* سريعاً جداً تجاوز جل شعب المريخ آثار الهزيمة المرة والمؤلمة التي تعرض لها الاحمر امام النجم الساحلي في ملعبه ووسط جماهيره بهدفين مقابل هدف بالجولة الثانية بمجموعات رابطة ابطال افريقيا وتجاوز السواد الاعظم ما حدث من كارثة حقيقية..
* الناس (البتبيع الوهم) عبرت سريعاً بـ(المسطحين) من العشاق او اولئك الذين لا يعرفوا غير التعامل بكل ما له علاقة بدغدغة المشاعر وشرعوا في ملء المساحات التي كانت قد امتلأت بالوهم من ذات الاحساس ذلك بعدما تبخر شعور رغبة الفوز بالكأس..!.
* (تعالوا يا ناس.. علينا جاي.. المريخ سيتأهل الى المرحلة التالية) لاحظوا ان الوعود تراجعت من الفوز بكأس افريقيا والتربع على عرش القارة والظفر بلقب الاميرة السمراء الى شئ آخر ربما يكون في اطار الوعود المرحلية القريبة من الشعور الحالي..
* (خلاص يا جماعة غارزيتو وصل للتوليفة الاصلية والمثالية التي بواسطتها سيتمكن من قيادة الاحمر الى الانتصار في المباراتين القادمتين على فيروفيارو ذهاباً واياباً.. دي 6 نقاط ونحن عندنا نقطة يبقى المجموع 7 نقاط وبرضو ماشيين صاح وتمام التمام)..!!
* (طبعاً ح تغلب الهلال.. الهلال ده ما داير ليهو اي مجهود بل على العكس سنتمكن من الفوز عليه وبسهولة لان المباراة ستقام في ملعبنا ووسط جماهيرنا وطبعاً نحن الهلال ده ذبونا الدائم وح نديهم المعلوم ونرفع رصيدنا الى عشر نقاط ونتأهل برفقة النجم)..!!
* (كمان عشان تطمئنوا يا صفوة غارزيتو قرر اعادة علاء الدين يوسف الى خانة قلب الدفاع بحوار صلاح نمر شايفين كيف.. يعني بعد كده الموية ما بتمشي على مرمانا وبكدة نضمن الفوز بسهولة على حمام موزمبيق لان امير كمال سيبعد من التشكيلة)..!!
* (والله يا جماعة مريخنا ده متأهل متأهل.. وقصة العبور دي اصبحت مسألة وقت ليس الاّ.. وكيف ما نتأهل ونحن الفزنا بكأس مانديلا والجبنا كاسات محولة جواً للبلد دي.. أفو.. أفو.. وأي زول يقول كلام غير كده يبقى ما مريخابي ومندس وهلالابي ساكت)..!!
* (لاعبينا ما كانوا في يومهم اليوم داك.. بعدين السماني الصاوي ده لعّاااااااب جنس لعب ممكن يغلب لينا ناس موزمبيق برااااااااهو كيف ما يقدر.. ده سيما يا.. الحريف اللعاب القصير المكير الخطفناهو من الهلال خطف قوة عين عديييل كده)..!!
* (طبعاً أهم حاجة انو الهلال ده ما يتأهل معانا مش المدير الفني لفريق النجم الساحلي التونسي قال لينا المريخ هو الأجدر بالعبور ومرافقة فريقه الى المرحلة التالية..؟! ده خبير يا جماعة وبيعرف احسن مننا عشان كده المريخ متأهل متأهل)..!!
* (علاء يوسف ده خطير وعندو خبرة كبيرة وبالتأكيد عودته الى خانة قلب الدفاع فيها فائدة كبيرة للفريق.. وكمان معاه صلاح نمر يا سلااام.. نمر ده والله مظلوم ظلم الحسن والحسين وبالرجوع للمباريات السابقة ح نلقاه احسن من امير كمال وكونلي)..!!
* (يالله يا علاء نحنا منتظرنك ومترقبين عودتك لخانة قلب الدفاع لتعويضنا الاخطاء التي حدثت امام النجم الساحلي وادت للهزيمة العابرة والتي ستكون هي البداية لفوزنا باللقب القاري والتمثيل في كأس العالم للاندية كيداً على الهلالاب الحاقدين ديل)..!!
* (خلاص.. أكتمل الشحن وصار جل المريخاب في قمة الجاهزية لمتابعة الفريق وهو يحقق الفوز وبسهولة على مضيفه فيروفيارو الموزمبيقي.. اما "فارنا" المحلي "جارنا" فاننا سنقوم بقص جناحيه بكل سهولة في الجولة الخامسة ونعلن تأهلنا بجدارة)..!!
* ((اللهم اني صائم.. تلك الخزعبلات فرضت نفسها عليّ في نهار رمضان اسأل المولى عز وجل ان يغفر لي ويشملني برحمته ويتقبل مني ومن كل المسلمين بمشارق الارض ومغاربها الصيام والقيام والدعاء.. آميين با رب العالمين واللهم اني صائم))..!!
* تخريمة أولى: ابرزت الاصدارات الحمراء الفوز الذي حققه الفريق على بري احد اندية الدرجة الأولى بخماسية بصورة خرافية ولدرجة جعلتنا نتخيل وكأن الانتصار اياه قد تحقق على النجم او فيروفيارو بالبطولة الافريقية.. يا جماعة شوية منطق مافي..!!
* تخريمة ثانية: فرحة خرافية بعودة علاء الدين الى خانة قلب الدفاع برفقة صلاح نمر ولا ادري كيف يتفاءل البعض بلاعبين سبق لهم الفشل في هذه الخانة وتم استبعادهم واتفق الجميع ـ بما فيهم المشجعين ـ على فشلهم..؟! انها الذاكرة الخربة يا سادة..!!
* تخريمة ثالثة: لمزيد من المتابعة والرصد والوقوف على وضعية برامج رمضان (الغنائية وخلافه) عبر القنوات سواء السودانية او العربية فضلنا تأجيل تناول مستوى برامج الشهر الفضيل الى الغد فمعذرة اعزائي القراء.. ولتنتظروني غداُ باذن الله..!!
من أعطاكم الحق في سلبه مريخيته .. رجل بحارب تجار الكلمة (المخدرين) ..
فعلا انتم مخدرون كرصفاءكم الهلالاب يخدعونكم وتصدقون مجموعةسذج يدعون حب الكيان للأسف حب سلبي مدمر
الهلال ذبونا خطا
الهلال زبونا الصح
كاتب غريب عجيب يعني في رأيك المريخ يفرش بيت بكاء بعد الهزيمه ويفقد الأمل في التاهل ويستني الهزيمه في باقي المباريات عشان انت تستمتع ولا الرأي شنو