جمعة مباركة للجميع وربنا يتقبل منا ومنكم صالح الاعمال
تعالوا كل واحد فينا يجرب يعيش اجواء المدرجات مع نفسو لدقائق بسيطة كده واتخيل انو المريخ متقدم نتيجه واداء مع الخبير (غرزه) بالله احساسك شنو!!
وتعالوا مع بعض نسترجع شريط معارك بطولة افريقيا (2015 )
معركة معركة وحريق حريق وتلك الروعة في المدرجات ،،،
شعورك شنو بالله عليك والشريط يمر امام عيونك !!
اتخيل انو الملاحم المرت دي كلها لم تشارك في اي ملحمة منهم وكنت من مشجعي الخارج،،
بالله في الم وعزاب اكثر من كده،،،
لو نسيت كل تلك الملاحم وصعب تنساها اكتب في اليوتيوب المريخ وعزام او المريخ وسطيف وشاهد لقطات من تلك المباريات ونشط ذاكرتك حبه وشاهد جمال الجمهور وروعة المريخ في الميداان ....
شوف المتعة كانت كيف وشكل المدرجات وملامحها كانت كيف ،،
صدقني حتشعر لحظتها انك في عالم تاني وكل زول يقول ليك زح انا بشيل المريخ مكانك الزمن داك يجيك احساس انو كل واحد عندو الرغبة يقدم روحو للزعيم !! احساس عجيب والناس كانت تنتظر المباريات الافريقية لتشكيل الملاحم في المدرجات عايزين يقدموا اي حاجة عشان رفعة الزعيم وتفوق محبوبهم.. وقتها تشعر نفسك صغير وسط هؤلاء العمالقة من شفوت المدرجات..
ايام الملاحم السابقة في ناس خلت شغلها لايام عشان معركة شطيف سطيف واعدام عزام !! كانت كل رغبتنا ننتهي من مهمه عشان نشوف مين الضحية القادمة ونحن مستمتعين وفرحانين ولاخوف في داخل اي مريخي وقتها
مريخ جميل يسر الناظرين نتيجة واداء
السخانة الكانت طالعة من المدرجات من كثرة الجمهور والانفاس الحارة تشعل حماس اللاعبين في الميدان من شدة حرارتها . معارك (2015 ) تدرس في إدارة الحشود ودروس في البذل والعطاء ودروس في الرأي والرأي الاخر الكل متقبل رأي الفرد والفرد متقبل رأي الكل والجميع كان كل همه وحلمه ان يشاهد المريخ من المدرجات ويكون من ابطال تلك المعارك الافريقية هل من عودة تاني لتلك البطولات والملاحم ونرسم مريخ (2017) مع الثعلب الافريقي والخبير غارزيتو !!
كانت بداية ملاحمنا في عام (2015) من عزام ولي قدام
عايزين معاركنا هذا العام من معركة سوني وانت طالع
معركة خلف ملحمة معارك افريقية وملاحم عربية ومتعة محلية
الحضور الضعيف في المدرجات لايشبه شفوت المدرجات ولايشبه اسم المريخ
استادنا طابقين عايزين بحضورنا نظهر الاستاد في كامل العدد ونسمع انو الاستاد لايوجد به مكان (شاااااغر )...
من باكر سنعيد للمدرجات سيرتها الاولى وبعد المباراة عايزين نرسل رساله الي غارزيتو انو المدرج هو اللاعب رقم واااحد في تشكيلتك يعني يكتب الجمهور قبل جمال سالم في ( التيم شت)
ملعب استاد المريخ ينادينا من اجل نادينا فهل نلبي النداء ......
**************************
شكرا لكل الشفوت وشكرا لكل مريخي في اي مكان في الارض انتم من يصنع الفرح انتم أساتذة المدرجات سنواصل ملاحمنا الافريقية منذ الغد كل الصفوه القلعة جوه **************************
لو سالوني امنيتك شنو اقول عايز يكون كل يوم مباراة وتمرين عشان الجمهور المريخي مايمشي من المدرج ويستمتع ويبادل الاعبين حب هذا الكيان ،،، هل تعلم انو في شفوت مريخاب معرفتهم كانت في المدرج تشوفهم اسه تقول مولودين في بيت واحد الناس دي شربت روح المريخ شراب
وتوارثت حب شاخور للكيان ام امنيتي التانية اشوف كل لاعبي المريخ بعد المباراة يطوفوا الملعب ويحمسوا المدرجات بقيادة غارزيتو عايز اللاعبين يبادلوا الجماهير الحب والولاء للكيان !!
عشان احساس يكون متبادل بين اللاعب والجمهور المريخي
واسالوني يعدها من اداء اللعيبة والنتيجة كل ماتبادل اللاعبون والجمهور الاحاسيس والمشاعر في حب الكيان كل ماامتلأت المدرجات وزاد العطاء في الميدان ..
**************************
نحتاج فقط خمسين الف اسد منكم في الاستاد .. خمسين الف شفت ولو في ذيادة مابنقول لا .. السبت عطلة مافي اعذار غايتو متعة الاستاد مختلفة ومافي زول بحس بقيمتها الا المغتربين وناس الولايات واي واحد من هؤلاء لو سالتو نفسك في شنو يقول ليك لو الواحد في الخرطوم كان جوه (المعمعه )
مدرجات المريخ حتلبس حلة زاهية بحضور الجمهور خلاف ذلك سيكون شكل المدرجات لايشبه جماهير المريخ ووقتها سيعاني اللاعبون والادارة !!!
منتظرنكم ياأسود ...
كملوا روعة شكل المريخ تعال ومعاك اخوك الشفت السبت مباراة العبور يوم السبت حيحدد شكل مريخ (2017) الفريق الغيني لم يحترم اسم المريخ في غينيا تعالوانعطيهم درس من المدرجات
يرجعوا غينيا ماخدين (سلفي) مع مدرجات المريخ ويعرفون كيف شعب المريخ يعشق فريقه ويدركون انهم تجاوزوا الخطوط الحمراء بعدم احترام المريخ ،،،
حضورك من المدرج يعني استردادك لحقوق المريخ في غينيا وتوصيل رسالة لكل القارة الافريقية انو جمهور المريخ رقم صعب ولايمكن الوصول اليه حالياً....
رسائل اخيرة
هل تعلم يامن تقراء الان في التغريدة ان هناك جنود من المريخ يعملون الان في الاستاد حتى يظهر بحله زاهية تشبه المريخ
هناك من يجلس يوميا في الاستاد ويعمل في الخفاء من اجل المريخ ...
انهم رجال يعشقون المريخ فقط لاهدف لديهم سوى مشاهدة المريخ في السماء ...
المريخ وطن نسكنه لافريق نشجعه ...
مسك الختام
هناك كثير من القضايا في الواقع
لكن معركة السبت هي الاهم عندنا المهم وعندنا الاهم
سنعود لكل الملفات لاحقاً عقب لقاء المريخ باذن الله
عدد من الهاشتاقات اليوم
# عقد _ غارزيتو_ لاربعة اعوام
# قناة _ المريخ _ مطلب جماهيري
# حضورك للمدرجات_ دافع للمريخ
# كن _ اسد_ من _ اسود المدرجات
.................................................................
جزء من التغريدة كان في تغريدة سابقة ومعارك سابقة افريقيا تبدلت الاسماء لكن الاحساس واحد وطن كبير يسمى المريخ تراب وطنا نعشقه وهواء كيان نتنفسه
استنشق واملاء رئتيك بحب المريخ فهو الهواء النقي في هذا الزمان .......
للتواصل:
واتس اب/ ٠٠٩٦٦٥٤٧١٤٤٥١٣
تويتر abumoshtaha@
abumoshtaha77@gmail.com
===========================
