* آفة العصر هي المخدرات
* العصر براهو
* أفة اليوم كلو
* والمخدرات أنواع وأشكال
* منها ما يبلع
* ومنها ما يستنشق
* ومنها ما يدخن
* ومنها ما يحقن
* ومنها ما يمضغ
* ومنها ما يجنب داخل الفم
* ومنها ما يسمع
* وهذا النوع الأخير هو أخطرها
* تأثيره سريع وتطول مدة مفعوله
* والمخدرات تذهب العقل
* وذهاب العقل يذهب التمييز
* وذهاب التمييز يجعل الإنسان يتصرف قبل ان يستخير
* وعدم الإستخارة بيجيب الخسارة
* الأهلة في تسجيل شيبوب ما إستخارو
* المهم
* التخدير بالسمع صعب شديد
* وتأثيره كبير وواسع النطاق
* وينتج تحت أسماء تجارية مختلفة
* أشهرها مخدر رفع المعاناة عن كاهل الجماهير
* وده نوع جديد مبيعاتو في إرتفاع خلال الخمسة وعشرين سنة الأخيرة
* وفي نوع تاني جيد برضو إسمو وظيفة لك خريج
* لكن أجودها منتج بإسمين مختلفين هما
* نأكل مما نزرع وده مع التخدير بخليك ما تشعر بالجوع
* ونلبس مما نصنع وده من فوائده إنو المخدر به والمدمن له ممكن يمشي فرعون
ويفتكر نفسو لابس
* المهم
* اليومين دى إخوتنا الأهلة في حزن سببه التسجيلات الكعبة
* تيتيه الله عليه..طلع ما تيتيه الله عليه
* طلع تيتيه الخلا
* وفشل في التسجيل أمام فرق الروابط المصرية
* وأبو ستة طلع مفتوق
* وشيبوب ما إستخارو فيه معطوب
* والتيم كعب
* ألم الأهلة شديد
* لذا خرج عليهم الإعلام الهلالي الموالي بمخدر يخفف الألم عليهم
* المخدر إسمو القناة
* حبه واحدة تنسي التعب والتيم كعب
* يستخدم بالأضان
* وهو مخدر قوي أثبت مفعوله
* وقمت فتحت خيال في قناة الهلال وفتحت ليك القناة
* والشعار
* قناة الأصفار
* لا مفكوكة ساي لا مشفرة
* مصفرة
* التردد صفر صفر صفر صفر
* مهدل الترميز برضك صفر
* القمر صفر سات
* أفقي لمن أرضي
* الشعار كسكتة تجي طايرة من اول الشاشة يقع منها صفرين
* صفر بالعربي
* وصفر بالإنجليزي
* مع أغنية مصاحبة تتعلق بالقناة والغرض منها هو التخدير
* لذا كانت أغنية الشعار
* الخدير انا ماني حي النقدو الطير انا ماني حي
* الغريبة برامج القناة كلها لا فيها طيارة ولا بتجيب سيرة مطار
* اها
* في خيالي داك جابو برنامج
* بتقدمو فطومة أختي
* أسمو عجوبة وسوبا
* فكرتو الجمهور يتصل تلفونياً على الرقم الموضح على الشاشة
* رقم التواصل هو
* صفر صفر صفرين تلاتة أصفار زيرو صفر زيرو
* قام واحد في خيالي داك إتصل
* فطومة..الو منو معاي
* صوت..معاك أمير خضر
* فطومة..مرحب بيك أمير خضر..وطي صوت التلفزيون شوية
* صوت..ده ما التلفزيون ده صوت ركشة
* فطومة..السؤال
* صوت...الهلال شال كاس الكونغو فى الكونغو ولا هنا؟؟؟
* فطومة ضاحكة...الفقهاء إختلفوا...واحدين قالوا في الكونغو وواحدين قالو هنا..لكن
جمهور الفقهاء الرياضيين قالوا ما شالوا إلا ما ظهر منه
* صوت.....ما هو باين في العيون
* فطومة.....معانا إتصال تاني
* صوت...الو
* فطومة...يا مرحب
* صوت..سؤالى قون أهلي شندى بتع الدرون في الدورة الأولى السنة الفاتت
إتنقض ليه؟
* فطومة...أسأل ليك عاطف النور يسأل لينا هيثم أخوهو النقض القون
* صوت...يعني حا ندخل في دوامه أنا ننقضو؟أنا ما نقضو..هذا نقضو
* فطومة.....معانا إتصال جديد يا مرحب
* الصوت...السلام عليكم...معاك إسماعيل من تندلتي
* فطومة..مرحب بي ناس تندلتي..إرسالنا واصلكم وواضح في تندلتي يا
إسماعيل؟؟؟
* صوت...والله زي السينما المتجولة..الصوت براهو والصورة زي الرسمة نصها في الحيطة ونصها في الشاشة والإضاءة زي كشافاتكم شمعة بس
* فطومة..إن شاء الله تتصلح..سؤالك شنو؟؟؟
* صوت...نحنا اسي في الحلة متغالطين الفريق السوداني الوحيد الجاب للبلد دي
بطولة من بطولات الكاف منو؟؟؟
* القناة صفرت
* وشخشخت
* وصورة فطومة بقت بالجمبة
* الطرحة وقعت
* الكستكة الفي الشعار إتفنقلت
* وطشت
* وشخشخت
* شخخخخخخخخخ
* الطبق إتفنقل
* والريسيفر حرق
* والشاشة كتبت
* لا توجد إشارة
* الله يجازيك يا إسماعيل طششت الشبكة وقفلت القناة
* وقفلت الخيال
* ثم طرحت سؤال
* نسبة نجاح القناة تمنين في المية ولا عشرين في المية يا فطومة ؟؟؟
* المهم
* أمس إجتمع مريخاب بورتسودان بنادي المريخ ببورتسودان للإعداد لإستقبال
الزعيم
* عروس البحر عن بكرة ابيها مريخاب
* ويكفى ان عروس البحر هي عروس البحر الأحمر
* ونتمنى لأهلنا بثغرنا أن يستمتعوا بالزعيم
* وأن يمسح الزعيم صورة خسارة الهلال من قورماهيا السنة الفاتت في نفس التوقيت
* روشا
* المخدرات بتخلى الناس ما تستخير
* إستخرتوا للقناة دي ولا سجلتوها ساي زي شيبوب ؟؟
* وهي شن القناة
* قالوا يوتيوب ساي
* عوض شكسبير عندو واحدة
* أسى نشوف الكسكته نفرز قناة شكسبير من قناة الهلال كيف؟؟؟
* نفس الكسكته ونفس الكلام
* بس عوض أنوارو واصله بدون سلوك
* ايها الناس
* إن تنصروا الله ينصركم
* اها
* نجي لي شمارات والي الخرتوم
* أكان شفت يا والينا
* إتنين بتاعين بحر مننا
* واحد قال يا ولينا
* حا نبنيهو البنحلم بيهو يوماتي
* التاني قال ليهو نحنا قادرين ننوم فيهو عشان نبنيهو
سلك كهربا
** ننساك كيف والكلب قال لا للمخدرات أعظم الشعارات يا بشر ؟؟!!
وإلى لقاء
سلك