• ×
الثلاثاء 27 يوليو 2021 | 07-27-2021
محمد عثمان الجعلي

طبل العز ضرب والهلال غلب

محمد عثمان الجعلي

 7  0  3124
محمد عثمان الجعلي

عندما يغني الفنان سيف الجامعة أغنية ( طبل العز ضرب ) كلمات الشاعر سيد أحمد الحردلو والتي تقول بعض كلماتها *** طبل العز ضرب ياالسرة قومي خلاص ...والجنيات هديك في الساحة ختوا الساس ... والبنوت زغاريدن طارت تجيب الطاش ... والخيل عركسن والدنيا بوق ونحاس ... والسودان خلاص ياالسرة قام دواس ... شد سواعدوا تاني وشيد المتراس ، عندما نسمع هذه الكلمات الجميلة يذهب الخيال لهلال العشق الجميل الذي إلتقى سانت لويس بطل موريشيوص في أول مشواره في مسابقة أبطال أفريقيا للكبار ، طبعاً الجنيات هديك الختوا الساس هم أخوان كاريكا وبشة ونزار أما زغاريد البنوت فهي صادرة من حناجر مهيرات الهلال والدنيا بوق ونحاس عشان إنتصار الهلال هو إختصار لمشوار الفرح في دنيا الطرب والمرح ، فعندما يفوز الهلال تتفتح الأزهار ويفرح الأطفال وتطرب عذارى الحي ، شارك الوطن بأربعة أندية في منافسات القارة المختلفة ولعب فريقان داخل الوطن وفريقان خارجه فخسر هلال الأبيض من سانجا بلوندي بهدف في الكنغو وهذه ضربة خفيفة يمكن تعويضها في كردفان وإتجهت اللأنظار نحو المريخ وكعادة المريخ يخيب الآمال كلما إتجهت إليه أنظار الوطن فخسر من ريفرز في نيجيريا بربع دستة وفاز أهلي شندي على سيور سبورت الجنوب أفريقي بنتيجة أقرب للهزيمة هي ثلاثة أهداف مقابل هدفين في شندي وعاش الناس في حيرة وكانوا في حاجة ماسة لمن يعيد لهذا الشعب الصابر المصابر توازنه النفسي ، فنطر الناس ناحية الجنوب فلم يشاهدوا مواسياً يفش الضيم ونظروا ناحية الشمال فلم يشاهدوا شيئاً ونظروا ناحية المغرب فلم يشاهدوا شيئاً وإتجهت الأنظار ناحية المشرق فشاهدوا فارس السودان وسيد البلد وهلال العشق الجميل ...عن إذنكم فاصل ونواصل ونظبط الرأس بي كباية شاي مدنكل بالهبهان والقرنفل ، عدنا ليكم ... نعم شاهد الكل نسر السودان الأزرق قادم من المشرق فصاحوا في وجهه *** عينيك يا الصقر في الحارة مابتنوم ... صدرك للصعاب دائماً بعرف العوم ... في وسط الفريق في الفارغة مابتحوم ... لابتتلام لا بتعرف تجيب اللوم ... ود ناساً عزاز جمعوا المكارم كوم ... تفخر بيك البادية والخرطوم ... أنقروا لما فرسان الهلال سمعوا الكلام ده الحصل شنو !! شالوا جوازات ناس سانت لويس وسلموها للمعقب بشة وقالوا ليه ( فارات موريشيوص الداقسة دي ) عايزنك تعمل ليهم خروجي نهائي من الأبطال ، وقد كان الأقمار عند حس الظن ، وفي أول ربع ساعة أرسل الشاب أوكرا يسارية قاتلة سكنت شباك الضيوف وحركت سكون المدرجات وفي نهاية الشوط الأول مرر نزار الكرة للمعقب بشة ( أستغفر الله ) المهندس بشة الذي أحرز الهدف الثاني ومع بداية شوط المدربين أضاف بشة هدف الأمان لهلال السودان وقال بكل تواضع ( هذه ترجمة لجهود زملائي اللاعبين ) ... ولقد شاهدنا العنف الذي مارسه ( عنقالة موريشيوص ) حيث أصابوا أبوعاقة وشيبولا ، ولقد أسفر هلال 2017 عن وجهه المشرق والقادم أحلى بإذن الله تعالي .
*** في وضح النهار المريخ يغرق في الأنهار
خسر مريخ السودان بثلاثية نظيفة أمام فريق الأنهار النيجيري خارج الديار وهي هزيمة ثقيلة ومهمة تعويضها صعبة ولكن غير مستحيلة ، لن نشمت بالجيران كما يفعل الإعلام السالب ومدرسة الهلال النموذجية علمتنا عدم الشماتة لأن هناك مريخاب يشاركوننا هموم الغربة وهم من أحباب الرحيق منهم خلف الله بلة مريخاب خيبر وعزالدين إبراهيم مريخاب الرياض وإبن الوهاج مريخاب الأمارات وعثمان جميل مريخاب الدوحة ونقول للإعلام الأحمر عشان خاطر الزهور نسقي النجيلة ، وكما قال الأستاذ الواثق عبد الرحمن صاحب همس الضفاف ... إتنين حارات ( غربة وغلب ) ونتمنى من إعلام المريخ أن يترك المسائل الإنصرافية ومهاجمة حكام الوطن المساكين وينتبه لبناء الفريق عشان عواجيز القارة الذين يعج بهم الكشف الأحمر أخطر على الفريق من الخصوم وواوا وعلي جعفر ، لماذا لا يقف الإتحاد العام موقف قوي ضد الهجوم على الحكام ويدافع عنهم ، والحكم هو قاضي الملعب ويجب إحترام القضاة أينما كانوا ، وياترى لماذا لا يصفق جمهورنا الرياضي للحكم عقب نهاية المباراة مهما كانت النتيجة ولماذا لا يبدأ هذه السنة الحسنة جمهور القمة و جمهور بقية الأندية ، ويجب على جمهور المريخ أن يتشبه بجمهور الهلال الذي نال من الكاف كأس الجمهور المثالي ولله در القائل
*** عودوا بالوصل من غسق الدجى ...فالهجر ليل والوصال صباح
*** والله ماطلبوا الوقوف ببابه ... حتى دعوا فأتاهم المفتاح
*** لايطربون بغير ذكر حبيبهم ... أبداً فكل زمانهم أفراح
*** فتشبهوا إن لم تكونوا مثلهم ... إن التشبه بالكرام فلاح
نتمني أن يغير جمهورنا الرياضي من نغمة التحكيم فاشل .
*** لاعب سابق غاني يشجع فريق سوداني
زارنا زبون في الشركة ووجدت في الإقامة الجنسية غاني فبادرني بالسؤال بالإنجليزي ( يو آر فروم سودان ) فعندما أجبته بنعم قال لي ( أي نو مور إنفورميشان أباوت يور كنترى !! وأضاف الغاني ( آي لايك المريخ تيم ...آي دس لايك الهلال ) فقلت في نفسي ...دي مصيبة شنو الجاتنا دي !! وكمان بعرف عن بلدي معلومات كتيرة ويحب المريخ ويكره الهلال !! وأخبرني أن إسمه وينيه أوجيه وأنه لعب سنتين في فريق الأشانتي وإحترف في أوربا ولكن مسيرته الرياضية توقفت بعد أن إنكسرت رجله وأخبرني عن أوكرا وتيتيه والمعلومة التي أجهلها أخبرني أن تيتيه كان مسيحياً ولكن عندما زار السودان إعتنق الإسلام وأسمي نفسه محمداً ... يلا ياعماد الطيب أخبرنا بمدي صحة هذه المعلومة ، ووجدته يعرف الكثير عن الهلال والمريخ وعندما أخبرته أني هلالابي أجابني ضاحكاً أن سر حبه للمريخ الشعار الأصفر لأنه شعار فريق الأشانتي ، بصراحة هو شاب راقي لكن قلت ليه كان لموا فيك ناس فيصل الأقرع وأبوناصر وأبوحسن وأبوحازم وجيفارا ( بقطعوا ليك إضيناتك الصغار ديل) وأبوضحي هلالاب محايل إتصل بي معاتباً لأنني كتبت المفكرة ولم أكتب عن مباراة الهلال مع بطل موريشيوص وقال لي ضاحكاً بتستحمل النقد القاسي !! قلت له يشرفني ويفيدني ، فقال مفكرتك يوم مباراة الهلال زي الزول الجاب لي ضيفه عشاء بي ملاح ( خدراء ) يعمل ليه وجع قلب !! في ناس يا أبوضحى ( الخدراء ) يكاتلوا فيها كتال زي سلطة الأسود .
*** همسة الوداع
حبايبنا الحلوين كل مايكون فريقهم داير دفرة مابقصروا كان بالحكم أو الشتل الإعلامي ( جاهزين جاهزين ) فقد ذكرت صحيفة الصدي أن إحدى أكاديميات كرة القدم المشهورة في ألمانيا تقدمت بعقد إحتراف لنجم المريخ خالد النعسان !! وأن اللاعب أبدي موافقة مشروطة وذلك بعد أن يوافق مجلس إدارة المريخ !! الولد دا ( أتضارفوا عليه ) ناس توماس مولر وفرانك ريبيري ) مايقوموا يلحسوا منه لمساته السحرية ... ناس بايرن ميونيخ ديل ( كراعهم خفيفة ) بسرقوا أي لمسة حلوة !! أنا قلت إمكن النعسان ماشي يعمل عملية عيون ( ويتشلق ) في ألمانيا !! أنتوا ماعندكم زول صاحي تودوه ألمانيا بدل النعسان !! وبهذه المناسبة نهمس في أذن الإعلام الأحمر مادام ناسكم مرغوبين عند الخواجات و النعسان دربه مرق وماشي ألمانيا !! معقول مالقيتوا ليكم عقد إحتراف لي ضفر في أسبانيا ؟ مجرد سؤال .
امسح للحصول على الرابط
بواسطة : محمد عثمان الجعلي
 7  0
التعليقات ( 7 )
الترتيب بـ
الأحدث
الأقدم
الملائم
  • #1
    ابوحسن 03-14-2017 04:0
    لك التحية استاذنا محمد عثمان ونبارك الفوز لاابو الهل والفضل يرجع لله في الاول وحماس وتحدي اللاعبين ثم بعد ذلك المدرب
    الزكي نبيل الكوكي هذا الرجل فيه احساس بمسؤولية والصدق وتجاوب وتنفيذ الخطة من قبل اللاعبين معه والاداء كان احسن في
    الشوط الاول للزعيم هلال العشق الجميل زي ما يحلو لاستاذنا الجعلي هههههههه بعدين يا الجعلي الغاني الجاك دا ما يكون مرسلنو ليك ناس الصفوة *
  • #2
    منعم ابوناصر 03-14-2017 10:0
    جعلينا تحياتى اولا التهانى والتبريكات لشعب الهلال بهذا المستوى الغير مستغرب من اولادهم لانهم دوما اهل وقفات مشهوده ولانهم دوما مع الكبار ويعرفو طرق الكبار مش ذى المستجدين المهم ماعلينا والتحيه لهم بهذا الانتصار الغريض والتحيه لهم يعودة المهندس يشه التشه ونقول شكرا الديبه وشكرا الكوكى الذى حفظ حق الديبه وشكرا النقى وشكرا وماقصرت لقائد هذه الكوكبه ومفجر النهضه الاخ الكاردينال شكرا لك بهذا الابداع الجميل والوجه المشرق الذى ظهرت به الجوهره000000 تحياتى للاخ الامين جيفارا واضم صوتى اليك وصاحبك كفوة الاحمر والاصفر دوما معه ذى مابقول اهلنا الصوفيه (دى حمله تقيله ) بعدين ياجيفارا يعنى انت رميت حملة الاصفر فينى والاخ الاقرع ياخى دا كتير علينا خلى الحمله على صاحبك الجعلى 0000اخونا عزالدين ابراهيم وين هو امكن جرفو موج الانهار 000مجردسؤال
  • #3
    ودعقيده خلف 03-13-2017 11:0
    استاذ الجعلي اولا التحيه للاخ الغاني وينيه اوجيه بانتمائه للاحمر الوهاج حامل الالقاب القاريه افريقيا وعربيا ومسجل اسمه في لوحه الشرف مع كبار القاره والمصيبه الكبيره كما قال استاذ الجعلي انه يكره الهلال لانه سالب مصفر واعلامه مرتشي وداء اثبات من الغاني له كل الشكر والتقدير والاحترام واتمني رسالتي دي تكون وصلته عشان يعرف قدر واحترام المريخاب ليهو شنو
  • #5
    الامين عبدالقادر 03-13-2017 06:0
    التحية والسلام اخوى الجعلى والتحية والتهانى لكل شعب الهلال على هذا النصر الكبير والخصم لم يكن سهلا ولابد من تكثيف جرعات التدريب والذهاب لموريشص من وقت بدرى لان الرطوبة عالية وجزيرة فى المحيط الهندى ماذا نتوقع ؟؟؟
    كانت عودة كاريكا وبشة فى وقتها وتوليفة الدفاع حتى الآن لم نطمئن عليها واين كانت الروح والجماعية هى سلاحها --- ونحتاج لقلب دفاع وهداف يعتمد عليهم فى التسجيلات القادمة فى يونيو --
    كبداية مبشرة ولكن نخاف من القادم لانه صعب جدا ونحن لساننا اطول من مستوانا وخاصة اعلامنا المضلل !!!
    وانت دائما اصحابك كفوة يحملون اللون الاصفر ونحن لن نقطع اذنيه ولكن نتركه للاخوان كتاحة ليصوره لنا وتفرد ابوناصر وفيصل القرع لهذا اللون --
    ودمتم للوطن والهلال فى حفظ الرحمن ورعايته
  • #6
    ودعقيده خلف 03-13-2017 04:0
    استاذ الجعلي لك التحيه دوما لا تعليق الا بعد رد الصاع صاعين
  • #7
    البابا 03-13-2017 04:0
    طبل العز ضرب ياالسرة قومي خلاص
    نزار يلعبها بالمقاس والمهندس ماسك عدة القياس
    التلاتة زي كباية الجعلي لوزنة الراس
    ظبطت راس الوطن واتمدد الاحساس
    ياناس والله الهلال ده حلو (خلاس)
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019