• ×
الجمعة 29 مارس 2024 | 03-27-2024
الواثق عبدالرحمن

همس الهتاف

الواثق عبدالرحمن

 1  0  1596
الواثق عبدالرحمن

صرح يا محسن
+ يمكن ان تكون له علاقة بأي شيء الا كرة القدم .
+ الكورة بنعرفا كويس ، لعبناها وشفناها .
+ ما فعله اولاد الهلال في النصف الاول من مباراتهم مع اتحاد مدني عجيب وغريب ورهيب ، يمكنك ان تصنفه في خانة السحر ، الابهار المطلق ، الرسم الكنتوري ، الموسيقى ، فقد كانت لوحة تشكيلية تدهشك من أي زواية نظرت اليها ، سيمفونية تضاف الى شلالات الروعة التي اطلقها بتهوفن وزين بها جيد الدنيا .
+ تاني تصرح يا محسن ؟؟
+ السر في التصريح ، التصريح الكاتلكم شنو انت .
+ ناس جنها تصرح ، ازونا تصريحات ساااااي .
+ ياخ انتو ناس كورة والا سياسيين .
+ الازرق جنو وجن الزول البصرح .
+ تصرح كتير تشوف كتير
+ الشوط الاول اربعة ، وبلنتي مهند راح كرامة سااااي .
+ في الكرة السودانية تنظيرة عجيبة ، عايز تشتهر صرح في مباراة فريقك الذي تدربه ضد الهلال ، يا صابت يا خابت .
+ كان صابت ، وده نادراً ما يحدث ، البيلية بتضرب معاك واسهمك تزيد .
+ الرشيد المهدية زاتو ، سيد الاسم ما غيرو ، شهرتو زادت لما بقى يصرح ويصرج .
+ يصرح احياناً ، ويصرج في اخرى .
+ خلونا في كورة اتحاد مدني .
+ وحات الله الجماعة بقوا يحننوا ، بقوا متفرجين زينا ساي كده .
+ تاني تصرح يا محسن .
+ هذا ليس بفريق للكرة انه تماماً كفرقة هارلم الشهيرة في كرة السلة فوز ومتعة ، غايتو قروشك بتحللا كان دخلت كورة الهلال .
+ موش بقولوا في فن للفن ، فن للمتعة المحضة اهو هلال الجن ده كده .
+ يمتعك ، ويحلق بك في عوالم الاستمتاع المخلوط بشهقة النفس ، تستمتع لما تتشهق ، سيدا ومهند وعلاء وعمر وخليفة وبشة وكاريكا المزيكا .
+ بالجد متعة فوق للتصور ، كرة قدم ندية وطازجة .
+ كورة زي الكورة ياخ .
+ الاولاد ديل فيهم عرق برازيلي والا شنو .
+ الغريبة المدرب صربي ، انت يازول قايل اتحاد مدني ده من البوسنة والا شنو .
+ تاني تصرح يا محسن .
+ البصرح ، بيتعمل ليهو تصريح ستة .
+ المرة الجاية صرحوا بالصامت ، خلو تصريحاتكم هزاز .
+ ياخ مهند حنا على الجماعة ، يا ود انت الهداف زيد الغلة .
+ قلت لي الهداف وارغو .
+ وارغو الحارقو .
+ وارغو المرق الوالي .
+ انت يا وارغو تتجازى .
+ بروفة جيدة للتوانسة .
+ مباراة التوانسة عنوانا الثبات واليقين .
+ الثقة مهمة والثبات الانفعالي مطلوب .
+ لا عندنا نقص حرفنة ولا شح مهارات ولا قلة لياقة ولا ضعف خبرة .
+ هو اذن اليقين والايمان بالقدرات وضبط النفس والابتعاد عن احابيل التوانسة .
+ شفتوهم شفطوا الاهلي كيف ، كرة يد ، ومباصرة تحكيم .
+ ما تحتكوا مع الحكم في تونس .
+ التحكيم الافريقي ضعيف وغالباً ما يساند الفريق صاحب الارض .
+ الهلال جاهز ، والاسياد في احسن حال .
+ تاني تصرح يا محسن .
+ ياخ تصريحك ده قوم عليك الاسياد وخلص المباراة من شقها الاول .
+ همس الهتاف كتبتو بين الشوطين .
+ صفارة الحكم راجيها لي شنو ، ما مولد وخلص .
+ تاني تصرح يا محسن .
+ انتهت سبعة ، ودخلت ارتال من الاسياد صراع الهدافين .
+ مهند الاول كاريكا شرحو ، والبقية في الطريق
هتاف اخير
ما بقدر اقول.... انا ما قادر اصرح
يمكن قون يزيد يمكن قول يجرح
يمكن فوز كبير.... والاسياد تجرح مع الاعتذار للشاعر والمغني والاغنية
امسح للحصول على الرابط
بواسطة : الواثق عبدالرحمن
 1  0
التعليقات ( 1 )
الترتيب بـ
الأحدث
الأقدم
الملائم
  • #1
    محمد عيسى 10-27-2010 08:0
    يا بتاعين الأسياد (اسياد اللبن) انت جادي في كلامك داولا عايز تملأ عمودك وخلاص تقبض المعلوم يا صحفيي الغفلة . مانشيت الغد ( سيد اللبن يغادر الجعرانية) واتجعرني واتسيدي !!!!!!!!! عجبي
       الرد على زائر
    • 1 - 1
      سولي شريف 10-27-2010 01:0
      ستموت بسبب هذا الحقد أيها المدعو محمد عيسى .. أفهم معنى الرياضة أو تحول للبنغ بونغ .. اتبغغي..
    • 1 - 2
      خالد عبد النبي 10-27-2010 01:0
      يبدو عليك يامحمد عيسي واحد حاقد لاتمتلك زرة من الوطنية الهلال يلعب باسم الوطن وانشاء الله سيرتد كيدك في نحرك ويبدو عليك عواطلي تبحث عن اعمدة كتاب الهلال لتبث سمومك والتي ستموت بها ،،، خليك مع الوصيف انت ماقدر الكبار .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019