• ×
الإثنين 8 مارس 2021 | 03-06-2021
محمد الطيب الامين

كيف تحول (الحوش) إلى (بلكونة) ؟

محمد الطيب الامين

 0  0  6652
محمد الطيب الامين


* واحدة من أكبر سلبيات وعيوب السكن في (الشقق) أنه يجعلك محروم من نعمة (الحوش) ..
* قد تكون هنالك (بلكونة) في الشقة ولكنها لا توازي قيمة ومكانة (الحوش) في البيوت السودانية ..
* (الحوش) في بيوت الخرطوم أصبح من (الماضي) ..
* النظام بقى شقق يا مولانا ..
* (شقة صغيرة تعرشها وتقعد) ، ولو جوك ضيوف من البلد إلا تنزلهم في (مسجد الحي) ..
* والله صحي ..
* وعيب الشقة الحقيقي بتكتشفو لما يحصل ليك عرس في البيت أو موت في البيت ..
* الشقة لا تستحمل (الفرح) ولا تستحمل (الحزن) ..
* ولا بديل للحوش إلا الحوش ..
* المهلة سمحة ..
* الضيق في السكن يسبب الإكتئاب والعصبية والحزن غير المعلن ..
* أى زول عندهم (حوش) في البيت بتلقى مزاجو أعلى من مزاج العندهم بلكونة ..
* إحنا وأولاد حلتنا الواحد قبل ما يختار العروس بيسأل من (حوش بيتهم) ..
* لو عندهم حوش يبقي (عز الطلب) ، ولو عندهم بلكونة يبقى تلزمنا (إستخارة) ..
* المهم ..
* من حسنات هلال (2017) الكبيرة هو أن التشكيلة (واسعة جدا) ..
* تشكيلة فيها (براح ومهلة) تشبه (حيشان البيوت العتيقة) ..
* تشكيلة المريخ تبدو مثل (البلكونة) وهذا ما سنعرفه لاحقا ..
* وقبل كل شئ نقول أن الهلال من حيث (المواهب والعناصر والخامات) لا يعاني من أى مشكلة ..
* الخامات الموجودة في الهلال غير موجودة في كل الفرق المحلية وكثير من الفرق الأفريقية والعربية ..
* وهذه ليس مبالغة وإنما حقيقة يعرفها صاحب كل بصر وبصيرة ..
* كشف الهلال حاليا من شدة (المواهب) لما ما قادر يلعب ..
* مرات بتلقى زول يقول ليك : (أنا والله من شدة الشبع حركة ما قادر إتحرك) ..
* الهلال (من شدة المواهب ما قادر يستقر على تشكيلة) ..
* مواهب رفيعة المستوى ، وخامات عالية الجودة ..
* على طريقة (سوق الجنوبيين و تجار الملابس) نقول : في الهلال عندنا خامات (ماركة عديل) ..
* زي جابسون ده ..(ماركة) ..
* ونزار حامد .. (ماركة) ..
* أبو عاقلة (ماركة) ..
* الطاهر سادومبا (عادي) ..
* أوكرا (ماركة) ..
* بشة الكبير والصغير الأتنين (ماركة) ..
* الثعلب (ماركة) ..
* أبراهومة (ماركة) ..
* شيبوب (ماركتين) ..
* ودي مجرد (عينة من الخامات العندنا) ..
* يبقي المشكلة في الهلال مشكلة إدارية وليس فنية ..
* أو بالأصح نقول : العيب في الهلال إداري وليس فني ..
* الخلل في الإدارة وليس فريق الكرة ..
* نقول عيب إداري وليس مشكلة إدارية لأن هنالك إشراقات إدارية كبيرة ..
* الهلال يشهد إستقرارا ماليا لا مثيل له في التاريخ القريب ..
* الهلال يشيد الآن (مدينة رياضية) لا مثيل لها في السودان ..
* هذه إشراقات إدارية لا ينكرها أحد ..
* ولكن هذه الإشراقات لا تغطي تلك العيوب الإدارية الواضحة ..
* عيوب يمكن تلخيصها في سطرين أتنين ..
* السطر الأول .. سماح الرئيس وموافقته على تدخل مجموعة من الناس في حاجات ما بتخصهم وهذا أشاع جو من الكراهية داخل المجتمع الهلالي وجعل (الإساءة) هى سيدة الموقف ..
* ده عيب لا يمكن أن يغطيه شيبولا ولا يمكن أن يغطيه تيتيه ..
* السطر الثاني في العيب الإداري هو : شعور نجوم الهلال بالغربة داخل الفريق وحالة الخوف والقلق والهواجس التى يعيشونها ..
* والسطر التاني ده بالذات سيقتل كل إشراقات الإدارة وسيجعل الهلال (مليان مواهب) بدون فائدة ..
* لو إستطعنا أن (نصفي النية) لن يقف أى فريق أمام الهلال لأن الهلال حاليا يضم مواهب لا خلاف عليها ..
* ولكن (سوء النية) يجعل خواتيم الأعمال سيئة وغير مرضية ..
* النية في كثير من الأحيان هى أصدق حتى من العمل ..
* جيب ورقة وقلم وأكتب أسماء نجوم الهلال ستجد أن المقارنة بينهم وأخوانهم في الفرق الأخرى معدومة ..
* المريخ ده تطلع منو أتنين بس .. محمد عبد الرحمن ورمضان عجب ..
* تاني ما في ..
* ورمضان عجب بأذن الله (الكبري بتاعو قرب يكتمل) ..
* تمسك هلال الأبيض بطلع منو مهند ومكورو بس والباقين عاديين ..
* الخرطوم الوطني طلع منو (التش ومحمد أدم) والباقي عادي ..
* لما تجي للهلال بتلقى الفرق شاسع جدا ..
* هسه أنا بقول ليك أسم لاعب وأنت شوف شبهو منو في كشف المريخ أو في كشف اى فريق اخر ..
* بشة شبهو منو ؟؟
* نزار ؟؟
* الثعلب ؟؟
* أبوعاقلة ؟
* جابسون ؟
* شيبولا ؟
* وغيرهم ..
* نجوم الهلال لا شبيه لهم في الأندية الأخرى بإستثناء الغزال والتش والغربال ..
* ده كلو بيأكد إنو العيب في الهلال بعيد كل البعد عن فريق الكرة ..
* نقول هذا وليس في البال خسائر معسكر الدفاع الجوي ..
* خسائر الدفاع الجوي لا تنفى أن الهلال مليان مواهب ..
* ولكن قلوب اللاعبين (شتى) والجو مكهرب جدا ..
* ما في أمان وسط اللاعبين ..
* ودي كارثة يا الكاردينال ..
* والمكابرة ما بتنفع في الحاجات دي ..
* الصرف الصرفو الكاردينال ده لو ما لقى جو معافى سيروح مع الريح ..
* نطلب من الكارينال حاجتين أتنين لا ثالث لهما ..
* الحاجة الأولى أعيد المحبة لمجتمع الهلال وأفتح أضانك للناس البحبو الهلال وأفتح قلبك للناس الما عندهم غرض ..
* الإساءة وتجريم الآخرين أسلوب لا يشبه الهلال وستدفع فاتورته لأن التوفيق يحتاج لبياض نية ..
* الحاجة التانية وهى الأهم .. أبعدوا من فريق الكرة وأتركوا اللاعبين في حالهم والمدرب في حاله ..
* من العيب أن يكون رئيس الهلال على خلاف مع (كبار الهلال وإعلام الهلال وبعض جماهير الهلال) ..
* رئيس الهلال هو رسول سلام وليس عدو ..
* رئيس الهلال هو الأكبر وهو الأعقل وهو الذي لا يتخذ قرارات ميتة ولا يصدر بيانات وهمية ..
* الهلال (حوش) يسع الجميع فلماذا هذا الضيق وكأننا في (بلكونة) ..
* حوش الهلال لا يضيق ولكن صدور الرجال ضاقت ..
* أتركوا الإساءات وتجريح الآخرين وصفوا النية عشان نتفرغ لعدو الميدان ووصيف كل الأزمان ..
* الكاردينال وصل الخرطوم ويجب أن يطرد الشيطان ويوحد أمة الكيان حتى ندخل العام الجديد بقلوب لا تحمل إلا (حب الله والوطن والهلال) ..
* ونركب صافنات ونجيبة (أم درمانية) وأصلو الزول بيموت والذكرى تفضل حية ..
* و..و..
* وصافي زي قلب الرضيع .
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019