• ×
الخميس 28 مارس 2024 | 03-27-2024
بابكر سلك

خطأ طبي

بابكر سلك

 4  0  3287
بابكر سلك

* تتعدد الاسباب والموت واحد
* قد يكون سبب الموت خطأ طبي
* برغم ان المرض مابكتل
* بكتل اليوم
* الا ان الموت يمكن ان يكون لسبب خطأ طبي وبسبب خطأ طبي
* مثلا زول عندو ضغط
* قبل ما يعرفوا العندو من الماعندو يقشطوهوا ليك دربات ملح يودوهوا الآخره قبال مواعيدو
* وكلنا يتذكر النكته بتاعت الزول المات ودفنوهوا
* في القبر مالقوا ليهو اي اسم علي صفحات الموتي
* لدرجة سألوهوا اسمك منو ?
* قال ليهم حيدر مصطفي
* قالوا ليهو حيدر مصطفي منو ?
* قال ليهم مصطفي حسين
* فتشوا الدفاتر سما ارض اسمو مافي
* عندك في الدنيا اسم غير ده ??
* قال ليهم ابدا
* قالوا ليهو آخر مرة في الدنيا كنت وين ???
* قال ليهم كنت في مستشفي امدرمان
* فتشوا تاني
* قالوا ليهو حيدر مصطفي حسين قسم السيد ?
* قال ليهم ايوووووه
* قالوا ليهو والله دكاترة السودان ديل لخبطوا علينا شغلنا كلو ..انت مفروض تجينا هنا بعد اطناشر سنة واربعة شهور
* بتحصل في كل العالم
* سمعتوا بي عمك المشي الدكتور ووراهو صورة الاشعة
* الدكتور رفعها وعاين ليها مسااافه وقال ليهو
* ماشاء الله ياحاج جمجمتك تمام مافيها اي شئ
* عمك قال ليهو جمجمة شنو يا ولدي ? يا دكتور دي صورة ركبتي
* القصة دي بتحصل في الدول البتقبل طلاب طب بنسبة خمسين في المية وممكن تنزل بشرط الرسوم المية مليون ما بتنزل ولا بتتقسط
* والاخطاء الطبيه في العالم شائعة
* مثلا طبيب يكتب لي حاجة طاعنه في السن فحوصات معينة لانه يتهمها بالبروستاتا
* وكمان ظهر الموت لخطأ هندسي كسبب جديد من اسباب الموت
* مهندس يشد ليك في خشم الحلة زلط بارتفاع مترين ونص عن الحلة دون ان يستعين بي ناس تخطيط المدن عشان يورهوا مجاري المياه الطبيعية ومصارفها كي يعمل حساب الكباري علي المجاري
* يجيب الردميات ويردم ويمندل ويكشح ليك الزفت ويسلم الشارع
* يجي الخريف
* وتحتاج السيول للتجمع بارتفاع تلاتة امتار كي تتجاوز زلط المهندس لتعبر الي النيل
* التلاتة امتار دي كفيلة باغراق الحلة كلها وتهدم منازلها
* البموتوا غرقا او نتيجة سقوط منازلهم عليهم يكونوا قد ماتوا بسبب خطأ هندسي
* ومهما بررت الحكومة اسباب الموت وارجعتها لاستعمال السكان لمواد ضعيفة في البناء
* فان الحقيقة تبقي كما هي
* موت بسبب خطأ هندسي
* وقد يكون الموت بسبب خطأ وظيفي
* موظف يمشورك الآف الكيلومترات جيب التصديق الفلاني والوصل العلاني وتعال بكرة وبعد بكرة و الشبكة طاشة والختم ده ماظاهر
* هنا يمكن ان يحدث الموت غيظا
* والغيظ بسبب خطأ وظيفي كان يمكن وضع جميع المكاتب المرتبطة بخدمة واحدة جوار بعضها
* وقد يكون الموت بسبب قانوني
* كأن تسري قوانين قديمة وبالية دون مراجعتها لتتواكب مع متغيرات الحياة
* وقد يكون الموت بسبب قوة راس
* وقد يكون الموت بسبب خطأ قضائي يوديك المشنقة وانت اشرف الناس
* تتعدد الاسباب والموت واحد
* امس متنا في كسلا بالقضروف بسبب خطأ طبي كالعادة
* دخلنا نعاني من وجع عين
* بتروا لنا رجلنا الشمال
* حبينا نزيل كلانا الشمال الضامرة
* فاستأصلوا لنا اليمين الشغالة وحولونا للغسيل
* العيب ماكان في دكتور هاي براهو
* العلة كانت في السيستم كلو
* في الطاقم الطبي و الاداري
* لان الاستهتار الذي شهدناهوا في جيبوتي ان كان سببه هاي
* استهتار امس ده برضو سببو هاي ??
* اين المعد النفسي الذي سمعنا عنه ??
* موش تم فتح باب التقديم لوظائف بعينها من ضمنها مدير تنفيذي ومعد نفسي ???
* خلاس الموضوع مات ???
* المعد النفسي كان عشان الطنقعة الفي الفارغه دي تروح
* عشان الناس المخلوعه بالنجومية دي تعرف انو مافي اي اسباب للخلعة والطنقعة
* وان الامر شغل واكل عيش
* تركيا دي قابلوا فيها مهند ونور ولا مشوا لي شنو ???
* لا لياقة ولا (لياقة ) في الخصم
* ومع احتراماتي لجيبوتي ولشرطة القضارف
* الاتنين ما محتاجين مدرب
* محتاجين فقط غيرة و اصرار و شعور بالخجلة عند الخسارة
* ولو عندنا مجرد كابتن يتمتع بروح القيادة كان الامر اختلف
* ولكن كباتننا اهتمامهم كلو بتلك الحلاقات الكريهه والمشي بطنقعة وكأنهم اتوا الينا بكأس العالم للاندية
* ايها الناس
* العيب في المادة الخام
* في لاعبيننا ديل
* فالغيرة وحدها هي من صنع رولاندو
* وميسي لم يعتمد علي مهارته ولكنه اضاف اليها غيرة و اصرار ورفض للهزيمه
* يسك ويقالع ويشاكل و ينزل مع المدافعين
* ايها الناس
* نحتاج اسمنت يحل محل الجبص الغاشينا ده
* المهم
* ادمنا الموت باخطاء طبية ومتنا غرقا تحت الانقاض باخطاء هندسية وكان موتنا غيظا لأخطاء ادارية ومتنا كمدا بسبب قوة الرأس
* فمتي تتركونا نعيش حتي تكمل المعدودة ونموت موت طبيعي في المكان والزمان المحفوظان علي اللوح المحفوظ ????
* ايها الناس
* القشرة والتباهي والاهتمام بالمظاهر والشكليات فقط لن تصنع ابطال اطلاقا
* قابل احدهم صديقة ووجده حزينا
* سأله
* مالك يا جعفر ???
* جعفر قال ليهو مرتي حزينة عشان مشت تقص شعرها بتاعت مركز التجميل قصتو ليها شديد لما وصل نص ضهرها بس
* الراجل ضحك وقال
* اسي سبب حزنك وحزن مرتك انو شعرها وصل نص ضهرها بس ?
* جعفر قال ليهو ايوة
* الراجل قال ليهو صدقني يا جعفر انت ومرتك فاكنها في روحكم ساي ومبارين المظاهر
* علي الطلاق يا جعفر انا مرتي كان رقدت في الواطة شعرها ما يصل الواطه ونحنا اسعد اتنين في العالم
* هل من المعقول نحزن ونتعس لانو شعر مرتنا اتقص شديد وصل نص ضهرها ويسعد الناس النسوانهم لو رقدن في الواطة شعورن ما تصل الواطة?
* السعادة شعور وليست شعور
* القصة ماقصت شعور طويلة وقصيرة ولكنها قصة شعور عميقة تبحث عن السعادة في البساطة وبشفافيه بدون شوفونية
* اها
* تش يل من كلامنا حتة يا انت ولا تجبرنا نلبس الكسكتة ???
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* للموسم بدينا
* فكانت سمسم القضارف اول اغانينا
سلك كهربا
ننساك كيف والكلب قال من وين نجيب ليك العذر
والي لقاء
امسح للحصول على الرابط
بواسطة : بابكر سلك
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    الامين محمد نور 01-27-2017 11:0
    ( انت مفروض تجينا هنا بعد اطناشر سنة و اربعة شهور .) اتق الله . هل انت مسلم ؟ يعني هزيمة المريخ ممكن تخليك تعمل اي شي وتقول اي شي . حسبنا الله ونعم الوكيل . الجهل و ضعف الايمان مشكلة كبيرة جدا . الله المستعان .
  • #2
    أبو معز 01-27-2017 02:0
    والله كلامك صاح واحد حالق نص رأسه والثاني خاتي قفه شعر تقليد أعمي ويا ريت لو كان تقليد ولو ١٠بالمئه من لعب القلدوهم. هؤلاء يحتاجوا معسكر في الاحتياطي المركزي علشان الحناكيش يغادرونا من غير رجعه ويثبت ضفر وقلة قليلة. نحنا محتاجين عشره من شاكلة ضفر يأكلوا الحديد ويحاربوا في النار.شرطة القضارف ركبوا بص عادي لكسلا وهزموا لاعبين سعر واحد منهم يعادل أسعار لاعبي الشرطه مجتمعين وياما حنشوف كثير.
  • #3
    osama 01-26-2017 08:0
    هو ده الكلام القدرت ليه .. انت وامثالك هم السبب في هزيمة المريخ والقادم اصعب.
  • #4
    Hajjam 01-26-2017 07:0
    ياسمسم القضااارف. وصيف صغييييير ماعارف.
    صعود وحيد لدوري الأربعة الكبار وبعد ده فصاحة وتطاول علي سيد البلد. فعلا الحيلة قليلة والخشم بليلة.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019