• ×
السبت 31 يوليو 2021 | 07-30-2021
بابكر سلك

اخبار اللمبي معاك شنو يا البلال

بابكر سلك

 7  0  1942
بابكر سلك





* النقة لسة شغالة ولايكة موضوع التدريب في المريخ لبانة
* استغرب جدا من عريس ناقي مع العروس الليل كلو بالتلفون قبل العرس سنة
* وبتقابلوا ليهم تلاتة سنين
* وبعد العرس بي شهر يجيك العريس يقول ليك العروس مانافعة معاي
* عصبية ومتوترة طوالي وما سمحة كمان
* شينة ومزعمطة
* نخرينها الكبار ديل شافطه بيهم الاوكسجين كلو
* الصباح اقوم من النوم راسي لافي من نقص الاوكسجين في دمي
* ونسأل عريسنا
* العصبية والتوتر دي ما ظهرت ليك في نقة التلفون الزمان ديك ???
* قول قصة الاوكسجين دي فاجأتك
* النخرين الزي كرعين الردا ديل ماشفتهن زمان !!
* اعذار العريس ما مقبولة
* واعتذارك مابفيدك العملتو كان بايدك
* اتوكل علي الحي الدائم يا عبد الدائم وكلو شئ قسمة
* ايها الناس
* تغيير المدربين اثناء التنافس زي لبس هدوم العيد قبل العيد
* لما يجي العيد والناس تلبس جديد تلقي روحك يا اللبست هدوم العيد قبل العيد شكلك محرج و تقعد بعيد
* هاي مدرب
* سمح كعب دي بتظهر بعد اعطائه فرصته كاملة ومرور فترة معقولة تسمح بتقييمه
* صحيح ان مقطوعته الموسيقيه لم تطربنا حتي الآن
* ولكن قد يكون السبب من العازفين
* نحنا لسه عندنا عازفين مابعرفوا يقروا النوته ولكنهم يقومون بالعزف جربندية ساي
* زي ديل لازم يخرمجوا الي ان يكتشفهم المايسترو عشان يغيرهم او يفهمهم او يشيل منهم بعض الصولات الخرمجوا فيها
* والكلام ده ماكفاية عليهو البروفات
* لازم حفلات كبيرة يكون اعجاب الجمهور بها او امتعاضة مطلقا صافرات الاستهجان هو الفيصل
* عشان كده اري بدل الحديث عن تغيير المدرب
* ان نعمل علي اقامة الحفلات التجريبية الكبيرة لنتيح للمايسترو والعازفين فرصة الاجادة
* ولا للتغير في هذا التوقيت
* فمن اعتاد واحاد عزف اغاني الحقيبة قد يفشل في اغنيات الراب
* الا الآن هن دلوكة دلوكتين الراخيات ومبوظات الايقاع
* يبقي الصبر مع العقلانية هي المخرج
* المهم
* طالعت بالامس علي صفحات دار البلال حوار للكاردينال
* وقفت كثيرا عند عبارة لكردنة
* يقول كردنة انه لاعداء له مع الخرطوم الوطني بل يدعمهم لان والدته احد ابناء الحي
* وقفت في الجملة وتعثرت علي ابناء الحي و اخبار اللمبي معاك اية يا بركة !!!!!
* اها
* اذا عدنا لمباراة الاهلة وشيكوبولا الغاني
* نجد انها كانت اعدادا جيدا لحكام صلاح
* طمأن الحكام جمهور الهلال بانهم اعدوا انفسهم للموسم الجديد جيدا
* اطمأن جمهور الهلال علي اعداد الحكام ولم يطمئن علي اعداد الهلال
* ولكن الاطمئنان علي الحكام بطمئن كتير
* واذا عدنا لحوار كردنة بالدار
* تستوقفنا قصة تسجيل ابراهومه
* لكردنة خيال فاق كتابات احسان عبد القدوس وحبكة اسامة انور عكاشة وبصمته علي شاشة الدراما المصرية
* كنت بفكر اخطفو
*خاص مريخاب للأبد
* انا فتحت خيال في الحوار
* اشوف ليك كردنة
* قاعد في المزرعة وبزبط في السيناريو
* كلمت جماعة من المقربين يخطفوهو
*الجماعة جوني في المزرعة
* انا قاعد الدنيا حلوه وصااانه
* موسيقي تصورية خلفيتها الشبكنا يخلصنا
* جوني الجماعة داخلين
* مؤثر موسيقي ( دنق تش )
* قلت ليهم في شنو ???
* كلوز علي وجه كردنة
* متوترا والكسكتة ترجف
* اليوم داك كردنه لابس جلابية لزوم المزرعة
* لكن لابس كسكتة مع الجلابية لاضفاء مزيد من الكوميديا علي المسلسل
* في شنو ????
* صمت
* مؤثر موسيقي يبدي توتر الموقف ( تك تك تك تك ) بفتح التاء
* الجماعة بصوت واحد
* ناس المريخ شطبوا ابراهومة
* كردنة يقفز من الفرح
* ويرقص علي انغام
* كان بعيد نادوهوا ليا يا ناس(مريخاب للأبد)
* وكان قريب جيبوهوا ليا ياناس
* يوهوووووووو
* تن تش
* جيبوهوا اسي
* كلوز علي اصبع كردنه اثناء الحديث
* نهاية الحلقة الاولي من مسلسل ابراهومة والتلتين سنة زعل
* ونواصل الحلقة التانية غدا
* ايها الناس
* ان تنصروا الله ينصركم
* اها
* نجي لي شمارات والي الخرتوم
* والينا
* متين تن هو كلنج جايينا ??
* تاني من الصباح ني هاو تحيه مننا ولينا
* بس مستقبلا لا بنلعب باكست ولا بنشيل رأسية يا والينا
* اي عكسية قون فينا

سلك كهربا

ننساك كيف والكلب قال وووب علينا من السبيبي الجايينا نيييي هاو هاو هاو
والي لقاء
سلك
امسح للحصول على الرابط
بواسطة : بابكر سلك
 7  0
التعليقات ( 7 )
الترتيب بـ
الأحدث
الأقدم
الملائم
  • #1
    Hajjam 01-16-2017 08:0
    ههههههه هاااااي. باي هاي. مسكين عمنا سلوكة صلعتك زادت من المغايص.
  • #2
    عباس 01-15-2017 03:0
    الكلام دا بربطك انت قاصد باللمبي والينا ولا كردنه هوي يازول اعمل حسابك اشاراتك وتلميحاتك معلومه ارعوي
  • #3
    ابو حازم 01-15-2017 01:0
    عندما ينتصر سيد البلد ويقدم الروائع هكذا تكون كتابات ناس قريعتي راحت ، وخلاص
  • #4
    بكرى 01-15-2017 11:0
    والله اتنمنى ان اطلق عليك لقب صحفى او اعلامى لاكنك مامساعد كل كلامك خارم بارم .وبعدين منو البطمئن على حكام صلاح الهلالاب ولا المريخاب هدفين لايخالج معن ولدى سنه وشهر فى عدم صحتهم احتسبت اهداف والله ياهو هداف اللواء الشافو الرائد فى مكتبو .ياخى مره واحده اختشى على نفسك وتكلم كلام فيه بصيص من الجديه .
  • #5
    Hajjam 01-15-2017 10:0
    مصيبتك كبيرة ياعمنا سلوكة. صلعتك دي طلعت قرعة فاضية وماعندك موضوع. احتاط لنفسك بحبوب الضغط والسكري والاكتئاب. انت يادوب شفت المناظر من عروض سيد البلد والقادم سيكون أسوأ بالنسبة لك وبقية الدلاقين. باي باي مستر هاي. هههههههههههه هااااااااااااااي من يضحك اخيراً يضحك كثيرا
  • #6
    سامي 01-15-2017 08:0
    خليك مع ناس عمو باسكال وكلتشي وعاشور وانتظر الصقع الصاح الموسم دا اعتقد تكون رقم 5 او 6 ومادايرين نقة وهيصة واركزوا للخبت كما قال أحدكم
  • #7
    الامين محمد نور 01-14-2017 09:0
    ما عندك موضوع كلام قديييم و بايخ لكنه بيشبهك .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019