• ×
الإثنين 8 مارس 2021 | 03-07-2021
نادر التوم

مريخ بِحَير.. و هلال بِحَيِّر

نادر التوم

 0  0  6301
نادر التوم

(1)
إضاءة: (مرَّة تانية) الهلال إتعادل
اعلامو المنظر ياما خاصم و جادل
كاردينالو كبَّ مالو فيهو و ناضل
ما قادر فريقو يفوز مهما سوَّى و حاول
تسخينة: في الأبيض او في أم درمان أو في نيالا
دايما درون هلالنا حالتو بطالة
جمهورو المنتظر حالتو صبحت حالة
سرحوا اللاعبين و افتحوهو ياخي بقَّالة
بكل سهولة و سلاسة و أريحية عاد المريخ بالعلامة الكاملة
من مورتانيا.. من بعيد
ليواصل مشوار الإنتصارات العربيَّة
بعد أن قفل الملف الافريقي جزئيا
و الممتاز (في الراحة) لحين تعادل آخر
استقرار فني و اداري و إعلامي و (صَفَوِي)
ما شاء الله لا قوة إلا بالله!!
الناس مبسوطة و مريخنا زينة
و يعود حبيبنا و العود أحمر
و يبقى المريخ شعاع النور و شعلة الأمل الوحيدة
و يبقى غيره مع الفشل في تأبيدة! تأبيدة بطرس؟؟
(2)
للمرة الرابعة على التوالي يتعثر الهلال
ملت جماهيره الصبر والانتظار
و في كل يوم مدرب جديد و وعود جديدة
و لا حياة لمن تنادي
الهلال يمرض و لا يموت
بس المرة دي قعد في العناية كتير
أربعة تعادلات مع هلالين و مريخ و أهلي؟
و تعادل التبلدي (شنبي)
من التريعة تاني ما غلبتو زول
التريعة ذااتها غلبتوها ساكت
طولتو ما غلبتو و بعدين معاك لو جيييت
تريدون من الديبة أن يفعل مثل مصطفي يونس
و يصنع من فسيخ تيمك شربات؟؟
على الاقل فسيخ المصري كان كبار
المرة دي استعجلتو الشبكة لمَّت سمك صغار كتيير
(3)
الغريب الى الآن بعد سلسلة النزيف المتواصل
يكتب بعض الكتاب ان الهلال ما اتغلب
لا ياخ! أصلو ما ممكن
هو اريت كان اتغلب و تاني غلب
بالاستراتيجية دي بتجوا الطيش براااحة
حتى لو ما اتغلبتو
كل يوم متعادلين بقينا نقول الهلال متعادل مع منو؟
و الهلال متعادل كم؟؟
التعادل ذاتو واحد بي شنب و واحد بي شرف
و كلو بي أشرف!
(4)
أخبار الغد
سيل (الوادي) المنحدر يبتلع هلال الصفر
المدرب الجديد: همنا الأبطال و فترنا من الممتاز
الهلال يفاوض هاي
الهلال يفاوض مغرزة
مدرب الوادي الحكم ظلمنا و الهلال نجا من هزيمة قياسية
(5)
عندنا مثل سوداني بضربوا في حالة الحاجة تكون ما أصلية
لكين بتمشِّي
بقولوا (ما والدك لكن بربيك)
بالطبع سيقوم بواجباته تجاهك لكنها تكون منزوعة الحنان
المدربين ديل كلهم بربوا في الهلال ساكت
كل مدرب (يأبوا) يجي والد أقصد واحد تاني
الغريبة بدرن تاني
ممكن نقول ما مدربك لكين بدرِّن ليك!
(6)
مقترح
المدربون الاجانب كلهم درنوا للهلال و مشوا
المدرب الوطني برضو جربتوهو
عندي ليكم مقترحين
واحد بقدموا هسه و واحد في عمود بكره إن شاء الله
المقترح الأول: طيب مااا تجربوا العنصر النسوي
سلمى الماجدي دي مالها؟
و بعدين انتو خسرانين شئ؟؟ كردنة بتدفع
أدوها فرصة فازت خلاس إتعادلت تكون زي باقي الناس
المشكلة و ين؟؟
من عدة زوايا
ضربة زينة كان محتاجة هلال التعادلات الحزينة
في زمن عجييييب
بالمناسبة كاريكا طول ما لعب
هو و بشَّة
ما تكونوا ناوين عليهم!!!
هلال الجبال و هلال الرمال و هلال التعادلال
تعادلات الهلال دي دايرة صفيح ساخر و الله قريب إن شاء الله
زهجتونا ذاتو كلو يوم تتعادلوا ياخ ما تجددوا شوية
يوم انسحبوا برضو تغيير
و الاتحاد برجعكم يعني الخبر يكون الهلال ينسحب
و البعدو: الهلال يعود!
على جعفر للمرة الثانية يعود بالنصر للمريخ من جديد
و الهلال يعود بالصفر من الغرب من جديد
جمال سالم يبدع في حراسة العرين الأحمر!
و مكسيم مطلب أحمر في التكميلية ان شاء الله!
ثوار وجيه: الهلال اتعدَّ (التريعة) يا الله ح يتعدَّ ليكم (البحير) كيف؟
رئيس مريخ البحير عمل العليو وأكد ان تصريحاتو ما كلام جرايد!
هسه متعادلين تاني في نيالا متين؟؟
بتكرروا في نفسكم بي صورة رتيبة خلاص!
و الديبة مواصل ولا لي الفاتو محصِّل؟؟
تخريمة: لا خوف على الهلال افريقيا ففريق (اوتوبيس) منتهي أصلاً
كل من سوني و زينة زادوا المواجع العلينا!
و يظل المريخ الحاضر و المستقبل و التاريخ
و يبقى الهلال ملك التعادل المسيخ!
و كلنا بنغلط... و كل الفرق بتتعادل!
آخر قطرة: إنتو ما تجرِّبوا تغيرونا حاجة تاني غير الديبة
و غير كردنة بالتاكيد!
عمود تحت تاثير (دوران البحير) اقصد الإلتهاب، نعوضكم بكره ان شاء الله!
تغريدة: تاني لو في زول سألنا الخبر شنو؟؟
بدون تفكير نقول الخبر درون!
آخر قطرة: الفرحة الجاية وين؟؟
تقفيلة: (شطَّبنا)
و برضو ما غلبنا! و البنسوي غلبنا!
اللَّهُمَّ صَلِّ وَ سَلِّم وَ بَارِك عَلَى سَيِّدِنَا مُحَمَّدٍ وَآلِهِ، كُلَّمَا ذَكَرَكَ وَ ذَكَرَهُ الذَّاكِرُون
وَ غَفَلَ عَنْ ذِكْرِكَ وَ ذِكْرِهِ الغَافِلُون!
و هذه بصمتي
امسح للحصول على الرابط
بواسطة : نادر التوم
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019