• ×
الخميس 28 مارس 2024 | 03-27-2024
بابكر سلك

قريباً الديبه فى المينا البرى

بابكر سلك

 2  0  2129
بابكر سلك


> اللهم لا شماتة
> وعلى طريقة فطومة أختى
> وأنا على سلم الطائرة إتصلت على الزعيم كردنة
> طوالى فطومة بتقول كده
> والغريبة فطومة والرشيد أول ما يقولوا الزعيم طوالى بقولوا بعدها كردنه
> الزعيم ساى ما بيقدروا يقولها
> وكردنه براها ما بتدى المعنى
> المهم وعلى طريقة فطومة
> أنا على سلم الطائرة إتصلت على الزعيم كردنه
> أنا على سلم الحافلة فتحت خيال
> مدرب فى قامة غرزة لما توقع معاهو عقد عدد السنين بورى طموح الطرف التانى
> كلما قصرت مدة التعاقد كلما كان طموح الطرف الثانى محدوداً بالبطولات المحلية
> وكلما طالت فترة التعاقد وأطلقت الصلاحيت واسعه بيد المدرب كلما كان الطموح كبيراً يصل
لدرجة كأس العالم للأندية
> لأن بناء فريق بطولات يختلف عن تحقيق البطولات
> يمكننا ان نحقق البطولة فى عام
> وفى الموسم الذى يليه ننزل للدرجة الأولى
> لأننا هدفنا البطولة ولم نهدف لبناء فريق بطولات إن لم يحز على البطولات توالياً تواجد فى
نهائياتها على طول
> فى اللحظة دى الكمسارى كورك
> دايات يا
> حد نازل
> قلت ليهو نازل أنا ده
> الحافله كلها تعاين لى
> بنزل الدايات
> الما بنزلنى شنو وعقد غرزه سنه
> قابل للتجديد دى طبعاً بإتفاق الطرفين
> يعنى ما قابل للتجديد برغبة طرف واحد
> والدنيا سوق
> والظروف بتتغير
> نزلنى الدايات ياخ
> المهم

> الديبة (المدرب رقم 15) فى الكسكتة
> حايكون اول مدرب هلالى فى العهد الكاردينالى يغادر بالميناء البرى
> لأنو الديبه شاطر لايمكن ان يصنع من فسيخ بخارى شربات إستقرار فى وظيفتو
> الديبه حا يرجع بويا طرف شمال ويجيب الطاهر الحاج فى قلب الدفاع وكده اى كورنر قون
> أيها الناس
> روشا ماشى لأسامه عطا المنان فى محلو
> الوادى نيالا تيم أسامه
> ولا ينفع مستشفى فى خى الوادى ولا لقيمات
> أولاد حى الوادى بى لقيماتهم يا روشا
> وكل أسلحة هزيمة الهلال متوفرة لديهم
> وأولها ضعف الهلال البائن
> والكورة فى ملعبك يا سمسم
> وريهم بتختلسوا الهدف كيف
> هدف خلسة والديبة يرجه أسه
> المهم
> سمعنا بتعيين الساده
> التعين أذان لمغرب
> تجميد القرار قبل الإقامة
> وخلاف السادة صاحب الشخصية مع فطومة أختى ما داير ليهو درس عصر
> محاسن قلتى لى البرأس الهلال منووووووووووو ؟؟؟
> أها
> كتيبة غرزة إتوجهت لغزوة جديدة
> فبحمد غلله بتنا ننتصر فى معارك الخارج قبل معارك الداخل
> والجميلفى البطولة العربية إنو كاشها داون مع اى مرحلة
> وبعد تخطى المرحلة دى حانقبض تانى
> القبضة التالتة دايرين نسجل بيها لعيبة الهلال
> ما ممكن أربعطاشر خواجة فى سنتين كلهم أكياسهم فاضية
> أكيد فى شى بقد الكيس وبفضيهو
> وشى بقدد الأكياس غير خت المواسير جوه الأكياس مافى
هذا العمود من قروب عشاق المريخ من أجل المريخ!
> ياخ مرة واحد بتاع كارو شايل مواسير
> الحصان فجأة وقف
> عندو غرض داير يقضيهو
> دخل فيهو بتاع دفار
> تصدق الموسير قدت الدفار
> نفس الحكاية بتاع بوكس شايل مواسير
> الكلام ده جمب الطلمبة
> رجع خلف فى تانكر المواسير قدتو ليك كشح البنزين أبو تمنية وعشرين الف ده فى الشارع
> ألف وخمسمائة جالون إتكشحت
> فى نص ساعة التانكر فضى
> تقول لى مدرب كيسو فاضى
> مواسيركم دى تفضى بحر خليهو كيس
> المهم
> أيها الناس
> نحمد الله ننعم بإستقرارٍ يجب إستغلاله فى الإنجاز سواء على مستوى فريق الكرة أو على ملف
الإستثمار.عشاق المريخ من أجل المريخ
> مثل هذا الإستقرار قلما يتوفر الينا
> حقو بالنفسيات العالية دى ننجز ملفات الإستثمار ومساندة الفريق وإستنفار الجماهيروتوحيدها
فى بوتقة واحدة أساسها المحبة والإخلاص فى العمل
> بالذات والعدو ربنا شغلو فى روحو
> كيدهم بقى فى مواسيرهم البتقدد أكياس مدربنهم لمن تفضى
> غايتو يوم فطومة أختى حا تكتب الآتى
> وأنا على سلم الطائرة إتصلت على الزعيم كردنه وقلت ليهو أنا إتخارجت ماشه دبى
> إتفكفك يا اخوى الجمهور قطع كوبرى المك نمر وماشين بشارع النيل على قاردن سيتى
> عجوبه جيبى سوبا
> أيها الناس
> إن تنصروا الله يينصركم
> أها
> نجى لى شمارات والى الخرتوم
> أكان شفت يا والينا
> لا لقينا البداوينا
> ولا كملت بلاوينا
> ولا خلصت حكاوينا

سلك كهرباء
>> ﻧﻨﺴﺎﻙ ﻛﻴﻒ والكلب قال يامشهينى طعم النوم أريتك بالسهر الإجيب عويناتك فى فقرتك ؟!
امسح للحصول على الرابط
بواسطة : بابكر سلك
 2  0
التعليقات ( 2 )
الترتيب بـ
الأحدث
الأقدم
الملائم
  • #2
    alyyas 02-22-2017 09:0
    يا غبي انا ما أحب أقرأ خرمجتك اصلا . بس من العنوان دا حال السودان كله والآن ما رأيك في إعفاء وطيران وزير داخلية الدولة ؟ ولماذا لا تكتب عنه يا جبان بس فالح في الديبة وهو الحيطة القصيرة وأين هااااااااااي ؟
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019