• ×
الأحد 11 أبريل 2021 | 04-10-2021
حسن عبدالرحيم

شفتا كيف حبك بيعمل

حسن عبدالرحيم

 0  0  6532
حسن عبدالرحيم


=الاشاعه يؤلفها الحاقد وينشرها الاحمق ويصدقها الغبي
=ان مروج الشائعه لئيم الطبع دني الهمه مريض النفس منحرف التفكير عديم المروءه فتان فتاك متلون كالحرباء وينفث سمومه كالحيه الرقطاء سلوكه الشر والهمز وعادته الخبث والغمز
=بتنا نعيش علي الشائعات ونقعد نحلل فيها ونتناقش ونتغالط ونصل لمرحله حد الاشتباك لتاكيد او نفي هذة الشائعه
=فقد بتنا نعيش في وهم كبير وبتنا لانفرق بين الصاح والغلط ومن هو المخطئ ومن هو المصيب
=والمصيبه في بعض الاحيان ندرك الاشياء ونعلمها وللاسف نعمل ماعارفين او رايحين او مغفلين وفي ناس الواحد فيهم يعمل فيها بردان وبلغه الرندوك رايح او حمد لبد ونمارس الغباء احيانا ونردد الكلام مثل الببغاوات
=يعني اي اشاعه ممكن الانسان يصدقها
=الا اشاعة محمدهارون خلي يتصور سلفي اواستقالة حسن محمد صالح او ان عماد الطيب نفى تصريحاته او المريخ فاز في وجود باسكال وامير كمال ونمر وعلي جعفر وجكسا
=وفي اشاعه ماممكن الناس تصدقها واحتمال البعض وديل لو صدقوها يبقي علي الدنيا السلام ودي بالنسبه للناس الما شافوني وجها لوجه وهي ان الهلال والمريخ يتصارعان حول النحيف الحريف الغزال الشارد حسن عبد الرحيم من اجل ضمي لكشوفاتهما
=او ان عمرابي قدم قدم صوته للمشاركه في مسابقه ذا فويس بقناة ام بي سي
=اويبقي ياسر الجعلي اربابي وعباس الشفيع كاردنيالي ونزار عوض مالك بوب مارلي وفوزي المرضي دعم الجوهرة بمليار وفيرا ينقذ المريخ من الهزيمه وجلطه بقي ملحن وبرجاس شاعر وابوسن طاهوي وغارزيتو تنازل عن مرتب شهرين دعما للمريخ والفاضلابي يشارك في مسابقه الجري السريع والزاكي التجاني فنان
=حقيقه اننا ننفخ في قربه مقدودة فلا شئ تغير
=الصور ياها نفس الصور والملامح والشبه والبسمه تحرق في الحشاوالمشاكل لم تتغير ووجوة واصحاب القرار لم تتغير والايدي المرتعشه كما هي وسلوك اللاعبين ياهو زاتو وخطط المدربين مافيها جديد ومحسن بفانلتو علي الخط يصرخ وجبرة يسخط وغارزيتو متمحن ويقول دي ورطه شنو الوقعتا فيها مش كان احسن لي الكسكته وطارق احمد جالس يتفرج ومورينهو يصرح وابراهومه يقول الهزيمه افادتنا
=ونتفرج في كاس الامم ومنتخبنا غائب ونحنا بنتبهدل وحكومتنا تتفرج
والامام الصادق في الخرطوم وهلمجرا =
=ومع ذلك ننتظر ان تتحسن الاحوال ونشعر بالتغيير
=كيف ومتي واي معجزة من السماء ستحقق ذلك الله اعلم
=وجمهور المريخ اصابه الضغط والسكري وواحدين جاتهم جلطات والصيدليات والمستشفيات تستقبل في الحالات
=واعلام المريخ ينفخ في قر به مقدوده ويحثنا عن صواريخ عاشور وانطلاقات السماني واهداف جكسا والمدينه والهلا لاب يضعون الايادي في القلوب خوفا من المريخ البقي زي الريال وبرشلونه
=وفي اول مباراة ينكشف المستور والمريخ مضروب ياولدي
=والمبرارات كملت والشماعات اتكسرت ومافي حاجه يقولوها طيب سريع كده شوفوا ليكم شكوي في اي حاجه انشاءالله تقولو جمعه ده غلبنا يوم الاربعاء
=ويتوب علينا ربنا
=فاذا كنا في انتظار السعادة فنحن في انتظار وهم كبير
=ونغني بكرة ياقلبي الحزين تلقي السعاده
= والبلد كلها اشاعات والكضابين يرددوا مع ريا وسكينه اشاعات
=وبقينا ماعارفين الاشاعه من الحقيقه والبعض يحاول ان يلبسنا نظارة سوداء لانري وحتي لانسمع ولانتكلم
=والحروب مستمرة والخلافات مشتعله والمؤمرات تحاك والكل في رصيف الفرجه ينتظر الفرج
=ومن اين لنا بالفرج اذا كبارنا خائفون مرتعشون من الماضي ويخشون الحديث عنه لانهم متورطين في العديد من المؤامرت
=واحلي حاجه لما واحد يتصل بيك قائلا والله ديل ناس متامرين
=وللاسف هو من كان مهندس طبخه المؤامرة
=ولكن برضوا من هم الذين تامروا علي قاهر الظلام
=ومن هم الذين يخشون الحديث عنه ولماذا هوفي قبرة يريدونه ان يكون محاربا اعلاميا والناس ماتكتب عنه ولاتجيب اي سيرة لنجاحاته او التذكير بماتعرض له من مؤامرت
=احدهم قال لي والله عبد المجيد ده زي ود امبعلو حي يرزق معزبهم وهو في قبرة عامل ليهم هلعه
=بس لوكو الصير شويه الايام القادمات حبلي بالعديد من المفاجات
=وانتا ياصحبي موضوعك بايظ نهائي
=عارف انا رجعتا للارشيف وتحدثت مع كثير ممن عاصروا تلك الفترة كشفوا لي بلاوي متلته والله ماصدقتا انك كدة
=وكنتا مندهشا حد الدهشه والاندهاش مما سمعته
=اها نعود لهلالنا وحلاتو وهويجندل المريخ برباعيه
=وتيته مافيهو كلام اقوان بالقدم والراس وكور بالمقاس والعجب ركبه جابسون ولاانطلاقات شيبولا
=هلال يسر العين جعل الجماهير تتمايل طربا ورقصا في المدرجات
=والله جماهير الهلال دي تستاهل يكرموها
=شنو كل مرة الجماهير تكرم فلان وفرتكان وعلان
=الجماهير هي سر انتصارات الهلال وهي التي تستحق التكريم لان حبها صافي لافيهو مصلحه ولامنفعه ولاسلفي ولابتصرح في الصحف اوتبحث عن صور ولاعن تزكرة اكراميه لدخول المباريات
=تاتي للمدرجات من تلقاء نفسها ويجلسوا مع بعض ويتونسوا ويعرفوا احوال بعض وفلان الليله ماجاء مالو الحاصل عليهو شنو ويتصلوا بيهو بالتلفون ويين ياعمك ويكون رده انا في زحمه المواصلات جائي احجزوا لي جمبكم وتاني واحد يسال الليله ماشايف فلان وبرضوا التلفون يرن ليهو وينك ياعمك ماشايفينك يقول ليهم والله شويه التهاب كفارة يازول ويتفقوا يمشوا ليهو زيارة في البيت ده الهلال وده جمهورو
=وتعال شوف العجب العجاب ناس كبار يخرجوا عن وقارهم بلمسه من بشه وانطلاقه من كاريكا وتسديدة من بويا
=ولو شفتو وهو يتمايل طربا ويقلع ليك العمه ويشعل فيها النيران لما بشه دخل الميدان ولما تيته جاب القون
=انه الحب الهستيري وهم يرقصون بكل الرقصات مع ركبه جابسون ويشجعون بكل اللغات مع تسديده لابوعاقله
=يرقصوا ويغنو ويبتهجوا وماشغالين بزول لامنتظرين هديه من كردنه ولااشاده من اعلام ولاتوصيله لمنازلهم من اداري يمشوا يتعبوا ويشقوا والواحد يصل البيت مهدد وحيلو ماشايلو عشان بحب الهلال
=مااروعه من جمهور رائع جميل محب عاشق لهلاله
=ولو الناس العاملين فيها كبار ومثقفاتيه ومنظراتيه بحبو الهلال زي الجماهير دي كان الهلال بقي حاجه تانيه
=لكن وين مع ناس الشوفونيه والمؤمرات والمصالح والمركبين فيها مكنه رئيس ويتحدثوا باسمه
=ولاخلافات الكبار في الهلال والشائعات والاكاذيب
=طبعا محمد هارون عاد للكتابه وقرانا منازل القمر واحد قال لي الله يستر
=بالمناسبه الناس الكانت بتقول الارباب مايكتب رائكم شنو في كتابات عضو المجلس محمد هارون
=وين ناس الهئيه الاستشاريه اختفوا لااسكت الله لكم صوتا
=والله بالغتو ماكلمتو التجاني ابوسن وعادل محجوب باجتماع الريفيرا مالكم
=ازيك يامولانا احمد حسب الرسول ياراجل ياطيب
=الهلال بخير ودوما بخير في ظل وجود جماهير محبه وعاشقه لهلالها
=وينك ياهاشم ملاح مختفي انشاءالله خير
=وماذا فعل الفريق المدهش عبد الرحمن سرالختم
=دة كلام شنو ياكوارتي
=ووينيك ياتيسير السنوسي
=حليلو هو
=-اخر المشاوير
=علي الجماهير ان لاتلتفت لاي اشاعه من المؤيدين او المعارضين ولامن اعضاء المجلس
=خليكم في حبكم للهلال وغنوا في المدرجات لحبيبكم شفتا كيف حبك بيعمل
=اعطوا ناس المجلس والمعارضين درس في معني الحب للهلال
= وارقصوا مع تيته وجابسون وصفقوا لاوكرا واهتفوا لكاريكا وتمتعوا بابداعات بشه ولاتحزنو لاعارة الثعلب
=انتو الساس والراس وبتاعين الاشاعات لحم راس
=وغدا المدرجات تنتظركم واللاعبين في اشد الشوق للقائكم وغنوا هلا الهلال والايام صفلنو
=وماتشتغلو باي زول انتو الحب والحنيه انتو الهلال وواصلوا تقديم الدروس المجانيه في حب الهلال
=انشاءالله يتعلموا ويستفيدوا من دروسكم المجانيه
وياذئاب كوستي ارجوا الراجيكم
= خبرطازج شفتا كيف حبك بيعمل
امسح للحصول على الرابط
بواسطة : حسن عبدالرحيم
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019