• ×
الجمعة 29 مارس 2024 | 03-28-2024
معاذ ابو مؤيد

ساعات وسعادة مريخابي يمثل المريخاب

معاذ ابو مؤيد

 0  0  7094
معاذ ابو مؤيد



اولا مبروك للمريخاب علي روعة المريخ وجمال المريخ وفوز المريخ ليلة الامس ...
الساعة الرابعة بتوقيت السودان يرتدي عبدالعظيم ملابسه ذات اللون الاحمر متوجه الي استاد المريخ بامدرمان ....
طلع الشارع يناديه صاحب الدكان موفقين ياعظمه الكوره متلفزه عظمه اي متلفزه في الملاعب ..
لكن نحن ناس استاد وناس مدرجات
يقيف في الشارع الهايسات تنادي بوسته بوسته
عظمه يركب بكل فرحه ويتوكل علي الله
يصل البوسته يشتري جرائد المريخ الزعيم والزاوية والصدى اصلو عظمه زول جرائد وقال يتونس بيهم مع العلم عظمة من الصباح اشترى نفس الجرائد وقراءهم لكن قال نشترى تاني عشان شويه تركيز ومراجعه ،،،
واقف جنب المكتبه تجي هايس موشحة باعلام المريخ تنادي استاد استاد......
اصلا المريخ يكون لاعب البلد كلها بالاحمر
عظمة يصل الاستاد يشترى المعينات التشجعية من فول وتسالي والمويه ويتجه ناحية البوابات ويشاهد الصفوه هنا وهناك ،،،
يمشي لشباك التذاكر
يجدهم كلهم ابناء المريخ التذكرجية وحماه البوابات
كلهم من الصفوه ،،
استقبال بابتسامه وفرحه كلهم ( اهل مع بعضيهم )
قروب الحماه وقروب الديناكوردات
استقبال لعظمه استقبال يليق بالصفوه
عظمه يطمن علي تذكرته من غير مافيا تذاكر او واسطات
عظمه جوه الاستاد فرحه لعظمه من مظهر الاستاد من نجيل والوان تسر الناظرين ...
عظمه يحتار في اختيار المكان
فجاءه شاف الاستاد كلو يكورك ويهتف ( غرزه غرزه غرزه)
عظمه يكورك مع الناس (غرزه غرزه غرزه)...
غارزيتو في نص الميدان يتحسس النجيل كانه اول مره يزور الاستاد يتفقد الملعب من المرمى للمرمى يأشر علي الاماكن المحتاجه مراجعه ويتم معالجتها من ابناء المريخ المشرفين علي الملعب......
غارزيتو يتجه للجمهور وعظمه يتابع في الثعلب العجوز والكل في المدرجات متابع وحاسس انو غارزيتو بيسلم عليه
اصلا الحب متبادل بين غارزيتو والصفوه وعظمه من ضمن الصفوه المؤيدين (لغرزه)...
عظمه التفت الي المشجع الجنبو قال ليه الخواجه دا ياخي يطمنك ويديك تفاؤل كده عجيب
بالله شرف الزول دا قبل الشمس تغيب لفه الميدان كلو
لاراعى عامل السن ولاانتظر ينزل مع اللاعبين
الخواجه دا لو فتشنا نلاقي جدو شاخور ...
عظمه بعد مزاجو استعدل مع غارزيتو نادي لست الشاي جيبي شاي ياوالده ...
عايز يتم الكيف ،،،
نزل اللاعبون للاحماء وعظمة مستمخ مع كوب الشاي وبروده الجو قليلا ...
مستمع بالاذاعة الداخلية وبداية اشعال الاضاءة في الملعب ومع عمليات الاحماء يهتف للاعبين ...
يعاين يلاقي بعض الاساسين حتى في الاحماء مافي !!!
يفتش في عاشور ماااافي
ابراهيم جعفر ماااافي
محمد الرشيد ماااافي
التاج ابراهيم ماااافي
علاء الدين مااافي
ياجماعه الخواجه دا شكلو عندو فهم
ينادي علي تشكيله المريخ بالاذاعة
راجي ماااافي
اودجو ماااافي
باسكال ماااافي
عظمة الخواجه دا اكيد قاعد ليه فوق راي
معقولة اللاعبين ديل كلهم في التشكيله مااافي !!! يراجع جرائد اليوم يلاقي تشكيله مختلفة بخلاف الامامه ،،،
قال في نفسو الخواجه دا مافي زول عارف سرو غير ولدو....
وفاروق جبره والمترجم ،،...
انطلقت المباراة وعظمه مستمتع بالاجواء وتركيز عظمه مع غارزيتو والملعب ...
تحمس عظمه مع الالتراس واستمتع مع التيفو( المااااخمج )
حس نفسو في الدوري الاوربي او بطولات الكان ....
وجد عظمه نفسو في نص الروابط التشجيعية عن يمينو الالتراس وعن شمالو الساساب وقدامه روابط البحر الاحمر ومدني وخلفو ناس التعبئة الجماهيرية ،،
حس بعظمة المريخ واهل المريخ
ديل المريخاب الجد
كل خمسه دقايق يميل مع احد الروابط التشجيعية
عظمه نشوان وطربان مع الالتراس
ويجي الهدف الاول وعظمه يقالد في الجنبو
ويجي الهدف التاني وعظمه يزداد صخبا
والهدف الثال وعظمه طاير من علي الارض بالفرحه ،،،
وعظمه تركيزوا لسه مع الداهية (غرزه )
الخواجه دا مجنون عديل
الخواجه يكورك وعظمه يكورك
الخواجه يوجه وعظمه يتحمس
الخواجه واقف علي الخط واصلا ماجلس
وعظمه واقف والالتراس واقف والاستاد كلو واقف
ناس المقصوره واقفين مع الاهداف
عظمه يعاين في كنبه الاحتياط
غير غارزيتو وجبره وولد غارزيتو ماشايف اي زحمة
لا اداريين ولا كوته ناس
عظمه يعاين في المقصورة يشاهد عاشور والرشيد والبقيه من اللاعبين واقفين يشجعو معاه ..
ولسه في سرو يردد الخواجه دا مجنون عديل
الزول دا زرع الروح دي في اللاعبين في ظرف ثلاث اسابيع
وزارع الروح فينا نحن الجماهير من سنين
وفي سرو اتزكر اغنية ( ست الدار ) للمرحوم حميد اترحم علي حميد وبقي يدندن ( الخواجه يكورك ساكت وبي فهم)
عظمة منتشي وشوط اول ينتهى والاستاد كلو يكورك ( غرزه غرزه غرزه )
عظمه من ضمن البهتف للخواجه
في الاستاد يهتفوا
والخلف الشاشات يهتفوا
والادارة تهتف
(غرزه غرزه غرزه)
غايتو الناس دا اتجننت بالثعلب (غارزيتو)
بين الشوطين عظمه يفتح الاذاعة ويسمع في المحللين كلامهم كلو غارزيتو وخطه غارزيتو وبدلاء غارزيتو
عظمه هنا فكر وسرح في العقد بين غارزيتو والمريخ
وقال الخواجه دا لاذم يمضي معانا عقد بدون تاريخ انتهاء ويعملوا فيه شرط انتقال التدريب لابن غارزيتو بعد عمر طويل وتبقى الشغله تدريب بمراسم ملكية
وراثه خواجات
طالما زرعوا الروح دي فينا وفي اللاعبين
ينطلق الشوط الثاني وعظمه مع متعة الاداء واقف اصلا ماجلس حتى بين الشوطين ولسه مركز مع غارزيتو
وييشوف التغيرات وفي سرو عظمه يقول الخواجه دا مجنون عديل
يشوف الداخل منو والطالع منو يلاقي اختلاف خانات المستبدل مع اللاعب ..
عظمه لالالا الخواجه دا حيرنا عديل
طيب النازل دا حيلعب شنو والطلعوه دا حيلعب مكانو منو
وفي لحظات تفكير عظمه يلاقي الاداء من انسجام لانسجام والمستبدل لاتشعر بخروجه
ويجي الهدف الرابع
وغارزيتو علي الخط وفي لحظه يدخل يطبطب علي النجيله...
عظمه مندهش معقوله حتى النجيله ياغارزيتو عايز تجعلها من محبيك !!
عظمه مع المشجع الجنبو الخواجه دا عارف شغلو تمام
الجماهير نشوانا بالاداء
وعظمه نشوان بالاداء وبي غارزيتو
اصلا غارزيتو اجبر عظمه والمشجعين ومن هم خلف الشاشات علي احترامه عشان احترامه لعمله ...
غارزيتو ينفعل مع كل هجمه والجمهور وعظمه ينفعلون مع غارزيتو
عظمه التفت وقال للجنبو
الكوره كوم وامكانيات الخواجه دا كوم براهو
الخواجه دا مجنون ...
استرجع عظمه الخرمجة في سلك التدريب في السنتين الفاتو بعد غارزيتو رااااااح
واتحسر علي ضياع هذه السنين وغارزيتو بعيد عن الكوكب الاحمر ...
خلصت المباراة وعظمه سرحان مع غارزيتو وتصرفات غارزيتو وانفعالات غارزيتو
ويسال الزول دا معالج نفسي ولامدرب
معقوله نحن واللاعبين يخلق فينا الروح دي !!!
روح مانديلا تطوف كل القاعده المريخية لاعبين وجماهير واداريين ....
ولسه عظمه يردد في سرو
الخواجه دا مجنوووون ..
عظمه يطلع ويركب مواصلات بيتهم وفي المواصلات يدخل عظمه قروبات المريخ..
يجد كل القروبات غارزيتو غارزيتو.
والكل يتحدث عن العقد !!!!
وعظمه يسرح تاااني بالله سنتين راحوا ساااااي لاسِلمنا من تدريب وطني ولا اجنبي ولاشاهدنا مدرب منهم يتفقد نجيله الاستاد!!!
فجاه في سرحان عظمه واحد يرسل صوره في احد القروبات (للتكت )
عظمه يكورك مع نفسه ويكتب في القروب
دا ما التكت
دا اسمو محمد هاشم (الشفت)
دا ودعطبره الشفت
انا شفت بعيوني قلق لاعب مع المريخ اليوم وشفت جسارة علاء الدين تتجلي في هذا اللاعب ...
ياخي دا دق كفر ذي الكفر ،،،
دا من جيل ابطال مانديلا ...
ماشاء الله تبارك الله
عظمه يكتب في قروب
فنلة العجب ماخسارة فيك يالشفت التكت...
عظمه فجاءه يلاقي نقسو جنب بيتهم وبتاع الدكان ملون بقالته بالاعلام المريخية الحمراء....
ويكورك ياعظمه الكوره كيف
مبروك الفوز ياعظمه
عظمه لسه يردد في سرو وسرحان الخواجه دا مجنون
الخواجه دا عقدو حيوقع بتين
الخواجه دا رجع الروح للمدرجات واللاعبين
الخواجه دا الخواجه دا ....
عظمه دخل بيتهم والعشاء قدامهم وعظمه لسه سرحان
ونشوان مع انتصار المريخ ومع خيال الثعلب غارزيتو
ويردد في سره الخواجه دا مجنون
الخواجه دا الخواجه دا ...
عظمه لسه سرحان ويردد في حاله عدم اللاوعي
الخواجه دا مجنون الخواجه دا حيوفع بتين ؟؟
عظمه سرحان ويردد والجمهور كلو نفس حاله عظمه
الخواجه دا مجنون
الخواجه دا حيوقع بتين ...
عظمة نام وحتى كتابه التغريدة عظمه نائم و(يكورك )
في سرو
الخواجه دا مجنون
الخواجه دا حيوقع بتين ،،،
عظمة يكورك ونحن نكورك والجمهور يكورك
الخواجه دا مجنون
ونحن قربنا نجن بسبب العقد ....
دا كان يوم عظمه الممكن يكون يوم كل مريخابي امس
غارزيتو اقنع كل المريخاب انه انسب شخص لقيادة المريخ ....
...........................................................................
كانت تغريدتنا في شكل ونسه عشان الفرحه كانت عفويه وملموسه في المدرج المريخي
الكل شاهد المباراة والكل شاف الابداع والامتاع من اللاعبين
والكل شاف الاقناع من مدرب بدرجه خبير
ماحبيت اكتب عن احداث المباراة او اكتب تحليل فني لست بمدرب او بالاصح لا اقدر ان انتقد او احلل في حضره الخواجه (غرزه)
بس ماشاهده الجمهور وشاهدته انا كفيل ان نمنح الخبير غارزيتو
الدرجه الكامله في الطب النفسي والتدريبي والتكتيكي
يجب ان يتحقق حلم عظمه
وحلم كل المريخاب
بالتوقيع مع هذا ( العراب) ثعلب البطولات الافريقية لمدة لاتقل عن ثلاثه اعوام
ان ارادت الادارة ان تشاهد المدرجات بنفس الكثافة الجماهيريه والمريخ بنفس المتعة الكروية
وان ارادت الادارة ان يستمع الجمهور بالفريق ويلتفت الي المدرجات وان تتفرغ الادارة لملفاتها العالقه
ان يوقع مع الخواجه العجوز غارزيتو ....
حتى يتفرغ كل مريخي لاداء واجبه في كوكب المريخ
.................................................................
هاشتاقات اليوم
# شكرا_ غارزيتو
# الجمهور_يطالب _بغارزيتو لمدة 4 اعوام
# شكرا_حماه المريخ_والدينكوردات
#شكرا _جماهير _المريخ
#شكرا_روابط_المريخ_والالتراس
#التكت_الشفت_من طينه الكبار
#شكرا _لاعبي _المريخ
#كونلي _صمام _الامان
ايها المريخاب
(استنشقوا هواء المريخ وحب المريخ فهو الهواء النقي في هذا الزمان .......)
استعدوا للمعركة القادمة (مين اللي بعدو)......

للتواصل:
‏‎ واتس اب/ ٠٠٩٦٦٥٤٧١٤٤٥١٣
‏‎تويتر abumoshtaha@
‏‎‏abumoshtaha77@gmail.com
‏===========================‎
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019