• ×
الأربعاء 28 يوليو 2021 | 07-27-2021
شوربجي

الانهيار وجهاد جريشه المظلوم والانهار

شوربجي

 5  0  1642
شوربجي


((())) يجب ان تتوقف احتفالات الهلال :

خلاص فرحنا وانبسطنا وزغردنا ورقصنا

وشكرنا ادارة الهلال واللاعبين والجهاز الفني

ورفعناهم فوق هاماتنا لما قدموه لنا من مستوي رفيع في امدرمان

ولكن الهلال حتي الآن لم يتأهل

وان كان الشوط الاول قد انتهي لصالح الهلال بنتيجه مريحه ومرضيه

فبورت لويس ليس بالفريق الهين

وقد شاهدناه يصول ويجول في الملعب بثقه كبيره

وكل لاعبوه يمتلكون بنيات قويه

فمطلوب من الهلال ان لا يركن الي التراخي

وان يلعب بنفس وتيرة المباراة الاولي

وان لا يصاب اللاعبون بالغرور

وان يحترموا الخصم كما ينبغي

وعلي الجهاز الفني العمل علي اعداد اللاعبين لمباراة الرد

وكل الدعوات ان يوفق الله فريق الهلال في تلك البلاد البعيده


((())) تأهل المريخ من سابع المستحيلات ولكن :

علي جماهير المريخ ان تهب لاستقبال فريقها القادم من نيجيريا

وان يصطف كل المريخاب في مطار الخرطوم للتخفيف من احزان تلك الهزيمه القويه

فهذه حال الكرة يوم لك ويوم عليك

ويمكن ان تعود فرقة المريخ في مباراة الرد

ولكن تحتاج تلك العوده مجهودا خرافيا وجبارا

وبشرط ان لا يسجل النيجيرين اهدافا اخري

علي ان تبادر فرقة المريخ بالتسجيل سريعا

وان كان ذلك سيعرض المريخ لخطر كبير

فقد ينكشف دفاع المريخ امام هدافي الانهار

وان كنت اري ان الامر في غاية الصعوبه

خاصة في وجود تلك الوجوه الشابه في الفرقة الانهاريه

والتي يقابلها لاعبون كبار وعواجيز امتلأت بهم جنبات المريخ

المريخ اخوتي يعاني من كثرة المباريات في ثلاث جبهات

وظني انه لن يكون قادرا علي المواصله


((())) وكان لشعراء الهلال كلمتهم :

ود المجذوب
ود بشري وسوهندا تعالو يا شفاتة
واجعني الوصيف القالو شالا تلاتة
عيدو الذكريات الفي شريط الداتا
تلقو الفرصة ممكنة والنجيمة حلاتا
****
سوهندا
ودمجذوب اخوي انا غايتو ماشمتانه
من حالة الوصيف انا يارفيق حزنانه
بعد ما النجمه كانت في النصر عشمانه
هسه بشوفا محتاره وبقت محنانه
****
ود البشرى :
قالوا فريقنا ،،،، لي شيل التقيلة مدرررب
المريخ صعب ،،، في الحارة دييمة مجرب
قالوا دفاعنا خرصااانة ،،، وحقيقة مكرب
من فت هجمة ماالو الليلة وقع إتخررب
******
ود المجذوب
يوم ناساروا حصلت ونحنا استمعتنا
والبارشا انتفض.. يا نجمة انتي اشمعني
يا سوهندا ليك نفس السؤال بالمعني
هل ممكن تعود النجمة ،،، بعد الطعنة
******
سوهندا
لوداير كلامي ،،، بقولو سرعه حقيقه
واب نجمه الحزين مااظنو عندو طريقه
ختام القول بجيب جملة حروفي واصيغا
هاميني الهلال..والباقي كلو حرييقه
*****
ودالبشرى :
يوم ناساروا داك ،،، كانت حظوظنا بعيدة
بس جمهورنا ،،، كانت عندو وقفة فريدة
مسكين الوصيف ،،، كيف فلسفتنا يجيدا
من وين يلقى زول اسطوري بشبه سيدا
*******
ود المجذوب :
ود البشري اخوي للفرحة انت مؤهل
الازرق غلب وان شاء الله ليك تتسهل
عندي سؤال بوجهو في اجابتو اتمهل
المريخ دحين ،،، ممكن يفوز يتأهل
*****
سوهندا :
صن صن يارفيق واصبر دقيقه استنى
في حروفك اقيف بس لوسمحت اتأنى
الأحلام حلال خلي الوصيف يتمنى
زي ما إبليس عشم يدوهو بيت في الجنه
*****
ودالبشرى :
ود مجذوب اخوي ،،، صدقني ماني مؤمل
المريخ كعب ،،،، جمهورو سااااي متحمل
لو داير يفوز ، شان في البطولة يكمل
الحكم الظريف ،، لااازم ، ،،، يكون مزمل
******
ود المجذوب
ابطال الكبار ،،،، يا نجمة زي الصبة
والازرق كبير ،،،، من الصميم بتحبا
ود بشري وسوهندا هلالنا ذوق ومحبة
عارف القصة جاطت..بس نطمنو حبة
*****
سوهندا
ودمجذوب بشوفك ،،، كاتب أحلى اغاني
في جور الفريق الساب وصيفنا يعاني
مادام التأهل ،،، ليهم اصبح اماني
خليهم يحاولو ،،، الحظ يجربو تاني
*****
ود البشرى :
معروف من زمااان ،،،الزول بجامل جارو
بنحاول نشجعو ،،،،، لما يرجع دارو
ياااا غلبو (الريفر ) ،،،، مريخنا بقت نارو
ياا كتمت كمان،،،، يا صحبي شتتو طارو


((())) اعذار غارزيتو والاعلام السالب والشماعه هو جهاد جريشه :

تبني اعلام المريخ السالب كل تصريحات المدرب غارزيتو

وطبعا سينال الحكم المصري جهاد جريشه نصيبه من الانتقادات المريخيه

والسبب طبعا انه يجب عليه احتساب بعض ضربات الجزاء للمريخ

بحكم ان مصر والسودان حته واحده

وقد تحدث غارزيتو عن الظروف الطبيعية القاسية التي عانى منها فريقه في المباراة،مشيراً الى أن الطقس كان خانقاً ودرجة الحرارة سجلت أعلى معدلاتها مع رطوبة عالية،

وعندما تكون هذه الظروف الطبيعية في عشب صناعي تكون المعاناة أكبر،

لذلك كانت كل الظروف ضد المريخ في تلك المباراة،

ونوه غارزيتو الى ان هذه الظروف جاءت في وقت كان فيه المريخ يؤدي مبارياته في ظل برنامج ضاغط،

لذلك كانت مؤثرة لأبعد الحدود على أداء الفريق في المباراة،

واضاف: زاد الوضع سواء بسبب الحكم المصري جهاد جريشة الذي ادار المباراة بصورة سيئة للغاية وظلم المريخ بصورة سافرة،

وأسهم مساعدوه بصورة واضحة في الظلم الكبير الذي وقع على المريخ، وعكس العديد من الحالات وانحاز لأصحاب الأرض بصورة سافرة،

وتضرر المريخ كثيراً من قراراته الخاطئة.


محمد الحسن شوربجي
امسح للحصول على الرابط
بواسطة : شوربجي
 5  0
التعليقات ( 5 )
الترتيب بـ
الأحدث
الأقدم
الملائم
  • #1
    عثمان جميل الدوحه قطر 03-14-2017 11:0
    من قبل سبق وأن قال شاعر السودان الضخم الأديب الأريب السيد محمد أحمد المحجوب رئيس الوزراء السوداني يرثي حال ماآل إليه السودان عندما تقلد اللواء محمد طلعت فريد وزارة التربية والتعليم في عهد حكومة عبود فقال قولته الشهيره في ابيات من الشعر ؛ كل إمريء في السودان ينال مكانا غير مكانه
    المال عند شحيحه والسيف عند جبانه .
    نعم هذا زمانك يامهازل فأمرحي .. أمثال شوربجي العربجي يكتب عن المريخ ويستهزأ هذا المأفون بالهزيمة التى نالها المريخ بنيجيريا واصفا في كلام ركيك وفارغ من المحتوى والمضمون بإستحالة تأهل المريخ لأنك ساذج وسطحي وتكتب بلا وعي وتفكير رشيد أن كرة القدم لا تعرف المستحيل .. ولا تفرح أنك قابلت اضعف الفرق في المجموعة .. صبرا فهل أنت بهذا الفريق ستحقق في مقبل الأيام إنتصارا على اي فريق في المباريات القادمة فأنت موهوم وفأفون ومجنون .
    لا تشمت فأنت أضعف فرق المجموعة فإذا ساعدك الحظ وقابلت في مستهل المشوار فريقا مثل فريق موريشص ... فالفرق القادمه فرق نارية وانتحاريه ستبكي بكاءا مرا وستولول مثل الحريم وسترمي دلوكتك وستنسى الرقص والزغاريد .. وهذه الأشياء والأفعال ليست من شمم الرجال يادجال .
  • #2
    ود ابشر السعيد 03-14-2017 09:0
    المصريين ديل ملاعين و عبيد مال ما عندهم اخلاق فى اى مكان ملاقييننا الله لا جاب عقابهم
  • #3
    عثمان جميل الدوحه قطر 03-14-2017 09:0
    اضحكوا مع شوربه قال اوقفوا الإحتفالات خلاص رقصنا وزغردنا ... وشلت دلوكته وترقص وتزغرد وسط الجماهير ياهمبول وياطرطور ماهو الرقيص والزغاريد أنت قمت وشبيت عليه من شب على شيء شاب عليه ما الجديد لكي تذكره لنا نحن ماعارفينك ياكهل ياعجوز انت بلا الخيابه والخيانه والفتنه والنميمه عندك شنو ... ألم تقرأ بالأمس رد الهلالي الرائع بكري لك أنه نعم الهلالاب الأصليين .. أما الدخلاء والغرباء فلا مكان لهم في مجتمع نظيف.
    تهكمك في سيد الكرة السودانية وزعيمها فمردود عليك ايها المتشنج الأعمى ... فكم مرة أنت تلقيت الهزائم تلو الهزائم بالخمسات والستات نسيت لما الفنان ترباس مشى يشرب مويه وجاء لقاها سته اهداف وقال مقولته الشهيرة والتي سار بها الركبان قال للفنان حمد الريح مشيت أشرب مويه لقيت الهلال راح في شربة مويه .. الفضائح عندكم بالكوم لكن أنا لا يمكن أسيء الهلال من أجل واحد مثلك مشجع متشنج متعصب دخيل ... السوداني الحر الأصيل لا يمكن ان يآتي بمثل أفعالك الشنعاء هذه والمصيبه رجل فاق الثمانين من عمره ويتهابل وبتعابط مثل الصغار .. يشتم ويسب ولا يهمه ماأثقل هذا المدعو دما .. المريخ سيتأهل غصبا عنك ايها الحاقد الممبوذ .. وجهاد أبو جريشه ماإبن عمك وممكن مثلك يرتشي ويعمل اي شيء ليه إنت محتار .. ماأنت مثله وتطبيلك لكردنه علشان خاطر عيون الهلال ومن أين أنت تعرف الهلال .. غايتو لم أرى في حياتي أسوأ من هذا الرمه .
  • #4
    السما الأحمر 03-14-2017 08:0
    يا حاسد الله يكفينا شرك ..طبعا الحسد حاجة مكروهة وانا عمري ما شفت زول حاقد وحاسد مثلك والله يكفينا شرك ..وان شاء الله المريخ سيجتاز الانهار بعدد وافر من الاهداف ويتاهل باذن الله وانت طبعا حاتموت حسدا
  • #5
    ابو انس 03-14-2017 07:0
    عودة الاحمر ممكنة خاصة في ظل الخبرات المتراكمة لديهم في التعامل مع الجلاكسات والحواسيب المحمولة جوا , فان راقبتم التحركات والحركات الجارية من يوم امس وفتحتم العيون وكثفتم الرقابة على الحكام دخولا واقامة نضمن لكم طيران امن فلنكن كلنا عيون واذان
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019