• ×
السبت 25 سبتمبر 2021 | 09-23-2021
محمد عثمان الجعلي

الهلالاب غالبين أربعة والمريخاب مغلوبين الأربعة

محمد عثمان الجعلي

 16  0  3137
محمد عثمان الجعلي

كل جماهير الرياضة في أرض النيلين كانت تترقب بداية حصد النقاط خاصة جماهير القمة حتى يحكموا على نجاح المعسكرات الخارجية والتى أصبحت تمثل للبعض ( معسرات خارجية ) خاصة الأندية التى حصدت نقاط الخيبة ( من قولة تيت ) وليالي العيد تبين من عاصريها ( والفيهو بخور بنشم ) كما يقول مثلنا السوداني ، ولعب بطل الثنائية أمام مريخ كوستي بالجوهرة الزرقاء وتوجست الأقمار خيفة على مستوى فريقها في بداية إنطلاقة المشوار ، الكل ينتظر الخيل الأصيلة التي سوف تظهر في اللفة ، فهل هي زرقاء اليمامة واليمين أم صفراء تسر الناظرين ، وبلغت الجرأة بهلال الإحترافية أن يضع كابتن الفريق الخلوق كاريكا على دكة البدلاء ويمنح الكابتنية للشاب أطهر وتقبل الكابتن القرار برحابة صدر لأن هدف الجميع أن يفوز هلال العشق الجميل ويضع أول 3 نقاط في البنك الوطني ، وكانت النتيجة بحمد الله وتوفيقه فوز وفنجرة ، رباعية مقابل هدف... بداية بالفعل مبشرة ( وبدينا إن شاء الله ملينا ) والكؤوس تحب الديار الزرقاء ولذلك تمشي عليها وكما يقول المثل المصري ( الرجل تدب مطرح ماتحب ) ، إنتهى الشوط الأول بثنائية نظيفة أحرزها تيتيه وجابسون في شباك الحارس صداح شيخ الدين ، وإنطلق الشوط الثاني وأضاف جابسون الهدف الثالث وكان يمكن للمباراة أن تنتهي بهذه النتيجة ولكن مريخ الفاشر تمكن إحراز هدف لتقليص الفارق ، وإحنا عندنا غزو شباك مكسيم جريمة يعاقب عليها القانون في الدستور الأزرق ، وجاء الرد حاسماً من مهاجم الفريق تيتيه الذي أحرز الهدف الرابع ، ماشاء الله وتبارك الله رباعية وكل لاعب جاب هدفين ، يلا ياطارق جيب لينا بخور التيمان واللبان الضكر خوفاً من العين الحمراء وشرارة عشان الأيام ديل حايمة أكتر من ( سمسم القضارف ) بينما الهلالاب فازوا بالأربعة كل الفرق التي تحمل إسم المريخ وهي أربعة فرق قد خسرت مباراة الإفتتاح ( بسحروكم !! ) يافاروق جبرة أعمل لى اللعيبة بخور بى ( شطة قبانيت ) ، حيث خسر مريخ نيالا بثنائية من الوافد الجديد تريعة البجا وخسر مريخ الفاشر بهدف من أهلي مدني وخسر مريخ كوستي برباعية مقابل هدف من بطل الثنائية أما المريخ ( الزعيم ) فقد خسر بهدف من شرطة القضارف ( شفع سنة أولى ) على ملعب كسلا الوريفة ، إعلام المريخ رفع سقف طموح الصفوة بالنفخ الكاذب عندما فاز الفريق في معسكر تركيا على الحواتة وجرسونات المطاعم بدستة ونص ، كما زعم إعلام المريخ أن لاعب الفريق جابسون الذي إنتقل للهلال مصاب في الركبة !! بالمناسبة جابسون أثبت أنه بالفعل ( كاسر ركبة في الهلال !! ) لذا لزم التنويه .
*** المريخ من الشرطة ماطلع بي نقطة
كل بطل مسؤول من وصيفه !! وخاصة إذا كان الوصيف من الجيران ، ليه حقين !! حق الوصافة وحق الجيرة ، عشان كدة من يوم هدف الشاب جمعة آدم مهاجم الشرطة القضارف في شباك عصام عبد الرحيم من ساعتها إحنا مأكلين في خاطرنا والدخلت فينا مامرقت ، وماعارفين نودي ( وشنا ) وين من العرب والأفارقة وأندية الدوري الممتاز وحتى من ناس سيكافا ، الوصيف شغال معانا إحراجات بالجملة ، لما إتعادل مع إتصالات جيبوتي قلنا نقبل على الحيطة أما بعد خسارة السمسمية الحيطة ذاتها إتعقدت مننا ، لو الزول بكون بلا وصيف كنا قعدنا بلا وصيف لكن سنة الحياة كدة ، هسه رصيدكم في بنك الدوري صفر من النقاط يعرفوكم كيف بديتوا المشاركة في النشاط !! الأستاذ محمد الفاتح ( كتاحة ) قال ناس شرطة القضارف كلبشوا المريخ ، الناس ديل كلبشوهم في شنو ياكتاحة !! مجارمة ولا ناس تهريب !! تيتيه قال بيئة الهلال بيئة صالحة للإبداع وأثبت ذلك جابسون عندما أحرز هدفين في أول مشاركة رسمية له مع الهلال أما نجوم المريخ الذين تألقوا مع فرقهم السابقة لم يظهروا بمستوى طيب مع المريخ خاصة عاطف خالد والسماني الصاوي ومحمد عبدالرحمن وغيرهم ، مما يدل على أن بيئة المريخ ( مقبرة مواهب ) بينما بيئة الهلال مفرخة مواهب ، معقول زول يكون بجواره واوا وعلي جعفر والنعسان وبخيت خميس والتكت ( داير يكسب عافية !! ) فلابد لهؤلاء النجوم الجدد أن ينطفئ لهيبهم مع الكسالى ناس واوا ولله در القائل *** لاتصحب الكسلان في حاجاته ...كم صالح بفساد آخر يفسد
*** عدوى البليد إلى الجليد سريعة *** والجمر يوضع في الرماد فيخمد ،
وين عنكبة وين كلاتشي ووين بقية هجوم المريخ إنتوا عبده جابر في ولاّ أعاروه .
*** رسائل غنائية رياضية من الفنان التاج مكي
نريد 3 رسائل غنائية رياضية من أغنية ( حبيت عشانك كسلا ) كلمات الشاعر الرقيق إسحاق الحلنقي وغناء الفنان التاج مكي والرسالة الأولى من مجلس إدارة المريخ وهو يعاتب جمهور كسلا على مساندته للشرطة القضارف الذي يلبس أزرق رغم أن المريخ حضر من الخرطوم ليلعب في أرض التاكا ورغم ذلك تنكروا له وتقول الرسالة *** حبيت عشانك كسلا وخليت دياري عشانك ... وعشقت أرض التاكا الشاربة من ريحانك ...ظلم الزمان الخاني ...ياريتو لو كان خانك ... يا الجرت وإتنكرت لي الساب ديارو عشانك ، والرسالة التانية من الحارس عبدالله أبوعشرين الذي تألق في مباراة الشرطة أمام المريخ وحافظ على نظافة شباك فريقه رغم أن المريخ هو الذي أرسله لفريق شرطة القضارف وأبوعشرين قرر عدم العودة لصفوف المريخ حتى لو جلس بدون فريق يلعب في صفوفه وتقول رسالة عتاب أبوعشرين للمريخ *** كلمني بس قول لي فاكر ليالي القاش ...لما الحنين عاودني لي عطفك الجياش ...جافيت حبيب ماخانك من نور بسيمتك عاش ... أنا تاني مابتلقاني يوم في طريقك ماش ... قاصد مكان في كسلا ،والرسالة الأخيرة من هلال الساجدين والناس الصالحين الذي كان يعشم بأن يصل معه المريخ مراحل متقدمة في الأبطال ولكن بعد هزيمة الشرطة وتعادل جيبوتي قرر الهلال أن يسير وحيداً في طريق الأبطال لأن المريخ الراهن مامرفق لي قدام وتقول الرسالة *** صوت السواقي الحاني ذكرني ماضي بعيد ... وعلى الرمال آثارك طرتني ليلة العيد ...آلمني قلبك ينسى يرخص غلاوة الريد ...باقي الطريق بمشيهو خليني فيهو وحيد ... الحب عذاب في كسلا .
*** همسة الوداع
حبايبنا الحلوين ماخلوا هاي تم مدة التأشيرة 6 شهور فكوه عكس الهواء ، أنا خوفي غارزيتو قبل مايصل ولده الميكانيكي يلحقوه ( قسيمتو في الفندق ) والغريبة ياخلف الله ود العقيدة المرة دي غارزيتو جاكم شايل قفة وغلبوكم بهدف في كسلا يعني كان جاء شايل شوال ( كان أم الحسين إنّفخت ) ، وبمناسبة القفة بتاعة غارزيتو دي ياهاشم ود الفنان نهمس في أذن الإعلام الأحمر إنتوا مسئولين من الخيرالشايل قفة الحلبية دا مدرب ولاّ دلالية ؟ مجرد سؤال .
امسح للحصول على الرابط
بواسطة : محمد عثمان الجعلي
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    ْعبّدِالُلُُه بّلُلُ الُقًرَيَاتْيَ 01-30-2017 06:0
    يا ناس صحيفة كفر ووتر لناس بتنشرو تعليقاتهم وناس. بتحزفوا تعليقاتهم ليه
  • #2
    ابن الوهاج 01-29-2017 09:0
    يا سلام شاعرنا القدير ود الفنان .. الجعلي العجيب قايل فريقو أمان .. اب صفرا" كبير مرت علي الأزمان .. ان غلب الصغير تلقاه سل لسان .. و ان غلبو الكبير دقة حكم و بمبان.. الحيمودي داك بالقاضية دقوا عيان .. و كل حكامنا خافوا يبقى الضرب جبخان..
  • #3
    ودعقيده خلف 01-29-2017 09:0
    استاذ محمد الفاتح ( كتاحه والتفاحه ) عودا حميدا للتعليقات المصوره وخاصه قفه الملعون الشوم عرزه
  • #4
    ْعبّدِالُلُُه بّلُلُ الُقًرَيَاتْيَ 01-29-2017 08:0
    الجعلي علي الطلاق البشوووووف كلامك يقول ان هليلك خالي من الصفر الدولي حبيبنا لا يغرك فوزك علي اولاد الكوستي الغلابه كدا النشوفك اليوم انتم لاعبين اما اخونا ابو ناصر لك التحيه ياخوي اطمئن من السحر نحن لما نسحر انتم خارج الشبكه ويالجعلي غارزيتو مقابلوا بالورود الحمراء وليس بالقسيمة كما ادعيته انت لكن والله ياجعلينا ماتتقدموا لقدام والقريق قدامك اليوم شايف الهليلاب فرحانين لاتفرحو كثير يا ابو حسين . وكتاحة. وعمنا الامين السماني ود الفنان ومنعم
  • #5
    ْعبّدِالُلُُه بّلُلُ الُقًرَيَاتْيَ 01-29-2017 08:0
    الجعلي علي الطلاق البشوووووف كلامك يقول ان هليلك خالي من الصفر الدولي حبيبنا لا يغرك فوزك علي اولاد الكوستي الغلابه كدا النشوفك اليوم انتم لاعبين اما اخونا ابو ناصر لك التحيه ياخوي اطمئن من السحر نحن لما نسحر انتم خارج الشبكه ويالجعلي غارزيتو مقابلوا بالورود الحمراء وليس بالقسيمة كما ادعيته انت لكن والله ياجعلينا ماتتقدموا لقدام والقريق قدامك اليوم شايف الهليلاب فرحانين لاتفرحو كثير يا ابو حسين . وكتاحة. وعمنا الامين السماني ود الفنان ومنعم
  • #6
    عزالدين ابراهيم عبدالرحمن 01-28-2017 10:0
    هووووووووو ي يا الجعلي حزرناك لكن جبرة فرط خلاك تمد لسانك علينا وزمان اهلنا قالو الخيل الاصيله تظهر في اللفه الاخيره ونحن بخورنا ماهو حق حلب ساكت بخور اوربي الرطوبه بس عاصره ريحتو ومن هتا ولي قدام عينك ما تشوف الا النور كؤس شنو البتحبكم انتو بحبوكم اصحاب اللياقات السوداء وقفه غرزة انت عارف فيها شنو محافير برضو اوربيه حالف قال بعد ما اخدت حقي من كردنه فطومه دي يا اعرسه ويا ادفنكم معاها في مقيرتكم وحالف بالطلاق الخواجه السنه دي كاس برنجي ماتشيلو وهو قاعد في السودان اها شوفولكم فريقا تاني تشجعوه احسن ليكم انا بشوف الشرطه القضارف لانها حا تكون الوحيده الهزمت الزعيم.....
  • #7
    ودعقيده خلف 01-28-2017 08:0
    استاذ الجعلي لك التحيه دوما بس بقولها ليك عليه الطلاق يا صفرابي هللالك بدون الزعيم ما يتقدم في الابطال شبر لاتفرح وتخبط في العشوائيه ياهو الزعيم الكورتو مشرفه افريقيا وباقي الكور راقده فطيسه
  • #8
    الامين عبدالقادر 01-28-2017 08:0
    التحية والسلام اخوى الجعلى نبارك لكم ولكل الاهلة هذه البداية المبشرة والانتصار العريض وانت عارف اللون قاعد يعمل حساسية تهديفية رهيبة لشباب اسياد البلد --
    الكوتش محمد الطيب كان ينتظر هاى وأتى له غارزيتو وله حسابات كثيرة معه وكسب الرهان رغم التصريحات النارية التى اطلقها واسكت بها الاعلام الاحمر ---
    يبحث اسياد البلد الاعداد القوى والجاد من خلال الممتاز لمعارك أدغال افريقيا لاننا لن نقابل مثل اتصالات الجيبوتى القابع فى قاع التمهيدى العربى والافريقى ---
    نجمك الظاهرة اصبح جوكر دفاع ولعب فى الطرف اليسار وابعد ملك الخانة هل يصدق يا كتاحة ذلك ؟؟؟
    ودمتم للوطن والهلال فى حفظ الرحمن ورعايته
  • #9
    ود الفنان 01-28-2017 07:0
    كم انت كبير يا زعيم .نهواك في كل الظروف وهاك الابيات دي يا ابو جعل :-
    شايف التيوس الليله قالت قول
    تتحدث في الزعيم ياخ بس معقول
    ناسين الصفر الحرن نهائي يزول
    وكم الفضائح المن زمن جقدول
    الخبر الاكيد الفي القضارف كان
    بس كبوه جواد لي فارس الاوطان
    الصفر الكبير يكبر مع الازمان
    والاحمر دوام هو مشرف السودان
    انهو المريخ والزعيم وسيد البلد نهواك غالب ونهواك مغلوب ما انت ريديك فينا باقي
    المريخ عشقي الابدي
  • #10
    الامين عبدالقادر 01-28-2017 06:0
    التحية والسلام اخوى الجعلى نبارك لكم ولكل الاهلة هذه البداية المبشرة والانتصار العريض وانت عارف اللون قاعد يعمل حساسية تهديفية رهيبة لشباب اسياد البلد --
    الكوتش محمد الطيب كان ينتظر هاى وأتى له غارزيتو وله حسابات كثيرة معه وكسب الرهان رغم التصريحات النارية التى اطلقها واسكت بها الاعلام الاحمر ---
    يبحث اسياد البلد الاعداد القوى والجاد من خلال الممتاز لمعارك أدغال افريقيا لاننا لن نقابل مثل اتصالات الجيبوتى القابع فى قاع التمهيدى العربى والافريقى ---
    نجمك الظاهرة اصبح جوكر دفاع ولعب فى الطرف اليسار وابعد ملك الخانة هل يصدق يا كتاحة ذلك ؟؟؟
    ودمتم للوطن والهلال فى حفظ الرحمن ورعايته
  • #11
    منعم ابوناصر 01-28-2017 05:0
    ياود الاقرع شرحك للقليبه يدل على مواكبتك لكبارنا اهل الرأى والفهم واهل الميز يعنى فهمنا ان اللقليبه عباره عن دبل قفه مليانه تراب طيب هل ممكن تكون مليانه من سمسم القضارف ولا الشرطه لاتسمح مجردسؤال
  • #12
    منعم ابوناصر 01-28-2017 05:0
    الحمدلله انك البمره دى لم تتغزل فى النجوم عشان فعلا عين نلس العارف عزو ودالعقيده ودبلل وابن الوهاج حايمه تدور للاقمار لكن نحن حارسنك انت عشان ماتذكر ذالك وشفت كيف تنبيهنا ليك اتى بفائده كبيره لوماكده كنا نعصر سمسم القضارف (((حلوه الرجل تدب مطرح ماتحب)))بعدينى احلى حاجه فى الرسائل رسالة ابوعشرين(000 ياجعلى اخونا عزو والعارف عزو مستريح لاحس ولاخبر اصلا هو ممسوك فى القضارف ولاشنو مجردسؤال
  • #13
    الامين عبدالقادر 01-28-2017 05:0
    التحية والسلام اخوى الجعلى نبارك لكم ولكل الاهلة هذه البداية المبشرة والانتصار العريض وانت عارف اللون قاعد يعمل حساسية تهديفية رهيبة لشباب اسياد البلد --
    الكوتش محمد الطيب كان ينتظر هاى وأتى له غارزيتو وله حسابات كثيرة معه وكسب الرهان رغم التصريحات النارية التى اطلقها واسكت بها الاعلام الاحمر ---
    يبحث اسياد البلد الاعداد القوى والجاد من خلال الممتاز لمعارك أدغال افريقيا لاننا لن نقابل مثل اتصالات الجيبوتى القابع فى قاع التمهيدى العربى والافريقى ---
    نجمك الظاهرة اصبح جوكر دفاع ولعب فى الطرف اليسار وابعد ملك الخانة هل يصدق يا كتاحة ذلك ؟؟؟
    ودمتم للوطن والهلال فى حفظ الرحمن ورعايته
  • #15
    ابوحسن 01-28-2017 02:0
    لك التحية استاذنا محمد عثمان والله ناس الصفوة وقعوا في شر اعمالهم بزات الاعلام السالب بتاعم خلي لهم الفصاحة وطول اللسان
    دخلوا اللاعبين في غرور وكبرياء ومعسكرات وصرف اموال طائلة بدون فائدة هههههههه شكلوا شقول نصب وسمسرة مصالح
  • #16
    ابن الوهاج 01-28-2017 02:0
    الجعلي صحفي صاحب الصفر الكبير..لا يغرنك انتصارك على ابننا الصغير... ود كوستي جاء منهزماً قبل الصفير..خذ
    ها مني يا جعلي الهنا لو ما بقت ريحتكم طير طير. .. في مدربين قدام هو لعيبة عندهم تار من زمن البرير...في تريعة البجاابو النقريتمترس و يلدغكم العصير...و في التيلدي هناك ولدنا بكرمكم بي خمسة خبير...و في دار جعل مساوي ناوي وأب احمد الخطير.. اما في الوهاج غارزيتو عارف شوارعكم و جهز التبرير..
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019