• ×
السبت 31 يوليو 2021 | 07-30-2021
محمد عثمان الجعلي

غاب الكبار وتعادل الأقمار خارج الديار

محمد عثمان الجعلي

 23  0  2891
محمد عثمان الجعلي

من محاسن الأمن السلام في ربوع بلادنا الحبيبة أن إنتعشت الرياضة في مناحي الوطن وتفجرت طاقات الإبداع ولقد شاهدنا هلال الأبيض وهو في عامه الثاني يمثل الوطن في الكونفدرالية وشاهدنا الوافد الجديد الشرطة القضارف وهو ينتزع من عمه المريخ أغلى 3 نقاط وشاهدنا مريخ نيالا وهو يتعادل أمام بطل الثنائية بهدف لكل في نيالا الجميلة ، ونتمني أن نشاهد أندية من شمال السودان تشارك في دوري الأضواء خاصة من دنقلا وحلفا حتى تعم الفرحة وينتعش الدوري السوداني وهذا جمال السودان *** وكل أجزائه لنا وطن إذ نباهي به ونفتتن ...نتغنى بحسنه أبداً دونه لا يروقنا حسن ، وهلال العشق الجميل لعب 7 مباريات فاز في ثلاثة وتعادل في أربعة ولو نظرنا بعين الإنصاف نجد هذا الوضع طبيعي لأن ( قرعة إتحاد اللقيمات العجيبة ) أوقعت محبوب الجماهير الأول وفريق الأقمار مع الأقوياء والكبار منذ بداية المشوار، بالله مش غريبة الهلال من قولة تيت يلعب مع قمة كوستي ويلعب خارج أرضه 3 مباريات منها 2 أمام هلال التبلدي وأسود الجبال بكردفان والثالثة أمام فريق أسامة عطا المنان بالوكالة في نيالا والقادمة أمام الوادي فريق أسامة بالأصالة وفي نيالا !! وحتى مباراتنا في أرضنا كانت أمام أهلي شندي ممثل السودان في الكونفدرالية بينما المريخ يلعب أمام 2 من الوافدين الجدد الشرطة القضارف في كسلا وحي العرب في بورتسودان والثالثة مع أهلي مدني وحتى قمة كردفان ونيالا يلعب معها المريخ في أم درمان !! مش قرعة غريبة يا إتحاد الفشل الكسيح !! ورغم ذلك المريخ خسر من الوافد الجديد شرطة القضارف !! ونعود لمباراة مريخ نيالا وكما نعلم أن سيد البلد لعبها في ظروف إستثنائية بمدرب جديد والهلال يفقد كل خط هجومه فرغم غياب بشة المؤثر وكاريكا غاب تيتيه والشاب ولاء الدين مع منتخب الشباب حتى أضطر الديبة لإشراك نزار وأطهر في الهجوم وبعد خروج أوكرا دخل شلش وكما نعلم سرعة شلش الرهيبة ولكن صافرة الحكم فضيل كانت له بالمرصاد ولقد عكس الحكم الكثير من الحالات وكان نزار يسقط على الأرض وفوق ذلك تحسب عليه فاول ، وحتى عندما خرج إبراهومة الذي أحرز هدف الهلال ومعه السموأل ميرغني كان البدلاء من العائدين من الإصابة شيبولا وشيبون ، ورغم غياب الكبار خرج الأقمار بنقطة غالية من خارج الديار ، ويجب أن نساند هؤلاء النجوم والقادم أحلى بإذن الله خاصة بعد شفاء بعد المصابين ، كما شاهد الكل الهلال يتعرض للظلم من التحكيم ورغم ذلك يشتكي إعلام المدفور بأن الهلال مدعوم ولك الله ياهلال ، ونحن لن نهاجم التحكيم كما يفعل الإعلام السالب ولكن نجتهد بأن تمضي مسيرة النور بين الأشواك والصخور ونسر السودان الأزرق سوف يظل صامداً بعزيمة الكبار وسوف ندافع عن حكام الوطن وإن ظلموننا ولن نكن حرباً عليهم مهما تجرعنا من ظلم ولله در القائل
*** إذا مرضنا أتيناكم نعودكم ... وتذنبون فنأتيكم ونعتذر
*** ففي العصافير جبن وهي طائرة ... وفي النسور شموخ وهي تحتضر
الأخ خلف ود العقيدة من مريخاب خيبر سألني لماذا غابت عن الرحيق عبارة تمتع بالرحلة ودع القيادة لنا !! ونقول لود العقيدة هسه تمتع بالرحلة ودع القيادة لنا فهلال الساجدين والناس الصالحين في الصدارة برصيد 13 نقطة وصافي 8 أهداف يليه شرطة القضارف برصيد 13 نقطة وصافي 3 أهداف وهلال كادوقلي الثالث برصيد 11 نقطة والرابطة الرابع ومريخك من العاشر وأحسب لي غادي .
*** الإتحاد الكسيح يخطئ ويعجز عن التصحيح
إتحاد السفرية المتجول تأتي نهضة الرياضة وتطورها في آخر سلم إهتماماته ، أخطأت في الرحيق السابق عندما ذكرت أن مدرب مريخ نيالا هو برهان تية والصحيح هو الجنرال صلاح محمد آدم وسبب الخطأ أنني إستعنت بجدول الدوري السوداني الذي يضعه إتحاد اللقيمات الكسيح وقد ضل من كانت العميان تهديه ، وحتى تشكيلة لعيبة الدوري الممتاز لعام 2017 بها الكثير من الأخطاء فلو نظرنا لتشكيلة الهلال بطل الثنائية نجد بالكشف الأزرق مازال موجوداً مساوي والشغيل وأبيكو وسيسيه وإيشيا وكل تشكيلة الدوري الممتاز بها أخطاء والكشف الوحيد الذي حرص إتحاد الفشل على أن يكون صحيحاً هو كشف المريخ !! معقول الشغلانية برضو صدفة زي قرعة الدوري الممتاز التي أوقعت الهلال في مطبات عديدة ولكن تجاوزها بحمد الله دون خسارة ، ياتري ماذا يكلف ( رجل العقاب ) أسامة عطا المنان لو أعطي موظف معين في الإتحاد أحدث كشوف الأندية وطلب منه أن ينزلها من أجل مصلحة أهل الرياضة حتى يجدوا المعلومة الصحيحة الطازجة ... أعجبني يوسف عمر من هلالاب محايل عسير وهو يستنكر القسوة والهجوم الإلكتروني على فريق الهلال من بعض منسوبي الأزرق ونعم لكل جواد كبوة .
*** مباراة الجمعة وتمهيداب العرب التسعة
جميل أن يفوز المريخ خارج أرضه على فريق تفرغ زينة الموريتاني بهدف علي جعفر ، ولكن غير الجميل أن يتطاول الإعلام السالب على سيد البلد وكبيرها لأنه تعادل مع مريخ نيالا ، ولقد قلنا أكثر من مرة إن كسب النقاط الحلال هو الذي يسعد ويساعد الهلال وكسب الحلال فيه البركة !! لذا لن نستغرب إذا فاز الهلال بالثنائية وتقدم في بطولة الكبار الأفريقية ، أما وصيفنا زمان طويل اللسان فنذكره بأن تمهيدي العرب ( خشم بيوت ) وبه 3 مستويات مستوي أول وثاني وثالث ومستويات التمهيدي الثلاثة تلعب بها 9 فرق ويصعد منها 3 فقط لدوري المجموعات المقام بالإسكندرية في الفترة من 21 يوليو حتى الخامس من أغسطس والذي يضم 12 فريق مقسمة على 3 مجموعات يصعد الأول من كل مجموعة مع أفضل ثاني لهذه المجموعات للمربع الذهبي ، والفرق التسعة الصاعدة هي ... من السعودية الهلال والنصر ومن مصر الأهلي والزمالك ومن تونس الترجي ومن الجزائر نصر حسين داي ومن الأمارات فريق العين ومن الأردن الفيصلي ومن المغرب الفتح الرباطي ، أما ناس قريعتي راحت فهي 3 مستويات ، مرحلة ماقبل الحضانة ومرحلة الحضانة والروضة وتضم المرحلة الأولي 4 فرق هي إتصالات جيبوتي والرفاع البحريني والعهد اللبناني والمريخ السوداني والفائز من مرحلة ماقبل الحضانة يلعب ضد تفرغ زينة الموريتاني وشباب الخليل الفلسطيني ولعب في هذا المرحلة نفط وسط العراق وصعد على حساب الجيش السوري كما تخطى العهد اللبناني شباب الخليل وفاز على فنجاء العماني وصعد وباقي للمريخ مباراة حمام موريتانيا الميت وسوف يكسبها بالتاكيد ويصعد لأن تفرغ زينة أفضل إنجاز له أنه لعب مرة واحدة في الكونفدرالية عام 2011 وخرج من دوري 32 أما بطولة الأندية العربية أول مرة يشارك فيها !ّ! ونلاحظ الحقارة العربية !! تمهيداب العرب الأفارقة ( فرزوا ليهم عيشتهم براهم إتصالات جيبوتي وتفرغ وزينة والمريخ ) و تفرغ زينة زي حي العرب بورتسودان ( مع إحترامنا للسوكرتا ) حيث فاز المريخ في الحالتين بهدف الماسورة الحمراء ( علي جعفر ) طبعاً أكيد الجيران سوف ينظموا المسادير بالفوز على تفرغ زينة الموريتاني ، وموريتانيا ( مابلحيل على الكورة ) بلد الشعراء والتمر ، وجادت قريحتي بالمسدار التالي
*** بين إتصالات جيبوتي ونغيما وزينة المشوار يطول
*** وصيفنا بي ناس قريحتي راحت الليلة مشغول
*** تمهيداب عرب وأفارقة !! بصراحة مامعقول
*** وقون علي جعفر زي أكل الكسرة بالفول
بالمناسبة أكل الكسرة بالفول من بنات أفكار صاحب القلم الظريف والمفردة المبتسمة الأستاذ / محمد عبد الماجد !! لذا لزم التنويه .
*** همسة الوداع
حبايبنا الحلوين في مباراتهم مع فريق فاطنة بت عبدالملك قاد البعثة بروفسيور هاشم الهدية !! معقول يقود المباراة مع منتخب الولية بروفسيور الهدية !! إتلقي فاطنة ذاتها حق دعم الفريق ( إشترت بيه تياب ) عشان كدة الحمام الميت إنضرب في نواكشوط !! وبهذه المناسبة نهمس في أذن الإعلام الأحمر إنتوا مباراة زينة دايرة هاشم الهدية ليها مش العنقالي متوكل كان يكفيها ؟ مجرد سؤال .
امسح للحصول على الرابط
بواسطة : محمد عثمان الجعلي
 23  0
التعليقات ( 23 )
الترتيب بـ
الأحدث
الأقدم
الملائم
  • #1
    ابو حازم 02-27-2017 01:0
    مرحبا بالحبيب تكعيب الجعلي عاشق الهلال المتيم، والتيم ما منظم، وحتما سيعود الهلال كما كان ونعود كما نود، والهلال لن يخسر في هذا الموسم وسيشرب الفرحان من نفس الكاس لانه كل هذه الفرق لن يصمد امامها المرخرخ.
    الفرق الخارجية ناس تفرغ والاسماء العجيبة دي اي فريق سوداني بفوز عليها وبكمية من الاهداف، ما تعجبكم هذه الانتصارات فرق الولايات اقوى منها، والدليل خسارة الشرطة.
    وتحياتي للجميع
  • #2
    منعم ابوناصر 02-26-2017 06:0
    اولا لاتكتر جعجعتكم ودا كلو كلام للاستهلاك المحلى والحين انتو لسه بتلعبو مع ناس الروضه يعنى لسه تمهيداب يعد تدخلو المحك الحقيقى وبعد كده انا شخصيا ابصم ليكم بالعشره لكن الان مابنشكر الراكوبه فى الخريف ودى مباريات مافيها تكافو وبعدين غرزه العاجبك دا بلاقيك فركو 000وانتو طول عمركم بتحيو المفتن او وليع النيران وشغلكم كلو دسايس ماكان فى داعى تقول من هلالاب الشرقيه نحن مابنخاف 000ونا اتفق مع اخونا ودبلل المره دى لاسيد بلد ولاوصيف بس ضرب ولايات يس000وانت يا متخبى بالسماء الاحمر اوالاجرب ياصحفى الصدى المصديه والبايره خلى عندك شخصيه وظهر لكن دا اسلوب العاجز لانو الجعلى رجل نزيه وصادق عشان كده انتو ميتين بالقيظ (والمابتلحقو جدعو) احسن تلم الدراب بتاعك دا عشان مايجدعوك بيهو قال السماء الاحمر قال
  • #3
    فيصل الاقرع 02-26-2017 01:0
    سلام جعلينا اها يعني خففث غلينا بغض الشئس كلامك عن الهلال منطقي ولكن الهلالاب عندهم الفنيله الزرقاء دي لو لبس السكران بحاسبوهو زي المفتي وقس علي ذلك يعني لو لبسها النعسان والشر بره وبعيد بحاسبوهو عليها زي بشه واحد
    واليوم جبت ليك محنه جديده انت البوديك تقلب في حاجات التمهيداب عشان تطلع فيها من المهد الي الحضانه ثم التمهيدي علي الطلاق اكان ديل نحن كنا حردناها للعرب الحقارين ديل
    ياجعلي مجرد سؤال قريحثي والا قريعتي واشرح لينا في المقال الجائي وانت بتبالغ يا الجعلي دايرن ارسلوا موكل علي امشي امعط سلوك الناس
  • #4
    ودعقيده خلف 02-26-2017 10:0
    استاذ الجعلي لك التحيه انا والله خايف من عيونكم الله يكفينا شركم وشر عيونكم الزرق نامل من عبدالله بلل القرياتي ومحمد مصطفي ان يحضروا لينا بخور تيمان ولبان ضكر من العين الزرقاء الايام دي حايمه اكثر من لاجيئئن جنوب السودان عبر الحدود
  • #6
    02-26-2017 01:0
    غاب الكبار وغابت هدايا التحكيم البلنتيات الحنك ساي دي والنتيجة عدم تفوق الهلال خارج الديار
    يعني بدون هدايا الحكام وحتي داخل الديار اقتلع الاهلي شندي التعادل عنوه واقتدار بالواضح كده الدفع الرباعي وقف
  • #7
    02-26-2017 01:0
    غاب الكبار وغابت هدايا التحكيم البلنتيات الحنك ساي دي والنتيجة عدم تفوق الهلال خارج الديار
    يعني بدون هدايا الحكام وحتي داخل الديار اقتلع الاهلي شندي التعادل عنوه واقتدار بالواضح كده الدفع الرباعي وقف
  • #8
    02-26-2017 01:0
    غاب الكبار وغابت هدايا التحكيم البلنتيات الحنك ساي دي والنتيجة عدم تفوق الهلال خارج الديار
    يعني بدون هدايا الحكام
  • #9
    ودعقيده خلف 02-26-2017 01:0
    استاذ الجعلي لك التحيه دي تغطيه للفضيحه ساهي بس بقولها ليك عليه الطلاق طاقتكم انزرقت والدخلت فيكم ما مرقت طيب يا صفرابي في بدايه قرعه الممتاز ليش ما هاجمت الاتحاد والا بعد الفاس وقع في الراس وقعت الزيطه والزنبريطه يا مغيور بعدين كل سبب الدمار تخبطك وتطبلك في الفاضي قلنا ليك اكتب ما فيه المنفعه بس بتعرف للحكي والكلام الفاضي بعدين شنو الجماعه الاقرع وجفاره واحمد الفكي ما ظاهرين معتكفين ولاشنو
  • #10
    رضوان 02-25-2017 10:0
    الهلال هذا العام لن يتجاوز دوري ال ٣٢ في الأبطال وربما يتدحرج لترضية الكونفدرالية والتي لن يستطيع تجاوزها بعد المستوى المتدني في الدوري الممتاز والذي يمكن أن يجعله من فرق الوسط أو المؤخرة.. وكل الشواهد تدل على إن الإضافات التي سوف تتم في شهر يونيو القادم ستكون محدودة اللهم إلا إذ لجأ الهلال للشطب وهي لا يمكن أن تكون مؤثرة على شكل الفريق الحالي
    واللاعبين الجدد يحتاجون إلى وقت للإنسجام مع القدامى ... فهذا الموسم بالنسبة لهم هو موسم للنسيان ... وسيتفرغون للسخرية وتبخيس انتصارات المريخ فأي فريق ينتصر عليه المريخ في عرفهم هو حمام .... وعندما إنتصر المريخ على بطل الجزائر ٢٠١٥ قالوا حمام وهم الذين هربوا منه في البطولة العربية.
  • #11
    عبد الله بلل القرياتي 02-25-2017 10:0
    اخي الجعلي لك التحية والتقدير. نحن المريخاب او الزعيم كما يحلو لعشاقه متعودون لتبخس اي فوز. لزعيم والله يالجعلي مباراتكم مع مريخ نيالا لو الحكم اعطي اولاد نيالا حقهم الطبيعي لكنت الان في خبر. كان واخواتها واتنمي ياجعلينا السنه القادمة ان تلعب مع الفرق التي لعب معاها الزعيم عشان نشوف فصاحتكم وجعجعتكم الفارغه من المفترض انت تكون فرحان بفوز المريخ خارج السودان لانه يمثل قمة الوطن عامة وعلي الطلاااق فرق الممتاز السنه دي لاها سأله في الهلال ولا حتي زعيم الانديه السودانيه ( مريخ الكأسات المحمولة جوا مانديلا ) .....
  • #12
    جاغوم 02-25-2017 09:0
    حاجة مودياكم التوج غير طولة لسانكم دي مافي خليك في الهليل بتاعك دا واركز ماقلت جعلي
  • #13
    السما الأحمر 02-25-2017 08:0
    يا اخوي فريق فاطنة في سوق العيش بام ضرمان وبعدين شغلك دا هضربة محموم والله يستر عليكم السنة دي ما تنافسوا على الهبوط وبعدين الشرطة وسوكرتا في انتظاركم ورونا شطارتكم بس من غير ابوشنب ومعتز ومعز وهاك يا هبوط قسري
  • #14
    بلادي 02-25-2017 05:0
    أنت إنسان فارغ.أين هليلك مدعوم الحكام.بالله أنت رجل ما تستحي.ماذا فعل المدعوم مع أندية الدرجة الثانية والثالثة في مصر .الإختشو ماتو بالله نقطتنا بسكاتك.غابت ضربات الجزاء الوهمية وظهر هليلك.
  • #15
    بلادي 02-25-2017 05:0
    أنت إنسان فارغ.أين هليلك مدعوم الحكام.بالله أنت رجل ما تستحي.ماذا فعل المدعوم مع أندية الدرجة الثانية والثالثة.الإختشو ماتو بالله نقطتنا بسكاتك.غابت ضربات الجزاء الوهمية وظهر هليلك.
  • #16
    ابو حنين 02-25-2017 04:0
    اهبل وعوير . الناس جاديين عايزين مخرج دا يكتب غاب الكبار ههههههه
  • #17
    ابو حنين 02-25-2017 04:0
    اهبل وعوير . الناس جاديين عايزين مخرج دا يكتب غاب الكبار ههههههه
  • #18
    عزالدين ابراهيم عبدالرحمن 02-25-2017 04:0
    جد الليله مبسوطين ملانين فرحه
    من سيد البلاد الجانا داوى الجرحه
    خلا قلوبنا بالصح تنتشي و منشرحه
    وأهلا بالزعيم زعماء البلاد يا مرحى
    ♥♥♥
    تسلم يا الزعيم الليله جيت طليتنا
    شريت الفرح و من الهجير ضليتنا
    بعد سويتنا زعماء علي الخلوق وليتنا
    رافع راسنا فوق و فوق للقمر عليتنا
    ♥♥♥
    المريخ قدل خلا النجوم جت هانيه
    خاب ظن العوازل لي هزيمتو البانيه
    قون علي جعفر الكان خطفه في فد ثانيه
    ولع نورو من سودانا لي موريتانيا
    ♥♥♥
    يا أهل الصفير أصلو الصفر هاوييكم
    وشيطانكم كبير شان للحسد غاوييكم
    المريخ عظيم ده البي الوجع شاوييكم
    دي لقطات من عروض لسه الفيلم راجييكم
    .
    .
    .
    قلتو لي الشغالين نقطه نقطه ...
    مبروووووووووووووووك يا صفوه وتستاهلو زعيكم قدره خمس وخميس !!! نجومكم تلاااااااااالي وتكتيكهم عااااااالي !!!! والله انا السنه دي اسويلكم المكشنه بلا بصل يا عيال فطومه قلت لي فطومه عبدالملك يا جعلي كمان مشيت عرفت اسم ابوها
  • #19
    سيد البلد 02-25-2017 04:0
    من محاسن الأمن السلام في ربوع بلادنا الحبيبة!!!!!!!!!!!


    الواو زاتو مانزل خجلا من كضبك.
  • #20
    سيد البلد 02-25-2017 04:0
    من محاسن الأمن السلام في ربوع بلادنا الحبيبة!!!!!!!!!!!


    الواو زاتو مانزل خجلا من كضبك.
  • #21
    عزالدين ابراهيم عبدالرحمن 02-25-2017 04:0
    اول حاجه عنوانك فعلا غابو الكبار وغيابهم تاجيل مباريات ان شاء الله مايغيبو بشينه وانت اصلك ما محسوب من الكبار الكبار حساباتهم انتو مشكلتكم ما قعد تعرفوها ابدا لانها ما بفهيمكم دا
    وبعدين يا الحبيب شوف المريخ بدا اول مباراه تعبان من جاء غارزيتو شوف المريخ ماشي في تصاعد وهليلك متدحرج الي الهاويه فرحتو بفرق كوستي وتاني عينكم ما تشوف الا النور قلت لي ما قعد تحتجو علي الحكام اليخليكم تحتجو شنو ما دام انتو كل البطولات واخدنها عن طريقهم اليخليك تحتج شنو قوة عين بس ونحن نحتج لانو كل البطولات الشلتها مننا بالحكام والكشوفات دي منو البوديها الاتحاد يمكن ودته فاطني حقنا ودوه ابو اشناب عشان كده صاح والحريم ربنا في القران قال في الشهاده الا متين كان واحدي نست التانيه تزكره خلو فاطني تجيب اخته معاها يمكن تلقاله هلالابي يعرس من هلالاب الشرقيه (....) نلعب في التمهيدي في الغيرو قالو الفحل مو عواف ودحين يا خوي نحن فحول تب وعلي الاقل عندنا كاس من افريقيا وغيرنا صفر وصفر كبييييييييييير قدر رويسك يا الجعلي وسلام وكان نسيت لي شي تاني بجيكم راجع لا تفرحو سمعتو وابقو صفر صفر نقطه نقطه نقطه الشقي ماسورة ..........
  • #22
    عزالدين ابراهيم عبدالرحمن 02-25-2017 04:0
    البدايه من منتهاك فرق فاطنه ما كتااااااااااار ما تنسي فريقك ماهو فريق فاطنه شاش انت المفروض تدافع عنو انت ماك جعلي حر والله ماك جعلي حر المثا يقول انا واخوي علي ابن عمي وانا وبن عمي علي الغريب انت فريق فاطنه دا مو ود عم هليلكم (فاطنه شاش ) و(فاطنه عبدالملك )النخوة والرجوله والاخوة كلها نسيتوها يا ناس فطومه شاش عيييييييييييييييييييييييييييييييييييييييييييييييييييب عليكم لكن انتو اصلكم كده بلا العيب ما بتعرفو شي
    بعد كده نجيك من فوق في التعليق التاني ؟؟؟؟؟؟؟؟؟
  • #23
    ابو المصطفي 02-25-2017 04:0
    دائماً الانسان كل ما يكبر بيعقل... لكن في ناس ما عارفين بتكبر ولا بتصغر .. ربنا يشفي ..
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019