• ×
الأربعاء 23 يونيو 2021 | 06-22-2021
محمد عثمان الجعلي

النصر ينادي الهلال أمام الوادي

محمد عثمان الجعلي

 13  0  3429
محمد عثمان الجعلي

يلعب محبوب الجماهير الأول هلال العشق الجميل يوم الأربعاء مباراته الثامنة في الدوري أمام فريق الوادي في نيالا ، والوادي هو فريق رجل الإتحاد القوي أسامة عطا المنان المريخابي المعروف وربما تخون الرجل المهنية والحيادية في مثل هذه المواقف وينظر بالعين الواحدة لمصلحة فريقه وينسى حديث ( كلكم راع وكلكم مسئول عن رعيته ) ، ولكن للهلال رب يحميه وجمهور يفديه ... ولقد شاهدنا مافعله الحكم فضيل حميدان بالهلال في مباراة مريخ نيالا ، وإن شاء الله يعود الهلال بنقاط المباراة كاملة خاصة بعد أن يعود للهجوم تيتيه وكاريكا ، ولن أتمكن من أن أكتب عن المباراة يوم الخميس لأن هذا اليوم بإذنه تعالى سوف يخصص لكتابة المفكرة الإجتماعية نزولاً عند رغبة الكثير من أحباب الرحيق ، وموعدنا معكم صباح السبت إن أمد الله في الأعمار ووقتها سوف يكون أبو الهل إستعاد موقع الصدارة الذي يجلس عليه مؤقتاً إبننا هلال كادوقلي برصيد 14 نقطة ورصيد سيد البلد 13 نقطة وهناك القادم بقوة شرطة القضارف ( الذي عكش الجماعة في الحدود ) وهو ينافس على المركز الثالث ولكنه في مباراته القادمة سوف يصطدم بهلال التبلدي في القضارف ولو تعادل الشرطة مساء اليوم لن يتقدم على الهلال ، ويجب أن يعلم نجوم الهلال وجهازهم الفني وإدارة النادي أن هذه المباراة مهمة لعودة الفريق لسكة الإنتصار حتى تسعد الأقمار التي مازالت تساند الشباب بقوة ، والنصر ينادي الهلال أمام الوادي ويجب على أبطال الهلال أن يجيبوا النداء وهم جند الفداء ، وعندما يفوز الهلال في هذه المباراة بالذات سوف تكون النتيجة متوازنة ونكون لعبنا 8 مباريات فزنا في 4 مباريات وتعادلنا في مثلها ، أما الخسارة أو التعادل لا سمح الله سوف يمنح الفرصة لأحباب الظلام وحلفاء النواح كي يرقصوا على الجراح ، وحتى الأقلام الزرقاء المتفائلة ولينة الجانب سوف تستخدم العلاج بشرطة المحجم وكي النار بدل التداوي بالعسل ، وسيروا وعين الله ترعاكم .
*** كأسات الهلال والمريخ عبر التاريخ
كان إعلام المريخ في الماضي يباهي بأن فريقه هو صاحب الكأسات المحمولة جواً وأن الهلال هو صاحب الصفر الدولي ، دعونا في البداية نتحدث عن بطولات أفريقيا الكبري ( الأبطال والكونفدرالية ) وأنه لم يحققها فريق سوداني حتى الآن وأفضل مركز حققه الهلال الوصول للنهائي مرتين عام 1987و1992 وحقق المربع الذهبي عدة مرات أولها عام 1966 كأول إنجاز يحققه فريق عربي سوداني ، أما المريخ أفضل ترتيب له في بطولة الكبار هو وصيف الكونفدرالية عام 2007 ووصل مربع الذهب للأبطال مرة واحدة عام 2015 أما البطولات دون ذلك فقد أحرز الهلال كأس السلام من كنشاسا ( الكنغو بلد مازيمبي ) عام 1966 هلال سبت دودو وجكسا وكان الكابتن هو المرحوم إبراهيم يحيي الكوارتي راجع صحيفة الرأي العام 13/9/1966 وبعد 23 سنة من ذلك التاريخ أحرز المريخ كأس مانديلا وهي ليست أبطال ولا كونفدرالية ( كأس خلايقة كدة في النص ) لكن طبعاً ناس المريخ كديستهم جمل عملوها زي كأس الأبطال ، وكأس الأندية البطلة تم شطبها بواسطة الكاف ودمجها مع الكونفدرالية عام 2003 أما كأسات المناسبات فقد أحرز منها الهلال والمريخ عدة كأسات حيث أحرز الهلال كأس بني ياس 1988 وفاز على فريق بني ياس المطعم بنجوم العرب مثل العراقي عدنان درجال والمصري محمود الخطيب وفاز الهلال بهدفين لهدف أحرز ثنائية الهلال كندورة وكدوس وكان الكابتن هو طارق أحمد آدم ، كما فاز الهلال بكأس السد القطري عام 1994 هلال والي الدين وزاهر مركز وفاز الهلال بكأس أبوظبي الجوية في فبراير 2010 هلال كاريكا وبشة ، أما كأسات المريخ هناك 3 سيكافات أولها عام 1986 والتاني عام 1994 والتالت عام 2014 وسيكافا الفي النص عندنا معاها حديث ويعادل السيكافات بل يتفوق عليها واحد من كأسات الدهب التي فاز بها الهلال عامي 1974و 1976 من أمام المريخ ( هلال قاقرين والدحيش ) ، ولقد فاز المريخ بكأس مانديلا أمام بندل يونايتد ...وباندل غير موجود الآن على خارطة الكرة النيجيرية بهذا الإسم !! فرق زي حرامية مصر( كل يوم بي إسم جديد !! الواحد يقول لي رفيقو ... إنت النهار دا إسمك إيه ياجدع !! ) كما فاز المريخ بكأس دبي عام 1987 أمام الزمالك المصري وكأس الشارقة عام 1999 ، أما الأكذوبة التي يروج لها إعلام المريخ بأن أفضل مركز للهلال في سيكافا هو المركز الثالث فهذا مجانب للحقيقة لأن الهلال في عام 1994 كان مشاركاً في مجموعة بورتسودان وتصدر مجموعته وكان المريخ يلعب في الخرطوم أمام سيمبا التنزاني وكان خاسراً حتى الدقيقة 88 بنتيجة هدفين لهدف وهنا مارست الصفوة هوايتها المحببة وحصبت الملعب بالحجارة وأصابت خمسة من نجوم الضيوف ، وبدل أن يعتبر المريخ مهزوماً ويعاقب جمهوره طلبوا إعادة المباراة ورفض سيمبا ذلك وإعتبروه مهزوماً ورفض الهلال هذه المسخرة وإنسحب من البطولة وحفظ سيد البلد سمعة السودان الرياضية ولعب المريخ أمام وصيف مجموعتنا شنقاني الزنجباري وهزمه بهدف ولعب النهائي أمام الإكسبريس اليوغندي وهزمه بهدفين لهدف !! تخيلوا هذه المهازل حصلت في سيكافا 1994 بل إن ضمير الصفوة سمح لهم أن يعتبروا هذا الكأس من ضمن إنجازاتهم ... وحقيقة الإختشوا ( الله يرحمهم ) .
*** رسائل غنائية رياضية من الفنان محمد وردي
نريد أن نرسل 3 رسائل غنائية رياضية من أغنية ( عصافير الخريف ) كلمات إسحاق الحلنقي وغناء محمد وردي ، ونلاحظ عبقرية الحلنقي في عصافيرالخريف وخروجه عن المألوف وإقترابه أكثر من نفس وروح صديقه الشاعر عمر الدوش ( عليه وعلى وردي رحمة الله ) ... الرسالة الأولي من جماهير الهلال وهي تكتم أشواق الحنين للهلال الذي لعب نصف مبارياته خارج أرضه وتعادل في 3 منها وكلها في غربنا الحبيب وهذا موسم الفوز بالجوهرة وتقول الرسالة *** هجرة عصافير الخريف في موسم الشوق الحلو ...هيج رحيلا مع الغروب إحساس غلبني اتحملو ... وكتمت أشواق الحنين داير الدموع يتقلو ...ورجعت خليت الدموع ينسابو مني وينزلو ، والرسالة التانية من الصفوة وهي تخاف على فريقها من الطيران المبكر خاصة عندما يقابل الكبار وأنه لعب مع الصغار في جيبوتي وغينيا وموريتانيا وكان يسافر بلا متاع ( زوادة ) ويعتمد على ما يجود به المحسنون مثل السوري عماد في غينيا وإتصالات الشناقيط في موريتانيا وتقول الرسالة *** ليه ياعصافير الخريف خضرة مشاعري يشيلا صيف ... تحت الغمام شايف مواكب الهجرة إتلاشت سراع ... ليه ياعصافير الخريف ليه الأسف من علمك أسف الوداع ... وعارف دا ما أول سفر لبلاد بعيدة بدون متاع ...زي ما بتخافي من الرياح بنخاف كمان إحنا الضياع ، والرسالة الأخيرة من معتصم جعفر وهو يتحسر على سفرياته الكتيرة التي تنافس سفريات إبن بطوطة وأن غيابه عن الوطن دفع تمنه دموع وكاد أمر الإتحاد أن يفلت من يده وفقد مجدي شمس الدين الذي كان يطيب خاطره وتقول الرسالة الأخيرة *** غايب السنين مالو الليلة غنا العصافير غلبو ... طراهو زولاً كان ولوف كم رضّ خاطرو وطيبو ... سمع قليبو كلام حنين هدهد مشاعرو ودوبو ... الناس سعيدم في الحياة لا ضاق سفر لا جربو ... وأنا حالي في بعد الوطن ... دفعني دمع العين تمن !! والتمن ياصيدلاني ترجع للوطن تاني .
*** همسة الوداع
حبايبنا الحلوين تعادل الهلال في نيالا عجبهم أكتر من فوز فريقهم على ناس قريعتي راحت ، وقالوا إعلام الهلال قال السبب السحر !! ولو قال ذلك قلم هلالي لايعني أن الأقلام الزرقاء تؤمن بالدجل والشعوذة رغم إيماننا بوجود السحر ولكن لن نجعله شماعة !! و ناس وصيفنا زمان الدجل والشعوذة ( فضلة خيرهم ) ... في مباراتهم أمام عزام التنزاني في فبراير 2015 ضبحوا خروف في أستادهم قالوا عشان فك النحس !! وبهذه المناسبة نهمس في أذن الإعلام الأحمر إنتوا لما ضبحتوا الخروف ( الأبرق ) كان ناس واوا عندهم أولاد ماما ( زار ) ولاّ شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 13  0
التعليقات ( 13 )
الترتيب بـ
الأحدث
الأقدم
الملائم
  • #1
    الامين 02-28-2017 05:0
    التحية والسلام اخوى الجعلى ونتمنى ان يعود هلال الساجدين والناس الصالحين لسكة الانتصارات التى لم يبتعد عنها وباذن لن يتاخر من المقدمة وننتظر عودة ضلنا المرسوم ووصيفنا الدائم حتى نستعد لاعنف المعارك فى ادغال افريقيا --
    كان اسوأحكم وانحياز فاضح مع مريخ نيالا وكمان لوحات عبر فيها اسامة وجماعته فى المدرجات بانه شامة فى خد الوطن والصحيح بلاء فى جسد الوطن هو وزمرته اتحاد السجم العام ربنا يقلعهم اليوم قبل الغد واذا ما تغييرت هذه المنظومة لن تقوم ولن تنهض رياضتنا ---
    وشكرا الحبيب الغالى كتاحة وتقبل وين يا ود عقيدة بالختم والصورة عفارم عليك يا تفاحتنا على الرد الشافى والكافى لهذه الالسن ---
    ودمتم للوطن والهلال فى حفظ الرحمن ورعايته
  • #2
    الامين 02-28-2017 01:0
    التحية والسلام اخوى الجعلى ونتمنى ان يعود هلال الساجدين والناس الصالحين لسكة الانتصارات التى لم يبتعد عنها وباذن لن يتاخر من المقدمة وننتظر عودة ضلنا المرسوم ووصيفنا الدائم حتى نستعد لاعنف المعارك فى ادغال افريقيا --
    كان اسوأحكم وانحياز فاضح مع مريخ نيالا وكمان لوحات عبر فيها اسامة وجماعته فى المدرجات بانه شامة فى خد الوطن والصحيح بلاء فى جسد الوطن هو وزمرته اتحاد السجم العام ربنا يقلعهم اليوم قبل الغد واذا ما تغييرت هذه المنظومة لن تقوم ولن تنهض رياضتنا ---
    وشكرا الحبيب الغالى كتاحة وتقبل وين يا ود عقيدة بالختم والصورة عفارم عليك يا تفاحتنا على الرد الشافى والكافى لهذه الالسن ---
    ودمتم للوطن والهلال فى حفظ الرحمن ورعايته
  • #3
    أحمد علي عمر 02-28-2017 12:0
    شكراً صحيفة كفر ووتر لإتاحة فرصة التعليق تعليقي على الجعلي أن الرحيق يسكب فيه عبير روحه أما السرد التاريخي جميل ولكن يامحمد المريخاب بتغلبهم باليل ويصبحوا يغالطوننا بالنسبة لأغنية عصافير الخريف إختيار موفق ولكن هناك 3 أخطاء أول واحدة غايب السنين مالو الليلة غنا العصافير غلبو والصاح اليلة مالو والتانية لا ضاق سفر لا جربو والصاح لا ضاق فراق والأخيرة ضي العين إنت قلت دفعني دمع العين تمن ولك شكري .
  • #4
    مكاوي محمد علي 02-28-2017 11:0
    يا اخوي انت بره الدارة تنقز هلالك ده لو ما الحكام ما دافرنوا كان زمان هسة بلعب في درجة مع ناس بري والموردة فريقك ده معطوب ما منو رجا
  • #5
    البابا 02-28-2017 09:0
    الجعلي أخوي إنت مادام الكاف لغى بطولة بيضة الديك ومانديلا ذاتو مات وبقى في روحو مايجي حياتو ده يشيل صفيحتو دي ويريحنا ......
    المريخاب كديستهم جمل ههههههههههههههههههههههههههههههههههههههههههههههههه
  • #6
    ابوحسن 02-28-2017 09:0
    لك التحية استاذنا محمد عثمان علي توضيح هذه التواريخ الهلالية الحافلة بنجازات في الزمن الجميل زمن الفن والكورة والهلال
    اسطورة لكن الكلام دا ما بيعجب اهل الصفوة
  • #7
    الكتاااااحة والتفاااااحة 02-28-2017 08:0
    image

    سمعنا يا ود عقيدة الخروف هرب
    image
    وهنا تم القبض على المسكين

    image

    وعمك الجزار يا ود عقيدة ما تدوهو الراس بس اعملوا ليه كوم محترم
    عمنا كملان من لحم الدنيا على الاقل يرم عضمه صلحوا ليه الكوم خروفكم زاتو كملان من لحم الدنيا
    الخروف ده كدايس الاستاد ما يكفيها

    image
    وجعلينا يا ود عقيدة نسى رش الملعب


  • #8
    النور 02-27-2017 11:0
    لو تصدق يا استاز لعيبة الهلال لم يلعبو 4 باص صحيح ولا هجمة منظمة واحدة طيلة المباراة حتي الهدف جاء نتيجة ارتداد الكرة من الحارس لضربة ثابتة
  • #9
    عزالدين ابراهيم عبدالرحمن 02-27-2017 09:0
    نحن يا خوي ما قاعدين نحسب المحلي فرز لينا الكيمان قعد نحسب محل الرجال قاعدين يجيبو مش المحلي والمحلي حقنا برضو اكتر منكم انتو لو عندكم قدر كاساتنا والله كان رحلتونا من اليلد لكن الحمد لله ربنا خلاكم كسيحين وحا تفضلو كده ما دام بتقودكم فطووووووووووووووووووومه يا خسارة الاشناب من كردنة لي عن حد ناس الشرقيه مالين وشكم شعر بلا فايده وفطومه تجننكم بس قايتو يعقوب حاج ادم ما عندو شنب ما فارقه معاهو الكلام انتو يا .....
    ودحين يا الجعلي ياخوي دا حلقا انتو ما عندكم اضنين ليه والحلق بيلبسوه الناس العندهم اضنين زي الزعيم والاهلي والزمالك ومازمبي وووووووووو وانتو ما عندكم اضنين ليه لمن يبقي عندكم اضنين قولو لي ؟؟؟؟؟
  • #10
    عبدالله بلل القرياتي 02-27-2017 09:0
    جعلينا لك التحيه ياخوي مسؤل من الخير انت لا تسابق الحوادث خلي فريقك المهلهل يلعب وبعدين صريح زي ما عاوز وبعدين انت وقت عارف كل راعي مسؤول عن رعيته كنت تقف مع زعيم الكورة السودانية وتشجعه وتكتب مقال خاص بأسم مريخ الملايين فاز خارج البلاد ولك التحيه وتاني لا تهاجم زعيمكم ومبيض وجهكم خارجيا وداخليا ......
  • #11
    وطن الجدود 02-27-2017 09:0
    الجعلي و الله دي خوفة ساكت من هسي بتكتب عنها و هي المباراة يوم الاربعاء . انت فاكرها في الابطال يا راقي ههههههههه بطل الجرسة ما يشيلكم السيل
  • #12
    ودعقيده خلف 02-27-2017 07:0
    استاذ الجعلي لك احسن تخفف علي شعورك وشعور جماعتك الزرق شويه بعد الفضايح حقتكم وكمان برضو نطلب من الاستاذ محمد الفاتح كتاحه ان يجيب لينا صوره خروف ابرق عشان يخفف عليك شويه من الضغط والسكري عشان ما نفقدك انت واصحابك الاقرع والامين جفارا
  • #13
    منعم ابوناصر 02-27-2017 06:0
    ماقصرت ياابوعثمان فى هذا السرد وهذه الحقايق ورقم عن ذالك جماعة الصدى ناس السماءالاحمر كما يحلو له ان يتخفى وكذالك المدعو ابومحمد يحاولو يلو عنق الحقيقه ويضللو فى رعيتهم التى ينطيق عليها المثل(عمياء وقايداها رعناء)والرعونه دى منى انا عشان حبايبك دليلهم ناس مزمز وابوشيبه اوابومحمد كما يدعى وكابو رافصات وسلك العريان وواحد فيهم يدعى السماءالاحمر وهولاء من الرعونه بمكان ديل هم اولاد ماما ديل تبع الزار لانهم يبكو وماعارفين الميت 000
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019