• ×
الثلاثاء 22 يونيو 2021 | 06-21-2021
بابكر سلك

شالونا في 999 وودونا ساهرون

بابكر سلك

 9  0  2152
بابكر سلك



* قلنا نستبشر خيرا ونتجدع في يستبشرون
* ساهروا بينا في العناية بساهرون
* رفعونا في 999 الشارع كلو يتفرج فينا
* والناس يعجبوك
* الجماعة ديل رفعوهم في شنو ???
* الاقول ليك بزوررا عملة
* عندهم مكنة امريكية ابو خمسين ده تمرقوا ليك بقروا يتناطح
* والبقول ليك مؤثرات عقلية مستورده ومحلية
* واو يا عمك
* والبقول ليك تجارة سلاح
* والبعاين ليك بي قرف
* والحمد لله في البوكس مارفعوا معانا الجنس اللطيف
* الناس كان مشت بعيد شديد
* وكان طلعونا وزراء ونافذين
* وحاكوا من القصص مايخرب بيوتنا و بيوت العنكبوت الفي بيوتنا زاتها
* واحد افتكر اننا من هذا المنطلق ولذلك ثم كذلك قررنا والهرجلة من النوع ده
* قال احب القرار الامريكي ومحاربة الفساد
* المهم شالونا في 999 وودونا ساهرون
* وده كلو ما المهم
* ياما في الحبس مظاليم

* ولكن المهم التشخيص الصحيح والسليم لدخولنا ساهرون علي نقالة في بوكس 999

* قد يكون التشخيص هاي في الدم

* لكن هاي ده دخل دمنا كيف ?

* دخل ساي ???

* ولا لقي فرقة بي جاي !

* ومنو الجاب لينا هاي !

* الناس الهاي ?

* ولا الناس الحول الناس الهاي !!!

* وهل صحيح من زمن كروجر عندنا بي جاي

* كانت في عرفة وتلفونات بين هاي وواحد من الناس الحول الناس الهاي !

* يضرب هاي

* آلو . بالالماني

* يرد الزول البي جاي

* اووو مستر هاي (بالعربي )

*يرد هاي

* بالالماني عملت لي شنو وشنو الراي

* الزول البي جاي اصبر شوية نلقي طريقة تأكلك وتأكلنا معاك عيش

* دو يو نو واط از كومشن يا كوتش ???

* وتوت توت توت تقطع المكالمة

* وتوت توت توت قطر صغنطوط

* يبقي الفحص لازم يطلع نضيف

* مافيش هاي في الدم

* لكن ده ما لعب فندقين !

* نفحص تركيا في الدم

* ونفحص تاني

* نلقي الكرويات الحمراء بسيطة

* وده دليل علي تقل الدم و انخفاض السيولة

* يبقي لازم نشوف الكرويات البيضاء

* نفحصها نلقي تركيا في الدم فيها خلل كبير

* كلو فندقين بالعاهم قطية في بطنها دي

* قطية غريبة

* تبلع فندقين جب مرة واحدة !

* ايها الناس

* يا شركاء الوجع

* بقينا نتوجع من الشهر الاول

* عارفين لية ?

* لانو زمان اختلاف الرأي فينا يجعل المريخ اقوي

* اسي اختلاف الرأي فينا يجعل المريخ دكوه

* يا شركاء الوجع المزمن

* اوضح الاسباب للسقوط الشنيع هو سوء ادارة اللاعبين

* رضينا ام ابينا

* فاذا كان هذا هو حصاد معسكر شهرين

* وواحد في الوطن

* وفندقين

* ومباريات تجريبية

* ونفتقد حتي لابسط مخزون من اللياقة البدنية والذهنية

* يبقي من رافق البعثة من الادارين مشي لي شنو ???

* والبعثة زاتها في تركيا كانت بتعمل في شنو !

* بتتفرج علي حريم السلطان ولا مشت عرس مهند ونور !!

* علي الطلاق انا اعسكر في تركيا شهرين

* بدون مدرب

* وبرااااي

* اغلب ليك الريال والهلال واعرس اربعة تركيات ومايجرتقني الا حريم السلطان

* لو نقصوا سلطانة واحده نعيد العرس من جديد

* من نظرة واعجاب فحب وخطوبة عرس وشهر عسل

* معسكر في تركيا يا عمك

* اعيد ليك القصة من تاشيرة الدخول

* ورانا ايه

* يبقي العله الاساسية في روح الاداء

* وروح الاداء تربية ادارية قبل ان تكون مهمة تدريبية

* فان كان واقع العلاقة بين اللاعب والنادي هو المال المتمثل في راتب وحافز

* يبقي علي الجانب الاداري ان يستخدم في سبيل تربية للكل مفهوم الاستقطاع والخصم

* وياحبذا لو ترك امر المستحقات دي للجهاز الفني

* الجهاز الفني هو المباشر مع اللاعب

* بعرف المجتهد من المهمل

* بعرف البلعب لي روحو والبلعب للتيم

* يبقي بعرف البستحق راتبو كامل من البستاهل الخصم

* واكيد بعرف منو المفروض يحفز وكم هو الحافز

* ضبط وربط وعين حمراء

* غير كدة مانزعل

* نركب 999

* نركب خمسة تبلديات

* نركب راسنا

* مانزعل ابدا

* ايها الناس

* ياشركاء الوجع الخرافي

* الموضوع ليس الهزيمة

* فهي احتمال من احتمالات نتيجة اي مباراة

* ولكن الموضوع الروح والغيره وسداد حقوق النادي التي يلهفها اللاعبون دون مقابل

* بسبب عدم التخطيط،السليم لافتقارنا لاستراتيجية تقودنا بعلمية مجرد خطوة واحدة للامام

* ايها الاخوة الثوار الاحرار

* ايها الشرفاء

* يا رفاق الطلق الاتانا من البداية

* كترت التخبط الاداري وعدم المعقولية في بعض التصرفات ولسنوات تجعلني افتح خيال واصدق

* انها مدروسة لاضعاف المريخ والهلال وظهور زعامات جديدة تفتقر لهذا الانتماء المجنون

* فالانتماء المجنون للقبيلة قد ولي

* وللحزب اضحي ضحكة

* وللاهل اصبح جن

* وتفتقدة القرية

* ونسته المدينة

* وافتقدتة بعض الاسر من بعض ابنائها

* وهل يتمتع الوطن بالانتماء المجنون له ????????

* كيف وصالة المغادرة اضحت اجمل وطن !!!!!!!!

* ولم يبق للانتماء المجنون مكان الا للناديين الكبيرين

* ضف الي ذلك ان هذه الهطرقة جعلت اجيالنا الجديدة تعرف اي شئ عن برشلونة و الريال والبايرن وغلطه سراي واهلي جدة وموناكو ولا تعرف استاد المريخ بي وين

* ولا تعرف ان في هذا البلد فريق قمة وعريق اسمة الهلال

* يظنون ان الهلال الوحيد هو الهلال السعودي

* والفاهم فيهم بعرف مع الهلال السعودي الهلال الاحمر

* فهل وقفنا للحظة لنحافظ علي كيانات عشقناها بصدق حتي الثمالة كي لا تلحق تلك الكيانات جنينة الحيوانات ???

* ايها الناس

* البحصل في الناديين الكبيرين ده شئ موطبيعي

* ايها الناس

* ان تنصروا الله ينصركم

* اها

* نجي لي شمارات والي الخرتوم

* موش يا والينا

* قالوا الحبشي قال

* ديم كويس بس عيبو سودانيين كتااار

* حضرنا قبل كم يوم افتتاح كافتيريا سورية

* ديل كمان اصلهم مابفتحوا مفاعل نوووي يا والينا

* بس كافتريات طوالي فاتحين لينا

* المهم

* الكافتريا سيدها سوري

* اسمها سوري

* اكلها سوري

* مية عامل فيها واي عامل سوري

* حتي الزبون سوري

* عملوا حفلة للافتتاح يا والينا

* الفرقة سورية بالسروال السوري

* الغنا سوري

* الدبكه ما بالدليب لكن بالسوري

* والجكس

* الجكس سوري يا والينا

* فهل نتوقع يا والينا

* يوم اخ سوري يقول الكلام القالوا حبشي الديم فينا ???

* اشروا لينا يا والينا

* عشان نخفف عليهم ويرضوا علينا

سلك كهربا

ننساك كيف والكلب قال. ( سو ) بتتفع لي سودان وبتنفع برضو لي سوريا

كان يوم غالطوكم انا برررره

والي لقاء
امسح للحصول على الرابط
بواسطة : بابكر سلك
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    عادل ود الخير 01-28-2017 11:0
    جيبو ١٥ تربال علموهم كرة قدم احسن من لعيبة المريخ علي الاقل عندهم بنية قوية لاعب المريخ ساقة ذي ......
  • #3
    الوليد ابراهيم عبدالقادر 01-28-2017 09:0
    كلام فيي السلك يا سلك..والله يا سلك اكثر م يؤلمني ان هذا الجيل يمكن يعرف الهلال السعودي اكثر من السوداني..اقول هذا رغم هلاليتي..اتدري ما السبب؟؟.. اظن من اهم الاسباب مسألة قتاة النيلين دي.. وهاك الدليل.. لي ابن يحب يتفرج علي الكورة وكان عمره حوالي 10 سنوات عدت من اللملكة في اجازة ووجدته يتحدث مع اصحابه عن تيسير الجاسم والسومة..فاندهشت وقلت له اتعرف تيسير الجاسم والسومه؟!!.. انت خليت الهلال السوداني والدوري السوداني.. فقال لي بالحرف "مافي في التلفزيون".. فعرفت حجم الجرم الذي اقترفه اتحاد اللقيمات حينما اصر علي التعاقد مع قناة النيلين التي تبث التلفزة عبر عرب سات..
    كلامك ي سلك عن حجم المعاناة التي يعانيها طرفا القمة جراء الاداريين الجلابة في محلو.. واحساس اللاعبين بعدم هيبة الادارات ..خاصة ادارة الكرة بالناديين له بالغ الاثر في التراخي وعدم المسؤولية..
    سلك اخير ... بالطريقة دي ي سلك ما اظن نشم لينا ريحة مطار..
    مع تحياتي وتقديري.. ســـــــــــــــــلام..
  • #5
    ابو عبدالله 01-28-2017 06:0
    ننساك كيف والكلب يقول كان أخير نحافظ على بلة جابر والزومة والباشا والعجب ما دام جابو لينا باسكال وعاشور وكلتشى !!!!!
  • #6
    osama 01-28-2017 04:0
    اخوك الكاشف ده مالك بيه خليك في المرخرخ واترك سيد البلد في حالة.
    الخترفة زايدة شوية من علقة كسلا .. هو انت شفتَ حاجه الجماعة ديل كان ما خلوك زي الجنريتر مدور.. بس الا جازك يقطع.
  • #7
    Hajjam 01-27-2017 11:0
    ههههههه هااااااي. صعود يتيم لدوري الأربعة الكبار وبعد ده تطاول غير مبرر علي سيد البلد. فعلا الحيلة قليلة والخشم بليلة.
  • #8
    عثمان فاضلابي 01-27-2017 10:0
    الاستاذ ( سلك) لك التحية رقم اني ازرق الهوي لكني ادمن صعقات السلك واقول ان سهام الاستاذ النوراني الفاضلابي لاتخطئ الهدف ابدا فما قاله عنك وفيك تستحقه واكثر..مشكور
  • #9
    Mamoun 01-27-2017 08:0
    بصدق لأول مرة في حياتك تقول كلام صاح يا سلك ولأول مرة في حياتك يا سلك تكون جادي في حاجات كتيرة سكن فيها الوجع ، الحقيقة المرة يا سلك ليس هناك من يعمل على تدمير الهلال والمريخ او المريخ والهلال فقط لكنه مخطط وسلوك وسياسة لتدمير كل ماهو متأصل في ذاكرة الوطن وريحة الوطن واصل السوداني ابتداء من الهلال والمريخ حتى جامعة الخرطوم ومابين الهلال والمريخ وجامعة الخرطوم يعيش شعب ووطن كان اسمه السودان بكل تاريخه وأخلاقه وعاداته وتقاليده وحبه وكرهه ، أرادوا لهذه المساحة بين الهلال والمريخ والجامعة ان تكون فراغا كبيرا تسكنه أشباحا ومسخ جديد هو ما نراه الان يسير بيننا
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019