عندما يترنم (قريبنا ) سيف الجامعة برائعة سيد أحمد الحردلو أغنية ( طبل العز ) التي تقول كلماتها *** طبل العز ضرب يا السرة قومي خلاص ... والجنيات هديك في الساحة ختوا الساس ... والبنوت زغاريتن تجيب الطاش ... والخيل عركسن والدنيا بوق ونحاس ... والسودان خلاص يا السرة قام دواس ... شد سواعدو تاني وشيد المتراس ... طبل العز ضرب والخيل تسابق الخيل ... من آخر الجنوب لي عطبرة وتوتيل ... ياشدر الهشاب قوم نمشي بحر النيل ... يالوز القطن قوم تاني نوّر وشيل ... وأرقص يانخيل في السواقي وميل ...السودان خلاص داير السمح وعديل ... كسر قيدو تاني وقام هميم بلحيل ... طبل العز ضرب حي عليك ياكفاح ... والآذان نده حي عليك ياصباح ... شايل النور ومالي بالأغاني الساح ... والظالم وقع يا السرة داوي جراح ... والشارع هجد مابسوي التاح ... خلى الناس تنوم بعد الشقاء وترتاح ، عندما نسمع هذه الكلمات الجميلة يذهب الخيال مباشرة لهلال الحركة الوطنية الذي وقف مسانداً لحركة النهضة والإصلاح التي عمت الوسط الرياضي وحازت على ثقة أهل الرياضة في وطن العزة والشموخ بقيادة الفريق المدهش وصحبه الكرام الذين أتوا مثل فلق الصباح ليكشفوا عن وطن الأجاويد ستار الظلام ، وتقول سيرة إبن الجزيرة الخضراء الفريق عبد الرحمن سر الختم أن الرجل رضع الشموخ من ثدي قواتنا المسلحة وشغل منصب وزير الدفاع وقد إستأمنه السودان على بندقيته كما إستأمنه السودان على دبلوماسيته عندما شغل منصب سفير السودان بمصر وأثيوبيا وإستأمنه السودان على إنسانيته عندما شغل منصباً بالأمم المتحدة وفي الرياضة كان رئيساً لفريق الجماهير الأول بالسودان هلال العشق الجميل ، ورجل بكل هذه المواصفات أجدر بأن يأمنه أهل السودان على قطعة جلد منفوخة بالهواء إسمها ( كرة القدم ) ومما يدل على قومية الرجل أنه إختار نائبه من أبناء القبيلة الحمراء ( المهندس عبد القادر همد ) وبإذن الله سوف يجد منتخبنا القومي الذي كان في السابق يتيماً كل الدعم من حركة النهضة والإصلاح وكذلك منتخبات الشباب ولا نملك إلا أن نقول لإتحاد اللقيمات ( بلاء وإنجلى ) والغريبة أن إتحاد الفشل العام ( شارب من المريخ بالنز ) في موضوع الشكاوي حيث أصبح يلوح بعصا الفيفا !! لذا لزم التنويه .
*** مسادير شعر لقادة الإتحاد في العهد المباد
إذا كان القدم ليه رافع فإن القلم أيضاً ليه رافع ... لم أكن أنوي كتابة رحيق ولكن تعليق ظريف من إبن الوهاج من مريخاب الأمارات على الرحيق السابق وإتصال تلفوني منه سألني إن كنت أنوي أن أكتب عن إتحاد كرة القدم في عهده الجديد ، والأستاذ إبن الوهاج رجل أديب لا تملك إلا أن تحترمه وإن إختلفت معه ، ولقد جادت القريحة بالمسادير التالية بمناسبة زوال إتحاد اللقيمات
*** المدهش وهمد ماشين في الطريق الصاح
*** والصاقعة وقريش مع النهضة والإصلاح
*** الكايس لي الحقيقة خلاص ضميرو إرتاح
*** وأدونا الفاتحة ياناس إتحاد اللقيمات راح
*** نهضة وإصلاح بصراحة شغل نضيف
*** إنعدل المسار تاني لا ظلم لا تزييف
*** إتحاد اللقيمات معاه جرائد الوصيف
*** قول لي مامون أبوشيبة بالله حالتك كيف !!
*** إكتساح تمام كمان بي طريقة ظريفة
*** إتحاد اللقيمات أصبح وزنو ريشة خفيفة
***أهلية وديمقراطية وأيدي طاهرة عفيفة
*** يإاتحاد اللقيمات شوف وين طريق الفيفا
*** غير رب العباد في قلوبنا مافي مخافة
*** إنتخابات نزيهة يشهد ليها كل الشافة
*** الفريق المدهش قوة ومعاها ظرافة
*** قول لي معتصم شوف طريق سيكافا
*** النهضة والإصلاح رغبة هلال الملايين
*** إتحاد اللقيمات ماكان لي حقوقنا أمين
*** والإعلام السالب بصراحة طبعك شين
*** قول لي مجدي شوف حياتو شتت وين
*** سوداننا الجديد ياراية النهضة ماتنتكسي
*** لا رشاوي لا حكم مدفور بي جلاكسي
*** إتحاد اللقيمات أصبح تاريخو منسي
*** قول لي أسامة شوف وين وكالة التكسي
*** إنتهى عهد الرشاوي والظلم والواسطة
*** إتحاد اللقيمات سقوف طموحك هابطة
*** جوك أخوان مهيرة والصفوف مترابطة
*** قول لي الجكومي شوف وين محل الباسطة
نتمني من إتحاد الطموح والتحدي أن يجعل حكم القانون تاج فوق رأس الجميع .
*** الإعلام السالب بعودة المباد يطالب
الإعلام السالب نصب سرادق العزاء بعد أن فقد حبيبه إتحاد اللقيمات الكسيح وأصبح بتحدث تارة عن تجميد نشاط السودان بواسطة الفيفا مع العلم أن سودان الشموخ صمد أمام عقوبات مجلس الأمن 20 سنة يعني عقوبات ناس ( التيوة ) عايزة توقف مياه النيل عن الجريان !! مستعدين نعمل دوري سوداني محلي وننظم صفوفنا للسنوات القادمة ونعرف أن مهر الحرية غالي وإذا كان الفيفا يساند الفساد فليذهب للجحيم ، إنتوا عارفين أكتر جهة متضررة من عهد الصحوة في سودان الغد المشرق هم سدنة الإعلام السالب وتاني لو مامون أبوشيبة هاجم حكام الوطن سوف يتصدي له همد قبل المدهش لأن سودان القانون الرياضي الناس فيه سواسية ، وحكام الوطن هم كحل على العين وتاج على الرأس ، الإعلام السالب أصبح يغرد خارج سرب الإجماع الوطني ... ولكن هلال الخريجين والحركة الوطنية يقف مع الإصلاح قلباً وقالباً ونعلم أن شداد لم يجاملنا من قبل وكذا عمر البكري أبوحراز ولن يجاملنا إتحاد المدهش وصحبه الكرام إلا إذا كان الحق معنا ونحن نريد الحق ولاشئ غير الحق وبالنسبة لإتحاد اللقيمات لانملك إلا أن نقول غلطان المرحوم .
*** همسة الوداع
حبايبنا الحلوين فنانين في عملية التخدير للصفوة وكانوا ينالون من إتحاد معتصم بعارضة الطريق ويوسعونه عناقاً في الزقاق ، وكانوا يتحدثون عن إستهداف فريقهم من قبل الإتحاد ولكن عطبرة الحرة كشفت النية الخالصة وحركة النهضة والإصلاح تمت الناقصة !! وبهذه المناسبة نهمس في أذن الإعلام الأحمر إنتوا هجومكم على إتحاد معتصم هل كان مسرحية !! ولاّ كاميرا خفية ؟ مجرد سؤال .