• ×
الثلاثاء 22 يونيو 2021 | 06-21-2021
بابكر سلك

الهلال في وضع الطيران"!!

بابكر سلك

 0  0  8056
بابكر سلك


* قرار الفيفا برفع قرار الحظر له ماقبله وله مابعده وفيه مابين السطور
* لا يسعنا الا ان نرفع القبعات حتي تراري صلعنا الندية احتراما للسيد رئيس مجلس الوزراء علي حكمته ورشده وعمله بمقولة قلبي علي وطني حتي تكللت جهوده برفع قرار الحظر
* وبرفع قرار الحظر ظهرت علي شاشة المريخ عبارة
* سستم الغاء تفعيل وضع الطيران
* ومعاهو خيارين كمان
* موافق والغاء
* اما شاشة الهلال فلسه معلقه في وضع الطيران
* قدر ماهبشو المكتوب في جبينها ما بتمحي
* يتيح لك وضع الطيران امكانية ايقاف تشغيل الاتصال والمراسلة وشبكة البيانات
* يعني تلفونك يقعد زي المرايا
* تشيلو تعاين فيهو لي خلقتك المنكشة وانت طاير
* ووضع الطيران الذي يتمتع به الهلال خدمة يمين وعرق جبين
* اكل نيم ومحمد عبدالرحمن ومكسيم
* ولا اظن ان وضع الطيران الذي يعيشه الهلال يضايق الاهله في شئ
* فهو وضع الهلال العادي منذ تسعة وتمنين سنة
* ووضع الطيران جعل الهلال في مربع الصفر لانه يقطع الاتصال بشبكة المحمولات جوا ورسائل التاريخ و بيانات الانجازات القارية
* حتي بلوتوث البطولات الاقليمية يوقفه وضع الطيران
* والحاجة الوحيده البتيحها وضع الطيران هي لعب الليدو تحت لمبة الدكان او علي ظل الاشجار جمب الخيران
* ايها الناس
* بقرار الفيفا الاخير تتأكد مشاركتنا في البطولة العربية
* وده في حد زاتو هاجس جديد لي ناس وضع الطيران المزمن الذين يقضون يومهم مع الليدو كخيار اخير
* ايها الناس
* عدت الازمة بسلام الي حد ما
* وفي انتظار قرار الكاف
* ولكن الا يكن الحساب ولد ?
* القصة ماخطيرة
* راعي الضان في الخلا يعلم بان الفيفا لاتعترف باي اتحاد وطني مالم يتم انتخاب ذلك الاتحاد وفقا لنظام اساسي مجاز من الفيفا
* يبقي سبب الازمة واضح جدا وتجب معاقبته ان كان يعلم بذلك
* او محاسبته علي جهله ان كان لا يعلم بذلك
* والقصة دي اي طيرة في اي شجرة في جنينة نبق بالكاملين عارفها
* والحكاية دي اي ابو قنفوت حايم في ليل بهيم باطراف النهود يعلم بها
* يبقي ليه ده كلوووو..
* ايها الناس
* الناس بتستفيد من تجاربها
* ولعل تجربة الفيفا المريرة التي مرت عليها من التجارب التي يجب ان نستفيد منها
* دولة المؤسسات دائما تكون في السليم
* لان المؤسسية سيستم لامجال فيه للاهواء الشخصية والقرارات الفردية الفوقية
* والسيستم بريحنا ويريح البتعامل معانا
* اما اذا كانت قراراتنا وفقا للامزجة
* قطع شيك ببقي شكلنا شين
* وبتبقي علاقتنا بالسيستم شاذه زي لباس بنطال السيستم الذي يكشف عن نصف العوره من الناحية الغربية
* لذا اري انه ليس المهم في اي دولة من يحكمها
* ولكن المهم هو كيف تحكم
* ايها الناس
* برغم كل ماحدث يبقي المريخ كبيرا
* ويبقي رواد شارع الطيار مراد هم روادا لشارع الطيار مراد حتي اصبحوا شعارا لوضع الطيران
* ايها الناس
* اتمني ان يصدر الكاف قرارا عادلا بروح رياضية ويعيدنا للتنافس الافريقي مجددا نحن و فريق قلعة شيكان
* عشان تعرفوا حاجة
* فالمريخ يادوبك دخل الفورمة
* و عشان فتحية تلقي فرصة في ممارسة هوايتها الفتحيييه
* ليسجل لها التاريخ سقطة جديدة علي صفحاته تضاف للحركة الوطنية التي تدعيها
* ايها الناس
* استاذة فتحية في حصة التربية الاسلامية قالت للطلاب خير الاسماء ماحمد وعبد
* دايرة واحد يديني مثال
* وقف طالب نجيب قال ليها اديك مثل واحد للاتين
* قالت ليهو شاطر قول
* قال ليها
* محمد عبد الرحمن
* قال ليك الولد اسي في الانعاش وفتحية مع المتحري في نيابة حماية الطفل
* بالغتي يافتحية
* ايها الناس
* ان تنصروا الله ينصركم
* اها
* نجي لي شمارات والي الخرتوم
* قال الشاعر
*انبل موقف واصدق صورة واشجع راي
* طفلها في العنبر قاعدة في بمبر تبيع في الشاي
* كشة جات شالتها
والغرامة شالت كوم الروشتات المردم بي جاي
* وكل حصاد الشاي
* وهي بالدفار تردد سرا لاللسلطة ولا للجاه
سلك كهربا
ننساك كيف والكلب قال غرامة ست الشاي وست الهناي وست البي جاي وبي جاي كلها وااااحده
ماعصرتوا علي ست الشاي ? ده بي كم وده بي كم يا اخوانا ?
والي لقاء
سلك
امسح للحصول على الرابط
بواسطة : بابكر سلك
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019