> نتأهل باذن الله خدمة يمين وعرق جبين
> ففاقد الشئ لن يعطينا شئ
> هو حيلتو صفر يدينا شنو عاد!

> وحتي لو فكر فاقد الشئ في فتح شباكه امام المنافس نكاية بنا
> لن يضرنا
> لاننا صممنا علي نصر بسوسة خدمة يمين
> ووقتها تبقي علي فاقد الشئ ميتة وشرط شبكة
> ميته لانه مات من هدف ميدو الاول
> وشرط شبكة لانو التاريخ سيضيف لهم بسجلاتهم الهزيمة الافريقية في عقر الدار
> ايها الناس
> لو فاز فيارو علي الطارو بمازمبية
> هدف واحد بسوسة من قدم العقرب او السماني او ميدو يجعل مازيمبية فيارو في شباك الناس الطارو عديمة القيمة لفيارو
> ايها الناس
> فاقد الشئ اديهو الفصاحة بس
> قالوا 2017 بجيبوا الاميرة السمراء
> سمراء بالسا ؟
> وصرح كردنة بانو الهلال لو 2017 ماجاب الاميرة السمراء تاني مابجيبها
> صدقت ياكردنة
> المهم ياكردنة نقطة صفر جديد
> وبمناسبة الاصفار
> اصفار الهلال التسعه وتمنين اكتر من اصفار اموال الكاردينال مضروبة في مية الف
> خت اصفار مية الف الخمسة واضربها في اصفار ثروة الكاردينال بعد تحويلها بالسوداني،
> تلقي اصفار الهلال التسعه وتمنين اكتر
> زول اصفارو اكتر من اصفار المليار؟
> ده ماشفناهو الا هلال الكاردينال
> واتصفري
> وبمناسبة الكاردينال
> محمد عبد الماجد (اليومين دي حايكتب عن عثمان حسين كتير ) كتب قائلا ان قرار عدم التجديد لمحمد عبد الرحمن
> افضل قرار للكاردينال بعد قرار الجوهرة
> اسي رايك شنو يا حماده !!!
> موش طلع افضل من قرار الجوهرة وقون و جريدة الرشيد ?
> قون شنو
> ديل قونين يا معلم
> غايتو يا محمد عبد الماجد العطالة حاتطوووول
> واغاني عثمان حسين مابتكفيك
> خش في الحقيبة يا معلم
> ده صفر طوووويل وثقيييل ومابنتهي
> ايها الناس
> وين الجعجعه الكتيرة و التطاول علي الملك ؟
> وين تارا والجريف وتيتيه واوكرا وشيبولا
> كلهم بره اللعب
> طيش افريقيا والعرب
> والخيل الحرة جات في اللفة
> وبغلة عبد الخير ياها بغلة عبد الخير
> لكن اعلام كردنة ما بقدر يقول البغله في الابريق او البغله وقفت في نص الطريق
> واتبغلي
> ايها الناس
> شطبوا تيتيه
> والعقلاء من الاهله يتساءلون
> شاطبين تيتيه ليييه؟
> اشطبوا الجاب تيتيه
> شطبوا مدرب الحراس
> والعقلاء من الاهله لهم سؤال
> شاطبين مدرب الحراس ليييييه
> اشطبوا المن بره الخط بتخش فيهو لما تنجدع ليه
> شطبوا الكوكي
> وهم لهم سؤال
> شاطبين الكوكي لييييه
> جاكم براهو
> اشطبوا الشطب الكوكي وتاني رجع ليه
> شطبوا بخاري
> شطبوا امل جماهيرهم في استمرارهم بالمنافسة
> وفطومة اختي تكتب
> شطبنا
> شطبتوا ساي !
> ده انتو مشطبين اوي ياحبة عيني
> قاعدين عا الحديدة
> ده انتوا ولا حاجه
> انتوا صفر وبس
> ايها الناس
> الاهلة اهل التناقضات
> قالوا الحكم غلبهم
> طيب مفوتين الكوكي مالكم؟
> شاطبين تيتيه قبل المواعيد ليه!
> مدرب الحراس دخلو شنو ?
> ويكتبون عن تحامل التحكيم عليهم
> ثم يكتبون عن كاريكا الكبر وبشة الطشه وعن الذين لا يستحقون ارتداء الشعار
> تناقضات
> ولكن الرأي عندي ياخالدونا
> فريقكم ده داير غربلة شديده
> يكبوكم في غربال كبييير
> ويغربلوكم
> نوعكم ده بتنفع معاهو،الغربله
> واتغربلي
> ايها الناس
> نعتمد في تأهلنا علي عضلنا
> طيش افريقيا والعرب مابخدمنا
> طيش،الدنيا والآخره لو فيهو عمار كان سواهو لي بت ام رويحتو دي
> طيش جميع المجموعات لو بقدر يأهل زول كان اهل رقبتو
> ولذا نتأهل خدمة يمين وعرق جبين
> والغالي بي غلاتو حلاااااتو
> والطيش بي طياشتو يوريك كياشتو
> ايها الناس،
> نتوقع ان يدفع الهلال في مباراته ضد فيارو بنجومة الكبار
> ابراهومة جابسون والطاهر الحاج واوكرا واب ستة رمز الكسكته ووليد علاء والحارس اللعب كورة حي العرب داك
> فالهلال نادي للتربية قبل كل شئ
> ولازم يربي ديل
> جنس طياشة
> ايها الناس
> الا يستحق غرزه التكريم؟
> اليس من حقه ان نقول له عفارم عليك محوا لبعض تفلتات لا تعبر عن الشفوت في شئ ؟
> ايها الناس
> البستحقوا التكريم كتاااار
> زول جميل اسمو جمال
> ولاعب موهوب اسمو الغربال
> ونمر ملك في الادغال
> وتارا الصال وجال
> والسماني فردة الغربال
> وكل الشارك في النزال
> والجمهور يستحق التكريم لا محال
> والقروبات مصنع الرجال
> اخص رجال الحوبة القروب البره الملعب بيلعب وشغال
> محمد الماحي ومولانا مجذوب ومتوكل احمد علي حامد بدوي ومحمد العمده
> مالك انس و دكتور محمد النعيم والحبيب صلاح خضر وكل رجال الحوبة كلهم و الحبيب عماد عقيد
> فضلت كورة سوسة
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> سقطت الامطار وسقطت الولاية كعادتها فينا
> مع اول مطرة شوارع الخرطوم اصيبت بالاسهالات المائيه يا والينا
> ان شاء الله القيامة تقوم عشان تلقي البلد بي طينها
سلك كهربا
ننساك كيف والكلب في المطرة لامي الكلاب ويهتف
تسقط تسقط،..الامطار
والي لقاء
سلك