إبن المتمة البار الأستاذ عبدالله الحسن المحامي ( عليه رحمة الله ) كانت لديه مقولة مشهورة عندما يوصي طلاب المتمة بالجامعات وكان يقول لهم ( سووا الحاجة البتشبهكم ) ... و عند الهلالاب الحاجة البتشبه الأقمار هي الجلوس بجدارة على مقعد الصدارة وقد كان ذلك ... رغم أن الهلال تعادل مرتين مع أندية كردفان الشرسة إلا أن الصدارة عادت لمقرها الطبيعي طائعة مختارة عندما إلتقي سيد البلد وبطل الثنائية فريق تريعة البجا ... وأبوالهل قدل وهزم أولاد الجبل وحسم الشوط الأول والمباراة بهدف تيتيه في شباك الحارس عمر رمضان في أول ربع ساعة ، ورجع عمار الدمازين للدفاع مع بوي ولعب أطهر في الطرف اليمين والطاهر الحاج في الطرف اليسار هلال كله طهر وطهارة ودفاعه أطهر وطاهر ... ماذا تتوقعوا من هجوم يسانده نزار وشيبولا باليمين وأوكرا باليسار وفي الهجوم يقف تيتيه ( الله عليه ) وماشاء الله على الأقمار الذين عادوا لسكة الإنتصار والفاتح النقر ملك الخندقة حاول الإعتماد على الهجمات المرتدة ولكن شباك مكسيم محروسة بترسانة أسلحة نووية ، وعندما ينتصر الهلال تتفتح الأزهار ويبتسم الصباح وتطرب عذارى الحي ، ومباراتنا القادمة مع الأهلي شندي بالجوهرة أيضاً ، طبعاً أبوالهل رفع شعاره المحبب ... تمتع بالرحلة ودع القيادة لنا ، أجمل حاجة سجدة الشكر التي أعقبت هدف الفوز ، ولئن شكرتم لأزيدنكم ...ورصيد الهلال 11 نقطة في المركز الأول له 11 هدف وعليه 3 فقط ... نقاطنا قدر أهدافنا الله يستر ناس العين الحمراء وشرارة مايلحسونا !! ياطارق جيب بخور التيمان من بدري ، أما وصيفنا الجديد هو شرطة القضارف برصيد 10 نقاط وللشرطة 7 أهداف وعليه 5 أهداف ووصيف وصيفنا هو هلال كادوقلي وأيضاً رصيده 10 نقاط وله 6 أهداف وعليه 4 وفي المركز الرابع الرابطة كوستي برصيد 10 نقاط أيضاً وله 5 أهداف وعليه 6 والخامس هو الوادي نيالا برصيد 9 نقاط ، أما وصيفنا زمان من المركز التاسع وأمشي لي غادي ، ياربي إتلقي الصفوة الليلة إتعشوا ولاّ ( بايتين القواء ) وياالفاتح النقر الجاتك في نقاطك سامحتك ... وأجمل خبر الهلال بمن حضر .
*** المريخ ( حمامة العرب ) ونغيما في بلدو إنغلب
جميل أن يفوز أي فريق يرفع لواء السودان وبالذات فريق الجيران ووصيفنا زمان الذي فاز على سوني نغيما في تمهيدي الأبطال بهدف كلاتشي ، وكما نعلم أن سوني نغيما شارك في الأبطال 5 مرات آخرها 2017 وفي الأربع مرات السابقة خرج من التمهيدي وتعالوا نشوف التاريخ بقول شنو !! المرة الأولى عام 2010 وخرج من التمهيدي على يد بيترو أتلتكو الأنجولي وكان مهزوم بأرضه 3/2 وخارج أرضه 6/1 والمرة التانية عام 2012 وطار على يد الدولفين النيجيري 3/1 رايح جاي وعام 2013 طار على يد الأشانتي الغاني حيث خسر بأرضه 1/ 0 وخسر بغانا بسباعية وحدات نظيفة وآخر طيران كان عام 2015 حيث خرج على يد فريق مغمور من توجو إسمه سيماس حيث تعادل بأرضه بهدف لكل فريق وخسر خارج أرضه بهدف ، دا ياسادة ياكرام طيب الذكر فريق سوني نغيما الذي فاز عليه المريخ بهدف !! مصاريننا إتقطعت بالضحك ونحن شايفين الإعلام السالب يتغزل في ناس واوا نثراً وشعراً وكمان في واحد من المسادير بيطاعنوا بطل الثنائية ويشكروا في غارزيتو ويقول شطر المسدار الأخير *** غارزيتو الشجاع عنده الخطط مدروسة ... مابفرز هلال لا سوني لا دبروسة ، حتى شعراء الوصيف مشاترين كيف يقارنوا بطل الثنائية بالتمهيداب !! حقيقة البلعب مع أندية التمهيداب (بخربشنو ) ... والمريخ هو ( حمامة العرب ) عشان كدة في البطولة العربية لعب تمهيدي وفي الأفريقية كذلك ، هسه نحن لو العرب قالوا لينا تلعبوا مع إتصالات جيبوتي وتفرغ زينة نقول ليهم ( آسفين تاريخنا ما بسمح لينا بي كدة ) وكمان ممكن نفتح في الإتحاد العربي بلاغ إشانة سمعة !! عشان كدة الشعب السوداني وجماهير الرياضية العربية فقدت سيد البلد الذي أدخل على البلد أول كأس أفريقية كأس السلام من كنشاسا سبتمبر 1966 كما أدخل للوطن آخر كأس عربية كأس أبوظبي الجوية فبراير 2010 وهو الفريق السوداني الوحيد الذي وصل نهائي أبطال أفريقيا مرتين ولعب أمام فرق عربية هي الأهلي القاهري والوداد المغربي ولله در القائل
*** سيذكرني قومي إذا جد جدهم ... وفي الليلة الظلماء يفتقد البدر
*** ونحن أناس لا توسط بيننا ... لنا الصدر دون العالمين أو القبر
*** تهون علينا في المعالي نفوسنا ... ومن خطب الحسناء لم يغلها المهر
*** أعز بني الدنيا وأعلى ذوي العلا ... وأكرم من فوق التراب ولا فخر
غايتو الزول البشوف فرح الإعلام السالب يحلف يقول الناس ديل غلبوا مازيمبي ، وكما يعلم الجميع أن مازيمبي عندما فاز على الهلال بخماسية مقابل هدفين دفع التمن في لوممباشي !! ( الخماسية الجيران نالوها من التبلدية ومقابل هدف كمان !! وجنس طولة لسان !! ) بالمناسبة من عام 2009 مافي فريق هزم مازيمبي بهدف في لوممباشي إلا هلال الساجدين والناس الصالحين هزمه بهدفين!! لذا لزم التنويه .
*** بطل الثنائية والتعامل بإحترافية
قبل كل شئ نشكر رئيس الهلال الأخ أشرف الكاردينال الذي سدد لعجوز فرنسا وإيطاليا غارزيتو حوالي مائة ألف دولار من أيام البرير ، وإعلام المريخ كان ينتظر خصم النقاط من الهلال عشان الجيران تعودوا على كأسات المكاتب ( وتكفين الميتة ) لقد تعامل الهلال بإحترافية وهو يتجنب الصدام مع حكومة الفيفا التي سبق لها أن عاقبت دول وليس أندية ، والحمد لله كل رؤساء الهلال ( مرطبين ) ورغم ذلك متواضعين بداية من الطيب عبدالله وقاهر الظلام والمدهش والحكيم والأرباب مروراً بالبرير وختاماً بالكاردينال ، ماشاء روقة وإعفاء من التمهيدي !! إن شاء الله حال السرور !! كما تعامل الهلال بإحترافية أيضاً وهو يرسل الوزير طارق لمتابعة مباراة توسكر الكيني وبورت لويس بطل موريشيوص لأن الصاعد منهما سوف يلعب ضد سيد البلد ، نحن الحمد لله التمهيداب ديل مابننزل لي مستواهم لو هم عاوزننا يرتفعوا لينا ويرتقوا بمستواهم والناس مقامات ومستويات ، وتشتهر موريشيوص بإنتاج السكر والشاي وغينيا بلد سوني نغيما تشتهر بالكاكاو والبن ( أريتو كان واوا إحترف هناك إن شاء الله جرسون في القهاوي ) ... مازال الرسوب ملازماً للإتحاد في موضوع الرعاية وبث المباريات وليت الجماهير الرياضية ترفض التلفزة بعد مضي 6 أسابيع عشان إتحاد السفرية مايلقي حق التذاكر إلا ( بالجرورة ) من وكالة أسامة عطا المنان . هووووي ياحناكيش الواتس أوعكم تسألوني من كلمة جرورة !! أمشوا لي جيفارا في الدمام أو سيف خواجة في الدوحة أو عزالدين أبراهيم في الرياض أو بابكر عوض الشيخ في المدينة عشان فيصل الأقرع عملنا ليه إعفاء زي إعفاء الهلال من التمهيدي .
*** همسة الوداع
حبايبنا الحلوين كانوا فرحانين بغرامة الفيفا ضد الهلال ونسوا شكوي وارغو ضد المريخ ووراغو يشبه ( عفريتة الزيت ) عايز من المريخ حوالي نص مليون دولار !! وقطر الوالي إتسلف حق الفندق في غينيا من لاجئ سوري إسمه عماد وأخوه مقيم في بورتسوان !! أف لكم ( يخسئ عليكم !! ) ضميركم سمح لكم كيف !! وبهذه المناسبة نهمس في أذن الإعلام الأحمر أها مبلغ وارغو ده بتسددوا كيف !! زمان دللتوا كراسي أستادكم !! هسه بتدللوا قفة غارزيتو ولاّ شنو ؟ مجرد سؤال .
الظاهر عليك كدة قابض كويس
والله تيمك ده حمام ميت
سيذكرني قومي إذا جد جدهم ... وفي الليلة الظلماء يفتقد البدر
*** ونحن أناس لا توسط بيننا ... لنا الصدر دون العالمين أو القبر
ياخى ان شاء الله اتحاد السجم العام يجروهم للكلاب لانهم جرجرونا فى حدوته اسمها البث حتى الاسبوع السادس لانهم يسيرون بلا تخطيط طول عمرهم ومعاها كنكشة فى الكراسى زى حبايبنا خلو الشعب يجر بربع الرطل للسكر وربع الكيلو ل اللحم فى بلد فيها مصانع السكر والثروة الحيوانية تغطى مساحة السودان واحسن تخلينا فى كورتنا وهلالنا يا الجعلى الكلام بجيب الهواء --
ودمتم للوطن والهلال فى حفظ الرحمن ورعايته
..............................................
ودى غلبتني ....( عفريتة الزيت ).
............................................
وبتاعت الحناكيش ما بسألك منها فيصل الاقرع ممكن يرسلها لى بالواتس اب
الليلة مقالك كسرة بملاح ملوخية وملاح قرع ملخبطات مع بعض
وبهذه المناسبة انت لما كتبت المقال ده كنت شارب شاى بلبن ؟
مجرد سؤال ...
فعلا الا يدللو قفة غارزيتو القالو فيها ثعبان هههه
تحياتي ليك يا جعلي ومبروك الصدارة بـ 11 نقطة و11 هدف والأجمل أن محرز الهدف الاخير هو صاحب الرقم 11، وفي انتظار الرقم 14 امام الشنداوية .
سيذكرني قومي إذا جد جدهم ... وفي الليلة الظلماء يفتقد البدر
*** ونحن أناس لا توسط بيننا ... لنا الصدر دون العالمين أو القبر
ياخى ان شاء الله اتحاد السجم العام يجروهم للكلاب لانهم جرجرونا فى حدوته اسمها البث حتى الاسبوع السادس لانهم يسيرون بلا تخطيط طول عمرهم ومعاها كنكشة فى الكراسى زى حبايبنا خلو الشعب يجر بربع الرطل للسكر وربع الكيلو ل اللحم فى بلد فيها مصانع السكر والثروة الحيوانية تغطى مساحة السودان واحسن تخلينا فى كورتنا وهلالنا يا الجعلى الكلام بجيب الهواء --
ودمتم للوطن والهلال فى حفظ الرحمن ورعايته
واخونا البشري انا وانت مشجعين ومعروفه ميولنا كلامك المفروض يكون للصحفي البكتب يكون محايد
وطبعاً غرزنة لو ما شاف الاخضر الليمونى ما بوقع ليه عقد كمان عاوزنو
يوقع ليكم بالجرورة .الحمدلله نحنا خلصنا ودفعنا العلينا وموتو بغيظكم
اما انتم الله يكون فى عونكم من الفيفا ومن مقدم عقد غرزنه.رايكم شنو
مش مزمز عضوء فى بص الوالى طيب ما يرهن صحيفته البايره وتسددوا بيها
ديونكم مش زمان كان بيقول الكاش بقلل النقاش .ودارت الايام !!!!