• ×
الجمعة 29 مارس 2024 | 03-28-2024
بابكر سلك

خمسة وعشرين قدام

بابكر سلك

 2  0  2743
بابكر سلك

.
* تم تعيين لجنة تسييرنا الجديده بقيادة الوالي
* تقريبا جميع المريخاب يؤيدون
* لان لجنة علي رأسها الوالي تستحق التأييد
* رجل يدفع وحده ويسجل وحده ويحلحل المشاكل وحده يستحق التبجيل لانه لايمن بما فعل
* وحينما يسأل عما فعل لا يتحدث (بالانا ) ولكنة يتحدث بلسان الجمع ليس تعظيما للمفرد ولكنه تواضع منه ومحاولة كريمة لادخال البقية معه في الاعجاب والتقدير
* فيقول الرجل بحمد الله سجلنا وسلمنا كل لاعب استحقاقه والآن نعمل علي تجهيز تكاليف المعسكر
* طبعا نعمل بتاعت جمال حقيقتها (اعمل ) و قمنا تعني (قمت ) وهكذا
* وهو ادب المريخ الذي يقول في مادته الاولي لامن علي الكيان وبر الزعيم كبر الوالدين واجب وليس تبرعا ينتظر ثوابه المتبرع
* هكذا تعلمنا ونحن صغار عندما كنا (نرتب ) منزل الحاج زروق رحمة الله عليه تحضيرا لاجتماع الحجاج حينما يكون عند زروق
* لذا نجد خصال المريخاب الاوائل في خطاب الوالي عندما يتحدث مجبرا عما قدمه للمريخ
* لذا لا نستغرب ان يتكالب الناس للدخول كأعضاء في مجلس الوالي
* وهروبهم من التكليف اذا كان الوالي ليس بالقائد لتلك المرحلة
* المهم الوالي يفعل ويقول فعلنا ليضاري تقصير الآخرين
* وبالضرا يا اب شرا
* املنا كبير في المجلس الجديد او اللجنة
* وكلما قلت قولة قدام يكون الشغل ماشي تمام
* وسمعنا ان الوالي وحده تحمل في التسجيلات خمسة وعشرين مليار جنيه
*اسي دي ماياها زاتها خمسه وعشرين مليار قدام !!!
* المهم
* البت لما تبقي بنوته حلاته بجيها احساس بالبيت كبير وضرورة وضع بصمتها
* اسلام حاولت ترتب جوطة ابوها وبدت بالاوراق
* لقت ايصال تبرع بمواد بناء لنادي المريخ الحالي
* وقتها كان مشروع مليار لاعمار الدار قد فشل
* ولن نقل غير ذلك
* فقرر الشرفاء ان يكون التبرع عيني
* اسمنت او طوب او رمله او جير
* اي زول يجيب حاجه بدوهوا ايصال بيها
* احتفظت بالايصال لاني لا ارمي متعلقات المريخ
* و اثناء ترتيبات اسلام لاوراقي وجدت صور كبونات تسجيلات لاعبي سلة المريخ وايصالات رسوم التسجيل
* كانوا سبعطاشر لاعب
* اسلام قالت لي ديل شنو يا بابا ???
* بعد شرحت ليها قالت لي وخاتيهم لي شنو ??
* قلت ليها لانو وقتها مجلس المريخ فشل في توفير رسوم تسجيل اللاعبين و الزمن ضايق اتدينتها وسددتها والايصالات مافي زول قدر يقول وينا
* قالت لي لكن ليه تدفعها انت ??
* قلت ليها ده المريخ يا بتي ..وفي المريخ ما ربونا علي قولة قدام
* ابوك يا اسلام مابقول قدام
* بعمل في صمت لان العمل لاجل المريخ متعه
* قالت لي يا بابا انت بتمشي استاد المريخ من متين ??
* قلت ليها من الابتدائي لما كنا بنتشارك حق الجير ونجير سور الاستاد في الحتات البايظه
*و من سكات
* هكذا ربونا في المريخ
* والمثل المريخي بقول البحب المريخ مابحب المناصب
* لكنه يقبل التكليف
* ايها الناس
* انا محظوظ لان مسقط رأسي في ام در كان بالعرضة مقبلين علي الاستاد
* نصحي الصباح نعمر حتي نمشي المدرسة
* اهلنا عافي منهم
* ولدونا في الحته دي لان جدنا الشيخ بابكر بدري حينها كان يسكن هنا وجميع اهله لانه كان يبني في الاحفاد
* اسي الاحفاد القديمة دي اتبنت سنة 52 قبل استاد المريخ
* والشايفنها جديدة دي امتدادات علي ملاعب الكرة (تمر ابونا )
* ونشأة المريخ الامدرمانية ساعدته كثيرا للمضي علي درب القومية
* فالقلعه الحمراء تمثل هنا ام درمان لكل اهل السودان
* وهنا ام درمان تعني اذاعة جمهورية السودان
* كل جمهورية السودان
* مرات بقولوا جمهورية السودان الديمقراطية
* ومرات بقولوا جمهورية السودان بس
* والاتنين لمسمي واحد هو سودان المريخ
* ايها الناس
* نبدأ موسم جاد يؤهلنا للعودة لمنصات التتويج
* ويكون الموسم كذلك بعدم المجامله
* حتي هاي
* لو طلع زول ساي
* يبقي بدري بدري باي باي
* و نجيب المدرب البستحق ان يقود تيم فيهو اربعة اطراف متخصصين
* فوالله لايهزم المريخ الا المريخ
* والمريخ لايهزم المريخ الا اذا شاعت المجامله وسط المريخ
* ايها الناس
* عقد شيبوب سافر ????
* اخاف ان يخطب شيبوب ويعقد ونحنا لسه بنسأل عن عقد شيبوب
* المهم
* جاتنا صور معسكر فريق بياكلوا في بصل
* ياربي ايه الحصل !
* ولكن بصراحة كردنة في تصريحو بتاع التمنين في المية بالغ عديل
* تعادي ليك ناس ياكردنه بجيبوا الحبر بالبرميل و الورق بالباخره والبلد شغل مافيها !!!
*كردنة سخن
* والعربية لما تسخن بوزنوا ليها البلوفة
* حقو الكسكتة لما تسخن توزنوا ليها حروفها
* لانو بالسخانه دي الشعب حايريد
* اصلو الشعب مابريد الا يسخن
* تم اللديتر وبطلها يا كردنة
* عشان ماتصلب
* ايها الناس
* ان تنصروا الله ينصركم
* طب ساكتين لييييه
* انصروووووه
* اها
* نجي لي شمارات والي الخرتوم
* والينا
* البرد داخل لينا
* نتغطي ولا تغطينا
* ولا مامهم وما بتشتغل بينا
* البطانية زاتها بقت مقصره يا والينا
* الناس تغطي ريسينا
* تمرق كرعينا
* تغطي كرعينا
* تمرق ريسينا
* والغريبه لو نام جمبك زول بفرفر يا والينا
سلك كهربا
ننساك كيف والكلب قال حقو الناس براها تجيب بطاطينا
والي لقاء
امسح للحصول على الرابط
بواسطة : بابكر سلك
 2  0
التعليقات ( 2 )
الترتيب بـ
الأحدث
الأقدم
الملائم
  • #1
    Mustafa A. Osman 12-17-2016 12:0
    الوالي فهلا ما بيتفشر لكن أنت سويتها واضحة ايصالك ده لازم تلف و تدور عشان تورينا أنك دفعت للمريخ؟ كم تساوي طوباتك ده مع تبرعات الآخرين؟
  • #2
    ابو الهل 12-17-2016 10:0
    غايتو انت الصحافة دى لابتشبهك ولا انت قدرها شوف ليك ورشه بتاعت صبغ وسمكره بكون احسن ليك لانك تجيد اللتيق واللصيق كلماتك ما كلمات انسان صحفى ى صحافى الغفلة وانت ومن اشباهك المخدراتى مزمز وهالطالب الفاشل هيثم كابو
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019