* عندما كان (الجرسلين) شيئا مدهشا في حياتنا كنا نأكله بالرغيف ..
* بنحشِي الرغيفة جرسلين وبنضرب في أمان الله ..
* إستهلكنا كثير من (فتايل الجرسلين) في بطوننا قبل أجسامنا ..
* الجرسلين الأكلناهو أكتر من الجرسلين الإتمسحنا بيهو ..
* الكلام ده طبعا لما كانت (المُربى) جميلة مستحيلة ..
* وإحنا وأولاد حلتنا في حاجتين أتنين عرفناهم بعد ما كبرنا ..
* الحاجة الأولى : (المُربى) ، والحاجة التانية : (المريخ) ..
* لا أعرف ما هي العلاقة بين المريخ والمُربى ولكن ما أعرفه أن معسكر المريخ في تركيا يشبه (الرغيفة المحشية جرسلين) ..
* الرغيفة المحشية جرسلين لا بتقدر تقول إنها ما محشية ولا بتقدر تقول إنها محشية ..
* حاليا معسكر المريخ في تركيا لا بتقدر تقول إنو ده معسكر ولا بتقدر تقول ما معسكر ..
* فريق معسكر في تركيا وبيلعب مع فرق من كازخستان ..
* طيب ما كان تمشوا كازخستان بدل تركيا ..
* غايتو جنس غايتو ..
* ختم الإتحاد العام لكرة القدم الموسم المنصرم بكثير من المشاكل التى تتعلق بحقوق الأندية والبث التلفزيوني وغيرها من الأشياء ..
* وسندخل الموسم الجديد بعد أقل من شهر بذات المشاكل التى ختمنا بها الموسم المنصرم ..
* ولذلك إذا أردنا موسم بلا مشاكل يجب تتغير هذه الأسماء التى تقود الكرة السودانية ..
* أسماء إستفادة من الكرة السودانية بينما الكرة لم تستفيد منهم ..
* ناس مجدى وأسامة ديل إستفادوا من الكرة أكتر من ناس بشة ومهند الطاهر وعلاء يوسف ..
* حاجة تكسف ..
* من عيوب معسكر القمة (الهلال والمريخ) أن كلاهما يختار فريق للتباري معه ثم يبرران لهذا الفريق المختار ..
* فريق يكون درجة رابعة يقول ليك الفريق ده درجة أولى ..
* اسوأ ما في الأمر هذا التبرير القبيح ..
* إنتو وكت دايرين فريق درجة أولى مالو ألعبوا المشكلة وين يعني ؟؟
* لكن ما صاح تجيبوا فريق درجة تالتة وتقولوا ده درجة أولى ..
* ما في شئ بجبركم على الكلام ده ..
* في النهاية ده معسكر إعدادي ونحن ما مطالبين نبرر ونخجل إنابة عن الفرق التى نتبارى معه ..
* ما عندنا إستعداد نخجل إنابة عن فريق لعب معنا أو سيلعب معنا وديا ..
* والحركة دي عند ناس المريخ كتيرة ومسيخة ..
* والله صحي ..
* يجيبوا الفريق يلعبوا معاهو ولو فازوا عليه يقول ليك : ده فريق (درجة أولى) ، ولو فاز عليهم يقول ليك : ده فريق بيلعب في (الممتاز) ..
* حاجة بايخة شديد ..
* أمبارح المريخ خسر تجربته الإعدادية ، وح يقول ليك ده فريق بيلعب في الممتاز والتجربة كانت قوية ..
* مع إنو الفوز على المريخ ما داير ليهو خصم قوي أصلا ..
* أى خصم ممكن يفوز على المريخ ..
* عشان كده ما (تكبروا اللفة) ..
* في النهاية إحنا عارفين أى حاجة ..
* عارفين المريخ بيخاف من الخسارة في المباريات الودية ليه ؟؟
* وكمان عارفين الشركة التى نظمت معكسر المريخ بتركيا قد إختارت مجموعة من (العطالة) و(اولاد الحلة) وإتفقت معهم للتباري وديا مع المريخ ..
* عارفين اى حاجة ..
* وعارفين العارف عزو مستريح ..
* المهم ..
* إنضم أمس المدافع العاجي لمعسكر الهلال بالقاهرة ..
* والخطوة تبدو جيدة فهذه فرصة كبيرة يتناغم فيها اللاعب مع أخوانه ويدخل الأجواء قبل أن يوقع في الكشوفات منتصف العام القادم ..
* ووجود العاجي خارج الكشف وداخل الفريق من شأنه أن يكون دافع أكبر للمحترفين المقيدين بالكشف الآن ..
* أى محترف يتواضع سيكون شهر خمسة خارج الكشف وسيدخل محله المدافع العاجي ..
* ولذلك لن يجد شيبولا وأوكرا وتيتيه خيارات أفضل من التألق والمحافظة على المستوى الفني والبدني حفاظا على الخانة ..
* والخانة في الهلال بقت أغلى من (قطعة الأرض في قاردن سيتي) ..
* تلقى خانة في الهلال زي اللقيت ليك قطعة أرض ناصية في كافوري ..
* زحمة النجوم في الهلال أيضا ستضع الجهاز الفني أمام خيارات صعبة جدا ..
* خيارات صعبة في حالة أن يكون الجهاز الفني هو الذى يضع التشكيلة ..
* ولكن الخيارات ستكون سهلة إذا كانت هنالك أيادي تضع التشكيلة من داخل المجلس أو من خارجه ..
* نحن لا نخاف على الهلال إلا من ثلاثة أشياء : (تصريحات الكاردينال ، والناس الحول الكاردينال وكيس المدرب البيشوفو بعد ما الدوري يبدأ) ..
* بمناسبة الكيس ..
* قبل يومين مزمل أبوالقاسم قرب يجيب لينا خبر كيس المدرب أنطوني هاي ..
* مزمل إنتقد (هاي) بشكل يؤكد أن أبو القاسم عندو معلومات عن (كيس هاي) ..
* كلام مزمل ده ما ساي ..
* ده كلام زول شاف الكيس أو سمع من زول شاف الكيس ..
* و(هاي) عمره في المريخ سيكون أقصر من عمر لافاني ..
* مشكلة (هاي) كيسو فاضي وكلامو كتير ..
* بيصرح كتير ..
* وتصريحاتو فيها نوع من أنواع الخرف ..
* زي مثلا قال : (لعبنا مع فريق ضعيف لكن غزارة الأهداف جاءت بسبب التكتيك الذي لعبت به) ..
* صاااااااااااااح ..
* هو عليك الله أنت لو عندك تكتيك بتقعد ستة شهور في المقصورة ؟؟
* ستة شهور قاعد في المقصورة .. (قال بيرصد قال) ؟؟
* كل اللاعبين الرصدهم شطبوهم ..
* أنا عندي إحساس إنو (هاي) ده بعد الدوري يبدأ ح يحضر المباريات في التلفزيون وح يكون فاروق جبرة مدربا للفريق ..
* عندي إحساس كده ..
* وأى زول طبعا حر في (محاسيسو) ..
* مدرب قبل ما يحفظ أسماء اللاعبين قال : (التكتيك هو سبب الأهداف) ..
* تكتيك بـ(الهاء) ؟؟
* هو اللاعب السوداني لو بيحفظ التكتيك في عشرين يوم كان تلقانا كل أربعة سنوات في كأس العالم ..
* نصيحتي ليكم مدربكم ده أمنعوهو من التصريحات ..
* تصريحاتو بتاعت التكتيك دي خليهو يحتفظ بيها لحدي ما يقابل مازيمبي والأهلى المصري والهلال السوداني وبعد داك يورينا التكتيك ..
* تكتيكك ده لما تشوف في مباراة القمة (هجمة) قائدها من النص جابسون ونزار وأمامهما شيبولا وأوكرا وتيتيه والله إلا تجري ..
* خليك مع التكتيك ده يا (هاي) لما تلقى نفسك (باي) ..
* ونركب صافنات ونجيبة (بورتسودانية) وأصلو الزول بيموت والذكرى تفضل حية ..
* و..و..
* ومشهور في (الفريق) لا بيت ولا بيتين ولا لعب القمار . (لكن جرب النط من الطابق الرابع) .