• ×
الخميس 28 مارس 2024 | 03-27-2024
محمد عثمان الجعلي

المنتخب العماني والهلال السوداني

محمد عثمان الجعلي

 16  0  3856
محمد عثمان الجعلي

يلعب هلال العشق الجميل يوم غد الخميس بمعسكره بقاهرة المعز مباراة ودية هامة أمام منتخب عمان العسكري ، ولعلم الجميع أن منتخب عمان العسكري هو يتكون من منتخب عمان الأول ومن أندية المقدمة في دوري المحترفين العماني ، وهو بطل كأس آسيا للمنتخبات العسكرية عام 2013 ووصيف بطل العالم للمنتخبات العسكرية عام 2015 عندما خسر أمام منتخب الجزائر بثنائية في الدورة العالمية التي أقيمت بكوريا الجنوبية ، ومنتخب عمان لهذا العام سوف يلعب في نهائيات بطولة العالم العسكرية المقامة بالسلطنة في الفترة من 13 إلي 29 يناير 2017 ، وتضم 16 منتخباً عسكرياً مقسمة على 4 مجموعات تقود المجموعة الأولي مع السلطنة فرنسا وتقود الثانية ألمانيا والبرازيل والثالثة مالي والولايات المتحدة والرابعة مصر وبولندا ، طبعاً حاولنا نذكر من كل مجموعة منتخبين فقط ، لذا مباراة الهلال الودية مع منتخب بهذا الحجم هي مباراة دولة أمام دولة ( والهلال مافي شك حكومة والناس أهالي ) ، لذا يجب على الفرنسي لافاني وطارق والنقي أن يلعبوا هذه المباراة بالتشكيلة الأساسية نظراً لشراسة الخصم وهي إعداد جاد للهلال وتعتبر من أقوى تجاربه بمعسكر الدفاع الجوي ، ولقد فاز منتخب عمان على فريق غزل دمياط برباعية مقابل هدف ، كما فاز على الإسماعيلي بهدف أحرزه مهاجم ظفار والمنتخب الوطنى سعيد الرزيقي ، وإذا نظرنا لتشكيلة منتخب عمان العسكري نجدها تضم معظم نجوم المنتخب القومي وأندية دوري المحترفين من نادي ظفار هناك الحارس رياض سبيت ولاعب الوسط هشام الشعيبي وهو لاعب منتخب وفي الهجوم قاسم سعيد وسعيد الرزيقي ومن فريق عمان المدافع محمد المسلمي ومن السويق الحارس المخضرم أنور العلوي ولاعب الوسط العبد النوفلي ومن الشباب لاعب الوسط سعود الفارسي ومن العروبة المدافع سعد سهيل ومن النصر المدافع فهد نصيب ولاعب الوسط محسن جوهر وغيرهم من نجوم دوري المحترفين العماني ، ولابد لهلال السودان أن يمثله مكسيم والجريف وأبوعاقلة وأطهر وبوي وبشة وشيبولا وأوكرا ونزار وفي الهجوم تيتيه وكاريكا لأن معالم هلال 2017 قد بانت ، وإحترام الخصم واجب وطني ، وياطارق والنقي كلموا لافاني قولوا ليه إنت في الخرطوم مافي باريس والخسارة الكبيرة لاسمح الله لامرحباً بها !! لأن الجمهور يريد أن يشاهد تباشير النصر والكبير مع الكبار ، ورومانسية الخواجات كفاها ( أديناها حقها ) وكلموا الخواجة دا قولوا ليه إنت تقود فريق يشحعه تلاتة أرباع الشعب السوداني ,.. بالمناسبة الربع الأخير هلالاب زعلانين !! لذا لزم التنويه .
*** المريخ والمرخية وحكاية الثنائية
فريق المرخية كان حتي 2004 إسمه الإتفاق والمريخ ذاتو كان إسمه نجمة المسالمة ، عالم تغير أساميها زي الحرامية في مصر الواحد يقول لي أخوه ( إنت النهار ياقدع إسمك إيه !! ) وإحتفل الإعلام السالب بالفوز على حمام قطر الميت وهو من فرق الدرجة التانية ( إنتوا ياكافي البلاء أصلكم مادايرين تقوموا لي فوق ) ليه ماتلعبوا مع فرق المقدمة في دوري نجوم قطر زي الأخوية ( وكما ينطقه أهل الخليج بالتخفيف لخويا ) والسد والجيش والريان ، وحتي فريق الأهلي لورضي أن يلعب مع المريخ فهو ثامن الدوري القطري ، أما صاحب الثنائية المرخية التي أحرزها عاشوووووور ورمضان عجب وعمل لها الإعلام السالب عيد ميلاد فهو درجة تانية وهو خير إعداد لمباريات إتصالات جيبوتي وتفرغ زينة الموريتاني ونغيما الغيني ، الوصية بالمهلة لما تصلوا جيبوتي بالعافية والسلامة ماتنسوا جيبوا لينا معاكم فيزا ( أستغفر الله ) جيبوا لينا فول حاجات ( إتلقي هناك رخيص ) الأيام ديل الطماطم مارقة في السودان ورخيصة عشان لزوم الدكوة ، وبيني وبينكم ( مابنقدر نقول شئ ) لكن المرخية ذاتا ماعندها فرق من المريخ هسه لو شلنا التاء المربوطة الهوادة دي وجبنا الخاء قدام الياء ياهو المريخ ذاتو بس فاقد ناس بخيت خميس وواوا ، ناس المريخ قالوا محمد عبدالرحمن يبهر ويتألق ، الحاميهو يبهر شنو وإنتوا لاعبين قدام المرخية حالتو دي مشطوبنا بسطكم كدي كان أدينكم واحد من الكشف الأفريقي كان سويتو شنو !! ونحن دائماً بنضوق الجيران ومافي بخلاً طوّل العمر ولافي كريماً مات من الفقر ( والبديّ ربنا بديهو ) ولله در القائل ******** إذا ملكت كفي منالاً ولم أنل ...فلا إنبسطت كفي ولانهضت رجلي
*** على الله إخلاف الذي بذلته ... فلا مسعدي بخلي ولا متلفي بذلي
*** أروني بخيلاً نال مجداً ببخله ... وهاتوا كريماً مات من كثرة البذل
ونقول للجيران ( أرموا بالكم ) شهر يونيو عندنا ليكم مشاطيب ، بس إنتوا أحرسونا وأمشوا في خطراتنا إن شاء الله عوجة تب مابجيكم وكل بطل مجبور علي وصيفو .
*** الشبه الجد بين أبوشيبة والبصيرة أم حمد
تحكي قصص التراث السوداني أن البصيرة أم حمد إستغلت ثقة قومها فيها وعملت فيها حكيمة وهي ماعارفة ( التكتح ) ، فمرة في عجل دخل رأسه في قلة فذهب الناس للبصيرة أم حمد فقالت لهم أقطعوا رقبة العمل قاموا قطعوها قالت ليهم ( يلاّ كسروا القلة ) ثم أضافت أنا برضو ماني حية ليكم بوصيكم دبروا حالكم تاني براكم ، تذكرت البصيرة أم حمد وأنا أقرأ في مقال رئيس تحرير الصدي مامون أبوشيبة وهو يكتب في عموده ( لغم في الكورة ) تحت عنوان ( نصيحة لوجه الله ياإتحاد ) قلت بيني وبين نفسي أكيد الليلة مامون كتب بعقلانية وساب الهضربة ... أنا نسيت حكاية المظاهر خدّاعة ، وكان المقال يطلب من الإتحاد تقليد الدوري المصري ويجب أن نلعب بنظام المجموعتين ، ثم بدأ مسلسل الهضربة حيث ذكر المامون ( ياربي مامون علي شنو!! معقول علي عقول القراء !! ما أفتكر )المهم ذكر أبوشيبة أنه لا يستبعد أن تأتي القرعة خبيثة وترمي المريخ مع أحد الأندية الكبار في المباراة الأولي أو التانية زي أهلي شندي أو هلال الأبيض أو الخرطوم أو هلال العاصمة ، خاصة وأن المريخ ربما يعود يوم 22 يناير من جيبوتي بعد رحلة مرهقة بالمطارات واللعبية ماناموا ويلعبوا أول مباراة بعد 48 ساعة !! أنا غايتو أبوشيبة دا زمان كنت فاكر إنه يتحدث بلسان إدارة المريخ عندما تريد تمرير بعض الأجندة على الجماهير ... لكن من قال عايز علاء الدين يلبس قناع مطاطي واقي للوجه في معسكر تركيا عشان ناس الكاف مايعرفوه ( أنا من الوكت داك أخدت آخرو ) ، ونقول لي مجدي شمس الدين عليكم الله برمجوا للمريخ مباراته الأولي مع تريعة البجا والتانية مع الشرطة القضارف عشان البصيرة أم حمد الحمراء دي تتفرغ لمهاجمة التحكيم بس !! والإعلام السالب مازال يمارس هواية خداع الذات .
*** همسة الوداع
حبايبنا الحلوين سجلوا خلال العشرسنوات الماضية 47 محترف من 4 قارات هي أمريكا وأوربا وآسيا وأفريقيا وأنا بقول 48 محترف عشان الدراسة غفلت ألوك أكيج من جنوب السودان ، وسوف نذكر نماذج فقط عشان المساحة ، من البرازيل باولينو ومن البوسنة نجاد ومن اليمن علي النونو ومن العراق علاء الزهرة ومن المغرب الدافي ومن تونس النفطي ومن فلسطين رمزي صالح ومن السنغال شيخ ديوب ومن مالي لاسانا ومن توغو أبالو ومن زامبيا ساكواها ومن غانا غاندي ومن كينيا آلان وانغا ومن ساحل العاج واوا ومن بوركينا فاسو كوة تراوري ومن أثيوبيا شيلمص ومن يوغندا جمال سالم ومن رواندا كاسروكا ومن الكاميرون هامان ومن مصر فرعون ( الحضري ) ، عن إذنكم أقيف حدي هنا يدي وجعتني !! وبهذه المناسبة نهمس في أذن الإعلام الأحمر دا فريق كوورة ولا الأمم المتحدة ؟ مجرد سؤال .

انقر هنا لإجراء أيٍّ مما يلي رد أو إعادة توجيه
تم استخدام 0٫43 غيغابايت (2%) من 15 غيغابايت
إدارة
البنود - الخصوصية
آخر نشاط للحساب: قبل 21 دقيقة
التفاصيل


Aljaali Usman
امسح للحصول على الرابط
بواسطة : محمد عثمان الجعلي
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    ابوحسن 12-29-2016 04:0
    لك التحية اسناذتا محمد عثمان واللي يا الجعلي ما قصرت قاعد تقدم نصائح الي ناس الصقوة وافكار جميلة انشاءالله بستفيدو منها
    هههههههههههههههه
  • #2
    منعم ابوناصر 12-29-2016 11:0
    تحيلتى جعلينا اولا نرحب بأخونا الوصيفى عزالدين ابراهيم ونقول اليه حياك الله فى رحيفنا العامر والجامع لكل شئ جميل ومفيد وهذا ماحببكم فيه الحمدلله انك مامشيت وراء ناس ابوشيبه ومزمز مدفور الوالى وكابو راقصات لانكم تعرفون مايفيدكم جيدا وهذا يحسب لكم انكم من الصفوه العقلاء وليس اصحاب الغرض والمصالح الضيفه وايضا انكم تعرفون ان اسياد البلد صدرهم واسع يسع الجميع وهذه هى الرياضه التى لاتعرفون منها الا ماندلا الذى لم يعترف به حتى الان والدليل على ذالك التصنيف تبعكم الذى لم يبارح محله تمهيدى حتى الان والى اشعار اخر
  • #3
    Allaelden Hassan 12-29-2016 01:0
    هرار ساكت اختشي هلالك بيلعب مع فرق مع الببسي والكولا والنصر واسماء ماسمعنه بها يا خي اختشي وخلي المريخ لاهله اتغد فريقه يا هرار افندي
  • #4
    السما الأحمر 12-28-2016 11:0
    ود عثمان ما كنت مرهف وقلبك طيب مالك تغيرت ولا انا نسيت ما كل الرشاشات عندهم عقدة سيد البلد ودايرين سيد اللبن يحل محل زعبم أندية السودان مريخ العز قال ايه 75في المائة من شعب السودان هههههههههه
    أنتظر بعد لما يبدا العمل اشوف ابو أب زرد بعمل شنو
  • #5
    ودعقيده خلف 12-28-2016 11:0
    استاذ الجعلي لك التحيه بس كدي فضحت نفسك وجهازك الفني بان كل تجارب صفرابك الوديه فالصو ما دام احترفت بالمنتخب العماني العسكري شرس اما بالنسبه لي اجانب المريخ احسن من اجانبك امثال وارقو واتوبونج ياحمبرا قباض الطير
  • #6
    فيصل الاقرع 12-28-2016 10:0
    سلام جعلينا ماشاءالله نشاط مانسحرك زي ما كل يوم بتعرض اقمارناللعين الحمراء وشراره والمرخيه والمريخ ووادي مريخ واحد ياالجعلي ودوله امام دوله دي حلوه منك وابوشيبه بتاعك دا وجعت بي رأسنا يااخي خلي في خرفه دا وزي ما قلت امدحوا في محمد عبدالرحمن الطشاش في بلد العمي شوف ذكرت لينا محترفين النريخ ودولهم انا خايف حقننا اكونو اكتر منهم
    ولك التحيه جعلينا
  • #7
    ابو صفوة 12-28-2016 09:0
    والله يا مشجع المتمة الاصبحت مدرب في غفلة من الزمن وبقيت توصي في طارق ولافاني 0.....اركز انت خفت ولاسنو ماقلت جهلي اقصد جعلي ...اركز وجيب القفه ...وكمان اصبحت كاتب عمود وتنتقد كمان في الصحفيين المحترفين والله مشكلة ...عندي ليك وصية ارجع الصالحية تاني كمل باقي تأهيلك في التدريب والاعلام وتعال ناطح الكبار يمكن تقدر ....محمد عثمان قالوا فريق المتمة في اتحاد شندي محتاج مستشار فني واعلامي قالوا جحا اولي بلحم تورو ...تحياتي صديق قديم
  • #8
    نعمان عمر 12-28-2016 04:0
    اعوذ بالله من فسو الكلام ومشاط الشعر القورقد ..وعدم الموضوع
  • #9
    الامين السمانى 12-28-2016 04:0
    التحية والسلام اخوى الجعلى وشايفك خايف من المنتخب العمانى الذى هزم الاسماعيلى فى عقر داره وبالعربى بل راسك اذا ماواثق من شباب الهلال ولكن فى النهاية هى اعداد واستحمل الضرب وسل سيفك اقصد قلمك لناس ابوشيبة المخرف ومزمز ابو القنابل -- والهلال والمريخ بيخافوا من التجارب القوية لانها بتفضحهم عديل عشان كده المريخ لعب مع المرخية والهلال مع النصر وحتى وادى دجلة الا اسم مدربه ميدو !!! هل فاز بالدورى المصرى او كاس مصر ؟؟
    ومن الامم المتحدة كلها لم نجد محترف يقولوا عليه وقدر المصارى نأتى بيهم وصحافتنا تتغنى بيهم وكأنهم ابطال العالم !!! ياخى اختشوا شوية ولافرق بين الهلال والمريخ فى ذلك ---
    لقد جمعنا الرحيق باخ مريخابى اصيل ويستحمل العكننة المحببة بين القلعتين -- تشرفنا بكم كثيرا اخى عزالدين ابراهيم -- لكن ماكان احسن تسمع كلام الوالدة وتتبع اخوانك ديل بدل البهدلة الحاصلة لكم وترتاح من قنابل مزمز ؟؟؟
    ودمتم للوطن والهلال فى حفظ الرحمن ورعايته
  • #10
    عزالدين ابراهيم عبدالرحمن 12-28-2016 04:0
    وبعدين مالك اليوم العمود قدر دا انا ماشي بسرعه 240 كيلو في الساعه يالله يالله في ساعتين حتي خلصت المخ ما خلاص لما نوصل النص ننسي انت كاتب شنو في البدايه لكن اليوم عرفت ليك طلعت ورقه ماسك العمود بشوي شوي واكتب رؤوس مواضيع وجيت نزلتها ليك برضو نسيت المشاطيب انت السنه دي تسجيلاتك كلها دحين مو مشاطيبنا 2 معطوبين وواحد قصير فرفاره وفرفره غير مجديه افريقيا والبصيره فطومه نسيتوها والله شنو اسكت يا جعلي والله من شده ما قادري تشطبكم من تشجيع الهلال
  • #12
    عزالدين ابراهيم عبدالرحمن 12-28-2016 04:0
    اولا يا استاذ محمد عثمان يا جعلي منتخب قطر الذي لعب مع المريخ مشارك في كاس العالم للمنتخبات العسكريه في المجموعه الرابعه مع البرازيل وهولندا والكاميرون لا تخم الناس ساكت وبعدين فعلا زي ما تحدثت عن الكرم المريخ من شده ما كريم لمن قسمنا لعيبتنا وسوينا الهلال اها في زمتك ارجل مننا في اكرم مننا في قزم لف انت وهليلك وبعدبن با حبيبنا انتو خلال العشره سنوات الماضيه مدربينكم الجيتوهم للهلال اكتر من قوات اليوناميد بالسودان قولو كلام يتبلع يا هلالاب ولا تتكلمو في سيد سيد بلدكم الزعيم المريخ مريخ ماااااااااااااااااانديلا الحارق فشافيشكم دا وسلام يا الجعلي
  • #13
    عزالدين ابراهيم عبدالرحمن 12-28-2016 04:0
    اولا يا استاذ محمد عثمان يا جعلي منتخب قطر الذي لعب مع المريخ مشارك في كاس العالم للمنتخبات العسكريه في المجموعه الرابعه مع البرازيل وهولندا والكاميرون لا تخم الناس ساكت وبعدين فعلا زي ما تحدثت عن الكرم المريخ من شده ما كريم لمن قسمنا لعيبتنا وسوينا الهلال اها في زمتك ارجل مننا في اكرم مننا في قزم لف انت وهليلك وبعدبن با حبيبنا انتو خلال العشره سنوات الماضيه مدربينكم الجيتوهم للهلال اكتر من قوات اليوناميد بالسودان قولو كلام يتبلع يا هلالاب ولا تتكلمو في سيد سيد بلدكم الزعيم المريخ مريخ ماااااااااااااااااانديلا الحارق فشافيشكم دا وسلام يا الجعلي
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019