# (استاذنا ايمن كبوش سلامات.. و.. بدون ما اخد كتير من وقتك.. او ازعاجك.. واحتراما لرأيكم.. ولكن ليه انت واقف ضد الفريق عبد الرحمن.. وما عايز اقول واقف بصف الدكتور.. عايز افهم وجهة نظرك وقت ما تقدر ترجع لي... احترامي.. اسامة اشيقر).
# هذا سؤال من الاسئلة التي في حياتنا.. انا ليس ضد احد الا فيما ارى انه ليس صائبا.. كثيرون تعجبهم فكرة استفزازي او اساءتي عندما يقولون ان موقفي ينطلق من قناعات الارباب! يا لفوبيا الارباب.. انا اشهد الله واهل النهى فيكم ومنكم بأن موقفي هذا، سبق اعلان الارباب لموقفه مثلما سبق اعلان مجلس ادارة نادي الهلال الذي اكد متأخراً جدا مساندته لمجموعة الفريق المدهش اذ لم يكن الاخ اشرف سيد احمد ميالاً لها ولا مقتنعاً بها لما يجمعه من ود وصداقة ومصالح هلالية مع الاخ الاستاذ اسامة عطا المنان.. هذا قبل ان تمارس عليه ضغوطا من جهات عديدة طلبت منه مراراً اعلان موقف الهلال الواضح من «اتحاد اللقيمات» الذي اصبحت علاقته بالهلال لاحقا «سمن على عسل»، او كما قال الكاردينال.
# اقول قولي هذا رغم الشرف الباذخ الذي احسه من الاساءات التي تلحق بي.. لذلك وددت ان اقول ان هذه زاوية تخصني.. ما يكتب فيها يعبر عني لانني لن اكون بأية حال بصمة لاي ابهام آخر.. وحمدت الله كثيراً ان الاخ الارباب لم يختلف عما عزمت عليه وانني اشهد الله ايضاً بان هذه المواقف لم يجري حولها اي تنسيق او حتى تلميح ما بيني والارباب.. وان اختلفنا عما نحن فيه فبالتأكيد سيكون هناك سجال وحوار ما بين الارباب وأنا.
# و... على مقربة من خيمة عزاء اعزاء الاخ الاستاذ مزمل ابوالقاسم الذين رحلوا في هذا الشهر الفضيل.. فاجأني الاخ سيف الدين الطيب ابراهيم.. المعروف لدي ولديكم بـ«سيف الكاملين».. وهو رجل رغم سيما «اللولوة» التي تبدو عليه.. الا انه رجل واضح ومقتحم ومبادر ولا يبالي.. باغتني الرجل حين اخذ يدي وتنحى بي جانبا وانا وهو لم نلتق لما يقارب الثلاث سنوات متصلة... باغتني بالقول: «يا زول اخير ليك تخلي البتعمل فيهو ده وتجي تشتغل معاي.. عندي خطة اعلامية وانت زولنا ياخ.. لازم تجي.. لكن خليني اسألك.. ناس معتصم ديل اصلو ما كانو يوم من الايام من ناسك.. وانا بعرفك كويس.. الحكاية شنو؟!... اكمل اخي سيف الكاملين مرافعته تلك.. فسألته: «يا سيف ياخي انت رأيي فيك ماك عارفو.. ؟ انا يومي ما قاعد اهاجمك.. اشتغل معاك كيف.. ؟! يا كبوش ياخي نحن ناس عهد واحد وتنظيم واحد وانا عافي ليك لكن قول لي مالك معانا.. ؟!
# قلت له: قضيتي مع رئيس مجموعتكم.. وهذا من حقي.. لا ارى فيه ذاك الرئيس المنقذ القادر على علاج اوجاع الكرة السودانية... قلت له هذا فرد لي: «خليني اقول ليك حاجة ما عارفنها الناس.. وانت ذاتك رغم تعدد مصادرك ما بتكون عارفا.. نحن مرشحنا الاصل اتفقنا عليهو هو صلاح ادريس.. والله كل الجهات الاشتغلت الشغل ده اجمعت عليهو وموضوعو في البداية كان مكلف بيهو اخونا محمد سيد احمد.. بس يا كبوش زولكم اعتذر.. وموقفو اللاحق ذاتو فاجأنا.. نسوي شنو؟!
# ازمة الامس التي كان مسرحها فندق السلام روتانا يا اخي اسامة اشيقر بينت واوضحت انني على حق.. اذ غابت كاريزما الرئيس وبدا عبد الرحمن مهيضا وكأنه كان يساق الى هذه المواقف رغم انفه وللعب الدور دون ارادته.. الرئيس دائما صاحب تفويض وصاحب رؤية ثاقبة وكلمة مسموعة ولا ينبغي ان يكون العوبة في يد صحفي او حتى عضو ساكت في المجموعة.
# قبل مرافئ الختام قلت لسيف الكاملين.. صلاح ادريس.. انتوا جادين صلاح ادريس.. أسكت ياخي خالد عز الدين ما يسمعك.. ضحك عالياً وافترقنا.
------------
لم أفهم لغتك هذه
خليك من الإتحاد وتابع الكاردينال الحارقك دا
المدهش بالله أبعد عنو قلمك البنقط حقد وليتك تكتب مرة واااحدة بصدق
وكلام سيف الكاملين كان ونسة معاك وقطعاً ليس للنشر أليس كذلك؟؟؟
أتمنى أن تكتب يوما عن الهلالالالال العظيييم والجوهرة وبصدق
وايا كان الامر فقد اكدت ان سيف الكاملين سيد السبهللية ولعباطة والعوارة هسى دا كلام يقولوا؟
حتى لو كان كلاموا صاح
لقد اراد الاهطل ان يوقع السودان فى فخ التجميد باسم عبد الرحمن سر الختم الذى تكشفت له الامور قبل نهاية مهلة الفيفا بساعات فهل يغتنمها ويتخارج ام يتمسك ويفقد الاحترام هنا وهناك؟
من سخرية الأقدار أن يصبح مثلك كاتباً ويقرأ له الشعب السوداني .. مهما كتبت وبررت تظل بوقاً من أبواق صلاح إدريس لاتجرؤ على مخالفته ، وإن صح وسبق إعلانك لموقفك لموقف صلاح فأنت وأمثالك تقرأون أفكار الرجل وتنفذون لنيل الرضا ..
نسأل الله أن يصرفكم عن الأعلام الرياضي فأنت جزء من مشكلة كبيرة أسهمت في تردي واقعنا الرياضي ..
لعلمك الزاوية التى تتحدث انها تخصك دا يجعلنانتحسر على الصحافة كيف زاويتك تكتب ما تري والقارى الذى يدفع من حر ماله ليقرأ هذا الهرا وهذه الاحقاد والفتن والاحن لكالله يا سودانلك الله ياسودان اذا كانت هذه النوعية من الصحف والتى تنقل الونسة الخاصة بهدف الفتنة