((())) هل تسعون لتقسيم الهلال ؟

هل تريدون الهلال هلالين ؟

وهل نقسم البلاد نصين ؟

فالكل يحمل سكينا وطعنا في الهلال

ومازالت تلك المقالات الناريه مستعره ما بين رئيس ورئيس

ولا حل في الافق غير تقسيم الهلال الي اهله

هلال عزة السودان وهلال الاصالة والصدارة وهلال المستقبل وهلال الاصلاح الجديد

او هلال الكاردينال وهلال الارباب وهلال طه وهلال البرير

وما اقبح هذه المسميات وما اقبح انصارها

فنحن نبغض كثيرا كل الاحزاب السودانيه

دايرين يطبقوها في الانديه الرياضيه

في السياسه حزب الامة انقسم الي احزاب

حزب للصادق المهدي

وحزب لجناح الهادي

وحزب لمبارك الفاضل

وكلهم فاشلون

والاتحادي انقسم الي احزاب كثيره

حزب باسم محمد عثمان الميرغني

وآخر باسم محمود حسنين

وآخر باسم احمد بلال

وكلهم فاشلون

والاسلاميين كذلك انقسموا ما بين وطني وشعبي

وهم ايضا فاشلون

وانتصر الكيبورد علي الجميع

وقد يفشل الهلال اذا انقسم الي جناح للارباب وجناح للبرير وجناح للكاردينال وجناح لطه

وقد تذهب ريحهم وتتشتت الجماهير ما بين هذا وذاك

وتنقسم الجوهرة الي اربعة اجزاء

وناس يشيلوا الكشافات

وناس تشيل النجيله

ونصف ملعب ربع ملعب مش مهم

وكل حزب بما لديهم فرحون

والمهم انا الرئيس الفاهم للكورة والقوانين فصفقوا لي

وطبلوا لي وغنوا لي

وعاش الرئيس

وكل واحد يدفع قرشين لفنان يغني له احلي الاغاني البطوليه

وامشي لي باريس

وابني مستشفي زي صلاح ادريس

او اشرف سيد احمد ولقبه كاردينال هيبه ود اصول وراجل ود رجال

او نحن عاشقين الهلال نحن جمهورك يالبرير سير سير سير سير يابرير

لقد كنا نتمني ان تتوحد صفوف اهل الهلال ولكنهم طغوا وتكبروا

وكنا نتمني ان يتوحد رؤوساء دعما للرئيس المنتخب

ولماذا لا يكون للهلال مجلس شوري او مجلس اربعيني او مجلس خمسيني او مرجع لجميع اقطاب الهلال

فكبار الهلال بعيدون كل البعد وكأن الهلال شركة خاصه للكاردينال

نطالب بشده تكوين مرجعيه تحافظ علي هذا الكيان الجامع

نطالب بمؤتمر جامع يجمع كل اهل الهلال تناقش فيه كل هذه الخلافات

لا نريد الجمعيه العموميه التقليديه التي يملأها البعض صريخا وعويلا

نريد مؤتمر جامعا وموسعا لكل اهل الهلال تشارك فيه حتي الجماهير

فما يحدث في الهلال ليس بديمقراطيه عقلاء

فلا الادارة ديمقراطيه

ولا المعارضه ديمقراطيه

ولا الرؤساء ديمقراطيون

والكل يعمل لمآرب اخري

ادركوا الهلال قبل التقسيم


((())) خدوهم علي قد عقلهم :

اذا اردنا ايقاف شماتة اهل المريخ للهلالاب علينا ان نعلن لهم الآتي :

*** فريق المريخ لم يؤسسه اليهود وقد تأسس قبل فريق الهلال

*** فريق المريخ فاز بالدوري الممتاز اكثر من الهلال

*** فريق المريخ يملك ملعبا افضل من ملعب نادي الهلال

*** فريق المريخ يملك طابق شاخور الما مكسور وهو اجمل من مقصورة الهلال الجديده

*** فريق المريخ يملك فنايل اجمل من فنايل نادي الهلال

*** فريق المريخ وبدون النفرات اغني من فريق الهلال

*** جمال الوالي اغني من الكاردينال

*** تسجيلات المريخ افضل من تسجيلات الهلال

*** محترفي المريخ افضل من محترفي الهلال

*** بص المريخ الحالي افضل من بص فريق الهلال

*** كشافات نادي المريخ القديمه افضل من كشافات نادي الهلال

*** نجيلة نادي ما فيها حفر واحسن من نجيلة نادي الهلال

*** جماهير المريخ ٩٩،٩٪ من جماهير السودان وجماهير الهلال هي الباقي

*** انتصارات المريخ التجريبيه اكثر من انتصارات الهلال التجريبيه

*** المريخ سيفوز بدوري كاس ٢٠١٧

*** الحكام دايما يظلموا المريخ في كل المباريات

*** المريخ هو مع كبار افريقيا وليس الهلال

*** المريخ ليس نادي شكاوي

*** المريخ لا يهرب من مباريات الهلال حتي في زمن زيكو

*** المريخ ليس فريق الحكومه

*** باسكال وكلاتشي والعاشور شباب صغار جدا

*** الغربال احرف من ميسي وهو غير مصاب

*** المريخ مفروض يكون مع الكبار وحياتو غلطان


((())) نذير الشؤم يلازم المكان :

وقد يعيد التاريخ نفسه ويسقط المريخ في التمهيدي

والله يجازي اللي كان السبب و ايام البايرن ميونخ الخادعه

واسطوانة عالمي ولا تكلمني

والدوحه القطريه والزعيييييم

ومباريات المريخ التي ملأها الاعلام ضجيجا

ليعود المريخ ويسقط صريعا امام كمبالا سيتي الذي كان يعسكر بهدوء في ضواحي كمبالا

وهدفين يوغنديين زي النار خرج بعدها الوصيف من التمهيدي يندب حظه العاثر

وكله منك يا اعلام التطبيل

وتواري حينها مزمل

واختفي سلك

وعاد كابو الي الصفحات الفنيه

ونحن ما قلنا عالمي ولا تكلمني

وما قلنا ان ٥٠٠ صحفي يحضرون تمارين المريخ في الدوحه

وما قلنا ان الصحف الالمانيه تشيد بالمريخ ( رغم ان النتيجه مدفوعة الثمن ومتفق عليها )

وده كله من اعلام الهلال .

وكان موت السفير الروسي وسقوط طائره روسيه وقتل جميع ركابها

فما هو السبب يا تري ؟

هل سوء الاحوال الجويه ؟

ام ان نذير شؤم قد حل بتركيا والروس ؟

وبكي كل اهل انطاليا فالموسم السياحي ٢٠١٦ مضروب

وهو الاسوء علي الاطلاق

وخسائر فادحه رغم ان المريخ قد دفع في فندقين

وانقطع السواح عن انطاليا هذا الشهر وهذه السنه

وقالوا انها سنه كبيسه

وما هو السبب يا تري ؟

هل هو ارتفاع اسعار الطماطم ؟

ام ان هناك نذير شؤم قد حل بانطاليا ؟

وفي الدوحه جاءت الكتاااااحه

كتاااااحه لم تشهد قطر مثلها منذ سنين

والله يستر علي قطر

وما هو السبب يا تري ؟

هل هو تغير في المناخ العالمي ؟

ام ان هناك نذير شؤم قد حل بقطر


محمد حسن شوربجي