(كيلو الضان 60 كيلو العجالي 30).
رطل الحلاوة 15 جنيه.
أيِّ كتاب بي خمسة .
كيلو الطماطم خمسة
النت سنة كاملة بي 100 ج .
مرَّت عليكم مثل هذه ( الدعايات).. في البيت في الشارع في المسلسل؟؟
- بالله كيلو عجالي
- دا شنو؟؟
- 30 !!!
لا، دا ما (أبو 30) لكين، أبو تلتين هنداك!
بالله رطل من الجوزية و اللكوم دي!!
- قروشك دي ناقصة عشرة جنيه !!!!!!!!!!
- كيف الكلام دا؟؟؟؟؟؟؟؟؟؟
الجوزيِّة بي 25 .
- بالله كتاب استيفن كوفي دا
- ههههه دا بي خمسين يا أستاذ
- ليه اصلو كوفي بتاع المريخ و لا كوفي عنان؟
- خدمات المشتركين؟؟
- مرحب بتكلمنا من و ين لو سمحت؟
- من وادي الربيع.. نزلت كرت بي 100ج و النت ما فعَّل معاي!!
- لا الخدمة دي بي ميه و خمسين.. ميه دا خالي ضريبة!!!
- الطماطم الفوق دي كيلوها بي عشرة، معليش يا حبيب!
و غير هذا من (الدعايات) التي تدخل تحت مظلة الكذب و التسويف من أجل
( التسويق)
تماماً مثل دعايات التأمين الصِّحي التي يتفنن فيها الممثلون الذين تركوا التمثيل في الدراما و راحوا يمثلوا علينا في الدعايات!!
بينما الحقيقة أن كثير من الأدوية ( ماخاشَّه في التأمين)!
و في الرياضة يصرح المسؤولون والمدربون و اللاعبون ( الأجانب و المحترفون) بأنَّهم سوف يحققوا النجاحات و البطولات
و في نهاية الموسم يقولوا: (دي ما خاشه معانا و الله) !

جري و طيران !!
لا أحد ينكرجري الكاردينال في عدة جبهات : مع الجوهرة الفضائية و البص والرؤساء القدام و الاعلام ....إلخ!
جري في كل الاتجاهات بعيدا عن فريق الكرة، مما سيؤدي إلي خروج الهلال بدري
- زي عامن أول- إن شاء الله! و يكون بهذا لم َّجري و طيران، لكين برضو (أخير من العدم).
نفس الشئ !!
المصريون طالبوا بعدم رفع العقوبات عن السودان بفهم إن ذلك سيسهم في دعم المليشيات في ليبيا... ( معَ أولى)؟؟؟؟
لم ينظروا لأنَّهم بدلاً من الإغتراب في المملكة التي ضايقتهم و ضيقتها عليهم يمكن أن يغتربوا هنا، و يلموا قروش أحسن ، و مافي زول يهينهم زي هناك..
و لاَّ يضطروا للتحانيس و كسير التلج، كما فعلوا من قبل بايفاد عادل إمام ووفد ضخم لما أمرتهم المملكة أن (يورها عرض أكتافهم) كلهمم أجمعون!
و كمان ممكن كمان يستثمروا و يزرعوا في حتات خصبة و بمياه نقية و ليست (عفنة)
هذا الشئ يُذكِّرني الهلال في الموسم قبل الفائت: المشكلة بين المريخ و الأمل... إنسحب!
من عدة زوايا
يريد د. كردنة أن يُثبت أنَّ الهلال لا تَلينُ لًهُ (قناة)... بينما (صحيفته) يشوبها الكثير من الغموض!
بتروجيت تعاقد مع المعلم شحاتة موسم و نص و خمسة، و المنتخب يقوده أجنبي، و يتعادل، دا شحاتة خلي ناس هناي و هناي ديل!
تخريمة: حلايب سودانية!
حقو شان القرعة تكون (محايدة) الهلال كان يبدأ بالأمل، في عطبرة هنا ما مشكلة!
تغريدة: تاني ح نضحك (هاي هاي هاي)، بدل هاء واحدة مكرورة و مجرورة!
افتكر انو الكلام الكتير و التنظير هو سبب ابتعادنا عن البطولات شغلو نمط (صامت) شوية عشان يقل ( طيران) الفرق السودانية.
تدوينة: رئيس برشلونة نحتاج و قتا طويلاً لتجديد عقد ميسي، فرصة و جات يا كردنة؟؟
زاوية ضيِّقة: أقلام زرقاء كثيرة إحتفت بالفضائية ولم يحفل أحد بالصحيفة فلعلَّ المانع خير؟
شعر حُر: الغياب ما بشكل غياب و الفراغ ممكن يكون مرات تساب فدع عنك الاكتئاب و لا تقلق ولا (تغفل) أمام الأمل الباب... كل ما في الأمر مشيبٌ وشباب.. و ترابٌ إلي تراب!
زاوية خاصة: - المكتوب على الجبين لابد يبين.
- ما أظن مع الكريمات الماليه بيها وشك دي!
تشة فنية: كترة الإذاعات و المذيعن و المذيعات.. نسمع منو ما عرفنها؟؟ بس ممكن نقول تجربة فطيرة جد!
شعار جوفينتوس ( الجديد) أحزن الجماهير ، مع إنو ما عندهم مشكلة مع زول في الشعار و ناس الهلال أبقوا على شعارهم مع إنو عصمت شاكيهم.
تلميحة: كل أول ليه آخر.. إلا الممتاز!
بسبب (الترحيل) مرات بنخلي الشغل أخشى أن تترك العديد من الاندية الشغل في الممتاز بسبب الترحيل.
و ......... كلنا بنغلط!
سؤال وجيه: بي عذاباتنا ليه بتتسلَّى؟؟
آخر قطرة: الدولار نزل!
و يظل المريخ الحاضر و المستقبل و التأريخ
تقفيلة : بُكره عمودنا إن شاء الله: ( مسادير و مسامير) !
و أختم قولي ب: (اللَّهُمَّ صَلِّ وَ سَلِّم وَ بَارِك عَلَى سيِّدنَا مُحَمَّدٍ عبدك وَ رَسُولِكَ النَبِّيِ الأُمِيِّ وَ آلِه).
و هذه بصمتي