في ناس عاقلين في الوصيف قالوا نحن الموسم دا برضو ما حقنا.
عشان الجواب باين من عنوانو.
من البداية في سخط من المدرب.
دا حالتو الرسمي لسه ما بدأ.
بس مشوا اكتر من كدا وقالوا مستوي الفريق دا (ما بيأكل عيش).
طبعا دا بعد ما عملوا مقارنة من نجوم سيد البلد.
وجدوا مافي مقارنة اطلاقاً.
كدي سيبوا اي حاجة.
بس نحن عندنا الغاني تيتيه والنيجيري شيبولا.
ياااخ ديل يعملوا مرارة في الحصوة.
والعجب اللاعب الغاني دا.
دي في الوديات بجيب هاتريك.
انتوا عارفين لعب الوديات بكون عامل كيف. اللاعب بلعب بإحساس الاستفادة من التجربة. لكن في الرسمي دا براه. بعمل علي الفوز والاجادة. بالمعني دا الغاني دا ح يجيب في الرسمي براه ستة اقوان في مباراة واحدة. ما بعيدة عليهو. نرجع لناسنا الطيبين ديل. فعلا طلعوا عاقلين .. عشان الموسم دا برضو ما عندهم بيهو علاقة. سيد البلد قااااااعد معناها بطولة مافي. بس نحن تركيزنا كلو علي البطولة الافريقية. معقولة نحن بنعمل في جوهرة زرقاء وقناة فضائية واذاعة واكاديمية عشان ننافس الوصيف. انا غايتو لو في محل لافاني بعمل فريقين. طبعا نجوم الهلال كلهم في مستوي الجاهزية. فريق نلعب بيهو الممتاز ونقابل ناس الوصيف. وفريفق نلعب بيهو البطولة الافريقية ونواجه اندية المغرب ومصر والجزائر وغانا. عشان في الختام نواجه صن دوانز حامل اللقب. اللقب السنة دي حقنا. ناس الوصيف ديل ما عايزين تعب كتير. واذا المدرب محتاج لجميع اللاعبين. مالو يلعب بالرديف. في فريق الرديف نجوم مميزين. يمكن لفريق الرديف يؤدي الغرض المطلوب. السنة نحن ما فاضيين للوصيف. الازرق طموحوا اكبر من الفوز للممتاز. الرئيس قال 2017 ح نجيب البطولة الافريقية. عشان نواكب الانجازات في مشروع الجوهرة. كردنة كلامو لازم يتحقق والكرة في ملعب اللاعبين. فريقنا ماشي كويس في الاعداد. ومستواه لسه ح يتطور اكتر من كدا. شفتوا عشان نأكد ليكم نحن ما فاضيين للوصيف. ما جبنا سيرته كتير. الوصيف زاتو بعمل في بروفة الآكشن. بعد كل مباراة ح يكون في ضرب وخنق. الله يستر بس. بعيد .. بعيد. *** اقتربت تجربة قورماهيا الكيني. الفرنسي اعلن تخوفه من ارضية ملعب الخرطوم. ملعب الخرطوم تم تغييره مؤخرا. وحسب رؤية لافاني فيها مشكلة. ويمكن تتسبب في مشاكل للاعبين. كلامو صحيح ميه ميه. الفريق يتأهب للموسم الجديد. والازرق في حاجة لمجهودات جميع اللاعبين. الازرق عندو كلامو كتير في الموسم دا. نحن الهلال بنريدو جد. (صمت اخير) .. مستواكم دا ما بتاكلوا بيهو عيش.