الفضائية، الفضيحة وين؟ ماقادرين يثبتو إنه في اوسكار حقيقي قاموا عملوا شنو ، جابو صورة اوسكار براها، وجابو بعدها صورة للرئيس أب كستة وختوهم جنب بعض، طبعا كانت ح تكون أجمل لو في صورة وهو مستلم الاوسكار، أكتر من اربعة شهوروالصورة معلقة في الشاشة وخجلانين ينزلوها،ده مستوى فهم رئيس نادي الهلال.
عشان كده بستغرب لما زول يقول ليك الشفناهو أمبارح أمام الفريق الموزمبيقي ده ما الهلال، والأغرب لو سالته آخر مرة شفت فيها الهلال هلال متين مابتلقى أي أجابة، الهلال أصلا ضعيف ومتراجع منذ اربعة مواسم، وكل موسم يمر يكون أضعف من الذي سبقه، وفي كل الأحوال لوعايز تعرف سبب إنهيار الهلال ركز مع الأوسكار.
ركز مع الأوسكار ح تشوف رئيس مجلس إدارة متواضع القدرات، ضعيف، يكذب بدون مايتجمل، وح تفهم تلقائيا ليه ده ما الهلال، ولو ركزت أكتر مع الاوسكار، ح تلقى مستحقات اللاعبين، وحوافزهم المتاخرة، ح تلقى أكتر من عشرين مدرب مروا خلال التلاتة سنوات ونص المرت من رئاسته لنادي الهلال، وح تلقى تصفية الحسابات مع اللاعبين، وح تلقى أجواء عكرة في الفريق وحوالينو، ح تلقى القوالات والعيون المزروعة لنقل مايحدث داخل الفريق، ح تلقى قهر اللاعبين وحجب مستحقاتهم المالية لانه بتاع الاوسكار شاف إنه اللاعب الفلاني إتسبب في هزيمة الفريق، لو ركزت مع الاوسكار ح تلقى فريق مضعضع مهزوز بدون قوام او عضم واضح، ح تلقى في كل مرة في لاعب شماعة ( الزول ده مرض ماعندو حاجة أشطبو غيروهو مايلعب كلو كلو).
ركز مع الاوسكار وشوف الكسكتة ولوقو القناة وإقتحام التدريب، وعشاء اللاعبين وغداء اللاعبين ومخاطبتهم، وتهديدهم، والحوافز الدولارية (كضب زي الخمسين المليونية) ركز مع الأوسكار ح تلقى محنة الهلال، ظاااااااهرة ماعايزة شرح ولا سؤال ولا دهشة واستغراب. فقط ركز مع الاوسكار.
امسح للحصول على الرابط
بواسطة : حسن فاروق
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019