((())) انتخابات الهلال تراوح مكانها :

ومازالت انتخابات الهلال تراوح مكانها ومن الاربعاء الي الجمعه الي الاربعاء وبالعكس

والطعون تتواصل وما ادراك ما الطعون

وقد كانت ٣ طعون من قبل

وازدادت مرة اخري وكلها رغبة في اسقاط الكاردينال

ولسان حالها يقول :

مين قال ليك ابني جوهرة زرقاء ؟

ومين قال ليك جيب باص للهلال ؟

ومين قال ليك نحن دايرين اسانسيرات ؟

ومين قال ليك نحن داير مظلات ؟

ومين قال ليك نحن دايرين فندق ؟

ومين قال ليك نحن دايرين نادي اسرة ؟

يا اخي نحن دايرين زريبتنا بتاعت زمان

ودايرين نادينا القديم بتاع زمان

ودايرين سلالمنا المكسره بتاعت زمان

وما دايرين مظلات ودايرين الشمش دي تحرق روسينا

وما دايرين باص وحنأجر ركشات

وما دايرين فندق وحنوم تحت الشجر

وما دايرين نادي الاسرة ما في واحد في الخرطوم

طعون وطعون وطعون ونحن مندهشون

وطعون وطعون وطعون ونحن متفرقون

من قبل اتهمنا الارباب بحكاية الديون

واتهمنا البرير بحكاية الديون

والآن نتهم الكاردينال بحكاية الديون

وان الجميع قد ورط الهلال

فهل اصبح العرف ان يورط رؤوساء الهلال نادي الهلال

انها حقا ديمقراطية عرجاء تجلب لنا من يورطونا بالديون

وكل مرة نصفق لهذه الديمقراطية العرجاء ونعود بها فرحين

وبصراحة نظام المريخ الغير ديمقراطي اثبت انه هو الانجح

ففي الظاهر نادي المريخ خالي من الديون

فأن كان كذلك فليصبح الهلال مثله

ولتعين الحكومه رئيس طوالي لنادي الهلال

وفكونا من الديمقراطيه والكلام الفارغ

وسلملي علي ديمقراطية ويستمنستر


((())) براعم الهلال يلقنون عجايز المريخ درسا كرويا بليغا :

وشخبطوا عجايز المريخ شخبطة

و لخبطوا عجايز المريخ لخبطة

وزاغت ابصار عجايز المريخ زرغانا

وبلغت القلوب حناجر عجايز المريخ بلوغا

والتاريخ لا يرحم

وشخبط شخابيط لخبط لخابيط مسك الالوان ورسم علي الحيط

وابداع لبراعم الهلال وتشكيل للوحة زرقاء جميله امام مريخ هلكان

وامتعنا كثيرا صغار الهلال وبشتي فنون كرة القدم فصفقنا لهم اعجابا

وغاب كبار وعجايز المريخ وغرقوا وسط امواج تلك البحور الزرقاء

فارتفع لديهم هرمون الادرينالين كثيرا

لتبرز بعدها الحكم المصري الكثير من الكروت الصفراء والتي كتب عليها ( احترس فهؤلاء صغار ولا تخرج من طورك والعب كرة قدم )

فكان لبكري المدينه كرتا اصفرا

وكان لكونلي كرتا اصفرا

وكان لمحمد عبد الرحمن كرتا اصفرا

وكان لصلاح نمر كرتا اصفرا

وكان لكواسي كرتا اصفرا

وماذا اقول ..

واي شي يقال بعد كل ماقيل ..

فمعسكر تونس هو الذي سيقول وقد كان للنزهة والرقص الاستعراضي لاخوان باسكال

ولاعبون يجرجرون ارجلهم غير قادرين علي ممارسة لعبة كرة القدم لشوط كامل

وسخرية من المعلق علي مستوي المريخ امام صغار الهلال

ولم لا فللسن احكامه ايها الساده

ولا ادري لم تلك الهالة الاعلاميه الحمراء التي سبقت المباراة مكاواة للهلال الذي اقتلعت منه هذه البطولة بليل

والجكومي هو رئيس بعثة المريخ والما عجبو يلحس كوعو

وده كلو كوم والانبراشات العربيه التي كانت حاضرة في الملعب

وحركة صلاح نمر العجيبه والغربيه في رمية التماس والتي اضحكت الجميع

ولنترك التعليق علي مجريات المباراة لنضحك مع الشباب وما كتبوه في المواقع الالكترونيه :

(()) مشاركة صلاح نمر ضد البراعم انتهاك صارخ لحقوق الاطفال

(()) في لاعب مولود في نفس اليوم الذي وقع فيهو راجي للمريخ

(())لاعب قال للحكم والله ضربني قال ليهو منو قال عمو داك وهو يشير لصلاح نمر

(())امير كمال قايل اللاعب الجاب القون من الاولاد البيجيبو الكورة من الاوت

(()) اكبر واحد فيهم مقاس جزمتو ٢٠

(()) رهبة الشعار الازرق تؤرق المريخ خارج الحدود

(()) يا جماعة ديل ذكروني بلاعبي منتخب السودان الفايز ببطولة الجيم

(()) في لقاء مع احد اللاعبين الصغار سأله المذيع لمن تهدي هذا الفوز قال اهديه لاصدقائي في طيور الجنه

(()) جلحات وصلع العجايز لفتت انتباه البراعم في الشوط الثاني فقالوا لبعضهم البعض الواجب احترام الكبير فكان هدف التعادل لبكري

(()) اللاعب اللي جاب القون جري ليحتفل بالقون . المدرب اداهو حلاوة حربه

(()) في استراحة ما بين الشوطين لاعب صغير طلب من لاعب عجوز ان يحكي له حكايه فاطمه السمحه والغول

(()) في بداية المباراة اصطف الفريقين والحكام فكان المنظر وكأنك بالقرب من مبنيين دار للعجزة ورياض اطفال


((())) مجادعة للتاريخ في مباراة اشبال السعودية وعجايز المريخ

والبشري vs ود المجذوب

.....

ود البشري

مريخنا الوصيف ،،،،،،، الليلة عاد واااا خيبتو

في دوري العرب ،،،، ضاعت مكانتو ،،، وهيبتو

شفناهو إنبرش ،،،،،، قدااامنا ظهرت عيبتو

ياااا شفعنا مالكم،،،،، ، ما بتقدرو شيبتو ؟؟

*****

ود المجذوب

مريخنا الوصيف الليلة قالو اتحكه

من بعد الدرون غارزيتو قال تتدكي

لاعب منهم من كبرو غالبو الجكة

عمرو يساوي اربعة من نديدهم فكة

...

ود البشري

يا حليل ( كونلي ) لي هسة عضامو تكرررج

يوم شاف الوليد بي الكورة ،،، جاهو معرررج

عمك ،، ود نمر اصبح ،،،، ،،،، كأنو مهرررج

والحارس عصام ،،،، ، سابو وقعد متفرررج

********

ود المجذوب

من فصل الدراسة الصبية قالو اتلمو

كملو للحداشر وبالتلاتل تمو

لعيبة النجمة تعبو من الفتر و انجمو

في الميدان بتسمع عادي قوم يا عمو

********

ود البشري

في دوري العرب ،،،، ، فاضحنا داااايما إتة

كورة ( السبعة ) لسسسة صداها مالي الحتة

دا الاولمبي ،،،، ،، سوااالك وجع في الجتة

لو جوكا ( الكبار )،، كان هسى تمن ستتتتتة

*****

الولد الصغير الفي الدفاع اتجول

بالغ في المرواغة يا معلم وطول

ديل قالو الصغار .. خلو الامور تتهول

كيف لو جابو ليك ناس الفريق الاول


محمد الحسن شوربجي