• ×
الإثنين 2 أغسطس 2021 | 08-01-2021
محمد عثمان الجعلي

محبوب الأقمار مع التسعة الكبار

محمد عثمان الجعلي

 19  0  3216
محمد عثمان الجعلي

أصدرت حكومة أفريقيا الكبرى للرياضة ( الكاف ) يوم الأربعاء الماضي قرعة الأبطال والكونفدرالية للعام الجديد ، وهناك حافز سنوي يقدم للكبار عبارة عن الإعفاء من اللعب في التمهيدي لأن المسيرة المضيئة لهذه الفرق الشامخة خلال الخمس سنوات الماضية وجمعها أكبر عدد من النقاط يؤهلها لتجنب اللعب مع ( ناس قريعتي راحت ) ، وكبار هذا العام تسعة أبطال وينتمون لسبع دول منها خمس دول عربية ودولتان من غير العرب ، طبعاً الناس كلها عشمانة تعرف هوية هؤلاء الكبار ، يلا نقول ليكم إخوتي الأعزاء ... من تونس الترجي والنجم الساحلي ومن مصر الأهلي والزمالك ومن المغرب الوداد ومن الجزائر إتحاد العاصمة ومن جنوب أفريقيا صن داونز ومن الكتغو مازيمبي وهناك بطل مع الكبار من أرض النيلين أرض الشمس المشرقة أرض السودان الحبيب ... أنقروا البطل دا مين !! لو في زول ( شليق ) قال لي المريخ !! بقول ليه ياراجل حرام عليك !! قول أستغفر الله ( ومضمض خشمك بي ديتول ) ، الفريق البطل ومن طينة الكبار يا سادتي الأماجد هو هلال العشق الجميل ( والله زي ما أقول لكم ) من غيرنا يعطي لهذا الشعب معنى أن يعيش وينتصر !! الحمد لله البلد فيها هلال الساجدين والناس الصالحين كان ماكدي ( كان الضيم كتلنا !! ) ، وسبحان الله ربنا أنصف بطل الثنائية من الهجوم الكاذب للإعلام السالب وجاء الإنصاف من الكاف ، وياعناقيد العنب المساكين ليها رب ، والهلال هو الفريق العربي الوحيد الذي وصل مربع الذهب للأبطال عام 1966 ومازالت قافلة النور تسير ، لذا لم يكن مستغرباً أن يرتفع سقف الطموحات للأقمار إدارة وإعلام وجمهور ويقولوا إن هدفنا هذا العام هو الأميرة السمراء فالهلال ماض وحاضر ومستقبل ولله در القائل
*** أين أزمعت أيهذا الهمام ...نحن نبت الربي وأنت الغمام
*** كل يوم لك إحتمال جديد ... ومسير للمجد فيه مقام
*** وإذا كانت النفوس كباراً ... تعبت في مرادها الأجسام
*** فكثير من الشجاع التوقي ...وكثير من البليغ السلام
تكفي مشاركة سيد البلد من دوري 32 ليعطر سماء أفريقيا ومشكورة الكاف وهي تنزل الناس منازلها ، بالمناسبة الناس مقامات والأندية قامات !! لذا لزم التنويه .
*** قطار التمهيداب سار ياشباب
يشارك السودان هذا العام بأربعة فرق حيث يلعب الهلال في دورى 32 في الغالب الأعم مع توسكر الكيني يوم 11 مارس بالخرطوم ومباراة الرد بعد إسبوع بنيروبي لأن بورت لويس بطل موريشيوص لن يقف أمام بطل كينيا في التمهيدي ، أما أهلي شندي فهو أيضاً معفي من التمهيدي وسوف يواجه سوبر الجنوب أفريقي الذي سوف يتخطي ألجيكو بلس بطل مدغشقر وهلال الأبيض سوف يواجه في تمهيدي الكونفدرالية سانت ميشيل بطل سيشل وبعده سوف يواجه سانغا باليندي ممثل الكنغو ، طبعاً المريخ تركناه في الأخير ليس لأنه ( في آخر المراح دائماً تجئ الفترانة ) لكن الجيران الونسة معاهم حلوة ، صحيح أن المريخ سوف يبدأ مشواره مع التمهيداب يوم 11 فبراير أمام ( سوني إيلا نغيما ) بطل غينيا الإستوائية والمريخ سوف يلعب قبل الهلال بى شهر ويمكن أن تسمي هذا الشهر ( منحة تفوق ) لأولاد الراحات ، يلا ياشباب عايزين نتكلم عن غينيا الإستوائية وعن فريق سوني نغيما ، أول حاجة وصية للجيران عشان ماتدقسوا ، في إتنين ... غينيا الإستوانية وعاصمتها مالابو وغينيا بيساو وعاصمتها بيساو ، ولما تعملوا الحجز أعملوا حجز الطيران على مالابو ماتمشوا بيساو ونبدأ رحلة البحث بالمطارات الأفريقية وسكان غينيا حقتكم 600 ألف نسمة والعاصمة مالابو سكانها 100 ألف ( يعني أصغر من الحاج يوسف ) واللغة الرسمية هي الأسبانية وتعتمد الدولة على النفط والكاكاو والموز والفريق يلبس فنيلة صفراء وشورت أزرق طبعاً سوني نغيما ( حمام ميت ) وحمام ميت يلاقي حمام ميت !! وإن شاء الله حمام الجيران ماهو دابو ...وسوف يهزم حمام مالابو ... والفريق الغيني حديث المشاركة بالأبطال .
*** رسائل غنائية رياضية من الفنان عبدالرحمن عبدالله
بمناسبة منازلة المريخ لفريق سوني نغيما في التمهيدي نريد أن ترسل 3 رسائل من أغنية (جدي الريل أبوكزيمة ) كلمات الشاعر محمد عبدالرحيم غناء الفنان عبدالرحمن عبدالله ، والرسالة الأولى من عمر النقي وهو يرفض تصوير مباريات الأقمار بمعسكر الدفاع الجوي خوفاً على هذه الأقمار من العين الحمراء وشرارة وأن هناك توصية من الإدارة بذلك وتقول الرسالة *** ساعة ساعة أنا بتاوقن ... ولحظة مابقدر أفارقن ...لي عيوني الشوق حارقن ... والدموع داير تغرقن ...والدن قال مابمرقن ...خائف النظرات تلحقن ...وخائف العين لاتعوقن ...من وين تاني بتلقن ... ولي يحفظن الخالقن ، والرسالة التانية من فاروق جبرة يرد على الذين يعتقدون أن معسكر أنطاكيا كان سجن غوانتنامو في البرد والمطر ويقول للصفوة السحن في المعسكرات طبيعي وسوف تروا نتيجة المعسكر عندما نواجه فريق نغيما في الأبطال وتقول الرسالة *** متلي كم مات بالشجن ...وقبلي ود الزومة إنسجن ...جدي الريل أبوكزيمة ...تعال نتمشى في الغيمة ...ماغيمة ريد تكب في رهيدة ... شواطيهو الخدر ديمة ... (تعال نتمشي يا أبونغيما ) ، والرسالة الأخيرة من حكماء الهلال وهم يجمعون الكاردينال مع أقطاب الهلال وإعلامه من أجل طي صفحة الماضي ومسانده الأزرق في مشواره القاري وتقول الرسالة *** نصارحك لا تخاف إنسان ... ننسى الماضي والأحزان ... نلاقي القمري لابس الطوق يغني يغني للوجدان ... يفر جنجيهو زي ( توبة ) يصفق للزهور نشوان ، ونسأل الله أن يجمع شمل الأهلة على الصفاء والنقاء كالعهد بهم دائماً .
*** همسة الوداع
حبايبنا الحلوين كراعهم باردة !! ( صلاة محمد ) بس المرة دي جات خفيفة على مستوي السفراء راح فيها السفير الروسي في أنقرة ، ربنا يحفظ سيف خواجة القلم الهلالي الصادق وعثمان جميل القطب المريخابي المتحمس بالدوحة ، والمريخ حام قارتين أوربا وآسيا عشان يلعب مع إتصالات جيبوتي في الدورة العربية ومع نغيما في تمهيدي الأبطال ، نحن لما نلعب تمهيدي نتعقد عديل ونخجل من جماهيرنا !! وبهذه المناسبة نهمس في أذن الإعلام الأحمر معقول لعب التمهيدي مابعمل ليكم إحباط ولا ( خمة نفس ) !! ولاّ من خلىّ عادتو قلت سعادتو ؟ مجرد سؤال .
امسح للحصول على الرابط
بواسطة : محمد عثمان الجعلي
 19  0
التعليقات ( 19 )
الترتيب بـ
الأحدث
الأقدم
الملائم
  • #1
    منعم ابوناصر 12-25-2016 06:0
    ياعزالدين ابراهيم لاتكون رجل فاقد منطق بالنسبه للكأس لما سيدالبلد جاب كاس انت لسه مابتعرف المريخ من التحرير ولكن كما قلت سابقا لانكم فاقد تربوى وحدود معلوماتكم ابوشيبه وكابو راقصات ومزمز مدفور الوالى ومعاض السلوك وسلك العريان وهولاء خواء لايدرون عن شى وحدود معلوماتهم عند الدفع فى بص الوالى غير كده هم يطبلو وانتم ترقصون لاعلم لكم بشى الامايكتبه هولاء المطبلاتيه اذا كنت تتكلم عن مانديلا هذا الكأس لا اثر له فى الكاف ولاماكان وصيفنا الدائم تمهيدى اذا كان عندكم شى معترف به ومسجل ماكنتم تمهيداب افهمو ياوصايفه وارجوا منك ان يتسع صدرك ولاتكون ك حال بعض الوصايفه عديمى المنطق اننا نظن فيك الخير
  • #2
    ابن الوهاج 12-25-2016 05:0
    سلام جعلينا الهمام الصحفي المخضرم و كل الحضور الأنيق. تاني رجعنا لي مقالاتك المهربكة زي قفة الحلبية .. أي أقمار تتحدث عنها ؟ ياأخي ما تخجلوا انتو امبارح مجلودين من وادي دجلة و فريقكم السنة دي ما بركز لي كبار السودان خلي كبار افريقيا .. افريقيا دي حقتنا نحن يا الجعلي جبنا الكؤوس جوا" من أدغالها .. الجعلي طالعني ..
  • #3
    ابوحسن 12-25-2016 02:0
    كل التحية استاذنا محمد عثمان معروف خارجين عن اي مثقفون في العالم انوا اول ما يزكر اسم السودان بعده ! الهلال السوداني
    مفروض ناس الصفوة تكون روحم رياضية ويحترموا ايوالهل لاانوالهلال ديمه مع الكبار والمريخ مع الصغار دي ما اول مرةالتصنيف
    دا من الكاف ولاشنو يا ناس الصفوة
  • #4
    ابو خالد 12-25-2016 09:0
    الزعيم .. الصفوة ... المحمولة جوا وارضا وفي النهاية تحصيل حاصل تمهيــــــــــــــــــــــــــــــــــــداب وعيني لا تحزن ...
  • #5
    البابا 12-25-2016 09:0
    600 ألف بس ياجعلينا يعني اليوم داك لو رئيس اللجنة الشعبية مات المباراة الا كان تلعب بجدون جمهور ههههههههههههههههههههههههه.....
    ثم ثانيا ياجعلكو أنت وصيف السنين ده بجيب الفرق الميتانة دي من وين؟
  • #6
    البابا 12-25-2016 09:0
    600 ألف بس ياجعلينا يعني اليوم داك لو رئيس اللجنة الشعبية مات المباراة الا كان تلعب بجدون جمهور ههههههههههههههههههههههههه.....
    ثم ثانيا ياجعلكو أنت وصيف السنين ده بجيب الفرق الميتانة دي من وين؟
  • #7
    منعم ابوناصر 12-25-2016 09:0
    سلام جعلبنا مشكوره الكاف وهى تنزل الناس منازلها كلام كبير فى حق الكبار ولا عزاء للتميهيداب بعدين ياالجعلى حبايبك الحمر فصاحه بس وطول لسان هم لايعرفو غنيا بيساو من غنيا الاستوائيه والله ناسك طلعتهم حمام ميت مافى مشكله خليهم يستعينو بالدكتور على قاقرين لانهم فاقد تربوى @@@حلوه شديد رسائلك وموجه صاح وفيها معلومات مفيده@ ناس تركيا يحمدو ربهم وقت الكج بتاع حبايبك الحمر وقع فى السفير لانهم معروفين تلاته من المعسكرات فى بلاد مختلفه خلو عجاجتها رابطه الى الحين انااقترح عليهم المسكر القادم يكون فى اورشليم او بورما
  • #8
    ابو حازم 12-25-2016 09:0
    سلام عليكم حبيبنا الجعلي، وبراحة على ناس قريعتي راحت الفيهم مكفيهم، وبرضو جيرانا وما صاح نعمل في الجيران كده.
    اجمل تعليق بمناسبة التمهيدي وصلني امس في الواتساب ان قناة طيور الجنة فازت بحق النقل لمباريات التمهيدي ههههه.
    نتمنى للجيران اللحاق بسيد البلد في الادوار الجاية وما عايزين نسمع اغنية "مريخنا طار طار الليلة طار".
    وتحياتي
  • #9
    عبدالرحيم العوض 12-25-2016 07:0
    الجعلي حبيبنا في البداية ازيك وامورك ثانيا قلت من غيرنا يعطي لهذا الشعب معنى أن يعيش وينتصر ...بس وريني اديتوه شنو انجاز الا يكون كاس الاعفاء من المجموعات...مبروك تستاهلوا طبقة الانجاز
  • #13
    ودعقيده خلف 12-24-2016 11:0
    استاذ الجعلي لك التحيه دوما البلقي هواهو بضري عيشو لكن صلح غلطك لانك دائم بتغلط السحن في المعسكرات طبيعي ولا السجن يا حمبرا قباض الطير ) في الختام الاخوه الكرام تقبلو تحيات اخوكم المشتاق ليكم دائما عبدالله بلل القرياتي تلفون واتساب
  • #14
    فيصل الاقرع 12-24-2016 08:0
    سلام جعلينا انا شخصا بعتقد ان اللعب في التمهيدي فيه اهانه لكنه مفيد لانه يعتبر جزء من االاعداد وشكرا علي المعلومات عن (نغيما) وغينيا يعني قلت لي عدد سكانها قدر مجلس ادارة االمريخ مع موظفي النادي وبعد كدي ان شاءالله ما ابلطوا في التمهيدي كالعاده
    بارك الله في د النقي المازي ناس واحدين نثرين دررننا للغاشي والماشي والعين الحمراء وشراره
    قال امصمص خشمه بالديتول فكرك الديتول اكفي ياجعلي دا ديتول ومعاهو ركعتين وياساتر
    ولك التحيه وارجا الجاياك من ود عقيده
  • #15
    عزالدين ابراهيم عبدالرحمن 12-24-2016 07:0
    البطل بسجل في السجل الزهبي للاتحاد الافريقي نش واحد يعفو من التمهيدي يشوفه انتصار وفرحان عيب 88 سنه كاس واحد ما جايبو ويقول ليك من كبار القاره تتقرقر سم هاري .......
  • #16
    الامين عبد القادر 12-24-2016 07:0
    التحية والسلام اخوى الجعلى وهنالك زعيم وفى التمهيدى معقولة ؟؟ وقبيل قلنا البلدى كبيرها وزعيمها اسياد البلد ولابد ان يعاملوا معاملة الكبار ومن حقنا أن نحلم ونتعشم فى كأس الاميرة السمراء والذى لم ولن يقف طموحنا عنده لاننا ببساطة اسياد البلد وأقمار البلد وباذن الله لن يخذلنا شبابنا فى هذا العام --
    وربنا يصلح الحال ويجلس كبار وحكماء الهلال حتى يعود مارد افريقيا عملاقا يشق احراش افريقيا صوب الحلم الافريقى وليس بغريبة على حكماء الهلال وجمع ووحدة الصف --
    ودمتم للوطن والهلال فى حفظ الرحمن ورعايته
  • #17
    عزالدين ابراهيم عبدالرحمن 12-24-2016 05:0
    البطل بسجل في السجل الزهبي للاتحاد الافريقي نش واحد يعفو من التمهيدي يشوفه انتصار وفرحان عيب 88 سنه كاس واحد ما جايبو ويقول ليك من كبار القاره تتقرقر سم هاري .......
  • #19
    الامين عبد القادر 12-24-2016 05:0
    التحية والسلام اخوى الجعلى وهنالك زعيم وفى التمهيدى معقولة ؟؟ وقبيل قلنا البلدى كبيرها وزعيمها اسياد البلد ولابد ان يعاملوا معاملة الكبار ومن حقنا أن نحلم ونتعشم فى كأس الاميرة السمراء والذى لم ولن يقف طموحنا عنده لاننا ببساطة اسياد البلد وأقمار البلد وباذن الله لن يخذلنا شبابنا فى هذا العام --
    وربنا يصلح الحال ويجلس كبار وحكماء الهلال حتى يعود مارد افريقيا عملاقا يشق احراش افريقيا صوب الحلم الافريقى وليس بغريبة على حكماء الهلال وجمع ووحدة الصف --
    ودمتم للوطن والهلال فى حفظ الرحمن ورعايته
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019