• ×
الأحد 26 سبتمبر 2021 | 09-26-2021
محمد عثمان الجعلي

أنا ماشي نيالا عاجبني جمالا

محمد عثمان الجعلي

 9  0  3242
محمد عثمان الجعلي

هلال العشق الجميل يشد الرحال من بقعة المهدي ليلعب ضد قمة نيالا مدينة الفرسان والجمال حيث يلتقي الهلال مريخ نيالا يوم الجمعة 24 فبراير ويوم الأربعاء الأول من مارس يلعب ضد الوادي نيالا والوادي هو فريق أسامة عطا المنان رجل الإتحاد الوحيد المتواجد في ساحة الإتحاد ( راجل العقاب ) بعد غياب إتحاد السفرية ناس مجدي ومعتصم ، ويدرب مريخ نيالا برهان تية ويدرب الوادي محسن سيد ... ثنائي تدريب المريخ السابق !! وهناك المريخابي أسامة عطا المنان ورابعهم أبوشيبة ومن خلفهم الإعلام السالب الذي يحرض التحكيم ضد الهلال ، وللهلال رب يحميه وجمهور يفديه وأقمار نيالا يتحرقون شوقاً لمشاهدة الهلال على الطبيعة ولسان حالهم يردد *** ساعة القلب شوقك دقت مواعيدو ...وإنت قلبي مشتاق ليك وين إنت ياسيدو .... وساعة لقانا العيد أذن آذان عيدو ... أشوف حبيب قلبي ... القلبي في إيدو ... أدندن بي لحن الشوق يشجيني ترديدو ... سيد قلبي ما أحلاك !! عيد الكلام عيدو ... غنينيي في موال ... في الحب أناشيدو ... أسقيني منو دوام رحيقك أنا بريدو ...يامنية في الخاطر زيد الدلال زيدو ... زيد الدلال زيدو وإنت الجمال سيدو ... ياهلال العشق الجميل ، وبإذن الله مباريات نيالا كما يقول التوانسة ( مربوحة ) وأنا ماشي نيالا وعاجبني جمالا ، وسيد البلد الآن متحكر في مقعد الصدارة ويجب المحافظة على هذا المقعد الوثير ، ونريد أن نشاهد ثنائية كاريكا وتيتيه وإنطلاقة أوكرا وشيبولا وأطهر وبوي في الأطراف ونزار ملك الدار والجريف الحريف والدمازين الرزين وأبوعاقلة الهميم ومن خلفهم حارس العرين مكسيم ، وبإذن الله كل من يرتدي شعار الهلال هو أهل للإبداع والجمال ، ونريد جماليات الهلال وشوقنا ليها طال ... وسيروا وعين الله ترعاكم وربنا ينصركم .
*** فاطنة الصادق المدرب السابق
شوفوا نكون واضحين أنديتنا الرياضية غير قروش مابتمشي وحكاية دعم الجماهير كذبة صفراء روج لها الإعلام الأحمر وجماهير الرياضة ماعندها نفس طويل عشان تتبرع كل شهر أو كل يوم من أجل تسيير أمور نادي قمة مثل الهلال والمريخ وشوفوا الأندية المرطبة ماشة كيف في الدوري !! وشوفوا الموردة البتلعب أين مكان جماليات لعبها في خارطة الدوري الممتاز الحالية !! لكن كمان الرأسمالية ديل لازم يكون معاهم ناس كوورة يعني الكاردينال مفروض يكون بجواره شوقي عبد العزيز وعلي قاقرين وغيرهم من نجوم الهلال في العهد الذهبي !! لأننا أصبحنا نعاني من عدم الإستقرار الفني ونحن نحلم بالأميرة السمراء التي بشرنا بها الكاردينال ، وكما نلاحظ أن المدرب الذي تهاجمه فاطنة الصادق يصبح بكرة في خبر كان ، أيه رأيك ياالكاردينال تجرب لينا فاطنة الصادق مدرب للهلال على الأقل نضمن الإستقرار الفني ونضمن بقاء المدرب عدة سنوات وإذا قرأنا في الصحف أن فاطنة أصبحت المدرب السابق للهلال نعرف أن عهد الكاردينال زال وبدينا صفحة وسطر جديد ، طبعاً الآن جبنا المدرب الديبة ( علوق شدة ) والديبة بشر له عيوب ومحاسن ومن أبناء الهلال ولكن عقدة المدرب الخواجة مازالت متحكمة في دواخلنا ، وإلا خبروني بربكم كيف سار الهلال مع المدرب الوطني الجنرال صلاح محمد آدم الذي فاز على الألماني كروجر في سبتمبر 2013 عندما فاز الهلال على المريخ بثلاثية مقابل ثنائية وأحرز الثلاثية بوي وعمر بخيت وبشة في شباك الحضري وأحرز للمريخ غاندي ورمضان عجب رغم أن الحكم كان وديدي الفاتح !! وهناك العديد من المدربين الوطنيين نالوا كأس الأبطال مع أنديتهم منهم مدرب صن داونز الجنوب أفريقي بيتسو موسيماني عام 2016 وخير الدين مضاوي مع وفاق سطيف الجزائري عام 2014 والهلال وصل نهائي الأبطال مرتين على يد كمال شداد وأحمد عبدالله ، فهل لدينا إستعداد وصبر على المدرب الوطني ، نعم المال عصب الحياة ولكن يسنده رأي الرجال والمال لسد ثغرة العرض ولله در القائل
*** والفقر يزري بأقوام ذوي حسب ...ويقتدي بلئام الأصل أنذال
*** كم من أخي ثقة محض مضاربه ... فارقته غير مقلي ولا قالي
*** والمال يغشى أناساً لاطباخ لهم ... كالسيل يغشى أصول الدندن البالي
*** أصون عرضي بمالي لا أدنسه ... لابارك الله بعد العرض في المال
إتصل بي يوسف عمر أبوضحى من هلالاب محايل وهو متضايق من عرض الهلال المتدني وعدم الإستقرار الفني ويقول إن الهلال هو بفضل الله من يخفف عنا كبد الحياة ورهق الغربة وهو البسمة وسط الدموع !! نعم هو كذلك يا أبوضحى .
*** الزاوية تضيق وتسير في نفق الزعيق
الصحافة الراشدة حيادية في الخبر وإنحياز في الرأي ، عجبت لما كتبه الملا مامون أبوشيبة وهو يتحدث عن عدم الإحترافية والحقد في الإعلام الهلالي لأنه حاول تبخيس فوز المريخ على نغيما وقال الملا ...عندما يحقق الهلال فوزاً دولياً نحن نعطيه حقه بنشر خبر إنتصاره على الصفحة الأولى كواجب مهني ووطني ونذكر الأخ أبوشيبة أن صحيفة الزعيق الحمراء لا تنشر خبر فوز الهلال حتى لوكان أفريقياً أما صحيفة الزاوية فقد كتبت في خبر تقول عن الهلال ( بسبب جمهور الأزرق المدعوم مطالب بدفع 485 ألف دولار للأحمر !! ) لو فرضنا صحة الخبر فهل تريد الزاوية من صحيفة قوون أن عن المريخ أن تقول ( المدفور يصل نواكشوط بسلام ) ويضيف أبوشيبة أغسلوا قلوبكم من هذه الأحقاد ياهلالاب وأعطوا ندكم حقه !! والغريبة أن مامون حكام لم يمنح الهلال حقه عندما ظلمنا الحكم في مباراة هلال التبلدي في أستادنا ويأتي بعد ذلك ليتحدث عن مخافة الله والورع الكاذب ، وهذا حال الصحافة الصفراء !! كل النقول عليه موسى يطلع فرعون !! بالمناسبة الزاوية في بدايتها كانت زاوية ( قائمة ) والآن أصبحت زاوية حادة وأضحت تضيق بعد أن سارت في نفق الزعيق !! لذا لزم التنويه .
*** همسة الوداع
حبايبنا الحلوين أصبحوا زي المداحين شايلين ( القرعة وحايمين ) في غينيا دفع لهم حق الفندق سوري وهسه في موريتانيا شركة شنقيتيل فرع سوداتل هي من يمول المريخ ( إتصالات الشناقيط ) ورغم ذلك ناس علاء الدين متمردين عشان ماإستلموا حوافز فوز نغيما وإتصالات جيبوتي !! وبهذه المناسبة نهمس في أذن الإعلام الأحمر هسه فوز نغيما والإتصالات داير مكافآ ت ولا كفاية شاي لبن بي لقيمات ؟ مجرد سؤال .

امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    عبدالله بلل القرياتي 02-24-2017 09:0
    عليك الله يالجعلي انت بتغش في نفسك ولا بتضحك علي منو بتشكر في فريق راقد صلطه ودكوه ياخي اخليك في حال هلالك التعبان وانت اسمع فاطنه اسمها فاطمة ولا حرف الميم دا طبعا برمز لزعيم الاندية السودانية وانت طبعا مش حاتقدر تنطقها مع تمنياتنا لكل فرق السودان بالتقدم والازدهار.
  • #2
    منعم ابوناصر 02-23-2017 08:0
    انا شايف شاى لبن بى لقيمات وهى جاهزه فى اتحادهم اتحاد اللقيمات اصلهم بتاعين ميتات واليومين ديل اخير المداحين 000ونا شايف العجاج فى الطريق ياودالحاج مش كده ياعزو؟؟؟؟؟؟؟؟؟؟؟
  • #3
    فيصل الاقرع 02-23-2017 06:0
    سلام جعلينا والله زي ماقال الاخ عمر الهلال ياهو نفسنا في الغربه ويوم ما العب سمح حتي لو فائز نفسنا دا بنقطع عديل ونتشابا للهواء دا وبعدين الاولاد وصفتهم وصف المتنبي اقصر ودا سبب العين والعروض الكعبه وانا كان لاعب وقرأت اوصافك دي اغلب الخصم قبال الحكم اصفر للبدايه
    وابو شيبه دا انا قلت ليك مخرف فك خبره والزاويه اصبحت زاويه حاده دي حلوه منك
  • #6
    الامين عبدالقادر 02-23-2017 11:0
    التحية والسلام اخوى الجعلى -- اليوم المقال سبقه شاى منعنع لانه ضرب فى الصميم لاتحاد السجم العام ولادارة الهلال والمدعوة فاطنة الصادق ولاعلام الوصيفاب المتمثل فى مرشدهم ابوشيبة وصحف الزعيق ---
    اتمنى ان يكون اشاوسنا فى الموعد والعودة بالنقاط الكاملة من ديار اسامة عطا المنان الذى اصبح دولة الاتحاد والمسردب لكل هفوات هذا الاتحاد الفاشل -
    اتمنى ان نجد قاقرين وشوقى وجكسا وامين ذكى وكل اوفياء الهلال على راس ادارة الهلال --
    وأى يوم كانوا هم مثل ؟؟ والاصل هم فرعون مصغر !!
    ودمتم للوطن والهلال فى حفظ الرحمن ورعايته
  • #7
    ابو حازم 02-23-2017 11:0
    حبيبنا الجعلي لك التحية وانت تكافح من اجل عشقك السرمدي هلال العشق الجميل كما يحلو لك، لكن بصراحة هلالك بصفة خاصة والكرة السودانية بصفة عامة اصبحت مملة وباااايخة ولا تمت للكرة بشي خالص، حاولت استمتع لي بخمس دقائق في اي مباراة سودانية غلبني عدييييل كده، الله المستعان.
    الديبة رجل شاطر ويفترض الادارة تخلي مدرب طوالي لان لاعبينا ما بنفع معهم خواجة اخير ليهم زول يهرشهم ويكورك فيهم ويفهمو.
    ناس ابو شيبة اصلا دي حالتهم من عرفناهم واغلب الصحف عندنا شغالة بالاسلوب ده.
    وتحياتي يا الجعلي واتمنى ليك مزيد من التقدم.
  • #8
    ودعقيده خلف 02-23-2017 10:0
    استاذ الجعلي لك التحيه سؤال وين ما زكرت لينا شعارك المحبب تمتع بالرحله ودع القياده لنا ولا سوته فيكم فطومه اختي يا صفرابي
  • #9
    عزالدين ابراهيم عبدالرحمن 02-23-2017 08:0
    من نيالا يا خوي الجعلي الا كان تجيب التمباك كردنه وقتين مايلقي النقاط بجيبه تمباك معقوله يجي خسران لا والله تاجر وكده مين الجاب سيرة الحرام الان ومين جاب سيرة الوسكي والخمور في اثيوبيا والجنوب ؟؟؟
    وبعدين نحن زاتنا رفعنا دعوتنا للفيا بمبلغ 485 الف دولار كان ما وديناكم تلعبو مع ناس ودنوباوي بس اصبر؟؟؟
    والمدعوم دي انت قايله جايه ساكت يا ابو ناصر لا ارجع وشوف كاسات الممتاز كيف شلتوها بالحكااااااااااااام فقط
    وحلوووووووووه فاطنه مدرب للهلال علي الاقل في جماعه حا يسكتو ساكت تاني ما بيقولو دايرنها (...)مافي داعي
    قلت لي فاطنه بالفاء مجرد سؤال ؟؟
    اولا شركه شنقيتيل لها الشرف انها شافت الزعيم ولعلمك شوف من صاحبها وبعدين قروشه حلال الجاب سيرة الخمرة منو هسه يا الجعلي .....محاسن كبي نقطه نقطه لكن الجوهناك برد والماسوره ما بتنقط عارف ليه قعد يشتروها من الخلاوي عشان كده ما بتنقط خ م ر ه ووسكي يا ......
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019