< في بلدنا دي.. وفي ظل صراعنا ده.. اذا كان محدثك غير عاقل فمن باب أولى أن يكون المستمع كذلك.. حتى تستقيم الحياة.. ويكون التعايش مع ما يحدث موضوعياً ومنطقياً.. دعونا معاً نقرأ هذا التصريح مرة.. ثم نستزيد بالثانية.. والثالثة واقعة .. والرابعة بطبيعة الحال لها شروط وجوب وصحة: «هاجم مجلس ادارة اتحاد الكرة جناح الفريق عبد الرحمن سر الختم، الاتحاد السابق ممثلا في اسامة عطا المنان أمين المال ووصف سيف الدين الطيب مساعد الرئيس وعضو المجلس ان الخطاب الذي Ãعلن عنه اسامة عطا المنان فيه تضليل للرأي العام موضحاً أن الخطاب جاء رداً على خطاب قدم منهم للفيفا عن تدخل وزارة العدل وكشف الطيب أن الخطاب حمل حديث عن الفريق عبد الرحمن سر الختم الذي عينته الحكومة وأن وزارة العدل تدخلت وسلمتهم مقر الاتحاد في حين أن الفريق سر الختم لم يتم تعيينه من قبل الحكومة وإنما جاء بإنتخاب وعمومية يوم 30 ابريل أحرز فيها 48 صوتا ومضى سيف الطيب الشهير بـ(سيف الكاملين) ان الحديث عن التجميد يوم 10 يونيو غير صحيح لأن الخطاب قال ان الأمر سوف تتم إحالته لمجلس الفيفا يوم 10 وليس التجميد واعتبر سيف الطيب أن حديث أسامة عطا المنان هو كذب في نهار رمضاااان.
< جاء هذا التصريح في أحد المواقع الإلكترونية المعروفة أمس وأستطيع أن أجزم بصحته إنطلاقاً من معرفتي الحقة بالأخ سيف الكاملين.. صحاف مجموعة الفريق المدهش الذي أراد أن يٌجرّم أسامة عطا المنان فمثل ما قاله دليل إدانة لكل الحراك السالب الذي يقوم به الفريق المدهش ورهطه.
< خلونا نصدق يا جماعة بأن أسامة عطا المنان يكذب ويتحرى الكذب.. طيب يا ناس انتوا موش مشيتو البحرين.. وقلتوا لاقيتو انفانتينو الجن ده واتصورتوا معاهو سيلفي وختيتوهو في الصورة.. ووعدكم خير بعد اداكم كرتو الخاص وقال ليكم تعالوا لينا هناك.. مرحبا بكم في سويسرا.. الكلام ده حصل ولا ما حصل.. ؟ طبعاً حصل!! وجيتوا عملتوا اجتماع وقلتوا نورتوا قياداتكم وقاعدتكم العرررررريضة ناس نصر الدين حميدتي وعبد العزيز نصر الدين وامين الجابري ومعتصم عبد السلام.. ومبارك تكتيك وعمر علي عبد الله.. فعلاً عررررريضة..
< خلوها قصة البحرين.. يوم الأحد الفات القريب ده موش كان سيف الكاملين الهوا ضاربوا والكندشة شغالة في راسو في مقر الاتحاد بعد أن تم انتزاعه بالقوة الجبرية المحمية بالشرطة وقرار وزارة العدل.. سيف الكاملين ده موش قال الفيفا على علم بكل هذه الخطوات؟ نسيت الكلام ده يا سيف.. ليه دائما انتوا بتقروا الخطابات زيكم وزينا كده في الواتساب.. تكون فاطمة سمورا دي ما عارفة بريدكم.. معقولة.. كدي حاولوا صاحبوا ساعي البريد يمكن الجوابات دي تصلكم قبل ما تصل ناس اسامة ومعتصم.. ياخي انتوا بالامس موش قلتوا عملتوا تسليم وتسلم مع واحد اسمو ابوجبل.. ووظيفتو الأمين العام.. وأصدرتوا تعليمات واضحة بأنو المكاتبات والمخاطبات تكون بإسمو هو بس.. طيب الحصل شنو.. احتمال فيفا غلطت في العنوان.
< بعدين قصة جابو سيرة عبد الرحمن سر الختم في الخطاب دي قصة مضحكة يا سيف.. لازم يجيبوا سيرتو يا سيف يا اخوي ولازم يقولوا ليك «معيّن» لأنو لو قالوا ليك «منتخب» يبقى معترفين بيك ومعناها مدنك شرعية والقصة كلها انتهت.. لكن ديل يا اخوى لا عارفنك ولا متذكرنك عشان كده قالوا ليكم فريقكم ده معين ساي.. كده شوفوا عبد العزيز محمد سيد احمد وشوفوا مكاتباتو عن الجمعية دي مشت لى ياتو بريد.. اوع تكون مشت لى فاطمة تانية في بالي.. اكيد دي ح تطلع «كيسكم فاضي».