• ×
السبت 15 مايو 2021 | 05-14-2021
محمد عثمان الجعلي

لي حبيبنا ولي صديقنا التهاني مستمرة

محمد عثمان الجعلي

 7  0  3650
محمد عثمان الجعلي

الشاعر محمد بشير عتيق منحه الله إبداع شعري وذكاء فطري فقد ذكر في أغنية ( قضينا ليلة ساهرة ) أسماء 5 من الحسان دون أن يشعر أحد بذكرهن ... وهن ليلي ومحاسن والروضة وعينة وزهرة ولقد أجاد أولاد شمبات أداء هذه الأغنية وأولاد شمبات هم ( عوض أحمد مصطفى وأبراهيم محمد حسين ) وتقول كلمات الأغنية *** قضينا ليلة ساهرة تضمنت محاسن ...من كل روضة عينة ومن كل عينة زهرة ... قضينا حفلة ساهرة ... تتوجت قياصر... وتلألأت كواكب ...من أطيب العناصر ...وكل من رآها ...تبالى بي هواها ...صبح شعورو ثائر ... وفكرو ضل حائر ...مابين دي واحدة صفراء ... ومابين دي واحدة خضراء ... الروضة لابسة حلة من الزهور طرائق ... بيها المكان تحلى والجو نسيمو رائق ... والغيم نشر مظلة ... بين مسفرات أهلة ونخبة عرب أجلاء ... ناس عليها فرحة وناس طريحة جرحى ... وناس قلوبة آسرة ... قضينا ليلة ساهرة ، عندما نسمع هذه الكلمات الجميلة ينقسم الخيال قسمين واحد يكون في الخرطوم اللذيذة والتاني يسافر شندي العزيزة ، عن إذنكم فاصل ونواصل ونظبط الرأس بي كباية شاي مدنكل بالهبهان والقرنقل ( حاس بي رأسي دا يسوي أووووو ) ... عدنا ليكم ياحبايبنا عايزين نشوف نص الخيال الذي ذهب مباشرة لهلال العشق الجميل الذي فاز على وصيفه الجديد أهلي الخرطوم بهدفين لهدف ، وكما يقول الأستاذ محمد عبد الماجد أي حاجة عندنا بي نظام ... ماشاء الله أهداف الهلال زي حقنة الساعات رغم أنه يفقد جهود خمسة من أعمدة الفريق الأساسية مكسيم وبشة ونزار وأبوعاقلة والصيني وزيادة فوق النظام زمن الأهداف حيث أحرز الشاب شيبوب هدف الهلال الأول مستفيداً من كرة القائد الخلوق كاريكا في الدقيقة 20 وكان يمكن أن تنتهي المباراة بهذه النتيجة لأن هلال المحترفين هدفه حصد النقاط ولكن قام بلة جابر بإحراز هدف التعادل للأهلي العاصمي في الدقيقة 40 وإنتهي الشوط الأول بالتعادل وجاء شوط المدربين الثاني وتفوق الكوكي حيث أحرز عزيز شيبولا هدف التفوق الأزرق في الدقيقة 40 من الشوط الثاني ( ملاحظين النظام في الزمن !! ) وأزيدكم في الشعر بيت الأهداف أحرزها حرف الشين ( شيبوب وشيبولا ) وإحتمال لو شارك شلش كان ممكن يجيب الهدف الثالث لو تجرأ أخوان بلة وأحرزوا الهدف الثاني ، طبعاً سيد البلد إرتفع بنقاطه إلى 25 في مركز الصدارة ورفع شعاره المحبب ...تمتع بالرحلة ودع القيادة لنا ...وأجمل حاجة مشاركة نجوم في الهلال طال عهدهم بالمشاركات الرسمية مثل الحارس جمعة جينارو رغم بعده عن المباريات التنافسية لكن جينارو مولعة نارو ، كما شارك أبوستة والسموأل ميرغني ووليد علاء الدين والشاب ولاء الدين وكابو ، الهلالاب قالوا عندنا مشكلة في الدفاع !! بالله الهلالاب ديل مامفترين !! يعني لو كان في دفاعكم واوا وصلاح نمر كان إنتحرتوا !! مفروض الأقمار يقتنعوا أن فريقهم الحالي يسير من حسن إلى أحسن ومش ناقص غير واتارا فقط في التسجيلات التكميلية القادمة ، الإعلام السالب كان يطلق علي شيبوب دهب شيبون عندما كان بطل عملية الذراع الطويلة ولعب في الهلال فأطلقوا عليه المعطوب .
*** بلة الغائب وسفاري سبب المصائب
مع إشراقة كل يوم جديد يتضح للجميع أن المريخ مقبرة مواهب فقد ضاع عاطف خالد وسط الكوامر المعمرة بل إن مشاطيب المريخ مازالوا يضعون بصمتهم في أنديتهم التي إنتقلوا إليها وأقرب مثال بلة جابر أو بلة ( الغائب ) عن صفوف المريخ أحرز هدف للأهلي بصاروخ توماهوك أما سفاري السم الهاري ومعه العميد مساوي وزراء دفاع آرسنال دار جعل فقد سحبوا من المريخ 3 نقاط وقالوا له نقاط شندي تظل شنداوية ممنوع الترحال ولازم ناس عاشور وضفر يرجعوا بي ( صمة خشمهم ) رغم أن بعثة المريخ كان يقودها إبن المنطقة الأخ مزمل أبوالقاسم ومزمل كراعو خدراء مع ناس شندي ونتمني كل بعثة لي شندي يقودها مزمل ( كراعك تمشي لي النبي يامزمل قول آمييين ) طبعاً الجيران أخدوا في شندي علقة ساخنة ( ما أخدهاش حرامي فراخ كما يقول الإخوة في شمال الوادي ) والصول بتاع الجلد كان إسمو ( إستغفر الله ) هم صولين ما صول واحد الأول خطاب فيصل والتاني مجاهد فاروق وأحرز يتيمة المريخ اليتيم كونلي ، الغريبة إعلام المريخ قال غارزيتو يهاجم حكمنا الدولي الفاضل أبوشنب وإذا صح كلام الإعلام السالب نقول للعجوز ( أب قفة ) ... ياغريب خليك أديب ، وهذه الإساءة التي تحدث لقضاة الملاعب عندنا بسبب سلبية إتحاد اللقيمات الكسيح ، بالمناسبة بعد علقة شندي تدحرج المريخ للمركز الخامس حيث أبو الهل في الصدارة ووصيفه الشرطة ووصيف الوصيف أهلي الخرطوم والرابع هلال كادوقلي !! لذا لزم التنويه .
*** رسائل غنائية رياضية من الفنان هاشم ميرغني
نريد أن نرسل تلاتة رسائل غنائية رياضية من أغنية ( مرة صابر فوق أذاي ) كلمات الشاعر محمود حسين خضر وغناء هاشم ميرغني والرسالة الأولي من مجلس المريخ وهو يواسي الصفوة ويقول لهم بأنهم بالأمس نالوا كأس دعم الطلبة في مباراة ودية من الهلال واليوم خسروا نقاط شندي في مباراة رسمية وهذا حال الدنيا و لديهم محاولة في شكوى ضد لاعب الأهلي محمد حسن الطيب ولو وجدوا مثل لجنة سمير فضل ربما نالوا نقاط المكاتب بدل نقاط الملاعب وتقول الرسالة *** مرة صابر فوق أذايا ومرة شايل جرحي وأشكي ... ياحبيبي الدنيا حالة يوم تفرح ويوم تبكي ، والرسالة التانية من إعلام المريخ ضد إمبراطور التحكيم الأحمر فيصل سيحة الذي تصالح مع ضميره هذه المرة وقال إن هدف عاشور في المباراة الودية في شباك مكسيم غير صحيح وأن الهلال تعرض لظلم التحكيم وتقول الرسالة *** مرة غايتو نقول إرادة دنيا خائنة الحب تسيببو ... يوم تصافي ويوم تجافي ... ويوم تشيل سعدي وتحيبو ، والرسالة الأخيرة من كابتن الهلال السابق سيف مساوي وهو يخاطب جماهير الأقمار ويتمني العودة لصفوف الأقمار وتقول الرسالة *** نحن مهما فراقنا طول ... ريدنا في أعماقنا باقي ... ونبقي زي ماكنا أول ياحبيبي الحي بلاقي ، نسأل الله النصر المبين لهلال التبلدي الذي يخوض معركة التحدي أمام سلطات موانئ غامبيا غداً الأحد ولأول مرة هلالان في سماء القارة السمراء .
*** همسة الوداع
حبايبنا الحلوين بالنهار يسبحوا وبالليل يضبحوا سبق لهم أن طلبوا خدمات نجم الأهلي شندي محمد حسن الطيب وبعد علقة شندي قدموا شكوي قالوا تسجيله غير صحيح !! طيب مادام كدة كنتوا عايزين تسجلوه كيف !! أنا لو كنت مكان كبسور الأحمر كنت أسندت ملف الشكاوي الكتيرة دي للصحفي المريخابي بابكر سلك عشان يكون زيتنا في بيتنا والمارقة أولي بيها سلك !! وبهذه المناسبة نهمس في أذن الإعلام الأحمر إنتوا ماواثقين من شهادة المحاماة حقت سلك !! معقول تكون مضروبة زي تسجيل باسكال واوا ( الكيري ) ولاّ شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 7  0
التعليقات ( 7 )
الترتيب بـ
الأحدث
الأقدم
الملائم
  • #1
    فيصل الاقرع 04-16-2017 11:0
    سلام جعلينا نحن سميناها ليلة الشيمات شيبون وشيبوله وشندي والعشاء كان شيه واهلي شندي سبحان الله عنده دفاع السودان سفاري ومساوي وبعدين يااخي فال الله ولا فالك فول علينا بواوا وصلاح نمر مفروض تقول لا قدر الله
    اليوم مفكره وكوره مفكره بتفصيل قصيدة عتيق الرائعه
    والهمسه اعلق عليها ود عقيده نحن ما لينا دعوه
  • #2
    حسن ميرغني عثمان محمد 04-16-2017 09:0
    يعني عادي ممكن نقول الدلاقين وصيف هلال كادوقلي والأهلي الخرطوم وصيف سيد البلد
  • #3
    منعم ابوناصر 04-15-2017 05:0
    يا العارف عزو انت مضايق ليه ومحرم علينا الفرح انت هزمتنا فى مبارة وديه شى عادى وانا كان ا قتراحى تلعب يالصف التانى بعدين المباريات بينا مستمره مالك بتهضرب طول بالك صراع الرجال متنى ونحن مابنقول الحكم زيكم ولكن منظركم سيحه مرق النصيحه بعدين طول عمركم الفريق المدفور من قبل الحكام واتحاد اللقمات واتحداك ان يفصل اتحادكم فى قضيه هلال الجبال خصوصا بعد جرح الشنداويه ماممكن يفقدو المدفور نقاط اخرى لكن لما كانت الشكوى عكس على طول سحبت النقاط من هلال الجبال الى المدفور وعليكم دوما بنقاط المكاتب وفعلا كما قال الجعلى الوصيف الشاكى اسرع من كاكى000يااخوى انت جيت ولا لسه واقف فى محطة شندى 0مجرد سؤال
  • #4
    منعم ابوناصر 04-15-2017 05:0
    المصسيه ياالجعلى فى صاحيك الصحفى موسى مصطفى فعلا العرق دساس كنا متخيلين انو من خيرة صحفى الوصيف الدائم ولكن اليوم سحيو عرق ناس مزمز وكابو وسلك العريان يعنى انا الى الحيبن اشك فى كاتب المقال يكون موسى مصطفى 000 لكن ابدااااع عمك بشير عتيق 0000بعدين فعلا علقه ماكلهاش حرامى فراخ طيب ليش دائما يسلبو حق الغير صراحه الاهلى شندى لعب مبارة كبيره واستحق الفوز ليه البكاء والعويل لكن من خلى عادتو قلت سعادتو نصيحه منى ليكم عليكم بنقاط المكاتب اسهل طريق ليكم00بعدين راسك يسوى اووووو ولا واوا مجرد سؤال 00محاسن رجعى باسكال من يلدو كبى الزوغه
  • #5
    الكتاااااحة والتفاااااحة 04-15-2017 05:0
    مره تطرب .. ومره تدى الفيها النصيب
    مره تفلق .. ومره تداوي

    حصل خالك يا محجوب ود علي
    الليلة خالك شارب شاى بلبن
    هسع بنط ليك ودعقيدة
    شيل شيلتك
  • #6
    عزالدين ابراهيم عبدالرحمن 04-15-2017 04:0
    النقر: تيتيه هداف امام الاندية الصغيرة والمريخ هو الافضل والازرق يحتاج للكثير
    فتح مدرب التريعة الفاتح النقر النار في كل الاتجاهات وقال ان الهلال يحتاج الى اسعاف و تدخل سريع من اجل تسجيل لاعبي اطراف و مهاجمين قبل الاطراف و خط دفاع كامل و قال ان اللاعب تيتيه لاعب هداف امام الاندية الصغيرة و اما المريخ هو افضل فريق سوداني حاليا و يحتاج لعدد قليل من اللاعب و المدينة وحدة يساوي...
    دا كلام النقر مدربكم تاني في كلام
  • #7
    عزالدين ابراهيم عبدالرحمن 04-15-2017 04:0
    ليس الفتي من يقول كان ابي ان الفتي من يقول ها انذا انتو مغلوبين مننا 2/صفر يبقي ما عندكم حق الكلام معانا تبقو ساكتين بس مالك ومال الاهلي شندي ؟؟؟؟؟؟؟؟؟؟؟؟؟
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019