• ×
الإثنين 26 يوليو 2021 | 07-25-2021
محمد عثمان الجعلي

حبايب الهلال والآرسنال

محمد عثمان الجعلي

 9  0  3148
محمد عثمان الجعلي

في مباراة من المفترض أن تكون من العيار الأفريقي تعادل ممثلا السودان في الأبطال والكونفدرالية بطل الثنائية مع آرسنال دار جعل بدون أهداف بعد أداء رتيب وغريب من الجانبين وكان الحرج هو طابع لهذا الهرج وخرج الجمهور وهو ساخط على الأداء ، ورغم الأداء الفاتر مازال الهلال في الصدارة برصيد 12 نقطة يليه هلال كادقلي والرابطة كوستي 11 نقطة لكل ، ومباراة الهلال القادمة في نيالا أمام مريخها يوم الجمعة 24 فبراير وفي الأول من مارس يلعب الهلال ضد الوادي في نيالا أيضاَ ، ومباراة الأهلي والهلال كانت في الماضي دائماً طابعها الإثارة والندية ، وكنا نتمني أن تكون هذه المباراة الأفريقية هي البوصلة التي تحدد مسار هلال الساجدين والناس الصالحين ولكن ليس كل مايتمنى المرء يدركه ...وخيرها في غيرها ، وهذا قدر الأقمار اللعب مع الأقوياء والكبار في بداية المشوار ، طبعاً الهلال والآرسنال نالا الإعفاء من تمهيدي الأبطال والكونفدرالية والحمد لله المريخ وهلال التبلدي خرجا أيضاً من قاع التمهيدي بعد أن فاز المريخ على سوني نغيما برباعية مقابل هدف وفاز فرسان التبلدي على بطل سيشل بهدف في أرضه ، وسوف يلعب الهلال والآرسنال مباراتهم الأفريقية الأولي بالسودان بينما يلعب المريخ وهلال الأبيض خارج الديار ، وإنطلاقة رباعي السودان الأفريقية يوم الجمعة العاشر من مارس حيث يستضيف الأهلي شندي فريق سوبر سبورت الجنوب أفريقي ويسافر هلال التبلدي للكنغو الديمقراطية ( بلد مازيمبي ) ليلعب ضد سانجا بولندي ويستضيف الهلال بورت لويس بطل موريشيوص الذي أقصي توسكر الكيني بهدفين لهدف بينما يسافر المريخ لنيجيريا لينازل ريفرز يونايتد ( الأنهار المتحدة ) الذي هزم ريال باماكو برباعية نظيفة ، عن إذنكم نطلع من الكتابة الجادة دي ( قاعدة تقبض نفسي ) ونحن الهلالاب ديل ناس بنحب الطرب ومتعودين ( نعرض فوق نشرة الأخبار ) ناس المريخ بقوا زي إبن بطوطة ...سفريات سااااكت !!، عشان كدة الله يستر من الأنهار المتحدة ... النيجيريين ديل بعد يضربوا القدوقدو ( ماعندهم يمة أرحميني ) لازم ياصفوة تبقوا زي كيجاب عشان السباحة في أنهار مانهر واحد وكمان متحدة ، وناس كلاتشي وكونلي وأوجو ( منزوعين بركة ) مابقدروا يعملوا حاجة في نيجيريا أمام فرقهم ... ممكن يساعدوا ( أب قفة ) في ترجمة رطانة الهوسا !! الله يحازي محنكم ياالصفوة قفة الخواجة طيرتوها وين !! بالمناسبة وحشتنا قفة غارزيتو !! لذا لزم التنويه .
*** الجمهور يجب ألا يجرب بأن يكون مدرب
مامن شك أن جماهير الهلال تعشق فرقة الأقمار بصدق ولكن في الآونة الأخيرة أخذت بعض الأقلام الزرقاء من الإعلام السالب أسوأ صفاته وهي التدخل في عمل المدرب ورسم الخطط التدريبية له والمطالبة بإقالته !! هسه عليكم الله فرقكم من مامون أبوشيبة شنو !! وكما نعلم أن الأندية الكبيرة تصبر على المدرب وتتحمله لو أخفق في عامه الأول ، وهناك أمثلة حيث إستمر البرتغالي مانويل جوزيه مع الأهلي القاهري في فترته الثانية من 2004 حتى 2010 ونال معه عدة بطولات ونال المدرب العديد من الألقاب منها العبقري والأسطورة ووش السعد وغيرها ، كما صبر نادي صن داونز على مدربه الوطني بيتسو موسيماني وهو يدخل الآن لعامه الرابع مع الفريق ونال معه كأس أبطال أفريقيا 2016 من أمام الزمالك ، إذا أردنا الإحترافية يجب الصبر على المدرب لأننا لو أحضرنا مورينيو سوف يحتاج لعدة شهور حتى يتعرف على إمكانيات الفريق ونجومه ونحن لسنا على إستعداد لتحمل مثل هذه التجارب ، أما هتافات الجماهير فهذه أشياء عاطفية يمكن أن تتغير خلال دقائق وأقرب مثال مباراة الهلال وتريعة البجا حيث إحتجت الجماهير على مشاركة الشاب إبراهومة كأساسي وعندما أثبت وجوده إحتجت على تغييره وعندما دخل البديل الصيني قابلته الجماهير بصافرات الإستهجان وعندما أبدع صفقت له الجماهير !! لذا يجب على الإدارة الواعية ألا تتعامل بردود أفعال وإنفعالات الجماهير الوقتية ولا نغير المدرب كما نغير القميص أو البدلة ، فلابد من الإستقرار الفني إن أردنا التقدم في البطولة محلياً وقارياً ، ويحضرني على الدوام موقف الأرباب صلاح إدريس عام 2009 عندما خسر الهلال بخماسية مقابل هدفين من مازيمبي وطالبت الجماهير بإقالة المدرب البرازيلي كامبوس ولكن الأرباب كان واضحاً وشجاعاً وهو يعلن تمسكه بالمدرب وهتفت ضده الجماهير ( أستقيل ياثقيل ) وبعد إسبوعين فاز الهلال على مازيمبي بثنائية في لوممباشي وهتفت نفس الجماهير ( تيمك صاح ياصلاح ) وعلى الجمهور أن يلتزم بالتشجيع لأنه إذا أصبح مدرب سوف تكون لدينا آلاف الأراء من آلاف المدربين ، أما موضوع إقالة لافاني فهو عزف على وتر العاطفة ولا يمت للإحترافية بشئ !! طيب مين الشخص الذي إختار لكم لافاني إذا حكمتوا عليه بالفشل قبل عامه الأول وماهي الضمانات التي تضمن لكم نجاح المدرب القادم وكم من الوقت نحتاج للحكم على نجاحه أو فشله . *** رسائل غنائية رياضية من الفنان أحمد المصطفي
نريد أن نرسل 3 رسائل غنائية رياضية من أغنية ( بنت النيل ) للفنان أحمد المصطفي كلمات الشاعر سيد عبد العزيز ... الرسالة الأولي من فريق سوني نغيما وهو يدين رش ملعب المريخ قبل المباراة لأنه زاد عليه الطين بلة !! كما أن نغيما لم يذق نغمة الفوز الأفريقي في حياته وجاء فريق نجمة المسالمة ليعمق عليه جراحه وأنه سوف يلاقي المريخ في التمهيدي العام القادم ويجيب التار وتقول الرسالة *** يابنت النيل النيل ... أحب النيل ياجميل ... ياظبية المسالمة وفي الخمايل حالمة ... وفيك ياظالمة ...ياظالمة ياظالمة ... تجرحي ليه ليه وأنا كلي جراح ... لابد يوم ألقاك وأرتاح ، والرسالة الثانية من جمهور الأقمار وهو يجدد ميثاق الحب والولاء رغم التعادل الأخير مع الآرسنال ويثق بأن القادم أحلي خاصة وأن هناك مواهب تنتظرها فرصة الظهور في قادم الأيام والفريق يضم مختلف المواهب ومن الجنوب أيام الزمن الجميل هناك الحارس جمعة جينارو ومن الشمال يوجد بشة وكاريكا وبحرف النون يوجد نزار وغيرهم من النجوم وأن الهلال هو عشق الجماهير الأبدي مهما تعثرت الخطى وتقول الرسالة *** ليك من سحر الجنوب قسماتو ... ومن طيب زهر الشمال نسماتو ...أحبو وأحب نوناتو ... ونوناتو الفي وجناتو ... أحبو وأحب تقديرو ... وسيف لحظو حين مايديرو ... أموت مابعشق غيرو ... وأموت مابعشق غيرو ، والرسالة الأخيرة من جماهير الأهلي شندي وهي ترفض جعجعة سكرتير النادي هاشم أحمدونا ( المريخابي ) الذي توعد الهلال بالهزيمة وسط الدار وبين الأنصار وطلع كلامه ( خرطي ) فشوش وإكتفي بالتعادل ... والأهلي حتى الآن رصيده 6 نقاط من 6 مباريات نالها من فوز وحيد وتعادل 3 مرات وخسارة مرتين !! وتذكرت الجماهير وقفة الأرباب القوية خلف الفريق وتقول الرسالة *** قال لي صديق خليني ...صبح الغرام باليني ... قت ليهو دا مواليني ...وهو المن زمان قاليني ... فقدنا الصواب ياشبابنا ... يا أبوعبدة وين أحبابنا ... لومتنا هم أسبابنا ... العودة العودة ياأربابنا .
*** همسة الوداع
حبايبنا الحلوين عملوا من سوني نغيما حاجة كبيرة عشان متعودين على تضخيم سيكافا ، وضحكت وأنا أقرأ العنوان الرئيسي للصدى وهو يقول ... القلعة الحمراء تفتح أبوابها لإستقبال أول الضحايا في الأبطال !! إنتوا معقول ضحيتكم بالغنم ( القرج ) خروف صومالي ... بربري صغير !! وبعدين موضوع شكوي نغيما عملتوا فيها شنو !! ولاّ سرحت مع جدي الريل أبوكزيمة !! وبهذه المناسبة نهمس في إذن الإعلام الأحمر هسه بعد مرقتوا من حفرة التمهيدي دي نقول ليكم مبروك عليكم ولاّ كفارة ليكم ؟ مجرد سؤال .

امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    ابوحسن 02-21-2017 03:0
    لك التحية استاذنا محمد عثمان المشكلة تاني رجعنا لموضوع تغير الجهاز الفني والمهاترات الادارية والصراعات من اجل الادارة
    الحق يقال دي حاجه تزعل الواحد بعد هذا الاعداد والاستعداد كلام غريب وعجيب واكيد وراه ايدي خفية عايزة الخراب الي ابوالهل
  • #2
    منعم ابوناصر 02-21-2017 11:0
    اولا محاسن كبى حرجل دى حقتكم انتم الوصيفاب لانها بتشبهكم ومعناها كبيى...... دا نحن مابشبهنا لكن مفصل عليكم انتم ثانيا نحن من وعينا للدنيا وعرفنا الاجمل من الاقيح وشجعنا الاجمل طبعا سيدالبلد باعتراف الفيفا والكاف والدليل دائما تمهيدى ماسمعنا بيكم فى الابطال0 اما قولك عن فطومه الحارقه دمكم انها تحكم الهلال مرحبا بها واقوليك ياريت تجيكم فطومه تكون مرطبه ذى حقتنا عشان تدفعو حقوق الناس وتصلحو حفرتكم مااحسن ليكم من ودالحاج الخلاها عجاج بعدين اخجلو انتو الماشين تلعبو مع فريق العمده عندهم اسمها فطومه بت عبداللملك ياتمهيداب بتجيبو لينا فى اسماء فرق عمرنا ماسمعنا بيها دى فطومه سودانيه وانتو عددكم 35 شخص وصيفى مابتخجلو ماشين تلعبو مع فريق حرمه اسمها فطومه الشنقيطيه 000بعدين انت ياابومحمد ياصحفى الصدى المصديه مين قال ليك الاستاذ الجعلى لايحترم عقول القراء ممكن لايحترمك انت لان نفسك مريضه
  • #3
    صلاح ابراهيم محمد 02-21-2017 12:0
    مافاهم حاجة انت بتقول في شنو . متصدر ول مصبر .
  • #4
    فيصل الاقرع 02-20-2017 09:0
    سلام حعلينا ومن الهمسه نبدأ لا عندنا ليهم مبروك ولا كفاره خلينا في همنا الهلال التعبان تعب الموت انا والله ياجعلي ان تغيير المدربين ولكن لافاني دا ادلا يعرف قرأة الملعب اطلاقا وما باين انه مدرب جيد واعتقد قرار اقالته صائب هذه المره لانه لا يورجا منه والله اللعيبه في الهلال لو وجدوا مدرب جيد مافي فريق اقدر عليهم
    انا ناس نغيمه ديل سوسيو ماتام حتي دجاجه خليك من غنمايه صومالي وبربري ومل زول فرحه علي قدرو المهم ياجعلي من مغص مباراة امس ما كنت ماوي اقرأ صحف لكن جيت اتلبد ببره ساي لمحت الرحيق وما قدرت اقاوم لك التحيه والتقدير
  • #5
    منعم ابوناصر 02-20-2017 06:0
    ناس تخرجو من الروضه لازم تقول مبروك مش الايام دى الروضه بعملو ليها تخريج وكده وانت عشان حبايبك المفروض تجيب ليهم انصاف مدنى (مش كده ياعزو)
  • #6
    ودعقيده خلف 02-20-2017 05:0
    استاذ الجعلي مبروك عليك الشنداويه الله يستر من الباقي
  • #7
    عزالدين ابراهيم عبدالرحمن 02-20-2017 05:0
    اخونا ابو ناصر عاوز يلوي عنق الحقيقه ويقول المريخ اشترك في الابطال من السنه الفاتت كمان دي غلاط من العام 1971 الي هذا العام المريخ شارك في الابطال 22 مره وهليلك 29 والزياده دي بالكاسات حقه الممتاز الشلتوها بالحكام وانت قعد تشترك من العام 1966 شن سويت صفر وحا تفضل صفر والزعيم هو الفريق الوحيد الرقم الصحيح في السودان وحا يفضل ما دام تقودكم مرة والله انا لو في محلكم والله ابطل اشجع الهلال هسه واحد يسالني لو انا لا قدر الله وكنت هلالابي واحد يسالني اقول ليه انا هلالابي (فشيله فريق تقودو ف ط و و و و و م ه)والله الان خجلت ليكم وكمان تشوف الجعلي يبدا ليك باغاني التقول القبه فيها فكي هلال فطومه والله فضيحه عديل ابو ناصر وين لافاني فطومه طيرت كيسو خلاص العاقبه للجعلي فطومه تطير كيسك
    هههههههههههههههههاي ابقي سلمي علي فطومه
  • #8
    عزالدين ابراهيم عبدالرحمن 02-20-2017 05:0
    ابدا من حيث انتهيت يا جعلي مش انت تقول لينا مبروك عليكم والله كفارة ليكم نحن نقول ليكم ارجو الراجيكم والسنه الجايه بازن الله التمهيدي فالكم تب وان شاء تلاقو نغيما نشوفكم تبقو رجاله ليه والله نغيمه دا احسن من فريقكم ايه رايك يا جعلي
    اها كيف اخبار لافاااااااااني قالو لي كيسو طار والله ما كنا عاوزين يطير الوقت دا شوي كدي الشنداويه كبي نقطه علي وزن محاسن كبي حرجل ؟؟
    نحن النيجيرين متعودين عليهم وقبل كده الكاس جبنا من بلدهم النشوفكم انتو ونشوف علومكم
  • #9
    أبو محمد 02-20-2017 04:0
    ماهذا الغثاء ؟ هل هذا مقال رياضي .. أرجو أحترام عقول ووقت القراء .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019