• ×
الإثنين 2 أغسطس 2021 | 08-01-2021
محمد عثمان الجعلي

رحيق الختام

محمد عثمان الجعلي

 13  0  3436
محمد عثمان الجعلي
نعود اليوم للمفكرة ونبحر بعيداً عن السواحل الرياضية لقد إستوقفني تجاوب أحباب الرحيق هلالاب ومريخاب مع فكرة المفكرة السابقة التي تتعلق بتكوين حزب ( قفة الملاح ) الذي يضم في عضويته أهل الإقتصاد والزراعة وعامة الشعب الطيب المضياف فقد إقترح القراء الكرام رئاسة الحزب للأستاذ الأمين جيفارا من الهفوف والسكرتير فيصل الأقرع من جدة والناطق الإعلامي الأستاذ محمد الفاتح ( كتاحة ) من دبي ولو سمح لي الإخوة الكرام نقترح الأستاذ سيف خواجة من الدوحة للمكتب الإجتماعي أما أمين المال فهو أستاذنا أحمد الفكي من حائل وماتنسوا كمان ود الفكي زول ( مولانا ) وكان الخليفة الراشد عمر بن عبدالعزيز يعين حفظة كتاب الله في منصب أمناء بيت مال المسلمين في الولايات المختلفة فجاءته تقارير سنوية من الولاة تقول بأنا وجدنا في بعض هؤلاء الحفظة خونة فكان رد عمر لولاته ( غيرهم أخون !! ) ، ومنعم أبوناصر من الدمام للأمن (فتّح عينك ) يا أبوناصر ناس الجبهة والمعارضة مايخترقونا ، أنا عندي إحساس ( إيلا) إحتمال يطالب بالإنضمام للحزب خاصة أن رئيس الحزب جيفارا من الجزيرة الخضراء ، هناك خبر عن اليابان يوضح إهتمام هذه الدولة بالإنسان منذ الصغر حيث أن مدير المدرسة الإبتدائية في طوكيو يتناول وجبة إفطاره من بوفيه المدرسة قبل نصف ساعة من إفطار الطلاب حتي يتأكد من جودة وصحة الطعام المقدم للأطفال وأنه لايسبب لهم تسمم ، فقلت في نفسي ليت وزير المالية بدرالدين محمود ومعه وزيرة الرعاية الإجتماعية مشاعر الدولب ووالي الخرطوم عبدالرحيم محمد حسين عقدوا إجتماعاً مع ستات الكسرة والجزارين وباعة الخضار حتى يعرفوا تكلفة المعيشة الحقيقية للمواطن ويضعوا الأجر المناسب للموظف وفقاً لذلك... طبعاً بعد أن يكونوا زاروا بيوت بعض المعلمين والممرضين وصغار الموظفين ، لن تقسو عليهم ونقول لهم كونوا مثل الفاروق عمربن الخطاب لأنه ليس في الرعية عثمان وعلي وطلحة والزبير ( رضوان الله عليهم ) وكما نعلم أن الراعي يتأثر بالرعية ولقد أوضح ذلك إمام الفصحاء علي بن أبي طالب عندما قال له أحدهم منتقداً لماذا نجد عهد الصديق والفاروق عهد هدوء وأستقرار وعهدك أنت وعثمان إضطراب وثورات !! فقال له الإمام علي ( كرم الله وجهه ) لأن رعية الصديق والفاروق أنا وعثمان أما رعيتنا أنا وعثمان أنت وأمثالك ، لذلك نقول للحكومة يجب الإهتمام بمعيشة المواطن والغذاء والأمن والدواء من ضرويات الحياة ، ونعترف أن الأمن في البلد جيد بحمد الله مقارنة بدول الإضطراب من حولنا أما الغذاء فقد جعل الشعب يعتصم ويقول للحكومة لا للغلاء ، وكما قال أحد زعماء المعارضة إن الرسالة وصلت للحكومة ، وهذا صحيح ويجب على الحكومة ألا تنظر لموضوع الإعتصام ونجاحه الجزئي بعين أنها هي المنتصرة ، لا أدري لماذا لاتفسح الحكومة المجال للمهندسين الزراعيين وتقدم لهم التسهيلات من أجل رفاهية الوطن والمواطن وبلادنا زراعية وأرضنا خصبة ومياهنا عذبة ، والمواطن لايريد غير صحن فول في الصباح والعشية وصينية غداء يوم بي بامية ويوم فاصوليا ويوم سلج ويوم عدس ويوم أم شعيفة ويوم سخينة ... مع العلم أنا بالذات السخينة بتعمل لي ( النحّار ) ، ياحناكيش الواتساب أم شعيفة أسألوا منها خلف الله بلة من خبير وماتصدقوه كان قال ليكم أنا بتاع بيرقر !! بالمناسبة زيادة أسعار الوقود كان ممكن تقبض الحكومة ( هبابة ) لكنها بعد مهرجان التسوق في مدني فتحت بي كرت الكباية !! لذا لزم التنويه .
*** حلب الشهباء ياموطن الأدباء
عندما نشاهد مشاهد الدمار في حلب نحمد الله على نعمة الأمن والإستقرار رغم ضيق ذات اليد ، وحلب الشهباء هي من أقدم مدن العالم عمرها ستة ألف سنة قبل الميلاد وبها آثار نادرة وتضم أرضها قبور بعض الأنبياء مثل سيدنا داؤود وسيدنا زكريا وهي عاصمة سوريا الإقتصادية وبها الصناعات المعدنية والصناعات القطنية وسكانها خمسة مليون نسمة وبعد قصف الروس وأذنابهم هاجرت رؤوس الأموال إلي مدن الساحل خاصة اللاذقية التي يتحكم فيها أبناء الأسد ، وحلب الشهباء هي موطن الأدباء أيام سيف الدولة وأبوالطيب المتنبئ وأبوفراس الحمداني ، ولقد دمرها الروس بالقصف الجوي وحاولت إيران ومن خلفها نظام بشار أن تحدث بعض التغيير الديموغرافي للمدينة ، وعندما بدأ سكانها في الخروج تم إستجلاب عوائل شيعية من الفوعة وكفريا ونبل والزهراء من ضواحي إدلب وحلب ليحل سكان الضواحي محل أصحاب البلد الأصليين ، وكان هناك مشروع إتفاقية لإنهاء الصراع بين الروس والأتراك في كازاخستان ولكن مقتل السفير الروسي أندريه كارلوف بواسطة الشرطي التركي مولود ميراد ( 22 سنة ) في أنقرة ربما عقد المواضيع أكثر وأكثر ، ونسأل الله أن يفرج كرب أهل حلب وكرب المسلمين في كل مكان إنه سميع مجيب .
*** حكيم بن حزام كريم في الجاهلية والإسلام
حكيم بن حزام إسم على مسمى كان حكيماً وكريماً في الجاهلية والإسلام عاش 120 سنة منها 60 في الجاهلية و60 في الإسلام وأسلم يوم فتح مكة وعمته هي السيدة خديجة بنت خويلد رضي الله عنها وكان من سادات قريش وصديق للرسول (صلوات ربي وسلامه عليه ) قبل البعثة ، وقال يارسول الله أرأيت أشياء كنت أتحنث بها في الجاهلية من صدقة وعتق وصلة رحم فهل لي بها أجر !! فأجابه الحبيب المصطفى ( أسلمت على ماسلف من خير ) وكان مسؤول الرفادة في قريش وهي معاونة ما إنقطع من الحجيج ، وفي حصار الشعب كان يرسل الجمل محمل بالغذاء لبني هاشم ومرة حاول أبوجهل منعه فلطم أباجهل على وجهه وأدخل التموين لشعب أبي طالب ، وإسم أبوطالب ( عبدمناف بن عبدالمطلب ) وكان يدافع عن رسول الله صلى الله عليه وسلم رغم حصار الشعب الذي إستمر 3 سنوات ، وعندما حضرت أبوطالب الوفاة طلب منه الحبيب أن يشهد شهادة الحق فقال له أبوجهل والله نعيرك بها أبد الدهر فمات على دين آبائه وقال شعراً جميلاً يطيب به خاطر الحبيب ويعتذر له ويقول *** والله لن يصلوا إليك بجمعهم ...حتى أوسد في التراب دفينا *** ودعوتني وعرفت أنك ناصحي ...ولقد صدقت وكنت ثمّ أمينا
*** ولقد عرضت ديناً قد علمت أنه ... من خير أديان البرية دينا
*** لولا الملامة وحذارى سبة ...لوجدتني سمحاً بذاك مبينا .
والهداية من رب العالمين والرسول مبلغ وأمين ( إنك لاتهدي من أحببت ولكن الله يهدي من يشاء ) وحكيم بن حزام ومعه المطعم بن عدي وزهيربن أمية وأبوالبحتري هم من تزعموا تمزيق صحيفة المقاطعة بعد أن أكلتها الأرضة ولم تترك إلا ( بإسمك اللهم ) ، وعندما باع حكيم دار الندوة ( برلمان قريش الشهير ) عاتبه سيدنا معاوية وقال له ( لقد بعت شرف قريش !! ) فأجابه حكيم... يا أمير المؤمنين لقد علمنا الإسلام أن خير الزاد التقوى !! فتصدقت بها في سبيل الله ، وكانت قيمتها مائة ألف ، وغزا حنين والطائف رضي الله عنه وأرضاه .
*** خاتمة قبل الوداع
مفهمونا التقليدي للزراعة أن يقوم بها من لم يوفق في مواصلة تعليمه أما الأفندي مافي داعي يبهدل هدومه بتراب البحر ، ومن طرائف أهل المتمة أن خالد حسن حسين كان يزرع ومعه خاله ولكن الخال تمرد على عمل الزراعة بحجة أن نظره ضعيف وأصبح مابشوف ، ونحن نطلق على الحاجز الترابي بين أحواض الزراعة إسم ( التقنت ) فكان هذا الخال يترك الموية تعبر التقنت وتغرق الزراعة وحجته في ذلك ضعف النظر ، وعندما جاء خالد في المساء لنادي المتمة وجد خاله لاعب ( كونكان ) ويجلي في الجماعة جلاء صاح !! فصاح في وجهه ...عليك الله يا خال هسه كبير ( الدو والتريس ) ولاّ التقنت ؟ مجرد سؤال . وإلى اللقاء في مفكرة قادمة نترككم في حفظ الله ورعايته .., وكما يقول الحبيب محمد الفاتح ( كتاحة ) أقعدوا عافية .
امسح للحصول على الرابط
بواسطة : محمد عثمان الجعلي
 13  0
التعليقات ( 13 )
الترتيب بـ
الأحدث
الأقدم
الملائم
  • #1
    ابو عمار 12-22-2016 07:0
    مرحب الحبيب الجعلي ومفكرته الرائعة والشهية دوما افقتدناها كثيرا والله .
    والله انا كنت بفتش عن المفكرة الايام الفائتة كل مرة افتح كفر ووتر وما القاها اقرا العناوين بس واقفل طوالي زهجان من الكورة والسياسة.
    والله قفة الملاح دي ما اظن ترجع تاني حتى لو مسكتوها امراء الخليج العربي الشبعانين ديل خليك من ناس الانقاذ الخلوها اقل من (كيس) صغير في احسن الاحوال واصبح الناس يشيلوا القروش في القفة ويجيبو الملاح في الجيب كما يقولون.
    البشيلو قفة ملاح في الايام دي حيكون محل اتهام سياسي كبير واليشيل شيلتو .
    الحمد لله ما جبتني يالجعلي في حزب القفة دة لانو بقا لي قريب من (حزب الراية أي الرايات التابعين نسوانن عشان احيانا قفة الملاح بجي فيها طلح وشاف وحاجات تانية حامياني لما تكون ربة البيت هي الجايباها او يكن الشايلها احد الرايات من الرجال .
    تدهور القفة يذكرني بكيس الملاح بتاع الورق داك والذي يادوب يوصل الملاح للبيت ويتهرد وينهتي مفعوله بفتحه واخراج الملاح هذا ان وصل سالما وربما نصو يكون لاصق في اللحمة .
    واذكر ان عمي عبد الرحمن ود الفكي الشهير بسرعة البديهة والطرفة كان ولده عبد العزيز بقطع النعلات سريع فقال (عبد العزيز ولدي النعلات عندو زي كيس الملاح ما بتم اليوم) .
    واخشى ان يكون الجماعة ديل مودننا لمرحلة نفقد فيها الملاح بعد ما فقدنا القفة !!
    واخشى ان يصبح عما قريب ملاحنا مشتق من الملح وشوية موية فقط وبالمجازفة بصلة.
    اما بخصوص التقنت فاهلي الجباراب بالدامر مشهورين بزراعة البصل والحنا وبقولوا (بصلة التقنت تخلي الحمار يقنت). لانها كبيرة وناجحة شديد رويانة.
    في التنفير من الزراعة عمي بشير قال لود بنته ابو بكر (شدو حيلكم في القراية نحن الزراعة دي خلت اصابعينا زي قرون البقر).
    اما الواسوق فله الفضل في بروز وذيوع الموسوعة الشاعر الاعلامي والمسرحي الفنان السر قدور بعد ان ترك الزراعة وفر لامدرمان حيث المجد الاعلامي والانتشار والاذاعة والتلفزيون والمسرح والشهرة فقد روي ان كان يعمل حبالي يجر حبل الواسوق في القبض (والواسوق عود وحبل ومطرحة يستخدم لتقسيم الارض لحيضان وتقانت) مع احد الترابلة الصعبين والواسوق طبعا حار فزهج السر ذات مرة من جر الحبل طول اليوم ورما الواسوق ارضا ومشا طوالي فناداه التربالي وقال له (تعال خلاص امسك العود بدل الحبل فرد السر قدور (والله لو بقا عود حسن عطية ما امسكو تاني) ومن وقتها فر السر الى ام درمان وكان السر قدور الحالي فكيف اذا ركن للزراعة والواسوق يالجعلي.
    رحم الله عمي سريع البديهة والنساب الشهير بشير ود علي فقد كان يستنكر الاكل الكثير والشهي ومطالبة الشفع بالحلويات وقال ذات مرة عندما طالبه الشفع بالحلاوة قالهن (نحن زمان وكت نبكي بسكتونا بالبصلة يدردقوها لينا نشيلها ونسكت ) .
    وقال ذات مرة (وجباتنا التلاتة كانت بليلة لوبا محشور تحتها عود عشر ناكل ونتمخط من دخانو) .
    وقد روي عن عمتي فاطمة بت علي انها قالت (لما كنا صغار كان بسكتونا بالدرابة (أي قطعة تراب مدردمة) ان بكينا) .
    بعد عودتها من الحج اهدت زينب بت البركة والدة السر قدور لخالها عمي بشير جلابية ووداها للعوض ود حسن خيطها لها ومرة راكبين في العربية عمي بشير ومعه العوض ود حسن ومحمد خير ود النور وكانو عندهم معه هظار فاشار العوض لعمي بشير وقال لمحمد خير (بشير الليلة لابس جلابية بت البركة) فلمسها محمد خير وقال لعمي بشير (والله جلابية بت البركة سمحة خلاص) فزعل عمي بشير وقال له (كلمك العوض ود حسن الحبوبتو كانت تزغرد لي نوار اللوبة) أي انها من الضيق والمعاناة في الأكل كانت تفرح بمقدم اللوبة من نواره .
    وذات مرة اشترى عمي بشير بامية من احد الخضرية بسوق الخضار بالدامر وطلب منه الزيادة فقال له الخضرجي (والله ما ازيدك قرن) فرد عمي بشير (ليك الحق ما تزيدني الشرفة والجوع حقتك جدك كان يشرك لي الرخمة) فقال الخضرجي الفارش الجنبو بخيت ود جاد الله لزميله الخضرجي (اها دي الكايسلها ما كان تزيدو) (وفي الحقيقة مافي زول بشرك للرخمة).
    رحم الله عمنا الراحل محمد علي الشهير بـ (القًق) شقيق العم قدور وكان يعمل تاجرا في القفاف يوديها طرود للخرطوم ومعه ابنه الحاج وطبعا القفاف انواع ام اربعة ام ستة وهكذا وكانا سريعي بديهة وذات مرة وصولو بي قفافهم الخرطوم في لوري زمن نميري بعد فشل انقلاب محمد نور سعد والامن حايم ومراقب الناس وطلع الحاج ينزل القفاف من اللوري وابوه تحت يستلم منو وكان القق يصيح (الحاج نزل اب اربعة ... الحاج نزل اب ستة) ويقصد طرد القفاف اب اربعة او اب ستة فرد عليه ولده الحاج زعلان (يابوي ما تكروك اب اربعة اب ستة ناس الامن ديل حايمين يجوا يمسكونا يقولو الناس جايبين سلاح).
    وهذا قليل من كثير اعادني اليه الحبيب الجعلي بالقرية وشوقنا اليه ورحمة الله على جميع من ذكرت من الاموات .
  • #4
    الامين عبد القادر 12-22-2016 10:0
    التحية والسلام اخوى الجعلى وانت تبحر بنا مع قفة الملاح فى سودان العزة ونتعشم ان ينصلح الحال ويجد المواطن السودانى البسيط مايعينه على قفة الملاح اليومى التى صعبت فى هذا الزمان وطلبت من وزير المالية والزراعة ووالى الخرطوم وهل سوف ينزل هؤلاء من كراسيهم العاجية لينظروا لشعبهم الغلبان والتعبان -- ربنا مع شعبنا وامتنا ونسأل المولى عز وجل ان يولى من يصلح لقيادة امتنا وشعبنا الصابر ---
    وماتزعل يا خلف الله ود عقيدة تعال ادخل مع الجميع ونحن مع الشعب وليس هنا هلال ومريخ وخلى عصبيتك وتناحرك الاجوف -- أم هى عادتكم يا وصيفاب ؟؟؟
    والرجل رشح سيف الدين خواجة واحمد الفكى وفخامة الاسم تكفى ---
    قصة فى الحلق ما يحدث لحلب الشهباء وللشام عامة هذا الدمار وربنا يلطف بهم وويولى من يصلح لقيادة الشعب المقهور ---
    والخاتمة فعلا تحكى عن خفة وطرفة اهلنا فى المتمة والتقنت اصغر من ابوسته يا منعم ابوناصر !!!
    ودمتم للوطن فى حفظ الرحمن ورعايته
  • #5
    الامين عبد القادر 12-22-2016 10:0
    التحية والسلام اخوى الجعلى وانت تبحر بنا مع قفة الملاح فى سودان العزة ونتعشم ان ينصلح الحال ويجد المواطن السودانى البسيط مايعينه على قفة الملاح اليومى التى صعبت فى هذا الزمان وطلبت من وزير المالية والزراعة ووالى الخرطوم وهل سوف ينزل هؤلاء من كراسيهم العاجية لينظروا لشعبهم الغلبان والتعبان -- ربنا مع شعبنا وامتنا ونسأل المولى عز وجل ان يولى من يصلح لقيادة امتنا وشعبنا الصابر ---
    وماتزعل يا خلف الله ود عقيدة تعال ادخل مع الجميع ونحن مع الشعب وليس هنا هلال ومريخ وخلى عصبيتك وتناحرك الاجوف -- أم هى عادتكم يا وصيفاب ؟؟؟
    والرجل رشح سيف الدين خواجة واحمد الفكى وفخامة الاسم تكفى ---
    قصة فى الحلق ما يحدث لحلب الشهباء وللشام عامة هذا الدمار وربنا يلطف بهم وويولى من يصلح لقيادة الشعب المقهور ---
    والخاتمة فعلا تحكى عن خفة وطرفة اهلنا فى المتمة والتقنت اصغر من ابوسته يا منعم ابوناصر !!!
    ودمتم للوطن فى حفظ الرحمن ورعايته
  • #6
    ابوحسن 12-22-2016 09:0
    لك التحية استاذنا محمد عثمان وجزاك الله خيرا علي هذا الكلام الجميل وفيه كثير من المعاني الراسخة من سيدنا رسول الله صل الله عليه وسلم واصحابه القرالميامين الذين حموا الدين رجال صدقوا الله فصدقهم *** لابنوا قصور وحدائبق ومزارع ومسابح ولاجمعوا المال *
  • #7
    منعم ابوناصر 12-22-2016 09:0
    صدقنى انت معلم بس ياريت ناس ودالغقيده يعرفوا ذالك هم يدرون ولكن هاكذا هم دوما لايعترفون بالحقايق حتى وان كانت ظاهره للعيان مثل هذه المفكره التى فيها بعض النقاط اتحدى لو يكون سمع بيها وماحكاية الصفر الدولى التى يتكلمون عنها ويوهمون بها جمهور الوصيف الدائم ابلق دليل على كلامى رقم انهم يدرون ان الهلال اول فريق سودانى اتى بكاس خارجى ولكن هكذا روجو لنفسهم هذه الكذبه وصدقوها هولاء هم (كبير ابوك البشاور غيرك ) وما ابوشيبه منكم ببعيد اليس هو مرجعكم مع تبع الراقصات @@@@@ نرجع لمفكرتنا الحبيبه وكنت اطلعت عليها ليلا وانا اخلد للنوم ووجدتها دسمه وصعب على الشئ الدسم وانا على مشارف النوم ولكن لان الحلو مابكمل فقلت امر مرور خفيف على ان اتى المكتب مبكرا واطلع عليها جيدا لانها فعلا ماده دسمه ومفيده بس كيف يعترف ود العقيده بعدين ياخوى كفايه انو الجعلى شملكم فى حزب القفه كمان عايزين يدخلوكم فى المكتب السيادى طيب دخلناكم سكرتى كويسه معاكم اكتر من كده مانقدر لانكم وصيفاب وتمهيداب@@@@كتير من النقاط المفيده فى المفكره وسوف نضمنها فى مفكراتنا الخاصه ( تحياتى ليك ياجعلى ولى اختيارك الراقى والجميل)
  • #8
    سيف الدين خواجه 12-22-2016 09:0
    يا حبيب بما انك اخصائي بحث فكلمة (التقنت ) عندنا في الشمال وسائر مثلث حمدي واعتقد انها راطنه من ضمن اسماء الساقية مثل الدروة والقادوس والحلقة وام حليقه معربه والاروتي والديو والكديس والاتدي الي اخر القائمه لعموم ثقلفة الحضارة بالشمال فل تصدق جزيرة (مقراد ) كلمة راطنه تعني ضنب الكلب والبحث عندك
  • #9
    سيف الدين خواجه 12-22-2016 08:0
    ا حبيبنا شكرا لك علي الترشيح لحزب قفة الملاح وارفض المنصب فقط اريد منصب وزير التخطيط والاقتصاد مع امانة لود الفكي فعداوتي للمال لا تحدها حدود لكن التخطيط والتدبير مهنتي والارقام ودقتها وصحتها وكمان ازيدك من الشعر بيت (تربية حبوبات ) لانني وحيد لوفاة الوالد وتزوجت الوالدة باكرا وتربيت في بيوت تصدق من حرصي علي عدم الخسارة حتي تزوجت ما كسرت كباية شاي في اي بيت حرصا وليس بخلا لان في بيتنا كانت تعقد المحكمه وسدانة المسجد وسقايته لذلك التخطيط عشقي الابدي وبالمناسبة القفة مقدور عليها اذا توفرت الالياتوشكرا لك
  • #10
    ابو حازم 12-22-2016 08:0
    لك التحية حبيبنا الجعلي وانت تبحر بنا في ربوع بلادنا بين قفة الملاح والتقنت، ولو اهتم المواطن بالتقنت لكفاه هم قفة الملاح.
    من عيوب مزارعي مناطقكم ومناطقنا أنهم لا يزرعون ما تحتويه القفة، ويكتفون بالفول والبصل والعلف فقط.
    التقنت والتقاء واللبقة والانتاية واللرومبو ومكاشنة الارض ووابو عشرين وزراعة ابو سبعين.
    يا سلاااام مصطلحات تعيدنا الى الارض الطيبة وارض المحنة ولكن، السعي وراء توفير قفة ملاح مدنكلة مرقنا من البلد.
    وتحياتي
  • #11
    فيصل الاقرع 12-22-2016 12:0
    سلام جعلينا ماشاء الله مررت بنا علي الدين والاقتصاد والسياسه والادب بعدقفة الملاح وحزبها وحتي ام شعيفه اديتها حقها وحلب لم تنسها واهلها وما يحدث في سوريا وليبيا والعراق وحتي مصر هو مؤسف ولكنه يجعلنا بان سوداننا كانه اليابان التي تهتم بالانسان كما قلت وكلام ناس الاعتصام الذين قالوا ان الرساله وصلت للحكومه دا كلام العاجز واحد يا الجعلي كان من الشيوخ حيرانه غرقت بهم المركب ولما ما قدر اطلع منهم واحد والجماعه عصروا عليه قال الروخ روحت للخالقه والفي الموىه دا وسخ دنيا يقصد الجسد وام شعيفه ياجماعة الواتس هي عليكم امان الله مويه وبصله وويكه زيت مافيها لكن اخير من لحم الزمن دا وبمناسبة التقنت الرئيس البشير ابوه كان ناس كوبر ما مسمينوا خسن تقنت لان كان كل ما جاء زول ماري بزراعته اكورك فيه يازول ما تكسر التقنت وبعدين خالد ودحسن ولد قليل ادب كيف احرج خاله
    بالله يا استاذ ماتحرمنا من المفكرات اصلا الايام مافي كوره مجرد سؤال مين لاعب تمهيدي؟
  • #12
    ودعقيده خلف 12-21-2016 11:0
    استاذ الجعلي لك التحيه دوما في الحقيقه ما عندك موضوع ولا عندك في فهم بريال واحد فهمك انسان حاقد وحسود ومن ضمن الجماعه المرتشيه كما قال ابو كسكسته انت قلت المفكره من احباب الرحيق هللاب ومريخاب لكن للاسف الشديد انحيازك واضح بالنسبه للهلالاب الرئيس والسكرتير والاعلامي والناطق كلهم هللاب كان اقل شي تشرك مريخابي واحد حتي لو كان باقل منصب في قفه الملاح يا حمبرا قباض الطير ( كبير ابوك البشاورو غيرك )
  • #13
    منعم ابوناصر 12-21-2016 10:0
    قبل مانبدأ التعليق خلى اخونا الاقرع يعرف لينا التقنت
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019