• ×
السبت 31 يوليو 2021 | 07-30-2021
بابكر سلك

اول خطوة واول دخلة

بابكر سلك

 0  0  1194
بابكر سلك





* غدا نعلن من قلعة الجويات تأهلنا لمرحلة قادمة ان شاء الله
* وعلي الجماهير تقع واجبات كبيرة
* نريد ان نعد لهم ما استطعنا من قوة جماهيرية وابداعية نرهبهم بها ونعرفهم علي مقدارنا
* نريد ان نطمئن غرزه بان ماحدث علي المدرجات في 2015 ما كان وليد صدفه
* ولكنه كان عملا جماهيريا ابداعيا سهر له الرجال ودعموه بدمائهم
* ونريد ان نقول للاعبين وراكم رجال يسدوا عين الشمس
* دايرين خمسين الف شفت ما ينقصوا (شا )
* دايرين نتنافس علي الابداع في التشجيع والامتاع والاستمتاع
* جميع الفئات الجماهيرية بمختلف مسمياتها دايرنها حضورا انيقا وملفتا ومؤثرا
* الاولتراسات مابتصوا
* ولكني اذيعكم سر الحاحي علي اولتراس جوارح (اول اولتراس في السودان )
* حيث امتعونا في ذلك الموسم بدخلات مدهشة شكلت مع بقية اللوحات التشجيعية سر تفرد الزعيم
* طلبت منهم اعداد دخلة بنفس درجة الادهاش التي عودونا عليها في دخلاتهم
* لتكون اول دخلة مع اول خطوة في طريق البطولات
* ايها الناس
* الارض ارضنا والجمهور حقنا والنتيجة عرضنا
* يبقي لانركن لنتيجة الذهاب اطلاقا
* ندخلها معركة في اتجاه واحد فقط وهو النصر
* نقدس فيها معشوقنا
* ونحب فيها بعضنا البعض في صوفية سمحة
* فالصوفي يعشق ولا يعرف الانا ولا يجري خلف المناصب
* يبقي كلنا من عصرا بدري
* كل القوة يا ناس القيادة العامة القلعة جوة
* وجميع الروابط وتجمعها واخص منها ناس الحولية اولاد كرري
* ساس الاساس مابتتوصي
* واولمبيوس ورا مؤمن
* اسود وتيرنيدو في المواقع الامامية
* اقصد تورنيدو
* وشفوت الاستاد ويسع الجميع مايفضل زول
* انه يومنا
* علي الاقل ندعم مجلسنا بدخل ملياري
* ونحطم رقم الدخل القياسي المسجل باسمنا
* فمن غيرنا ملأ طابقين وحوش الاستاد
* المهم
* في السوق البيض البلدي (جني الجداد ) بتباع بطريقة ملفته وعلمية و مستمرة قريب مية سنة
* تلقي بائع البيض خاتي كورة او قرعة فيها موية
* تجي تشتري يخت ليك بيضه بيضه في الموية
* البتحتل سمحة
* بمرقها يديك ليها
* والبتطفح كعبة
* لانو الجداد البلدي ببيض طبيعي
* وعند التكاثر بكون قاصد تكوين اسرة
* الجدادات الفترن من البيض بحضنن
* اها الحضانة دي ياها البتخسر البيض
* مازي الجداد الاوتوماتيك ده
* يبيض بالوردر وبدون ديك
* ديك يسألها ساي بيضتي من وين مافي
* كلو جداده تبيض زي ماعاوزه في اي حتة
* وما ساءله في زول
* لادايرة اسرة ولا دايرة يحزنون
* دايرة تعيش وتتجدع في المزارع اكلها يجيها في الاكالات في محلها
* المهم
* سيد البيض البلدي بطلع البيض البحتل ويديك ليهو ويخلي المطفح في طفيحو
* الحكاية دي ذكرتني لافاني مدرب الهلال
* الزول ده اظنو تاجر بيض
* بطلع نجم المباراة وبخلي باقي البيض مطفح في ميدانو
* وكابي البيض كلو
* كيسو فضي
* المهم
* علي صفحات دار البلال وجدت اشادة من مهندس ضليع بكردنة كرجل بر وبالدكتوراه الفخرية التي منحتها جامعة الاحفاد للبنات للسيد اشرف الكاردينال
* واحب اذكرك يا باشمهندس انو القاعة البناها كردنة في جامعة الاحفاد وقعت بردلوب في واطات الله دي قبل مايجف الحبر الذي كتبت به شهادة الدكتوراه الممنوحة لكردنة رجل البر و الاحسان في الشمال والجنوب
* عليك الله يا باشمهندس،ويا بركة يا اخوي
* كان ماقوموها تاني كلمو رجل البر قولوا ليهو طينك وقع والله ستر علي بناتنا
* ايها الناس
* ان تنصروا الله ينصركم
* اها
* نجي لي شمارات والي الخرتوم
* شفنا صور حمام المدرسة الوقع بي ست رقية يا والينا
* سيخه وااااحدة جوه الصبة ما ظهرت لينا
* الخوف يكون الجقور الاكلوا الكبري اكلن السيخ من جوه الصبة يا والينا
* وتبقي الصبة بعد الاكلة هشة وتقوم ترمينا
سلك كهربا
ننساك كيف و الكلب قال سقوط ست رقية سقوط لقيم نبيلة كتيرة وسقوط لمعاني جميلة وقعد ينقنق سقوط جامعة وسقوط معلمة في حمام مدرسة . وهتف تسقط تسقط الأمطار وقام جاري،
والي لقاء
سلك
امسح للحصول على الرابط
بواسطة : بابكر سلك
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019