• ×
الأربعاء 14 أبريل 2021 | 04-14-2021
نادر التوم

تَتَعَدَّدُ الأسْبَابُ!

نادر التوم

 0  0  5858
نادر التوم

إضاءة: سبب الريد!
تسخينة: ايه اسباب غرورك؟
(1)
نبحث معكم عن أسباب التعادلات الهلاليَّة:
ممكن يكون كردنة؟؟ لا الرجل وفَّر المال،
و سجلَّ اللاعبين يعملوا ليكم شنو؟ قول مواسير دي مشكلتو؟؟
يدفع ليكم و يختار كمان؟ انتو بتسووا في شنو؟؟
طيِّب الاعلام ؟لا الإعلام قايم بى دورو على أكمل وجه
الموالون يظهرون الايجابيات و المعارضون يظهرون السلبيات!
جائز تكون الاضاءة بتاعة الجوهرة؟؟
لا لا، اللعيبة لعبوا بره متعودين عليها
صاح قد تكون جاهراهم شديد لكين دي ما المشكلة
يكون الجمهور؟ لا ، جمهور الهلال دا بالذات اللاعب رقم صفر
بجي قبل اللاعبين و الادارة و الاعلام في حب الهلال
و ما برضي في الهلال حاجة اى نعم تنظيرهم كتير
لكن لا يمكن أن يكونوا سببا في التعادل الكتير
خلاس المُدَرِّب؟ لا، المدرب يعمل شنو يعني؟
الخطة ختاها التشكيلة عملها و العرفناو ما قاع يسمح بالتدخلات
معناتها الأرضية؟؟؟ لا.. اى نعم هي كعبة لكين لعبوا في زيها،
و بعدين الارضية دا حنك لافاني ساكت هسه ارضية الجوهرة دي ارضية
اللهم الا تكون ارضية الهلال لانو اصلا ما عندو أرضية
(بث) لقيتها، نقل قناة الملاعب للمباراة، شكل قاصمة الظهر
لا لا ياخ ما تتطيَّر ناس الملاعب ذنبهم شنو؟
دي حسنتهم الحلو المشكلة و خلوكم تغنوا
شفنا هلال بنريدو؟ ما عندهم ذنب أقلَّاها وروكم الهلال ع حقيقتو
طيِّب أيش المشكلة يا مولانا؟؟؟
أيوااااا! الكلام الفوق دا تبريرات ساكت
المشكلة الحقيقية إنو غارزيتو ما وقع
- جادي معاكم-
لافاني يدرب و الادارة و الجماهير و الاقلام الهلالية
كلها بالها مع (مغرزة)
يعني لو مغرزة كان (وقَّع) ما كان النمور (وقَّعوا) الهلال في المحظور!
(2)
في ناس ما اقتنعوا بالسبب الفوق دا
هنالك يا إخوة سبب تاني
هو أب شنب أيوه و الله - جادي معاكم-
أب شنب إحتسب للهلال هدف (مو صحيح)
و العهدة على الصديق ( شهاب مغاربة)
هذا الهدف جعل الهلال يتعادل ( أونطة) كالعادة-
لكن (النتيجة الحقيقية) فوز هلال الابيض 2/1
لكين الحقيقة شئ و الشنب شئ تاني خالص
طيب لو كان الهلال رضي بالهزيمة
و رجعوا اتعادلوا مع هلال كادوقلي كان بقت مبلوعة
يقولوا الهلال ماشي كويس من هزيمة لتعادل
بعدها ينتصر على التريعة يقولوا كدا 80%
لو جا تاني اتعادل مع شندي بتكون كبوة بس!
يعني كان يكونوا تعادلين بس
كردنة دا بصبر مع المدرب لحدي 3 مباريات
أكتر من كدا ما بجامل كمان ممكن يطرد معاهو المحترفين
( زعلة بس)!
(3)
في ناس برضو ما مقتنعين بالسبب دا
طيب نديكم (خيارات) تاني؟
مغرزة وقع ما وقع، استلم ما استلم ، الوالي جا ما جا
سوني ضعيف.... انتوني قاعد ..... إلخ
شغالين بالمريخ أكتر من روحكم
ياخ ما تشجعوا المريخ عديل و ترتاحوا!
(4)
أيا كانت الاسباب فالمدرب غادر والديبة قاعد
- اسمك مين؟ - برعي ! -بتاخد كم؟- 10 جنيه! في الشهر؟؟- آه
و هُما ياخدو بلاوي بس الحق عليك أصل إنت اللي مدلعهم
حوار سرحان مع برعي في شاهد ماشافش حاجة
تذكرته كلما استلم مدرب وطني مهمة تدريب الهلال
المدرب الاجانب ياخدو بلاوي و يفشلوا يمشوا يجيبوا ناس الديبة
بحجة أولاد النادي لا بالله اولاد النادي هسه بس؟
لكين الحق عليكم أصل إنتو اللي مدلعنهم و هما ياخدوا بلاوي
على الاكياس الفاضية!
(5)
المناسبة جات افتكر انو المدربين الاجانب ديل خافوا من الرسوم
الواحد بجي كيسوا فاضي.. الوزن الزائد عليو رسوم اضافية
انتو قولوا ليهم رسومكم علينا عشان يستِّفوا أكياسهم من هناك!
تخريمة: الهلال ما داير مدرب كيسو مليان
داير مدرب كاسو معاو يقول ليهم هاكم الكاس هَنْدَه!
(6)
من عدة زوايا
الحفاظ على كردنة واجب تمليه الضرورة
كردنة ما بتعوَّض المدربين و اللاعبين و الجماهير كلهم بمشوا و بجوا
كردنة دا لو فات تاني بترجعوا للبيانات!
الهلال يمرض و لا يموت..
ما أعتقده ان الهلال الآن مريض (في الانعاش)
تعبان و متعِّب الناس معاهو
تغريدة: لو جبتو مدرب تاني برضو ح يلحق لافاني
المريخ يلعب يوم الجمعة ان شاء الله و منتصر باذن الله!
و يظل المريخ الحاضر و المستقبل و التأريخ
و يبقى الهلال صفرا كبيرا جدا خالص على الشمال!
و كلنا بنغلط!
آخر قطرة: نيالا (تربيع)!
اللَّهُمَّ صَلِّ وَ سَلِّم وَ بَارِك عَلَى سَيِّدِنَا مُحَمَّدٍ وَ آلِهِ ،عَدَدَ مَا فِي عِلْمِ الله، صَّلَاةً دَائِمَةً بِدَوَامِ مُلْكِ الله!
و هذه بصمتي



امسح للحصول على الرابط
بواسطة : نادر التوم
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019